དཔལ་གཤེན་བསྟན་གཡུང་དྲུང་རབ་བརྟན་གླིང་གི་བྱུང་བརྗོད་ཀུན་གསལ་མེ་ལོང་ཞེས་བྱ་བ་བཞུགས་སོ།།

༄༅།། རྨད་འབྱུང་མཚན་དཔེ་འབར་བའི་སྐུ་མངའ་ཞིང་།། ཚང་དབྱང་ཡན་ལག་དྲུག་ཅུ་སྙན་འཇེབས་གསུང་།། ཟབ་རྒྱས་བོན་ཀུན་མཁྱེན་པའི་ཡེ་ཤེས་ཐུགས།། རྣམ་འདྲེན་རྫོགས་སངས་རྒྱས་དེས་དགེ་ལེགས་སྩོལ།། རྨད་བྱུང་མཁྱེན་རབ་གཡུང་དྲུང་ཁང་བཟང་རྩེར།། རྒྱལ་གསུང་སྡེ་སྣོད་ཐེག་དགུའི་སྤྲིན་དཀར་གཏིབ།། ལུང་རིགས་བཤད་སྒྲུབ་བསྟན་པའི་སྤྲིན་རྔ་གྲགས།། མཁས་ཀུན་གཙུག་རྒྱན་བླ་མས་བྱིན་རློབས་ཤིག། གཤེན་བསྟན་རིན་ཆེན་གཡུང་དྲུང་ལུ་གུ་རྒྱུད།། རབ་འབྱམས་དཔག་བསམ་ཡོངས་འདུས་རྩ་བ་བརྟན།། བཤད་སྒྲུབ་འདུས་སྡེ་རྒྱ་མཚོའི་གླིང་དེ་རུ།། བྱུང་བརྗོད་དཀར་ཆག་ཀུན་གསལ་མེ་ལོང་བསྟན།། ༧ ཞེས་མཆོད་པར་བརྗོད་ཅིང་བཤད་པར་དམ་བཅའི་ཚིག་འཕྲེང་མེ་ཏོག་རབ་མཛེས་ཀྱིས་མདུན་བསུས་ཏེ་དཔལ་གཤེན་བསྟན་གཡུང་དྲུང་རབ་བརྟན་གླིང་གི་བྱུང་བརྗོད་ཀུན་གསལ་མེ་ལོང་བསྟན་པར་བྱེད་པ་ལ་གཉིས་ཏེ། སྤྱིར་སངས་རྒྱས་བསྟན་པའི་བྱུང་བ་བརྗོད་པ་དང་། བྱེ་བྲག་གྲུབ་ཐོབ་སྤ་ཡི་མཆེད་ཁུང་བརྗོད་པ་དང་དེའི་གདུལ་བྱ་སྐྱོང་ཚུལ་ལོ། དང་པོ་བསིལ་ལྡན་ལྗོངས་འདིར་རྒྱལ་བ་གཤེན་གྱི་བསྟན་པ་རིན་པོ་ཆེ་འདི་ཉིད་དུས་ནམ་ཞིག་དར་ཞེ་ན། བདག་ཅག་གི་སྟོན་པ་རྒྱལ་བ་གཤེན་རབ་མི་བོ་ཀུན་ལས་རྣམ་པར་རྒྱལ་བ་དེ་ཉིད་འབྱུང་ལྡན་ཞེས་པ་ཤིང་ཕོ་བྱི་བའི་ལོར་རྟག་གཟིགས་ཤམ་བྷ་ལྷ་ཡང་པ་ཅན་གྱི་གྲོང་ཁྱེར་ཕོ་བྲང་བལ་པོ་སོ་བརྒྱད་དུ་སྐུ་མཚན་དཔེའི་དཀྱིལ་འཁོར་བཞད་པ་ནས་རྒྱལ་བའི་མཛད་ཆེན་ཉི་མའི་གྲང་ལྡན་རྣམས་རིམ་པར་སྐྱོང་བའི་སྐབས་སུ་འབྱུང་ལྡན་སུམ་ཅུའི་ནང་ཚན་གཤེན་ལོ་བཅོ་བརྒྱད་སྐོར་གངས་ཅན་བོད་ལ་ཞབས་ཀྱིས་བཅག་པའི་དུས་སུ་བོད་ཀྱི་བོན་པོ་རྣམས་ལ་ལྷ་གསོལ། འདྲེ་བཀར། ཡུག་ཕུད། ཡས་རྟག་ལུང་དུ་གནང་བ་སོགས་རྒྱུ་ཡི་བོན་ཅུང་ཟད་དར་བ་དང་། ནམ་ཞིག་ཐེག་པ་དགུ་ལ་སྤྱོད་པའི་སྨོན་ལམ་གཏབ་པ་དང་འབྲེལ། དེ་ནས་འབྱུང་ལྡན་གཉིས་བརྒྱ་ཞེ་དགུའི་ཐོག་མ་སྤྱི་ལོའི་སྔོན་གྱི་དུས་རབས་གཅིག་སྟོང་གཅིག་བརྒྱ་སུམ་ཅུ་སོ་དྲུག་གི་མཚམས་སུ་བོད་རྗེ་རྔ་བ་གཉའ་ཁྲི་བཙན་པོ་མཚན་གསོལ་ནས་སྐུ་གཤེན་མཚེ་ཅོ་ཡ་ངལ་གཤེན་གསུམ་དང་ནམ་མཁའ་སྣང་བ་མདོག་ཅན་སོགས་ཀྱིས་སྔར་སྟོན་པས་བཞག་པའི་རྒྱུ་བོན་ཕྲན་ཚེགས་དང་། ཞང་ཞུང་ནས་དར་བའི་འདུལ་བ་སྡེ་གཉིས་བཅས་སྔར་ཡོད་ཀྱི་སྟེང་དུ་རྒྱུ་བོན་སྒོ་བཞི་ཤེས་པ་ཅན་བཅུ་གཉིས་རབ་ཏུ་དར་བ་དང་སྔགས་སེམས་ཀྱི་བོན་སྡེ་རྣམས་ཀྱང་རིམ་པར་དར་བའི་ལོ་རྒྱུས་ནི་བོན་གྱི་བསྟན་འབྱུང་རྒྱས་པ་ལས་གསལ་བར་ཤེས་སོ། གཉིས་པ་ལ་གཉིས་ཏེ། གྲུབ་ཐོབ་སྤ་ཡི་མཆེད་ཁུང་དང་དེའི་གདུལ་བྱ་མཛད་ཚུལ་དང་གཉིས་སོ། དང་པོ་གྲུབ་ཐོབ་སྤ་ཡི་མཆེད་ཁུང་ནི། ཐོག་མར་འོད་གསལ་ལྷ་ཡི་གནས་སུ་ཡབ་སངས་པོ་འབུམ་ཁྲི་དང་ཡུམ་ཆུ་ལྕམ་རྒྱལ་མོ་གཉིས་ཀྱི་སྲས་ལྷ་བུ་སྤ་ལ་རབ་ཏུ་མཛེས་པ་ཞིག་འཁྲུང་ནས་སུམ་ཅུ་རྩ་གསུམ་གྱི་ལྷ་གནས་སུ་བབས། མཚན་ལྷ་བུ་སྤ་བ་སྤ་ཐོག་ཏུ་གྲགས། དེའི་རྗེས་མི་ཡུལ་དུ་འགྲོ་བ་འདུལ་བར་དགོངས་ཏེ་ཏིང་འཛིན་གྱིས་གདུལ་བྱ་གཟིགས་པས་ལྷོ་འཛམ་བུ་གླིང་ཞང་ཞུང་ཕུག་པའི་ཡུལ་དུ་འགྲོ་འདུལ་མཁྱེན་ཏེ་ལྷ་ཡུལ་ནས་ཞང་ཞུང་རྣམ་རྒྱལ་ལྷ་རྩེ་ལ་བབས་ནས་སྤྲུལ་པ་དུ་མ་བསྟན་ཞིང་ཞང་བོད་ཀྱི་ལྷ་མ་སྲིན་སྡེ་བརྒྱད་དམ་ལ་བཏགས་ཏེ་སྲུང་མར་བསྐོས། དེ་སྐབས་འབྱུང་ལྡན་གཉིས་བརྒྱ་ཞེ་དགུའི་ནང་ཚན་དང་སྤྱི་ལོ་སྔོན་གྱི་དུས་རབས་གཅིག་བརྒྱ་ལྔ་བཅུའི་ཡས་མས་ཞིག་ཡིན་པ་དང་། ད་ལྟ་འབྱུང་ལྡན་སུམ་བརྒྱ་རྩ་གཅིག་གི་ནང་ཚན་ལྕགས་ཕོ་འབྲུག་ལོ་ཡན་ སྤྱི་ལོ་༢༠༠༠ ལ་མི་ལོ་༣༡༥༠བསྐོར་འདས་པ་དང་། དེ་ནས་ཏི་སེ་གངས་ཀྱི་ཕུག་པར་ཞང་ཞུང་གི་ལྷ་མཆོག་དབལ་ཆེན་གསང་བ་དྲག་པོའི་སྒྲུབ་པ་ལོ་གསུམ་མཛད། དེ་ནས་གསང་གསུམ་གྲུབ་བརྙེས་ཏེ་མཚན་ལ་རིག་འཛིན་ཆེན་པོ་ཁྲི་མན་ལྕགས་ཀྱི་བྱ་རུ་ཅན་དུ་གྲགས་ཤིང་དེ་ཚེ་ཞང་ཞུང་རྒྱལ་རབས་བཞི་བཅུའི་ནང་ཚན་རྒྱལ་པོ་སྟག་སྣའི་མཆོད་གནས་མཛད་ཅིང་བཞུགས། དེ་ཕྱིན་ལྷ་བུ་སྤ་བ་སྤ་ཐོག་གི་གདུང་རྒྱུད་ཀུན་ལ་མིང་སྤ་ཚང་སུ་གྲགས་སོ། དེ་ནས་རིམ་པས་གདུང་རྒྱུད་ཀྱི་སྲས་ ཁ་ཡལ་ལྕེ་ཕུད་ ཐིས་པ་ལྷ་ལེགས་ ཞོ་ནེ་ ནེ་རོག་ ནེ་རང་ གཙུག་ཕུད་རྣམ་རྒྱལ་ དབང་གི་རྒྱལ་མཚན་ རིང་སེ་ ཁྲོམ་ཁྲོམ་ཟེ་ དཔལ་ཙེག་ བཙན་རྒྱལ་ བཙན་གྲགས་ རྨ་ལོ་སོགས་ཀྱིས་ཞང་ཞུང་རྒྱལ་རབས་རིམ་བྱོན་ཀྱི་བླ་ཡི་མཆོད་གནས་མཛད་པ་དང་མཐར་བོད་རྒྱལ་ཁྲི་སྲོང་ལྡེ་བཙན་དང་། ཞང་ཞུང་རྒྱལ་པོ་ལི་མི་རྐྱ་གཉིས་ཀྱི་དུས་སྐབས་སུ་སྤ་གྱི་ཁྲོམ་དཀར་པོ་ཞེས་པ་དེ་ཉིད་བོད་རྗེའི་མཆོད་གནས་སུ་མཛད་ཅིང་བཞུགས། རེ་ཞིག་གྱེར་བསྟན་བསྣུབ་ཅིང་ཆོས་བསྟན་སྤེལ་བའི་སྐབས་དེར་ས་བདག་དང་འགུ་ལྷ་འཁྲུགས་ཤིང་བསམ་ཡས་གཙུག་ལག་ཁང་ཆགས་སུ་མ་སྟེར་བས། འབྱུང་ལྡན་གཉིས་བརྒྱ་བརྒྱད་བཅུའི་ནང་ཚན་ས་ཕོ་སྟག་གི་ལོར་མཁན་པོ་བྷོ་ཏི་ས་ཏོས་བོན་གཤེན་མཐུ་བོ་ཆེ་ཞིག་གི་དབུ་ཐོད་རྨིང་དུ་སྦས་དགོས་ཞེས་ལུང་བསྟན་པ་ལྟར་རྒྱལ་པོས་བང་ཆེན་མངག་སྟེ་སྤ་བོན་གྱི་དབུ་ཐོད་ཞུས་པས་སྤ་བོན་གྱིས་རྩྭ་འཇག་མའི་ཚད་དུ་བསལ་ནས་ལིང་གིས་སྤར་ཏེ་གནང་བའོ། དེ་བསམ་ཡས་གཙུག་ལག་ཁང་གི་རྨིང་དུ་སྦས་ཞེས་པ་འདི་ཡན་སྔར་ཞང་བོད་བསྟན་པ་མཉམ་ཆགས་ཀྱི་སྐབས་སུ་བྱུང་བའི་ལོ་རྒྱུས་སོ། ༧ བསྟན་པ་ཕྱི་དར་གྱི་སྐབས་སུ་གཏེར་སྟོན་བརྒྱ་རྩའི་གཙོ་བོ་གཤེན་ཆེན་ཨ་བོ་ཀླུ་དགས་འགྲིག་མཚམས་བྲག་ནས་ཟབ་གཏེར་བཞེས་ཤིང་བོན་བསྟན་སྤེལ་བའི་སྐབས་སུ་གཏེར་སློབ་བུ་ཆེན་བཞི་ཡི་ནང་ཚན་གསང་སྔགས་སྤྱི་སྤུངས་སྐོར་གྱི་བཀའ་བབ་ནི་སྤ་སྟོན་དཔལ་མཆོག་རྒྱལ་བ་ཡིན་ཞིང་ཁོང་ནི་འབྱུང་ལྡན་གཉིས་བརྒྱ་གྱ་བཞིའི་ནང་ཚན་ཤིང་སྟག་ལོ་  སྤྱི་ལོ་ ༡༠༡༤ གཙང་ལ་སྟོད་ཕྱོགས་ལ་སྐུ་འཁྲུང་ཤིང་ད་ལྟ་ལྕགས་འབྲུག་ཡན་སྤྱི་ལོ་༢༠༠༠ལོ་མི་ལོ་༩༨༥འདས་ཞིང་བླ་མ་དེ་ཉིད་ནི་གྲུབ་གཉིས་མངོན་པར་བརྙེས་པའི་གསང་སྔགས་ཀྱི་རྣལ་འབྱོར་ཆེན་པོ་ཡིན་པ་དང་རྗེས་སུ་རབ་བྱུང་མཛད་དེ་དབུ་སྐྲའི་གཙུག་ཕུད་ཕུལ་བ་མ་སྲིང་དབལ་མོ་མ་མཉེན་པར་དོན་དུ་རབ་བྱུང་དབུ་སྐྲ་ལྡན་པ་བཞུགས། དེ་རྗེས་གདུང་རབས་གཅིག་ལ་སྤ་དར་མ་རྒྱལ་མཚན་དང་། འོད་གསལ་རྒྱལ་མཚན་ཞེས་པ་གཉིས་འཁྲུང་། བསྟན་པ་ཕྱི་དར་གྱི་སྐབས་སུ་གྲུབ་ཐོབ་སྤ་ཡི་གདུང་ལ་འདུལ་རྒྱུད་ཐོག་མར་བྱུང་བའི་མཁན་པོ་གང་ཡིན་ཞེ་ན། ཇི་སྐད་དུ། གཙུག་གཤེན་རྒྱལ་བའི་སྤྲུལ་པ་ལས། སྤ་ཡི་གདུང་ལ་འོད་གསལ་མཚན་ཅན་འབྱུང་། ཞེས་པ་དེ་ཉིད་ཡར་མེ་བ་ལས་འདུལ་ཁྲིམས་རྫོགས་པར་བཞེས་ཤིང་འདུལ་བའི་མཁན་པོ་མཛད། སྤ་དར་མ་རྒྱལ་མཚན་གྱི་སྲས་གྲུབ་ཆེན་ཁྱུང་འབར་ ཁྲོ་འབར་ ཀུན་ཚེ་ ཇོ་རྒྱལ་དང་བཞིའོ།  དེའི་སྲས་ཤེས་རྒྱལ་ དྲང་སྲོང་ ཡོན་ཏན་རྒྱལ་མཚན་ མདོ་སྡེ་རྒྱལ་མཚན་ བསོད་ནམས་དཔལ་ལྡན་ རྒྱལ་བ་བློ་གྲོས་དང་ གཅིག་མ་ཚང་བ་འདྲ་ བདུན་ནོ། དེ་རྗེས་སྤ་ཡོན་ཏན་རྒྱལ་མཚན་ནི་སྟོད་མངའ་རིས་ཀྱི་ས་ཡི་ཆར་སྤ་གྲུབ་ཆེན་ཁྱུང་འབར་གྱི་སྲས་སུ་འཁྲུངས་ཞིང་ཡབ་ཀྱི་དྲུང་དུ་གསང་སྔགས་ཀྱི་དབང་ལུང་རྫོགས་པར་གསན་ནས་མཐར་གཤེན་སྟོན་ནམ་མཁའི་མདུན་ནས་རབ་བྱུང་དྲང་སྲོང་གི་ཁྲིམས་རྫོགས་པར་བཞེས། སྤ་མདོ་སྡེ་རྒྱལ་མཚན་ནི། ཇི་སྐད་དུ་ཚེ་དབང་རིག་འཛིན་སྤྲུལ་པ་ལས། སྤ་ལ་མདོ་སྡེའི་མཚན་ཅན་འབྱུང་། སྐུ་ཤ་སྨུག་ལ་བྱིན་ཆགས་པས། སྤྱན་དང་ནུ་མ་གཡོ་བ་འབྱུང་། ཞེས་དང་། དེའི་མཁན་བུ་སྤ་བསོད་ནམས་དཔལ་ལྡན་དང་། དེའི་མཁན་བུ་སྐུ་མཆེད་ཟུང་སྟེ་བསོད་ནམ་སེང་གེ་ནི་དབྱིལ་སྟོན་ཁྱུང་རྒོད་རྩལ་གྱི་བོན་བདག་ཏུ་གྱུར། ཅུང་པོ་རྒྱལ་བ་བློ་གྲོས་ནི་མཆོག་གྱུར་ཆེན་པོ་དེ་ཉིད་རབ་བྱུང་ཁྲིམ་རྫོགས་བཞེས་སོ། དེ་རྗེས་སྤ་སྟོན་རྒྱལ་བ་ཤེས་རབ་ཅེས་པའི་སྔགས་འཆང་ཆེན་པོ་དང་། སྤ་དོན་འགྲུབ་འབུམ་བཟང་། དེ་རྗེས་དཔལ་ལྡན་བཟང་པོ་གསུམ་གྱི་གོང་འོག་ཏུ་འབྱུང་ལྡན་གཉིས་བརྒྱ་བརྒྱ་བཅུ་གྱ་བརྒྱད་ཀྱི་ནང་སྐོར་ལ་གདན་ས་ཆེན་པོ་ལྷ་སྲིན་འཐབ་པའི་གནས་ཚབ་མཁའ་འགྲོ་ཕག་གདོང་མའི་གནས་ས་ལ་སྟོད་ལྷོ་ཡི་ཕྱོགས་ལ་སྤ་ལ་ཕུག་བདེ་ཆེན་སྒང་ཕྱག་བཏབ་པ་འདྲ། （ལུང་ཁ་གཅིག་གིས་དཔལ་ལྡན་བཟང་པོས་ཕྱག་བཏབ་ཅེས་པ་སྣང་། ）དེ་ནས་འཆད་ཉན་སྒོམ་སྒྲུབ་བྱེད་པའི་གྲུབ་ཐོབ་སྤ་ཡི་གདན་ས་ཆེན་པོ་ཡིན་ཞིང་སྐུ་གསུང་ཐུགས་རྟེན་གྱི་རྩ་ཆེའི་རིག་དངོས་མང་པོ་ཡོད་པར་གྲགས། གོང་གི་སྤ་བླ་དོན་འགྲུབ་འབུམ་བཟང་ནས་རིམ་པས་བཟང་པོ་བཅུ་གསུམ་དུ་བྱོན་པའི་གདན་ས་ཁྱད་པར་ཅན་ནོ། དེ་ནས་སྤ་སྟོན་དཔལ་ལྡན་བཟང་པོ་རབ་བྱུང་དྲང་སྲོང་ཆིག་རྫོགས་ཀྱི་བསྡོམ་པ་བླང་སྟེ། ཇི་སྐད་དུ། ལི་ཤི་སྟག་རིང་སྤྲུལ་པ་ལས། སྤ་ལ་དཔལ་ལྡན་བཟང་ཞེས་འབྱུང་། ཕྱི་མ་རིག་འཛིན་ས་ལ་སླེབ།  ཞེས་དང་། སུམ་ལྡན་གྱི་སློབ་དཔོན་ཆེན་པོ་གྱུར་ནས་གཟའ་བདུད་དམ་ལ་བཏགས་ཤིང་ལ་ཕུག་སྤ་ཡི་གདན་སར་བཞུགས་སོ། དེའི་སློབ་མ་སྤ་ཉི་དཔལ་བཟང་པོ་དང་། དེ་ནས་རིམ་བཞིན་ཟླ་རྒྱལ་བཟང་པོ། སྟོབ་ཆེན་བཟང་པོ། བསྟན་རྒྱལ་བཟང་པོ། དཔལ་མཆོག་བཟང་པོ། དཔལ་འབར་བཟང་པོ། ལྷུན་འགྲུབ་དཔལ་བཟང་། ནམ་མཁའ་བཟང་པོ། དཔལ་ཆེན་བཟང་པོ། རིན་ཆེན་དཔལ་བཟང་། གཡུང་དྲུང་བཟང་པོ་སོགས་ཡུལ་ཞང་ཞུང་གི་བྱང་ཤར་ལ་ཕུག་སྤ་ཡི་གདན་ས་ཆེན་པོ་དེ་ལ་སྤ་བཟང་པོ་བཅུ་གསུམ་དུ་གྲགས། དེ་ནས་གདུང་རབས་ལྔ་ཡི་མཚམས་སུ་ལྷུན་གྲུབ་དཔལ་བཟང་གི་སྐུ་མཆེད་རིན་ཆེན་རྣམ་རྒྱལ་གྱི་སྲས་རྒྱུད་སྤ་སྟོན་ས་ལེ་འོད་དཀར་ཞེས་པ་དེ་ཉིད་སྲིད་པ་རྒྱལ་མོའི་ལུང་བསྟན་བཞིན་མདོ་སྨད་རྒྱ་རོང་གི་ཡུལ་ཕྱོགས་ལྕོག་རྩེ་རྒྱལ་པོའི་མངའ་རིས་སུ་ཕེབ་ཏེ་འཇིགས་རྔམ་བྲག་དཀར་གྱི་གནས་སུ་ལས་ལྡན་གྱི་ལྕམ་བཞེས་ཤིང་བཞུགས། གསང་སྒྲུབ་ཀྱི་ལྷ་ཞལ་དུ་མ་གཟིགས་པ་སོགས་གྲུབ་པ་རང་དབང་མངོན་འཕགས་ཀྱི་རྟགས་ཁྱད་པར་ཅན་ནོ། དེ་སྲས་གདུང་རྒྱུད་ཁག་གཉིས་སུ་གྱེས་ནས་ལྕོག་རྩེ་རྒྱལ་པོ་དང་ གླིང་དགུ་རྒྱལ་པོ་གཉིས་ཀྱི་མངའ་རིས་སུ་བླ་བྲང་ཁག་གཉིས་སུ་མཛད་ནས་བཞུགས་པའི་སྐབས་སུ་གླིང་དགུའི་བླ་མཆོད་གདུང་རབས་མཚམས་སུ་སྤ་གཡུང་དྲུང་རྒྱལ་པོ་སྐུ་འཁྲུང་ཤིང་དེ་ཉིད་ནི་སྔོན་གྱི་སྨོན་ལམ་དང་གདུལ་བྱ་དུས་བབས་སུ་དགོངས་ནས་སྟོད་ཕྱོགས་སུ་ཕེབས་སྐབས་ཨར་སྐྱོ་ཞེས་པའི་ཐ་སྙད་དུ་མཛད་ནས་འབྱོན་ཡོང་པའི་དུས་དེར་ཡིས་སྨད་དུ་སླེབ་སྐབས་རྐང་པ་སྐྲང་ཞིང་འགྲོ་བར་མ་ནུས་པས་གསང་མདའི་གེ་ལྕག་ཚང་ཟེར་བའི་མི་ཚང་ཆེ་ཙམ་ཡོད་པ་དེ་གར་མི་ཤི་བདུན་ཚིག་བཟུང་དུས་སུ་ཐུག་སྟེ་མ་ནུས་པའི་ཨར་སྐྱོ་ལ་བྱམས་སེམས་ཀྱིས་ལྟོ་ཟས་སྤྲད་པ་དང་མཐར་ཡོས་འཐག་ཏུ་བཅུག་སྟེ་མཚན་མོ་ཁྱིམ་སྨད་ལ་ཉལ་དུ་འཅུག། དེ་ཚང་ལ་ཉམས་རྟོགས་ལྡན་པའི་ཨ་མཆོད་དགེ་སློང་ཞིག་ཡོད་པ་དེའི་རྣལ་ལམ་དུ་ཨར་སྐྱོ་ཉལ་སའི་མལ་དུ་ཡི་གེ་པོ་ཏི་མང་པོ་བརྩེགས་པའམ་ སྐབས་འགར་ཡིག་འབྲུ་གྲངས་མེད་ཀྱི་གང་ཞིག་གཏམ་པར་སྣང་གསུངས་སོ། དེ་ནས་ཉིན་ཞིག་ཨར་སྐྱོ་ལ་ཁྱེད་གང་ནས་ཡིན་མིན་དྲིས་པས་ ཨར་སྐྱོ་ང་གཞན་ཡུལ་ས་འདབས་ལ་སླེབ་དུས་ཆེ་རབས་བཤད་ན་མི་འོས་མོད། འོན་ཀྱང་རྒྱ་རོང་གླིང་དགུ་རྒྱལ་པོའི་བླ་མཆོད་སྤ་ཚང་བླ་མ་སང་གི་བུ་ཞིག་ཡིན་ཞེས་གསུང་པར་གྲགས། དེ་ནས་བཟུང་དེ་ཚང་གིས་མཐོང་ཆེན་དུ་བརྩིས་ཏེ་གཟིམས་མལ་གཙང་སར་སྤོས་ཏེ་གུས་ཞབས་ཀྱིས་གནས་སུ་གྱུར་ཅེས་རྒན་རབས་སེར་སྐྱ་ཕོ་མོ་མང་པོའི་ངག་རྒྱུན་ལས་ཐོན་མྱོང་ཡོད། དེ་ནས་ཡུམ་གེབ་ཟ་བྷ་ཀི་མ་ཞེས་པ་གྲོགས་མོ་བཞེས་ཤིང་གདན་ས་ཆགས་བཏབ་མཛད་དེ། མདོ་ཁམས་རྔུལ་རྫའི་སྒང་སྟོད། པུ་རྒྱལ་གནས་ཀྱི་ནུབ་ཕྱོགས། སེ་ཆེན་རྒྱལ་པོའི་མངའ་རིས། ཡིས་གཞུང་གི་ཐ་གྲུ་རི་གླང་ཆེན་འདྲ་བའི་ཞོལ། གདན་ཁྲི་སུམ་བརྩེགས་བཀོད་པ་ལྟ་བུའི་དཀྱིལ་དུ་གདན་ས་ཕྱག་བཏབ་ཅེས་པ་དེ་ནི་ད་ལྟའི་དགོན་གནས་འདི་ཡིན་ཞེས་སོ། དེ་ནས་ཁོང་སྟངས་དབྱལ་གཉིས་ལ་སྲས་ཨི་ཟི་ དགྲ་འདུལ་ བརྟན་རྒྱལ་ བསོད་ནམས་དབང་དྲག་ སྔོ་ནག་ སོགས་སྲས་བདུན་ཡོད་པར་གྲགས་ གཉིས་ཀྱི་མཚན་གསལ་པོ་མི་འདུག་ དེ་ནས་སྲས་ཆུང་དགྲ་འདུལ་ནི་གཟིམ་གཞིས་ལོགས་སུ་བཅས་ནས་དེའི་སྲས་གཡུང་དྲུང་ནམ་བཟང་ ལྷུན་གྲུབ་གྲགས་པ་ ཤེས་རབ་གྲགས་པ་ ག་གཙུག་དང་བཞི། ཡབ་ཀྱི་གཞི་འཛིན་སྲས་ཆེ་བ་ཨི་ཟིའི་སྲས་ཡོན་ཏན་ བྱིས་དགའ་ ཕྱག་དྲུག་དང་གསུམ། སྤ་ཡོན་ཏན་གྱི་དུས་སུ་བྲིས་རྒྱང་པད་བྲག་དམར་པོའི་ཞོལ་འདབས་སུ་ཆགས་བཏབ་སྟེ་སྲས་ནམ་མཁའ་ཏིང་འཛིན་དང་། ཁྱུང་གི་རྒྱལ་པོ་གཉིས་འཁྲུང་། སྤ་ནམ་མཁའ་ཏིང་འཛིན་དང་ཡུམ་གྷར་ཟ་མཚོ་སྨན་གཉིས་གྱི་སྲས་ནམ་མཁའ་གཡུང་དྲུང་། ནམ་མཁའ་སྒྲོན་གསལ། ཉི་མ་འབུམ་གསལ། བསོད་ནམ་བསྟན་པ། ཁྱུང་གྲགས་བཅས་སྲས་ལྔ་འཁྲུང་། ཁྱུང་གྲགས་ནི་ཡུན་རིང་མ་འཚོ་བར་སྐུ་གཤེགས་ཀྱང་སླར་ཡང་ཁྱུང་གི་རྒྱལ་པོའི་སྲས་སུ་སྐུ་འཁྲུང་ནས་མཚན་དུ་རྨེའུ་གཡུང་དྲུང་གཙུག་ཕུད་ཀྱིས་ གཡུང་དྲུང་ཕུན་ཚོགས་སུ་མཚན་གསོལ་ཏེ་དེ་ནི་གྲུབ་ཐོབ་སྤ་ཡི་གདུང་རྒྱུད་གཙོ་བོ་འཛིན་པའི་སྐྱེས་བུ་ཆེན་པོ་ཡིན་གསུང་སོ། མཆོག་ཆེན་དེ་ཉིད་ཀྱིས་སྒང་ཟ་ནོར་བུ་མཚོ་དཔལ་ཞེས་པ་ལྕམ་བཞེས་ཏེ་དེ་ལ་སྲས་འཆི་མེད་ཚེ་དབང་ཞེས་པ་གཅིག་འཁྲུང་། དེ་ནས་ཡུམ་ཆེན་གེབ་ཟ་དང་འགྲོགས་ཏེ་བླ་མ་ཡབ་ཚང་ཞེས་ཁྱིམ་གཞི་གཞན་དུ་བཅས་ཞིང་། དེ་ལ་སྲས་ གཡུང་དྲུང་འབྲུག་གྲགས་དབང་གི་རྒྱལ་པོ། ཀུན་རྒྱལ་པོ། འཆི་མེད་རྣམ་རྒྱལ། ཡེ་ཤེས་དཔལ་བཟང་། གཏེར་ཆེན་ ཡེ་ཤེས་གཡུང་དྲུང་བཅས་བདུན་ཡོད། གོང་གི་གཡུང་དྲུང་ཕུན་ཚོགས་ཀྱི་སྲས་དང་པོ་འཆི་མེད་ཚེ་དབང་ཡོད་སར་བླ་མ་སྦྲ་ནག་ཚང་ཞེས་པ་ལ་སྲས། ལྷུན་རྒྱལ། རྒྱོག་དགའ། ནམ་མཁའ་དབང་འགྲུབ། ཚེ་དབང་ནམ་མཁའ། སྤ་སྤྲུལ་བསྟན་པ་རྒྱལ་མཚན། ཟླ་རྒྱལ། མཆོག་སྲས་སོགས་སྲས་བདུན་ཡོད། དེའི་འོག་ནམ་མཁའ་དབང་འགྲུབ་དང་། ཚེ་དབང་ནམ་མཁའ་གཉིས་ཀྱི་སྲས། བསྟན་པ་འབྲུག་གྲགས། ཕུན་ཚོགས་ཀུན་ཀྱབ་གཉིས་ཡོད། ཕུན་ཚོགས་ཀྱིས་ཀུན་ཁྱབ་སྲས། བསྟན་རྒྱལ་བཟང་པོ། ཀུན་བཟང་། ཨ་རྡོ། ཀུན་བཟང་ལྷུན་གྲུབ།  བླ་མ་ཡབ་ཚང་གི་ཁྱིམ་དུ་སྲས་མེད་ནའང་། གཞན་ཡང་ཡེ་ཤེས་དཔལ་བཟང་གི་སྲས་ནམ་མཁའ་བཟང་པོ། ནམ་མཁའ་ལྷུན་གྲུབ། འཆི་མེད་རིག་འཛིན་དང་གསུམ་ཡོད། ནམ་མཁའ་བཟང་པོའི་སྲས་ནམ་མཁའ་རྒྱལ་མཚན། ཚུལ་ཁྲིམ་རྒྱལ་མཚན་སོགས། བློན་པོའི་སྤ་ཚང་བླ་མ་རྣམས་ཡིན། ནམ་མཁའ་ལྷུན་གྲུབ་སྲས། ཁྲི་པ་བསྟན་འཛིན་གཡུང་དྲུང་སྐུ་ཚེ་ནར་མ་སོན་བ་གཤེགས་བསྟན་འཛིན་རྒྱམ་མཚོ། བསམ་པའི་དོན་གྲུབ། ཁམས་ཆེན་ཀུན་གྲགས་བཅས་ཡིན།  འཆི་མེད་རིག་འཛིན་གྱིས་སྲས། བསྟན་པའི་ཉི་མ། ག་ཡུ། ལྷག་པ། ཕུར་བུ་བཅས་ཡིན་ ཡང་བྱ་ཟ་གཡང་མོ་ལ་སྤ་ཡི་གཏེར་ཆེན་ཡེ་ཤེས་གཡུང་དྲུང་གི་སྲས་ཚེ་དབང་ཐོག་མེད། དེའི་སྲས་ཚེ་དབང་ཉི་མའོ། ཡེ་གཞུང་སྤ་ཚང་བླ་མ་ནི གོང་གི་དགྲ་འདུལ་སྲས་ལྷུན་གྲུབ་གྲགས་པ། དེའི་སྲས་ལ་ལའི་བླ་མ་ཀུན་གསལ་ཞེས་གཞིས་ཆགས་ལ་ལ་ཕུ་ཡོད། དེའི་སྲས་གཡུང་དྲུང་ཉི་རྒྱལ་དང་།གཡུང་དྲུང་ཉི་རྒྱལ་ལ་སྲས་མེད། ནམ་མཁའ་རྒྱལ་མཚན་གཉིས་དེའི་སྲས། ཀུན་བཟང་ནམ་མཁའ། ཉི་མ་སེང་གེ ཟླ་བ་རྒྱལ་མཚན། བསོད་ནམ་རྒྱལ་མཚན་བཅས་སྲས་བཞི་ཡོད། དེ་ལ་འདམ་རའི་བླ་ཚང་ཡང་ཟེར།