བཙན་པོ་ཁྲི་སྲོང་ལྡེ་བཙན་གྱི་སྐོར།

བྱ་འཕུར་ལྷུན་གྲུབ་རྒྱ་མཚོ།

ཡབ་ཁྲི་རྗེ་གཙུག་བརྟན་དང་།ཡུམ་རྒྱ་མོ་ཀོང་ཇོ་གཉིས་ཀྱི་སྲས་སུ་ཕྱི་ལོ་༼༧༡༨༽ས་རྟ་ལོར་འཁྲུངས།རྒྱལ་པོ་ཁྲི་སྲོང་ལྡེ་བཙན་ཞེས་པའི་མཚན་ཡང་།ཞང་བོད་སྐད་གཉིས་འདྲེས་མའི་ཚུལ་དུ་བྱུང་བ་སྟེ།དོན་ལ་ལྷ་མཛངས་མཁྱེན་རབ་ཅེས་གྲགས་པར་བཤད།ཆོས་རྒྱལ་འདིའི་ཁྲི་ལོ་ནི་སྤྱི་ལོའི་དུས་རབས་བདུན་པའི་དཀྱིལ་ཏེ།ཞང་བོད་མཐོ་སྒང་གི་ལོ་རྒྱུས་ཀྱི་འཕྲེང་དོག་པོར།ནང་ཁུལ་འཁྲུགས་རྩོད་ཀྱིས་ནམ་མ་ལངས་པའི་ལོ་ཟླའི་ཁོར་ཡུལ་ནང་གི་མི་སྣ་གལ་ཆེན་ཞིག་ཡིན་པས་བན་བོན་གཉིས་ཀའི་ཕྱོགས་ནས་བཤད་སྲོལ་མི་འདྲ་བ་རེ་བྱུང་བར་སྣང་།སྐུ་གཤེན་ཁྱུང་པོ་གྱེར་ཅེན་ཟླ་མེད་དང་།ཞང་ཞུང་གི་བོན་པོ་ར་ལ་ཁྱུང་སོགས་ཀྱིས་མཛད།

བོན་ཕྱོགས་ནས་ཀྱང་རྒྱལ་པོས་ཚེ་སྟོད་དུ་བོན་ཆོས་ལ་རིག་གནས་གསར་རྗེ་གཉིས་པ་སྟེ་ཛ་དྲག་ཆེ་ཤོས་ཤིན་ཏུ་བསྒྱུར་ཏེ།སྔར་ཡབ་མེས་ཀྱི་བོན་སྤངས་ཏེ་ལེའུ་ལྷ་ལོག་གིས་ཁྲི་སྲོང་ལྡེ་བཙན་ནི་བདུད་ཀྱི་རྣམ་སྤྲུལ་ཙམ་དུ་མ་ཟད།བསྒྲལ་བའི་ཞིག་བཅུའི་གྲལ་དུ་བཞག་སྟེ་དམོད་བཅོལ་གྱིས་ཛོ་ཐིས་ཀྱང་འཕངས་མྱོང་ལ།ཕྱིས་ཞང་ཞུང་བོན་སྲིད་རྩ་བརླག་ཏུ་བཏང་བར་འགྱོད་བཤགས་ཕུལ་ཏེ་ཚེ་སྨད་དུ་གནམ་ལ་ཉི་ཟླ་ཟུང་གཅིག་ས་ལ་བོན་ཆོས་ཟུང་གཅིག་ཅེས་ཉམས་སུ་བླངས་ཤིང་།བན་བོན་གཉིས་ཀའི་ཕྱོགས་སུ་བདག་རྐྱེན་གནང་བར་བརྟེན།བོན་གྱི་ལོ་རྒྱུས་འགའ་ཞིག་ཏུ་བདེར་གཤེགས་སྤྲུལ་བ་ཁྲི་སྲོང་ལྡེ་བཙན་ཞེས་པའི་བསྟོད་བསྔགས་ཀྱང་ཕུལ་ཡོད།མདོར་ན་ལོ་རྒྱུས་པ་རང་རང་གིས་ཕྱོགས་བཟུང་སྟེ་ཁྲི་སྲོང་གི་སྐོར་ཞིབ་ཙམ་འཁོད་ཟིན་པ་སྣང་།

བན་ཕྱོགས་ནས་ཁོང་གིས་བོད་དུ་ཤཱཀྱའི་བསྟན་པ་དར་སྤེལ་དང་རྒྱ་བསྐྱེད་གནང་བའི་ཚུལ་སོགས་སངས་རྒྱས་ཀྱི་སྤྲུལ་བར་བརྗོད་དེ་ཆེ་བསྟོད་ཁོ་ན་གནང་བ་ལས།སྐབས་དེའི་བོད་ཀྱི་སྤྱི་ཚོགས་ཁྲོད་དངོས་སུ་བྱུང་བའི་ལོ་རྒྱུས་ཀྱི་ངོ་གདོང་དམར་པོ་ཕྱི་རོལ་དུ་སྟོན་མཁན་ཧ་ཅང་ཉུང་བའི་ཚད་དུ་གྱུར།བོན་གྱི་ལོ་རྒྱས་ཡིག་ཆ་ཁག་ཅིག་ལས་མཐོང་བ་ནི་རྒྱལ་པོ་ཁྲི་སྲོང་དགུང་ན་སོ་དགུར་སྨིན་སྐབས་བོད་དང་ཞང་ཞུང་དབར་འཐབ་རྩོད་དང་དམག་འཁྲུག་བསྟུད་མར་བྱུང་ཞིང་།ཞང་རྒྱལ་ལིག་མིན་རྐྱའི་ཡང་ཆུན་གུ་རུབ་ཟ་སྣང་སྒྲོན་ལེགས་མོ་བྱ་བས་བསླུ་བྲིས་འོག་ཞང་ཞུང་འབུམ་སྡེ་ནི་ཕམ།བོད་སྟོང་སྡེ་ནི་རྒྱལ།ཞེས་སྡོམ་ཚིག་བཀོད་སའི་ལོ་རྒྱུས་ཀྱི་དཀྱོག་མཚམས་ཆེན་པོ་ཞིག་ཏུ་གྱུར་བར་མངོན།དེར་མ་ཟད་ཁྲི་སྲོང་ལྡེ་བཙན་གྱི་སྲས་མོ་ཞང་ཞུང་རྒྱལ་པོའི་བཙུན་མོར་བརྫངས་པ་ཡང་།སྲོང་པོར་བཤད་ན་ཞང་རྒྱལ་ལིག་མིན་རྐྱའི་སྲིད་དབང་ལ་ཆབ་སྲིད་གཡོ་ཇུས་ཀྱི་མཇུག་མ་བསྐྱངས་པར་སོམ་ཉི་བྲལ།གང་ལྟར་དེ་ནས་བཟུང་ཞང་ཞུང་རྒྱལ་པོའི་རྒྱལ་རྒྱུད་རྩ་མེད་དུ་བཏང་བར་གྲགས།

དེ་བཞིན་བོད་དང་ཞང་ཞུང་དབར་མི་མཐུན་པའི་གནས་ཚུལ་སླར་ཡང་བྱུང་རྗེས་རྒྱལ་བློན་གཡུ་སྒྲ་ནེ་ན་དང་འཆིམས་རྡོ་རྗེ་བྲེ་ཆུང་སོགས་གཙོས་བློན་པོ་ཁག་གིས་རྒྱལ་པོར་བོན་འདི་བཀུར་བ་ཡང་ལྕི།བསླབ་ཏུ་ཡང་རྒྱ་ཆེ།བསྒྲུབ་ཏུ་ཡང་གཏིང་ཟབ།ལྷ་སྲུང་ཡང་རུ་འཐུར་བས་བསྣུབ་འཚལ།ཞེས་བོན་གྱི་བྱུང་ཁུངས་ཞང་ཞུང་ཡིན་པའི་རྒྱུ་མཚན་སོགས་ལའང་གནག་པ་སྐྱེས་ཤིང་།ཁྲི་སྲོང་གིས་བོན་བསྣུབས་པའི་ཚུལ་ནི།བོན་ལ་དགའ་བའི་བློན་པོ་འགོས་ཁྲི་བཟང་དང་ངམ་སྟག་ར་ཀླུ་གོང་།མ་ཞང་ཁྲོམ་པ་སྐྱེས་ལས་སོགས་ཀྱིས་བོན་མི་བསྣུབས་པའི་ཞུ་བ་ཕུལ་ཡང་གསན་འཇོག་མ་གནང་བར་རྒྱལ་པོའི་ཞལ་ནས་ཆོས་བྱས་ན་རྒྱ་གར་རྒྱལ་པོས་ལོ་སྟོང་ཐུབ་ཟེར།རང་རེའི་ཚེ་བསྲིང་བ་ལ་ཡང་དགོས།ཤི་ཡང་བོན་བཞིན་དུ་འདུར་མི་དགོས་པར།སྨོན་ལམ་རེ་བཏབ་པས་ལྷར་སྐྱེ་ཟེར།ཞེས་གསལ་བར་མ་ཟད།བོན་ཞེས་པ་བསླབ་ཡང་རྒྱ་ཆེ།བསྒྲུབ་ཡང་གཏིང་ཟབ།ཞེས་པས།ཁྲི་སྲོང་གིས་བོན་ལ་བརྣག་པ་བསྐྱེད་པའི་དུས་རིམ་ནག་པོའི་ནང་།ཆོས་རྒྱལ་ཆེན་པོའི་རྒྱུན་ལྡན་མ་ཡིན་པའི་སྙིང་ནད་ཀྱིས་གདུང་བའི་དུས་སྐབས་ཤིག་ཏུའང་འཁེལ་ཞིང་།བློན་གྱིས་ཞུས་པ་ལྟར་བོན་ཅི་ཙམ་བསྒྲུབ་ཀྱང་གྲུབ་རྟགས་སྣ་གཅིག་ཀྱང་མ་ཐོན་པས་འུ་ཐུག་ཐབས་ཟད་ལྟ་བུའི་ངང་ནས།རྒྱལ་པོས་ཀྱང་ཁྱེད་བོན་རྣམས་ཀྱིས་ངའི་མངའ་རིས་འཕྲོག་པར་འདུས་པས།ཁྱེད་རྣམས་ཆོས་ལ་ཞུགས་ནས་བན་དེ་བྱས་དམ།བོད་རུ་བཞི་ལས་འདས་པར་གཤེགས་སམ།ཆབ་གསོལ་ལམ།གང་བདམ་པ་ཞིག་དོམ་ཞིག་ཟེར་རོ།ཞེས་གསལ་བ་སོགས།མདོར་ན་བོན་གྱི་ཆོས་དེ་ལོག་ཆོས་སུ་གྲུབ་པའི་རྒྱུ་མཚན་མ་ཡིན་པར་བོན་བསྒྲུབ་པར་བྱེད་པ་ལ་དུས་ཡུན་རིང་བའི་ཉམས་ལེན་སོགས་མ་བརྟེན་པར།མཐར་ཐུག་ཟག་མེད་ཀྱི་འབྲས་བུ་ཐོབ་ཏུ་མེད་པ་དང་།བོད་གྱི་རྒྱལ་པོ་ཕྱིའི་རྒྱལ་ཁབ་ནས་དྲངས་པའི་ཆོས་དང་ལོངས་སྤྱོད་གང་ཡང་ཧ་ཅང་ཐུགས་གཙིགས་དང་ཨ་གསར་ཆེ་བས་བོན་ཆོས་བསྣུབས་པར་སྟ་གོན་བྱས་པར་གྱུར།

འོན་ཀྱང་འགའ་ཞིག་གིས།ཁྲི་སྲོང་ལྡེ་བཙན་གྱིས་བོན་བསྣུབས་དགོས་པའི་རྒྱུ་མཚན་ནི།བོན་གྱི་ཆོས་ལུགས་སམ་གྲུབ་མཐའ་དེ་ཉིད།མ་དག་པ་དང་།ལྷ་མཆོད་དང་ཀླུ་མཆོད།གཏོ་ཆོག་ཙམ་ལས་སངས་རྒྱས་བསྒྲུབ་པ་ལ་གཞི་ལམ་འབྲས་གསུམ་སོགས་ས་ལམ་གྱི་རྣམ་གཞག་ཆ་མ་ཚང་བ་དང་།ཐ་ན་བོན་གྱི་གྲུབ་མཐའ་ནི་ནང་པ་སངས་རྒྱས་ཀྱི་བསྟན་པ་མིན་པའི་རྒྱུ་མཚན་སོགས་བཤད་དེ།ཁྲི་སྲོང་ལྡེ་བཙན་གྱིས་བོན་བསྣུབས་དགོས་པའི་རྒྱུ་མཚན་དུ་འདྲེན་པ་དང་།གཞང་ཡང་རྒྱལ་པོ་སྲོང་བཙན་སྒམ་པོས་རྒྱ་གར་ནས།སྟོན་པ་ཤཱཀ་ཐུབ་ཀྱི་ཆོས་གདན་འདྲེན་དགོས་པའི་རྒྱུ་མཚན་ཡང་།བོན་ནང་ཆོས་ཡིན་ན་མི་རྒྱུ་གཉིས་ཀས་དཀའ་བ་སྤྱད་ནས།རྒྱ་གར་གྱི་ནང་ཆོས་བོད་ལ་གདན་འདྲེན་མི་དགོས་པའི་རྒྱུ་མཚན་བཤད་པ་ནི་རྒྱུ་མཚན་རྣམ་དག་ཞིག་གཏན་ནས་མ་ཡིན་ནོ།

དེ་ལ་ཁྱབ་འགྲིག་མགོ་མཚུངས་ཞིག་བཀོད་ན།རྒྱལ་པོ་སྲོང་བཙན་སྒམ་པོས་རྒྱ་མོ་དང་བལ་མོ་རྐོང་མོ་སོགས་མི་རྒྱུ་གཉིས་ཐོག་ནས་དཀའ་སྤྱད་ཀྱིས་ཁབ་ཏུ་བཞེས་པ་དེ་ཡང་།དེ་སྐབས་བོད་ལ་བུ་མོ་མེད་ནས་གདན་འདྲེན་ཞུས་ཏེ་ཁབ་ཏུ་བཞེས་པ་ཡིན་པ་ཐལ།བོད་ལ་ཡོད་ན་གདན་འདྲེན་དགོས་པའི་རྒྱུ་མཚན་མེད་པའི་ཕྱིར།རྟགས་ཁས།ཁྱབ་པ་འགྲིག

ཡང་ཅིག་བཀོད་ན།དཔལ་ལྡན་ས་སྐྱ་བ་དང་མཉམ་མེད་བཀའ་རྒྱུད་པའི་བསྟན་པ་བོན་ཅན།བོད་གངས་ཅན་ལྗོངས་སུ་གསར་དུ་སྤེལ་བ་ལ་དགོས་པ་མེད་པར་ཐལ།སྔ་འགྱུར་རྙིང་མ་བའི་ནང་ཆོས་དེའི་སྔོན་དུ་བོད་ལ་དར་ཟིན་པའི་ཕྱིར།དེ་ལྟར་རིགས་ལམ་གྱིས་བསལ་བ་བབས་ཀྱང་སྔར་གྱི་ཁས་བླངས་མི་འདོར་ཞེས་ཨུ་ཚུགས་མཐར་སྐྱེལ་བྱ་ཚེ།རྒྱུ་མཚན་དང་རིགས་ལམ་བཤད་པའི་སྐོབས་མིན་པས་དེ་ཙམ་གྱིས་འཐུས་པར་བྱོས་ཞེས་སྨྲ་བར་འདོད།

འོལ་གླིང་ནས་འཕྲོས་པའི་དྲུང་མུའི་ཞབས་རྗེས་ནང་དུ་དྲངས།