གཞན་ཡང་གཙུག་ལག་ཁང་གི་སྐལ་བཟང་སྟོང་སྐུ། མཆོད་རྟེན་བརྒྱ་དང་དྲུག་ཅུ་སོགས་ཀྱི་ནང་རྟེན་ལ་གོང་གི་གྲུ་ཞུ་སྤ་རྨེའུ་སོགས་ཀྱི་སྒྲུབ་སྨན་དང་གནས་བྱིན་ཅན་གྱི་གཏེར་གནས་ནས་ཐོན་པའི་ས་སྣ་རྩི་ཤིང་མེ་ཏོག་རིགས་དང་སྤ་གསལ་བ་རྣམ་གཉིས་ཀྱི་གདུང་ཐལ་རིལ་བུ་བཅས་ཕུལ་ཡོད། རྟེན་དེ་རྣམས་ཀྱི་ཕྱི་ཡི་འཕྲ་རྒྱན་གལ་ཆེའི་རིགས་ནི་དང་པོ་འདུ་ཁང་ཆུང་འབྲིང་དང་སྦུག་མཇལ་ཁང་གི་སྐུ་གདུང་སྐུ་གཟུགས་ཀྱི་འཕྲ་རྒྱན་ལ། དུང་ཆུང་གཡས་འཁྱིལ་དང་། གཟི། བྱུ་རུ། གཡུ། མུ་མན། སྦུ་ལེན། ཤེལ་རིགས་སོགས་རིན་པོ་ཆེན་རྡོ་ཁམས་རིགས་དེ་རྣམས་ལྷ་ཡི་རིགས་ལྔ་དང་མགུལ་རྒྱན་ཁྲི་ཡི་གདོང་རྒྱན་བང་མཛོད་དང་སྐུ་གདུང་གི་བྲེ་བུམ་གདོན་རྒྱན་བང་མཛོད་སོགས་ལ་འཕྲ་རྒྱན་རྣམས་ཆད་མེད་མཛེས་ལེགས་སུ་བཏབ་པའོ། དེ་འོག་སྐུ་གདུང་མཆོད་རྟེན་རྣམས་ཀྱི་འཕྲ་རྒྱན་ལ་གཟི་ཆུ་མིག་ལྔ་པ་དང་གསུམ་པ་གཉིས་པ་སྟག་ལོག་སོགས་བཞི་བཅུའི་༼སྔོན་མའི་རྩིས་སྤྲོད་ཐོ་དེབ་བཞིན་༽སྐོར་དང་དེ་བཞིན། གཡུ། བྱུ་རུ། སྤོས་ཤེལ། པད་རག། འབྱུང་ལྔའི་ཕ་ལམ་གྱི་རིགས། ཕྲ་མན། མཆོང་དཀར་སྨུག་དམར་སོགས་བུམ་ལྷའི་རྒྱབ་ཡོལ་ལ་ཕྲེང་ཞགས་ཕྱི་ནང་གཉིས་རེ་དང་ལྷའི་རིགས་ལྔ་རྙན་རྒྱབ་མགུལ་རྒྱན་ཕྱག་ཞབས་གདུ་བུ་གདོང་རྒྱན་བང་མཛོད་རྣམས་ལ་གཡུ་བྱུར་གཡང་ཊི་མ་ན་ཧུང་སོགས་རིན་ཆེན་རིགས་ཀྱི་ཕྲ་ཚོམ་གྲངས་མང་གཏམ་པའོ། ཁྱད་པར་བྱུ་རུའི་ཐང་ཤིང་ངམ་སྲིན་མོའི་ལག་གཡས་ཞེས་པ་ཡལ་ག་ལྔ་ལྡན་དང་། དམར་རྩའི་དྲེད་གཡུ་ཞེས་པ་གཡུ་རྙིང་ལྗང་ནག་གླང་ཆེན་མཆེ་བའི་དབྱིབས་ཅན་སྲིད་ལ་མཛུབ་གང་དང་ཞིང་ལ་ཚོན་གང་ཡོད་པ་དེ་ཉིད་ས་བདག་གི་སྙིང་ནོར་ཞིག་ལ་རྩི་གི་ཡོད། དེ་གཉིས་ནི་གཡུང་དྲུང་བཀོད་ལེགས་ཀྱི་བང་མཛོད་དང་ གདོང་རྒྱན་ལ་ཕྲ་བཏབ་ཡོད། དེ་འོག་གཙུག་ལག་ཁང་དང་ལྷ་ཁང་བཀྲ་ཤིས་སྒོ་མང་ཟུང་གི་སྐུ་གདུང་སྐུ་གཟུགས་ཀྱི་འཕྲ་རྒྱན་ནི་ དང་པོ་བདུད་འདུལ་སྒྲ་སྒྲོགས་གི་བུམ་ལྷའི་ཐུགས་ཁར་རདཎ་གླིང་པའི་གཏེར་བྱིན་གཤེན་རབ་བགྲང་ཕྲེང་སྡོག་༡༣དང་། གནམ་སྲས་གཟི་དམར་སོགས་གཟི་བྱུར་སྤེལ་མའི་ཕྲེང་ཞགས་དང་། བུམ་ལྷའི་རིགས་ལྔ་དང་། སྙན་རྒྱན། མགུལ་རྒྱན་རྣམས་ལ་ ཨར་རྒྱ་པུག་གཟི་རིལ་གཡུ་བྱུར་མུ་ཏིག་གི་ཕྲ་རྒྱན་དང་། བུམ་བྲེ་གདོང་ཆེན་བང་མཛོད་རླུང་དཀྱིལ་བཅས་ཀྱི་འཕྲ་རྒྱན་ལ་ གཡུ་དང་བྱུར་ཆེན། ཨཎྟ་ནི་ལ་ མ་ན་ཧོ་ མུ་མན་ བྱུར་དཀར་ སྤོས་ཤེལ་ པད་རག་ མཆོང་རིགས་སོགས་དང་ དེ་བཞིན་གཤེན་རབ་རྣམ་པར་རྒྱལ་བ་སྟོན་པ་ལོངས་སྤྱོད་རྫོགས་སྐུ་གཉིས་ཀྱི་མགུལ་རྒྱན་རིགས་ལྔ་ཁྲི་ཡི་གདོང་རྒྱན་བང་མཛོད་ས་འཛིན་བཅས་ལ་ཕྲ་རྒྱན་གོང་བཞིན་གཅིག་མཚུངས་ཡིན་པ་མ་ཟད་རཌྣ་གླིང་པའི་གཏེར་བྱོན་ནོར་སྣ་བཅུ་གསུམ་གྱི་གྲལ་དུ་གཏོགས་པའི་བདུད་འདུལ་སྒྲ་སྒྲོག་གི་བང་མཛོད་ཀྱི་དཀྱིལ་དུ་མུ་ཏིག་ལས་གྲུབ་པའི་ཀླུ་ནོར་དུང་གཟུགས་གཡས་འཁྱིལ་དང་། རྣམ་པར་རྒྱལ་བའི་དོ་ཤལ་གྱི་དཀྱིལ་དུ་ནོར་བུ་དགའ་བ་གཡས་འཁྱིལ། སྟོན་པ་ལོངས་སྤྱོད་རྫོགས་སྐུའི་མགུལ་རྒྱན་བར་མའི་དཀྱིལ་དུ་རྡོ་རྗེ་ཕ་ལམ་མཛུག་གང་བ་བཅས་རྩ་ཆེའི་ནོར་སྣ་དེ་རྣམས་ནི་གཙུག་ལག་ཁང་གི་སྐུ་གདུང་གི་ཕྲ་རྒྱན་ནོ། ༧ གསེར་གདུང་བཀྲ་ཤིས་སྒོ་མང་ཞེས་པ་རི་བོའི་གཏོས་དང་མཚུངས་པའི་བདེ་བར་གཤེགས་པའི་གཞལ་ཡས་ཁང་གི་བཀོད་དབྱིབ་ལྟ་བུ་སྣང་ཞིང་ནམ་མཁའ་སོགས་འབྱུང་ལྔའི་ཕྲི་འཕང་དང་（རླུང་དཀྱིལ་ལ་ཆ་ཆེན་༣༢ཡོད་）དེའི་སྟེང་དུ་གཞལ་ཡས་ཁང་གི་ཕྱོགས་རེར་སྒོ་འམ་གསས་ཁང་བཅུ་དྲུག་རེ་ཕྱོགས་བཞི་བསྡོམས་པ་དྲུག་ཅུ་རེ་བཞིའི་ནང་དུ་ཁྲོ་བོ་དབང་ཆེན་གྱི་ལྷ་འཁོར་དང་སྒོ་སྟེང་ཁ་བད་དར་ཁད་སོགས་སུམ་གཉིས་སུམ་གཉིས་ཕྱིར་འཕར་བའི་གོང་མ་ཙི་པིར་གྱི་ཁ་ནས་རིན་ཆེན་གཡུ་བྱུར་མུ་མན་མུ་ཏིག་སོགས་ཀྱི་ཕྲེང་ཞགས་ཀྱི་ཟར་ཚགས་ཕྱོགས་བཞིར་འཁོར་ཞིང་གསེར་དངུལ་གྱི་གཡེར་ཁ་དང་དྲེལ་ཆུང་རིན་ཆེན་འཕྱང་འཕྲུལ་སོགས་གྱིས་རྒྱན་པའོ། །དེའི་སྟེང་སྒོ་བབས་དང་བསྟུན་པའི་སྒོ་རྒྱན་མཆོད་རྟེན་དྲུག་ཅུ་རེ་བཞི་ཡོད། དེའི་སྟེང་ཕོ་བྲང་ལ་གཞལ་ཡས་ཀྱི་གསས་ཁང་ངམ་ཕྱོགས་རེར་སྒོ་བརྒྱད་རེ་བསྡོམ་སུམ་ཅུ་སོ་གཉིས་ལ་རྣམ་དག་ཡེ་ཤེས་ཀྱི་ཡུམ་ཅུ་སོ་གཉིས་ལྷར་བཀོད་པ་དང་སྒོ་ལ་རིགས་རྟགས་ཀྱི་དྲྭ་མིག་སྟག་གཡག་འབྲུག་ཁྱུང་གི་ཡ་གད་དང་བྱ་འདབ་ལ་ནོར་བུའི་གདོང་འབུར་སྒོ་རྒྱན་ལ་མཆོད་རྟེན་༣༢དང་དེའི་སྟེང་རྟ་བབས་ཁྲི་འཕང་བཅུ་གསུམ་དང་མགུལ་ཆུ་ཡན་ལ་མཆོད་རྟེན་སྤྱིར་མཚུངས་ཀྱང་བུམ་པའི་ཕྱོགས་རེར་སྒོ་གསུམ་རེ་བརྩིས་པའི་གསས་ཁང་རྒྱ་ཕེབ་གཉིས་ལྡན་ཡོད་པ་༡༢དང་བུམ་ལྷ་ནི་ཀུན་བཟང་རྒྱལ་བ་འདུས་པའི་སྐུ་དང་གསས་ཁང་ནང་དུ་ཡེ་ཤེས་བཅུ་གསུམ་གྱི་ལྷ་བཀོད་པའོ། །དེའི་བུམ་ལྷའི་རྒྱབ་ཡོལ་དང་རིགས་ལྔ་མགུལ་རྒྱན་བུམ་བྲེ་ གདོང་རྒྱན་ ས་འཛིན་བཅས་ལ་ འཕྲ་རྒྱན་ནི་གཡུ་བྱུར་ མུ་མེན་ དུང་ཤེལ་ སྦུར་ལེན་ ཛུས་ གཡང་ཊི་སོགས་སྔར་བཞིན་དང་། གསེར་གདུང་དེའི་གཡས་གཡོན་དུ་ཀུན་བཟང་རྒྱལ་བ་རྒྱ་མཚོ། ཤེས་བར་སྨྲ་བའི་སེང་གེ་གཉིས་ཀྱི་རིགས་ལྔ་མགུལ་རྒྱན་སོགས་གོང་གི་སྐུ་གདུང་རྣམས་དང་གཅིག་མཚུངས་ཡིན་པའི་ཁར་གཏེར་གྱི་ནོར་སྣ་བཅུ་གསུམ་གྲལ་ཀོང་ཟ་ཁྲི་ལྕམ་གྱི་གཙུག་གཡུ་ཞེས་པ་གཡུ་སྤྱང་མིག་མེད་ནོར་དབྱིབས་ཅན་གཐེ་བོང་ཙམ་ཡོད་པ་དེ་སྨྲ་་སེང་གི་རིགས་ལྔའི་གཙུག་དཀྱིལ་དང་། གཏེར་གཟི་ཆུ་མིག་དགུ་པ་ནི་མགུལ་རྒྱན་གྱི་དཀྱིལ་དུ་ཕྲ་རྒྱན་བཏབ་པ་དང་། ལྷ་ཁང་དེའི་གསེར་གདུང་གི་གཡས་གཡོན་དུ་གསེར་ཐང་ཆེ་བ་རེ་དང་ནང་གི་ཤར་ནུབ་ཀྱི་དྲ་མིག་གི་སྟེང་དུ་ཕྱི་རྒྱུད་ཆོ་ག་བཅུ་གཉིས་སོགས་ཀྱི་གསེར་ཐང་འཁོར་གཤམ་བྱས་པ་ཡོད། སྒྲུབ་ཁང་ཐོག་གི་བོན་སྐྱོངས་སྲུང་མའི་སྐུ་གསོབ་དང་སྤྱན་གཟིགས་གོ་ཆ་སོགས་སྐུ་བརྙན་གྱི་སྡེ་སྐོར་རྗེས་བཞག་གནང་བ་དེ་ལྟར་རོ། །གོང་གི་ལྷ་ཁང་ཆེ་ཆུང་དགུ་ཡི་ནང་མཆོད་མེ་རྒྱུན་འབར་གྲངས་༡༢ཡོད། གཉིས་པ་གསུང་རབ་སྐོར་སྤ་ཉི་མ་འབུམ་གསལ་གྱི་བཞེངས་པའི་བཀའ་འགྱུར་དང་བརྟེན་འགྱུར་རྣམས་ནི་དང་པོ་མདོ་སྡེ་པོད་༥༥ འབུམ་སྡེ་པོད་༧༧ སྔགས་སྡེ་པོད༢༡ སེམས་སྡེ་པོད་༣ བསྡོམས་པོད་༡༥༦ བརྟེན་འགྱུར་ལ་སྤང་ལམ་མདོའི་སྡེ་ལ་གཏོགས་པའི་པོད་༣༤ བསྒྱུར་ལམ་སྔགས་ཀྱི་མདོ་ལ་གཏོགས་པའི་པོད་༡༧༡ གྲོལ་ལམ་སེམས་ཀྱི་མདོ་ལ་གཏོགས་པའི་པོད་༣༠ ཞར་བྱུང་བཀའ་གཏེར་ཚད་མར་གྲུབ་པའི་གསར་བོན་བསྐོར་པོད་༤༠ རིགས་གནས་པོད་༨བཀྲ་ཤིས་སྨོན་ལམ་སྒྲིག་རིམ་རྣམས་པོད་༡བཅས་པོད་༢༨༤དང་། བཀའ་བརྟེན་ཕྱོགས་བསྡུས་ཀྱི་པོད་གྲངས་༤༤༠དང་། བདེ་ཆེན་གླིང་པས་མཛད་པའི་བཀའ་འགྱུར་གྱི་དཀར་ཆགས་སྲིད་པའི་སྒྲོན་མེ་དང་གཡུང་དྲུང་འབྲུག་གྲགས་ཀྱིས་མཛད་པའི་བཀའ་རྟེན་གྱི་རྩིས་བརྒྱ་རྟ་བདུན་དབང་པོ་གཉིས་ལ་པོད་༡བཅས་འདུ་ཁང་འབྲིང་པའི་སྦུག་མཇལ་ཁང་གི་ལྷོ་བྱང་གཉིས་ཀྱི་བཀའ་རྟེན་གཤམ་ཡུལ་གྱི་དྲྭ་མིག་ཏུ་བཞུགས་སོ། །ཤེར་ཕྱིན་མཐའ་དཔྱོད། སྡུད་གྲ་རིགས་ལམ་ཆེ་ཆུང་གི་རྣམ་བཞག་ཚད་མ་རྣམ་འབྱེད་ ས་ལམ་འཕྲུལ་སྒྲོན འདུལ་བ་མདོར་བསྡུས་བཅས་ཀྱི་པར་ཤིང་ནི་འདུ་ཁང་ཐོག་འཁོར་གྱི་གཡས་གཡོན་དུ་བཞུགས་སོ། །དེ་འོག་སྤ་གཡུང་དྲུང་འབྲུག་གྲགས་ཀྱིས་བཞེངས་པའི་བཀའ་འགྱུར་པོད་བརྒྱ་དང་ལྔ་བཅུ་ང་དྲུག་ཡོད་པར་མ་ཟད་དེའི་སྟེང་སྤ་ཚང་གཏེར་ཆེན་གྱིས་བསམ་ཡས་ཅ་ཏི་དམར་པོ་ནས་གཏེར་དུ་དྲང་བའི་བྱམས་མ་འབུམས་ལྔའི་ཤོག་སེར་ལས་ཕབ་པའི་ཡེ་ཤེས་བཀོད་པ་དོན་གྱི་འབུམ་ལ་པོད་༦༠ རྣམ་དག་འདུལ་བ་ཁྲིམས་ཀྱི་འབུམ་ལ་པོད་༨བཅས་གོང་གི་འབུམ་སྡེ་པོད་༧༧དང་བསྡོམས་པས་འབུམ་སྡེ་ལ་པོད་༡༤༥ དང་མདོ་སྔགས་སེམས་སྡེ་བཅས་ཁྱོན་བསྡོམས་བཀའ་འགྱུར་པོད་༢༢༤ཡོད་པ་དེ་ལྷ་ཁང་བཀྲ་ཤིས་སྒོ་མང་གི་ཤར་ནུབ་ཀྱི་དྲྭ་མིག་ལ་བཀོད་པར་བྱའོ། །གཡུང་དྲུང་སེམས་དཔའ་ལམ་གྱི་འབུམ་དང་། དགེ་རྒྱས་ཚོགས་ཆེན་རྫོགས་པའི་འབུམ་གཉིས་ནི་ཤོག་སེར་ལ་ཕབས་ཟིན་ཀྱང་པོ་ཏི་འབྲི་རྒྱུ་དངོས་སུ་བྱུང་མེད། ཁམས་བརྒྱད་གཏན་ལ་ཕབ་པའི་འབུམ་ནི་གཤེན་གཏེར་དང་གཅིག་མཚུངས་ཡིན་པས་ཤོག་སེར་ལས་ཕབ་མེད། །