དང་པོ་མེ་གླང་ལོ་（སྤྱི་ལོ་༡༩༣༩）གས་གཡུང་དྲུང་བློ་ལྡན་དང་རང་ལོ་༢༦འབྲོང་པ་བསྟན་འཛིན་དབང་གྲགས་རང་ལོ༡༦ཟུང་ནི་རབ་འབྱམས་ཁྲི་བཞེངས་གཛད་དེ་ནས་གཡུང་དྲུང་བློ་ལྡན་མཆོག་མཚན་ཉིད་དཔོན་སློབ་བསྐོས་བཞག་གི་མངའ་གསོལ་གནང་བས་མེ་གླང་ལོ་ནས་ས་ཕག་ལོ་ཡན་ལོ་ཉེར་གསུམ་རིང་ཡོངས་འཛིན་ལས་ཐོག་ཡིན་ཞིང་བརྗེ་འཐེན་བྱེད་མྱོང་མེད། དེ་ནས་བཟུང་ས་ཕག་ལོ་དང་ལྕགས་སྦྲུལ་ལོ་སོགས་ལོ་རེ་མོས་སུ་གྲྭ་གཉིས་རེ་དགེ་བཤེས་གསར་བཞེངས་རྒྱུན་འཐུད་མཛད་དེ། སྐྱ་ཕྱུག་གཡུང་དྲུང་དབང་གྲགས། འགོ་པ་ཕུན་ཚོགས་རྒྱལ་མཚན། ཞུ་ཚང་ཀུན་བཟང་ཚེ་གྲགས། འཁོར་ལྡན་ཡེ་ཤེས་རྣམ་རྒྱལ། བེ་རུ་རྟོགས་ལྡན་ཚུལ་ཁྲིམས་དགེ་བ། ཁ་བོ་རྟོགས་ལྡན་ཤེས་རབ་ཕུན་ཚོགས། སྤ་བླ་མ་ཟླ་བ་རྒྱལ་མཚན། སྐྱ་ཕྱུག་བཀྲ་ཤིས་རྣམས་དག། ངུ་འབྲོང་སངས་རྒྱས་དཔལ་ལྡན། ཨར་ཆུང་སྐལ་བཟང་རྣམ་རྒྱལ། སྐལ་བཟང་དབང་གྲགས། གཡུང་དྲུང་འགྱུར་མེད། བསྟན་འཛིན་གཙུག་ཕུད། ཚེ་དབང་ཕུན་ཚོགས་བཅས་ས་སྟག་ལོ་ནས་ ས་ཕག་ལོ་༡༩༥༩ཡན་བླ་གྲྭ་བཅུ་བཞི་དགེ་བཤེས་ཁྲི་བཞེངས་མཛད་པ་རེད། ལྕགས་སྦྲུལ་ལོ་（སྤྱི་ལོ་༡༩༤༡）སྤ་བླ་མ་གཡུང་དྲུང་འབྲུག་གྲགས་ཀྱིས་གསེར ་གདུང་བཀྲ་ཤིས་སྒོ་མང་གི་ཕྱི་སྣོད་ལྷ་ཁང་ཀ་བ་ཉི་ཤུ་རྩ་གཉིས་ཀྱི་ས་མལ་དང་སྒོ་ར་རང་འགྲིག་བཅས་རྨིང་ཐིག་བཏབ་སྟེང་དེའི་བཀོད་དབྱིབས་ནི་དང་པོ་བཀྲ་ཤིས་སྒོ་མང་གི་མཚམས་བཞིར་ཀ་རིང་བཞི་དང་རྒྱ་ཁྱོན་ལ་ཀ་རིང་བཅོ་བརྒྱད་ཡོད། ནང་རྟེན་ལ་གསེར་གདུང་བཀྲ་ཤིས་སྒོ་མང་དང་ཀུན་བཟང་རྒྱལ་བ་རྒྱ་མཚོ་གཉིས་ཀྱི་མཐོ་ཚད་ལ་དང་པོ་གཞུང་འདམ་ལྔ་དང་ （ཀུང་ཁྲི་བརྒྱད་）གཉིས་པ་ལ་གཞུང་འདམ་བཞི་དང་ཕྱེད་（ཀུང་ཁྲི་བདུན་དང་སྐར་༢༠）ཡོད་པའི་གསེར་གདུང་དང་ལྡེབ་རིས་ནི་སྒོ་ཡི་གཡས་ལོགས་སུ་སྤྲུལ་སྐུའི་མཆོད་རྟེན་བརྒྱ་དང་ཉི་ཤུ། གཡོན་ལོགས་ལ་བྱམས་མ་སྟོང་སྐུ་བཅས་བྲིས་ཡོད་པ་དང་ནང་གི་ཤིང་ཚོན་བཅས་མེ་ཁྱི་ལོ་ཡན་ （སྤྱི་ལོ་༡༩༤༦）ཕྱི་ནང་གཉིས་ཀ་བཞེངས་གྲུབ་ཟིན་པ་རེད། ལོ་དེར་ཤར་རྫའི་རྒྱལ་ཚབ་བློ་གྲོས་རྒྱ་མཚོ་འདིར་ཕེབ་པའི་སྐབས་དང་བསྟུན་ཏེ་གྲུབ་དབང་ཤར་རྫ་རིན་པོ་ཆེའི་མཛོད་ཆེན་ལྔ་སོགས་མན་ངག་རྫོགས་པ་ཆེན་པོའི་ཁྲིད་ལུང་དབང་བཞི་རྣམས་མཆེད་ཉན་གྲུབ་མཚམས་སྤ་ཚང་དགོན་དུ་གྲུབ་བརྒྱའི་དཔལ་བརྙེས་ཀུན་མཁྱེན་ཤར་རྫ་བའི་དགོངས་དོན་བཞིན་སྒྲུབ་གྲ་གསར་འཛུག་ （རྟོགས་ལྡན་ཤེས་རབ་ཕུན་ཚོགས་སོགས་བླ་གྲྭ་ལྔ་）བགྱིས་པ་དང་འབྲེལ་ལྷ་ཁང་བཀྲ་ཤིས་སྒོ་མང་གི་ཕྱི་ནང་དང་རྫོགས་ཆེན་སྒྲུབ་གྲ་འཛུག་གཉེར་ཟིན་པ་དེ་གཉིས་ནི་ཕྱིའི་སྣོད་དང་ནང་གི་བཅུད་ལྟ་བུའི་བོན་བསྟན་དར་རྒྱས་འགྲོ་བའི་བརྡ་དང་རྟགས་སུ་ངེས་ཞེས་སོ། ལྕགས་སྟག་ལོ་ （སྤྱི་ལོ་༡༩༥༠）སྔར་སྒྲུབ་ཁང་རྙིང་པ་ཀ་བ་བཞི་ཡོད་པ་དེ་ཉིད་སླར་གསོ་མཛད་ཀ་བ་དྲུག་གི་ས་མལ་ཐོག་ཁང་རང་འགྲིགས་སྐྱར་དུ་བསྐྲུན་ཞིང་ནང་ལྷ་རིས་ནི་ཡི་དམ་གསས་མཁར་མཆོག་ལྔ་དང་བོན་སྐྱོངས་ཕོ་རྒྱུད་མོ་རྒྱུད་བཅས་བྲིས་ཟིན་ཏོ། མཁས་གྲུབ་སྤ་འབྲུག་རིན་པོ་ཆེ་མེ་ཁྱི་ལོ་ནས་སྒྲུབ་གྲྭའི་མཁན་པོའི་ཐུགས་འགན་བཞེས་ཤིང་མཐར་ལྕགས་སྟག་ལོ་སྒྲུབ་གྲྭ་གསར་སྣོན་བླ་གྲྭ་ལྔ་དང་བཅས་སླད་ཕྱིན་གྲུབ་དབང་ཤར་རྫ་བའི་རྫོགས་ཆེན་སྒྲུབ་གྲྭའི་ཁྲིད་ལུང་མན་ངག་སོགས་ཚང་མ་རྟོགས་ལྡན་ཤེས་རབ་ཕུན་ཚོགས་ཀྱིས་གནང་དགོས་ཞེས་བཀའ་ཡིས་གནང་བ་བགྱིས་ཤིང་སྒྲུབ་གྲྭའི་མཁན་པོར་རྗེས་བཞག་གནང་ནས་སྔར་འབྱུང་ལྡན་གཉིས་བརྒྱ་གོ་དགུའི་ནང་ཚན་ཆུ་འབྲུག་ལོ་ （སྤྱི་ལོ་༡༨༩༢）བོད་ཟླ་གསུམ་པའི་ཚེས་བཅུ་ལ་སྐུ་མཚན་དཔེའི་དཀྱིལ་འཁོར་བཞད་པ་ནས་བཟུང་། གཡུང་དྲུང་བོན་གྱི་སྟོན་པ་རྣམ་འདྲེན་བརྒྱད་པ་དམུ་རྒྱལ་སྲས་ཀྱི་བསྟན་པ་སྤྱི་དང་ ཁྱད་པར་རྒྱལ་བ་གཉིས་པ་མཉམ་མེད་ཤེས་རབ་རྒྱལ་མཚན་ཀྱིས་ལུང་རྟོགས་ཀྱི་བསྡུས་པའི་བསྟན་པ་འདི་ཉིད་ཀྱི་རིང་ལུགས་དྲི་མ་མེད་པ་སྐྱོང་ཞིང་སྐུ་ཚེ་གང་གི་རིང་ལ་རྒྱལ་བའི་སྐུ་གསུང་ཐུགས་རྟེན་དང་ལྷ་ཁང་སོགས་གྲངས་མང་བཞེངས་ཤིང་གནས་པར་མ་ཟད་སྙིག་དུས་ཀྱི་རྒུད་པ་སེལ་བའི་སླད་དུ་ཡི་དམ་ཁྲོ་ཕུར་ཞང་གསུམ་དང་བཀའ་གསར་རྙིང་སྒྲུབ་ཆེན་དུས་མཆོད་སོགས་ཉམས་མེད་མཛད་པ་དང་། དྲན་པའི་ཞལ་ལུང་ལས། དེ་རྗེས་སྤ་ཚང་གདུང་ལས་སྤྲུལ་པའི་སྐུ། སྤ་རིགས་སྟོན་པ་འབྲུག་གྲགས་མཚན་འཛིན་པ། ཐུགས་གཏེར་སྙིང་པོ་ཟབ་རྒྱས་བོན་གྱི་སྡེ། ཕྱི་ནང་གསང་བའི་རྒྱུད་དང་གྲུབ་སྐོར་དབང་། ཞེས་གསུང་པ་ལྟར་བཀའ་ལུང་སྡེ་སྣོད་གསུམ་གྱི་དགོངས་དོན་མཚམས་པའི་རིག་གནས་ཀྱི་གཞུང་ཆ་ལག་དང་བཅས་པའི་པོད་དུ་མ་ལྗགས་བརྩོམས་གནང་ཞིང་ཕྱི་རབས་བསྟན་པའི་སྲོལ་འཛིན་རྣམས་ལ་རྗེས་བཞག་ནས་ཁོང་དགུང་གྲངས་དྲུག་བཅུ་ཐམ་པའི་ཐོག་ལྕགས་མོ་ཡོས་ལོའི་（སྤྱི་ལོ་༡༩༥༡）བོད་ཟླ་བརྒྱད་པའི་ཚེས་སུམ་ཅུའི་ཐོ་རེང་ལ་དགོངས་པ་བོན་དབྱིངས་སུ་བསྡུ་བའི་ཚུལ་བསྟན་པའོ། ༧དེ་ནས་བཟུང་བོད་ཟླ་བརྒྱད་པའི་ཚེས་༢༨དང་༢༩གཉིས་འདས་མཆོད་མ་རྒྱུད་དང་བླ་སྒྲུབ་གཉིས་ཚོགས་མཆོད་འབུལ་སྲོལ་ཡོད།༧ དམ་པ་དེ་ཉིད་ཀྱི་དགོངས་རྫོགས་མཆོད་སྤྲིན་འབུལ་བའི་གོ་རིམ་ནི་དགོན་པའི་མཁན་པོའི་འདས་མཆོད་དང་འཐུས་པས་སྤ་གཏེར་ཡེ་ཤེས་གཡུང་དྲུང་གིས་ཐུགས་འགན་བཞེས་ཏེ་སྔར་ཉི་མ་འབུམ་གསལ་གྱི་འདས་མཆོད་འབུལ་ཚུལ་བཞིན་གདུལ་བྱའི་སེམས་ཅན་གྱི་རེ་བ་དོན་ཡོད་དུ་བསྒྲུབ་པར་བགྱིས་སོ། ཆུ་འབྲུག་ལོ་ནས་（སྤྱི་ལོ་༡༩༥༤）ས་ཁྱི་ལོ་ཡི་（སྤྱི་ལོ་༡༩༥༨）བར་སྤ་ཚང་གཏེར་ཆེན་གྱིས་དགོན་པའི་བསྟན་མཆོད་ཀྱི་འགན་ཁུར་མཛད་དེ་སྔར་སྐྲུན་ཟིན་པའི་སྒྲུབ་ཁང་གི་ནང་རྟེན་བོན་སྐྱོང་སྲུམ་མའི་ཕྱི་ནང་གསང་བའི་རྟེན་རྫས་རྣམས་ཚང་པར་བསགས་ཏེ་ཤིང་ཕོ་རྟ་ཡི་ལོའི་བོད་ཟླ་བདུན་པའི་ཚེས་བཟང་པོ་ལ་སྲུང་མའི་སྐུ་གསོབ་དངོས་སུ་བཅིང་པའི་འགོ་འཛུགས་སྟེ་སྒྲུབ་ཁང་གི་ལྷ་ཁྲི་དཀྱིལ་དུ་ཡི་དམ་གསས་མཁར་མཆོག་ལྔའི་སྲུང་འཁོར་དང་ དབལ་གསས་དྲེགས་པ་ཟིལ་གནོན་གྱི་རྟེན་འཁོར་དང་ རྟེན་གཏོར་ རྟེན་རྫས་བཅས་བཀོད་པའི་གཏོར་སྒོམ་དང་། དེའི་གཡས་སུ་རྨ་ཆེན་པོམ་ར་སོགས་བོན་སྐྱོང་ཕོ་རྒྱུད་ཀྱི་སྡེ་དང་། གཡོན་ཕྱོགས་སྲིད་རྒྱལ་དྲིལ་དམར་སོགས་མོ་རྒྱུད་ཀྱི་སྡེ་བཅས་སྐུ་གསོབ་རེ་རེ་བཞིན་སྤ་གཏེར་རད་ཎ་གླིང་པས་ཕྱག་ལེན་རྒྱུད་ཅིང་རྟེན་བཞུགས་བཀའ་གཏད་རྗེས་གནང་མཛད་དེ་བླ་གྲྭ་བཅུ་ཡིས་ཡི་དམ་གསས་མཁར་མཆོག་ལྔ་དང་སྲུང་མ་སོ་སོའི་གཞུང་ཚོགས་བརྒྱ་སྟོང་གང་གྲུབ་བགྱིས་མཐར་སྒྲུབ་ཁང་ལྷ་མཆོད་ལ་རྒྱུན་དུ་སྒྲུབ་མཆོད་བྱེད་སྲོལ་སྔར་ལམ་བཞིན་རྗེས་གནང་མཛད་པའོ། ལོ་དེར་སྤ་ཉི་འབུམ་རིན་པོ་ཆེའི་ཡང་སྲིད་སྤ་སྤྲུལ་བསྟན་པ་རྒྱལ་མཚན་ནི་ཕྱོགས་མེད་བྱ་བྲལ་ཀྱི་རྟུལ་ཞུགས་འཛིན་ཏེ་བོན་རི་དང་དབུས་རི་སྟོད་གནས་གངས་རིན་པོ་ཆེ་སོགས་འཕགས་ཡུལ་གྱི་གནས་ཀུན་ལ་ཕེབས་ཤིང་སླར་ཆུ་སྟག་ལོ་（སྤྱི་ལོ་༡༩༦༢）བོད་ཟླ་༢ཚེས་༣༠ལ་ རྒྱ་གར་ས་གནས་མི་རྟག་ཚུལ་བསྟན་དགོངས་པ་བོན་དབྱིངས་སུ་གཤེགས་སོ། དེ་ནས་སྤ་ཚང་གཏེར་ཆེན་གྱིས་སྤ་གཡུང་དྲུང་འབྲུག་གྲགས་ཀྱི་སྐུ་གདུང་རྟེན། ཤེས་རབ་སྨྲ་བའི་སེང་གེའི་སྐུ་ཟང་གསེར་ལས་བཟོས་པའི་མཐོ་ཚད་གཞུང་འདམ་བཞི་ཡོད་པ་ཞིག་བཞེངས་འགོ་འཛུག་གནང་སྟེ་མེ་སྤྲེལ་ཟླ་ཚེས་བཟང་པོར་ལེགས་པར་གྲུབ་ནས་གསེར་གདུང་བཀྲ་ཤིས་སྒོ་མང་གི་གཡོན་ངོས་ཀྱི་དབུ་རྩེ་ཁང་དུ་ཁྲི་བཀོད་མངའ་དབུལ་མཛད། དེ་བཞིན་གཤེན་ལྷ་འོད་དཀར་དང། རྒྱལ་བ་འདུས་པ་གཉིས་（མཐོ་ཚད་ལ་གཞུང་འདམ་གང་）ནི་བཀྲ་ཤིས་སྒོ་མང་གི་གཡས་གཡོན་ལ་བཀོད་པ་འོ། འདི་ཡན་བསྟན་བཞེངས་རིམ་པར་མཛད་པའི་ཚུལ་བསྟན་པའོ། གཉིས་པ་བསྟན་པ་རྗེས་བཞག་མཛད་པ་ལ་གཉིས་ཏེ། དང་པོ་བླ་རབས་དང་བཞེངས་གྲུབ་ཟིན་པའི་སྐུ་གདུང་གི་ཕྱི་ནང་བྱིན་རྫས་དངོས་རིག་དང་འདུ་ཚོགས་དུས་མཆོད་ཀྱི་གོ་རིམ་སྒྲིག་གཞི་དང་རྒྱུན་སྤྱོད་མཆོད་ཆས་ཀྱི་རིགས་སོགས་ལ། དང་པོ་སྤ་དགོན་གདན་རབས་རིམ་བྱུང་གི་མཁན་པོ་འམ་དབུ་བླ་ནི། གཡུང་དྲུང་ནམ་བཟང་། ནམ་མཁའ་སྒྲོན་གསལ། ཉི་མ་འབུམ་གསལ། གཡུང་དྲུང་འབྲུག་གྲགས། བསྟན་པ་རྒྱལ་མཚན། ཟླ་བ་རྒྱལ་མཚན། བསྟན་པ་འབྲུག་གྲགས། བསྟན་པའི་ཉི་མ་བར་དུའོ་ གོང་གི་བླ་རབས་ལྔ་དང་སྤ་ཡི་གཏེར་ཆེན་ཡེ་ཤེས་གཡུང་དྲུང་རྣམས་ཀྱིས་བཞེངས་པའི་སྐུ་གཟུགས་དང་སྐུ་གདུང་དེ་རྣམས་ལ་དང་པོ་ནང་བརྟེན་གཟུངས་བཞུགས་ནི་རྗེ་སྨན་རི་བའི་མཁན་ཆེན་མཁས་གྲུབ་ཉི་མ་བསྟན་འཛིན་གྱི་གཟུངས་རྫོགས་རྒྱས་པའི་ཕྱག་ལེན་ཇི་ལྟ་བ་བཞིན་དང་（འོག་མ་ཀུན་ལ་འགྲེས་）བྱིན་རྫས་ཁྱད་འཕགས་ཏེ། དང་པོ་ཏོག་ལ་སངས་རྒྱས་ཀྱི་སྐུ་བལ་རིང་བསྲེལ་༡དང་འཕེལ་གདུང་༢དེ་བཞིན་གཤེན་དང་ གྲུ་ ཞུ་ སྤ་ རྨེའུ་ ཁྱུང་བཅས་གདུང་ཤ་རི་རམ་སོགས་རིང་བསྲེལ་དང་གལ་ཆེའི་བྱིན་རྫས་རྣམས་ནི་འདི་ལྟར་ཏེ་དང་པོ་འདུ་ཁང་ཆུང་བ་དང་། འདུ་ཁང་འབྲིང་བའི་སྦུག་མཇལ་ཁང་གཉིས་ཀྱི་ནང་དུ། སྟོན་པ་གཉིས། མཆོད་རྟེན་གཉིས། རྣམ་རྒྱལ། བྱམས་མ་བཅས་ཀྱི་ནང་རྟེན་ལ་སྟོན་པའི་འཕེལ་གདུང་སྤ་གཡུང་དྲུང་རྒྱལ་པོའི་རིང་བསྲེལ། དེ་དང་འབྲེལ་བའི་གཏེར་སྟོན་བརྒྱ་རྩ་དང་གཤེན་དང་གྲུ་ཞུ་སྤ་རྨེའུ་ཁྱུང་དང་ཞིག་པོ་བཅོ་བརྒྱད་སོགས་ཀྱི་སྒྲུབ་རྟེན་བྱིན་རྫས་ཀྱི་སྡེ་རྣམས་ནི། འཆི་མེད་ཡུམ་སྲས་གཤེན་གསུམ་ཀྱི་དམ་རྫས་སོགས་བྱིན་རྫས་སྣ་༡༢དང་སྦུག་མཇལ་ནང་གི་རྣམ་རྒྱལ་སྐུ་གཟུགས་ཀྱི་བང་མཛོད་ནང་དུ་འབྲུག་གི་སྦར་རྡོ་ཞེས་པ་རྡོ་སྨུག་བསེ་མུ་ཏིགི་འབྲུམ་བུ་ཡོད་པ་རྡོ་གཞན་ལས་ལྗི་ཚད་ཆེ་བ་དེ་ཉིད་ནི་འདོད་འབྱུང་གི་ནོར་སྣ་རྩ་ཆེན་ཞིག་ཏུ་རྩི་གི་ཡོད། ཡང་སྨན་སྐུ་ཁང་གི་ནང་རྟེན་གཙོ་བཞི་དང་སྨན་ལྷ་མཆེད་བརྒྱད་བཅས་གཟུངས་བཞུགས་དང་བྱིན་རྫས་ནི་གོང་འཁོད་ལྟར་ཡིན་ལ་ལོགས་སུ་མེད། ཡང་སྐུ་གདུང་ཁང་དང་གསས་མཁར་མཆོག་ལྔའི་ལྷ་ཁང་ནང་གི གཤེན་ལྷ་འོད་དཀར། མཉམ་མེད་འདྲ་སྐུ་ཉི་འབུམ་འདྲ་སྐུ། དབལ་གཤེན་སྟག་ལྷའི་སྐུ། ཁྲོ་བོ་གཙོ་མཆོག་ཕུར་པ་འབྲུག་གསས་གཏེར་སྲས་ཚེ་དབང་འགྱུར་མེད་ཀྱི་སྐུ་གདུང་། ཡང་སྐུ་གདུང་ཆ་བརྒྱད། སྐུ་གདུང་ཁང་གི་སྐུ་གདུང་རྣམས་གསུམ་བཅས་（ནམ་མཁའ་སྒྲོན་གསལ་ཉི་མ་འབུམ་གསས་ནམ་མཁའ་གཡུང་དྲུང་གསུམ་གྱི་སྐུ་གདུང་）ཀྱི་ནང་གི་བྱིན་རྫས་ནི་རྨེའུ་གཏེར་ཆེན་ཨོ་རྒྱན་བདེ་ཆེན་གླིང་པས་དབུས་ཕུག་གསང་བ་ཡང་རྫོངས་ནས་སྤྱན་དྲང་བའི་དེ་བཞིན་གཤེགས་པའི་སྐུ་བལ་རིང་སྲིལ་དང་གསང་སྔགས་གླིང་པའི་གཏེར་བྱོན་སངས་རྒྱས་འཕེལ་གདུང་དབུས་ཕུག་གཏེར་བྱོན་བྲམ་ཟེ་གསལ་ཁྱབ་འོད་ལྡན་གྱི་རིང་བསྲེལ་སོགས་བྱིན་རྫས་སྣ་དགུ་བཅུ་གོ་གསུམ་དང་སྟོད་མངའ་རིས་ཁྱུང་ལུང་གངས་དཀར་རྨད་རྒྱ་ནག་གླང་ཆེན་འགྱིང་རི་རི་བོ་རྩེ་ལྔ་སོགས་ས་རྡོ་ཆུ་ཤིང་སྣ་ཚོགས་འཚོགས་ཚད་ཕུལ་ཡོད་ཅེས་སོ། དེ་འོག་གཙུག་ལག་ཁང་ཆེན་དང་། བཀྲ་ཤིས་སྒོ་མང་གཉིས་ཀྱི་ནང་གི་ གསེར་གདུང་བདུད་འདུལ་སྒྲ་སྒྲོགས། རྣམ་པར་རྒྱལ་བ་སྟོན་པ་ལོངས་སྤྱོད་རྫོགས་སྐུ། གསེར་གདུང་བཀྲ་ཤིས་སྒོ་མང་། ཀུན་བཟང་རྒྱལ་བ་རྒྱ་མཚོ། ཤེས་རབ་སྨྲ་བའི་སེང་གེ གཤེན་ལྷ་འོད་དཀར། རྒྱལ་བ་འདུས་པ་བཅས་རྟེན་མཆོག་དེ་རྣམས་ཀྱི་ནང་གི་གཟུངས་རྫོགས་དང་བྱིན་རྫས་ནི་གོང་འཁོད་ལྟར་ཡིན་ལ་དེའི་ཁར་ཏོགས་ལ་རད་ཎ་གླིང་པའི་གཏེར་བྱོན་གཤེན་རབ་བགྲང་ཕྲེང་དུམ་ཚལ་དང་༡སངས་རྒྱས་འཕེལ་དུང་དང་༢ཉི་འབུམ་རིང་སིལ་དང་།༣ སྨྲ་སེང་། རྒྱལ་འདུས། གཤེན་ལྷ་འོད་དཀར་དང་གསུམ་ལ་སྤ་འབྲུག་རིན་པོ་ཆེའི་རིང་བསྲིལ་དང་༤ བྱིན་རྫས་གཞན་གྱི་ཁར་སྤ་གཏེར་རད་ཎ་གླིང་པས་དབུས་ཕུག་གསང་བ་ཡང་རྫོངས་ གྱིམ་ཤོད་ཤེ་ལེ་རྒྱ་གར། སྤུ་རྒྱལ་ཚེ་ལུང་དཔལ་འབར། དབལ་བོན་རུ་ལག་ཤེ་རིང་ཕྱུགས་མོ། ཡར་ལུང་ཤེལ་གྱི་བྲག་སོགས་ནས་གཏེར་དུ་དྲང་བའི་དམ་རྫས་བྱིན་རྟེན་དང་བཅས་སྐུ་གདུང་སྐུ་གཟུགས་རྟེན་གོང་འོག་རྣམས་ཀྱི་ནང་རྟེན་བྱིན་རྫས་ཀྱི་གྲངས་བརྒྱ་དང་ཉི་ཤུ་རྩ་བརྒྱད་དམ་བཀྲ་ཤིས་ཉི་མའི་གྲངས་སུ་ངེས་པ་ནི་རགས་བཤད་ཙམ་མོ།
