དཔལ་གཤེན་བསྟན་གཡུང་དྲུང་རབ་བརྟན་གླིང་གི་བྱུང་བརྗོད་ཀུན་གསལ་མེ་ལོང་ཞེས་བྱ་བ་བཞུགས་སོ།།
ཟིན་ཐོ་གོང་མར་མཐུད། གཉིས་པ། གདུལ་བྱ་སྐྱོང་ཚུལ་གཉིས་ཏེ། དགོན་པ་ཕྱག་བཏབ་མཛད་དེ་བསྟན་བཞེངས་རིམ་པས་མཛད་ཚུལ་དང་ བསྟན་པ་རྗེས་བཞག་མཛད་པའི་སྐུ་གསུང་ཐུགས་རྟེན་རྣམས་སོ། ༧ དང་པོ་ལ་གྲུབ་པ་རང་དབང་མངོན་པར་ཆུབ་པའི་སྤ་གཡུང་དྲུང་ནམ་བཟང་པོ་ཞེས་པ་འདུལ་ཁྲིམས་གཙང་མར་བཞེས་པའི་བླ་མ་དེ་ཉིད་ལ་སྣང་སྟོན་ཟླ་བ་རྒྱལ་མཚན་གྱིས་རབ་ལེགས་གཡུང་དྲུང་གླིང་གི་དགོན་སྡེ་ཕྱག་བཏབ་པ་དང་འབྲེལ་དེ་ནས་དྲང་ངེས་བོན་གྱི་ཁྲིད་ཀ་ཀུན་གྱིས་བཤད་པར་བསྐུལ་ཞིང་རྡ་རྟགས་བརྟེན་འབྲེལ་གྱི་རྫས། འཁར་རྔ་གཅིག་དང་། གཤང་ཆེན་༡། མནྡལ་༡བཅས་གནང་བ་སྦྱིན་མཛད་ནས་བསྟན་འགྲོའི་དོན་དུ་དགོན་གནས་གསར་འདེབས་དགོས་པའི་བཀའ་ལུང་ཡང་ཡང་སྩལ་བར་བརྟེན། འབྱུང་ལྡན་གཉིས་བརྒྱ་གོ་བརྒྱད་ཀྱི་ནང་ཚན་མེ་ལུག་ལོ།（སྤྱི་ལོ་༡༨༤༧）ཟླ་ཚེས་བཟང་པོ་སྤ་བླ་མ་གཡུང་དྲུང་ནམ་བཟང་དང་ཧོར་ཡིས་ཐ་བེ་ཧུ་རྒྱ་བྱིན་དབང་པོ་བླ་དཔོན་ཡོན་མཆོད་ཟུང་འབྲེལ་གྱིས་བསྟན་འགྲོ་སྤྱི་ཡི་བདེ་ཕན་དང་རྒྱ་བོད་བླ་དཔོན་གྱི་ཞབས་རིམ་ལྷག་པར་དུ་ཡིས་ཐ་དཔོན་སྡེའི་ལྷ་སྐལ་དུ་དམིགས་ནས་རིག་འཛིན་གོང་མའི་གསང་ལུང་དང་ལྷ་བླའི་བརྟག་བབས་དང་བསྟུས་ཏེ་དགོན་ས་གང་ལེགས་དཔྱད་གཞི་མཛད་པའི་སྐབས་དེར། ཤར་གྲོགས་གུར་རུ་སྦལ་རྒྱ་བོ། ནུབ་ནེའུ་ཁྱིམ་བྱ་དམར་བྱུར་རྫོངས། ལྷོ་ངང་ཚང་གཡུ་འབྲུག་སྔོན་མོ་དང་བཞི་ནི་སྲུང་བཞི་དང་། རྒྱབ་རི་གླང་ཆེན་འགྱིང་འདྲ། གཡས་རི་པད་མ་སྤུང་འདྲ། གཡོན་རི་གདུགས་དཀར་ཕུབ་འདྲ།
མདུན་རི་བཀྲ་ཤིས་རྟགས་བརྒྱད་བཅས་ཚང་བའི་ས་མཆོག་འདི་ནི་བླ་མའི་དབུ་འཕང་མཐོ་ཞིང་ཤེས་རབ་ལོ་འདབ་རྒྱས་ས་ ཡོན་ཏན་རིགས་རྒྱུད་བཟང་ཞིང་ལེགས་བཤད་འབྲས་བུ་སྨིན་ས གཡང་གི་དཔལ་ཁ་བསྐྱེད་ཅིང་ཟས་ནོར་ཕུན་ཚོགས་འབྱུང་ས་སོགས་ཡོན་ཏན་གྱི་ཆར་དུ་མ་ལྡན་པའི་དབུས་སུ། གཙང་ཆུ་གཡུ་འབྲུག་གསེར་གཞུང་གི་འཁྱིལ་ཁུག་ གདན་ཁྲི་བང་རིམ་སུམ་བརྩེགས་ཀྱི་ཡངས་རྟེང་། ས་མཐུ་བོན་འབྱུང་གྲུ་གསུམ་གྱི་ལྟེ་བར་ས་གནད་སྲིན་མོ་གན་རྐྱལ་དུ་གནས་པ་སོགས་ལ་དཔྱད་དེ་དགོན་ས་གཏན་ལ་ཕབས་པའི་ནུབ་མོར་སྤ་བླ་མ་གཡུང་དྲུང་ནམ་བཟང་གི་དགོང་ལམ་དུ་ཡུལ་བདག་ཞིང་སྐྱོང་ཀླུ་མོ་ཞིག་གིས་ལྡེ་མིག་མཐུ་བ་གང་ཁྱེར་ནས་འདི་ཡི་བདག་པོ་ཁྱེད་ཡིན་ཟེར་ནས་ཁོང་ལ་ཕུལ་བ་རྨིས། དེ་ནས་གཟའ་སྐར་འཕྲོད་སྦྱོར་ལེགས་པའི་ཉིན་དུ་བླ་དཔོན་ཡོན་མཆོད་ཟུང་འབྲེལ་གཙོ་བོ་གནང་ནས་གཤེན་བསྟན་གཡུང་དྲུང་རབ་བརྟན་གླིང་ཞེས་པའི་དགོན་ས་ཕྱག་བཏབ་མཛད་དེ་གཡུང་དྲུང་སེམས་དཔའི་འདུས་སྡེ་བཤད་སྒྲུབ་རྒྱ་མཚོའི་བསྟི་གནས་འགྲོ་བ་ཐུན་མོང་ལྷ་སྐལ་དུ་དམིགས་ཏེ་བསྟན་པ་རྗེས་བཞག་མཛད་རྒྱུའི་འགོ་བརྩོམ་སྟེ། དང་པོ་སྤ་གཡུང་དྲུང་ནམ་བཟང་གིས་ཡབ་གྱི་གཞིས་མཚེར་གཟིམས་སྦྲ་དེ་གནས་གཞན་དུ་སྤོས་ནས་དགོན་སའི་ཆགས་ཐིག་གདབ་པ་དང་འབྲེལ་དགོན་པའི་ཇ་མཛོད་ཁང་དེ་སྤ་ཚང་བླ་མའི་གཟིམས་སྦྲའི་ས་མལ་དངོས་སུ་རེད་ཟེར་རྒན་རབས་མང་པོའི་ངག་རྒྱུན་བཤད་སྲོལ་འདུག དེའི་གཡས་ཟུར་འདུ་ཁང་ཀ་བ་དྲུག་གི་ས་མལ་དང་དེའི་ནང་རྟེན་སྨན་སྐུ་ལས་བཟོས་པའི་སྟོན་པ་ཁྲི་གཙུག་རྒྱལ་བའི་སྐུ། ཤིང་ལས་བཟོས་པའི་གཡུང་དྲུང་བཀོད་ལེགས་ཀྱི་མཆོད་རྟེན་དང་སྡེབ་རིས་ལ་གཡས་ལོགས་སུ་བདེར་གཤེགས་གཙོ་བཞི། གཡོན་ངོས་སུ་ཡི་དམ་ཞི་ཁྲོའི་ལྷ་འཁོར་དང་སྟག་ལའི་སྐུ་བརྙན་བཅས་ཡོད། དེའི་གཡོན་ངོས་སུ་སྒྲུབ་ཁང་ཀ་བཞིའི་ས་མལ་ཐོག་ཁང་དང་བཅས་ནང་དུ་ཡི་དམ་གསས་མཁར་མཆོག་ལྔ་བོན་སྐྱོང་སྲུང་མ་རྣམས་ཀྱི་བརྙན་རིས་དང་། མ་བདུད་བཙན་རྒྱལ་བཞིའི་སྐུ་གསོབ་དང་རྟེན་མདུང་དང་རྟེན་རྫས་གྲྭ་ཁང་བཅས་གསར་བཞེངས་དང་དེ་ནས་ལོ་རིམ་འདུ་འཚོགས་དུས་མཆོད་སྐུ་གསུང་ཐུགས་རྟེན་ འཆད་རྩོད་རྩོམ་གསུམ་བཤད་སྒྲུབ་སྒོམ་གསུམ་སོགས་ལམ་རིམ་པ་བཞིན་འཕེལ་རྒྱས་ཕྱིན་པ་དང་འབྲེལ་རྒྱ་སྡེ་སོ་དགུའི་སྤྱི་ཁྱབ་ཙུང་ཆེ་ཧུ་ཚེ་དབང་ལྷ་རྒྱལ་གྱིས་ཤིང་བྱི་ལོར་ （སྤྱི་ལོ་༡༨༦༤ལོ）བརྩལ་བའི་བཀའ་རྟེན་ལས་༧ཨ་ལུང་ཡར་གྱི་ས་མདོ་རུ་ ས་གནད་རྣམ་པ་བཅུ་གསུམ་ལ། དམིགས་སུ་གཟེར་བའི་བོན་གྱི་སྡེ། གཡུང་དྲུང་བསྟན་པའི་རྒྱལ་མཚན་འཛུགས། ༧ ཞེས་པའི་ལུང་གི་དགོངས་དོན་དང་འཚམ་པས། ཧོར་ཚོ་སོ་དགུའི་དགོན་སྡེ་སོ་བརྒྱད་ཀྱི་ནང་ཚན་བོན་དགོན་ཨང་གཉིས་པ་ཡིན་པའི་བཀའ་རྟེན་བརྩལ་ཞིང་བསྟན་འགྲོ་སྤྱི་དང་ཁྱད་པར་རྒྱ་བོད་བླ་དཔོན་གྱི་ཞབས་རིམ་དུ་དམིགས་པའི་དཔལ་གཤེན་བསྟན་གཡུང་དྲུང་རབ་བརྟན་གླིང་ཞེས་པའི་བཀའ་རྟེན་ལ་བོད་བཞུགས་ཨམ་བན་ཆེན་མོས་གོང་ཐམ་ཡང་གནང་བ་རེད་ཅེས་རང་གིས་མཐོང་མྱོང་ཡོད། དགོན་པའི་རྒྱ་ཁྱོན་གང་ཞིག་ཡོད་ཅེ་ན་སྐབས་དེའི་དུས་ཀྱི་བླ་མས་ས་འདུལ་དང་ ས་འབེབས་མཛད་དེ་ཐོ་མཚམས་ཞེས་ཕྱོགས་བཞིར་རྒྱལ་ཐོ་ཞེས་པ། ནང་རྒྱུད་རྒྱལ་ཆེན་སྡེ་བཞིའི་སྐུ་བརྙན་བཅུག་པའི་མཁར་ཐབས་བཞི་དང་ ལས་བཞིའི་ཧོམ་གདན་བཅས་བཟོ་སྐྲུན་བྱས་པ་གཡོ་འགུལ་གཏོང་སྲོལ་མེད། དེང་སྐབས་དེའི་ནུབ་དང་ལྷོ་གཉིས་ལ་ཚད་གཞལ་ཏེ་རྨིད་ངོས་སྙོམ་གྲུ་བཞི་མ་གང་ཡོད་བལྟ་སྐབས་དེའི་ཕྱོགས་གཉིས་ལ་རྨིད་གཉིས་བརྒྱ་ཉི་ཤུ་རེར་ཡོད་པ་དེའི་རྒྱ་ཁྱོན་ནི་རྨིད་ངོས་སྙོམ་གྲུ་བཞི་མ་ （༢༢༠＋༢༢༠＝༤༨༤༠༠）བཞི་ཁྲི་བརྒྱད་སྟོང་བཞི་བརྒྱ་ཡོད། འབྱུང་ལྡན་གཉིས་བརྒྱ་གོ་དགུའི་ནང་ཚན་ལྕགས་ཕོ་རྟའི་ལོར་ （སྤྱི་ལོ་༡༨༧༠）སྤ་ཉི་མ་འབུམ་གསལ་གྱིས་འདུ་ཁང་ཀ་རིང་གཉིས་དང་ཀ་ཐུང་བཅུ་ཐོག་འཁོར་སྒོ་མཆོར་གློ་འབུར་རང་འགྲིག་དང་དིའི་སྦུག་མཇལ་ཁང་ཀ་བ་དགུ་སྒོ་མཆོར་རང་འགྲིག་བཅས་གསར་བཞེང་མཛད་དེ་ནང་རྟེན་ལ། རྣམ་པར་རྒྱལ་བ། བྱམས་མ། སྟོན་པ་ཁྲི་གཙུག་རྒྱལ། གཡུང་དྲུང་བཀོད་ལེགས་ཀྱི་མཆོད་རྟེན་རྣམས་ཟང་གསེར་ལས་བཟོས་པ་མཐོ་ཚད་ཁྲུ་དྲུག་ཡོད་པ་ （ཀུང་ཁྲི་གཉིས་དང་སྐར་༤༠）ཡོད་པ་དང་། སྡེབ་རིས་ནི་སྦུག་མཇལ་ཁང་ནང་གི་ལྷོ་བྱང་གཉིས་ནི་བཀའ་དང་རྟེན་འགྱུར་བཤམ་ཡུལ་དྲྭ་མིག་དང་། ཤར་གྱི་སྒོ་ལོགས་གཡས་གཡོན་དུ་གཏེར་གསར་སྲུང་མ་སྡེ་བཞི་ནི་ མ་གཤིན་བཙན་རྒྱལ་བཞིའི་སྐུ་བརྙན་བྱིན་ཆེན་ཟེར་བ་དང་། ཁྱད་པར་བསྟན་སྲུང་ཨ་བསེ་རྒྱལ་བའི་སྐུ་བརྙན་དེ་ནི་ནང་རྟེན་དངོས་པོ་རྐུན་ཁྱེར་དུས་སུ་གསུང་དངོས་སུ་བྱོན་ནས་རྟགས་ཁྱད་པར་ཅན་སྟོན་པ་རེད་ཟེར་སྲོལ་འདུགས། དེའི་སྒོ་མཆོར་ཁང་དུ་རྣམ་རྒྱལ་བཀའ་སྲུང་གཅན་ལྷ་གཙོ་འཁོར་ལྔ་དང་། མགོན་ཆེན་བརྒྱད་པོ་གཙོ་འཁོར་བཅུ་གསུམ་རེ་ཡོད་པའི་བརྙན་རིས་དང་། འདུ་ཁང་ནང་གི་སྡེབ་རིས་ནི་གཡས་ལོགས་ལ་ཕྱི་རྒྱུད་ཆོ་ག་བཅུ་གཉིས་དང་། གཡོན་ལོགས་ལ་ཡི་དམ་གསས་མཁར་མཆོག་ལྔ་དང་མ་རྒྱུད་ཐུགས་རྗེ་ཉི་མ། མདུན་གྱི་གཡས་ངོས་ལ་མི་བདུད་གཙོ་བོ་བྱས་པའི་བོན་སྐྱོང་ཕོ་རྒྱུད་ཀྱི་སྡེ། གཡོན་ངོས་ལ་དྲིལ་ནག་གཙོས་པའི་མོ་རྒྱུད་ཀྱི་སྡེ། རྒྱབ་ཀྱི་སྦུག་ལ་ལྷ་ཁྲི་དང་གཏོར་སྒམ་དྲྭ་མིག་བཅས་ཡོད། སྒོ་མཆོར་ནང་དུ་ཕྱི་རྒྱུད་མདོ་ལུགས་ཀྱི་རྒྱལ་ཆེན་སྡེ་བཞི་གཙོ་འཁོར་དང་། སྲིད་པ་འཁོར་ལོ། ཏི་པམ་ཐང་གསུམ་སོགས་ཡུལ་སྐྱོང་ཟོ་དོར་བཅས་ཀྱི་བརྙན་རིས་དང་། འདུ་ཁང་སྟེང་དང་སྦུག་མཇལ་གྱི་དབུ་རྩེ་ལ་གསེར་འཕྲུ་རེ་དང་། མདུན་ཟུར་གཡས་གཡོན་གྱི་སྟེང་དུ་ཟང་གསེར་གྱི་རྒྱལ་མཚན་འདུ་ཁང་དང་སྦུག་མཇལ་ཁང་ཕྱི་ནང་བཅས་མཐར་ཕྱིན་གསར་བཞེངས་མཛད་པའོ། དེ་ནས་རིམ་བཞིན་དགོན་གྱི་ཇ་ཁང་ཀ་བ་དགུ་དང་ཐོག་འཁོར་རང་འགྲིག་མཛོད་ཁང་ཀ་བ་གཉིས་བཅས་གསར་དུ་བསྐྲུན་ཞིང་མཛོད་ཁང་ནང་ལ་དགོན་པས་རྣམ་རྒྱལ་གཡང་སྡུད་སྐབས་སུ་ནོར་བུམ་འབུལ་ཡུལ་གཡང་ཁང་ཞིག་ཡོད་པ་དེའི་དཀྱིལ་དུ་ནོར་བུའི་གཡང་རྡོ་ཞེས་པ་ཕ་བོང་མཐིང་སྨུག་རྡོ་གཞན་ལས་ལྷག་པའི་ཁྱད་ཆོས་ལྡན་པ་ཆེ་ཚད་མི་གཟུགས་ཙམ་ཡོད་པ་རེད། ཤིང་བྱ་ལོ་ （སྤྱི་ལོ་༡༨༨༤）སྤ་ཉི་མ་འབུམ་གསལ་གྱིས་བྲིས་རྒྱང་པད་བྲག་ལྷ་རྩེའི་ཡང་དབེན་དུ་བཀའ་སྟེག་བདེ་ལྡན་གསང་བ་ཁྲོད་ཅེས་པའི་རི་ཁྲོད་དེ་རྨིང་འདིང་ཞིང་མཐར་ཕྱིན་པར་མཛད། རི་ཁྲོད་དེ་རྒྱ་ཁྱོན་གང་ཞིག་ཡོད་ཅེ་ན། སྤ་གསལ་བ་རྣམ་གཉིས་ཀྱི་གཟིམས་ཁང་གདུང་ལྕམ་རེ་དང་གསུང་རབས་འབྲི་བཞེངས་ཁང་ཀ་བ་གཉིས། ཇ་ཁང་ཀ་བ་བཞི། མཛོད་ཁང་ཀ་བ་གཅིག ཡང་འགྲུལ་ཁང་ཀ་བ་གཅིག དང་ཉི་རྭ་བཅས་ཡོད་པ་དང་། གོང་གི་གཟིམས་ཁང་ནང་དུ་ཡི་དམ་ཞི་ཁྲོ་སྲུང་མ་ཡུལ་སྐྱོང་ཟོ་དོར་བཅས་ཀྱི་བརྙན་རིས་ཡོད་པ་རེད། མེ་ཁྱི་ལོ་ （སྤྱི་ལོ་༡༨༨༦）རྨེའུ་གཏེར་ཆེན་ཨོ་རྒྱན་བདེ་ཆེན་གླིང་པ་མཆོག་ནི་ཡིས་ཐ་བེ་ཧུའི་རྒྱལ་གཞིས་སུ་གདན་ཞུ་བྱས་ནས་དུས་བབས་གནད་ཀྱི་རིམ་འགྲོར་གཏེར་ཆེན་མཆོག་གི་གཏེར་ཁ་ཕུར་པ་འབར་ནག་གི་སྒྲུབ་ཆེན་དེ་ཡིས་ཐ་དཔོན་ཚང་གིས་རྒྱུན་འཛུགས་དགོས་པའི་བཀའ་ལུང་བརྩལ་དོན་བཞིན་ཧོར་རྗེ་ནོར་བུ་ལྷ་མཁར་ནས་ཞལ་བཞེས་དགོས་པའི་བཀའ་ལུང་ལྟར། གཏེར་ཆེན་མཆོག་དང་སྤ་ཉི་མ་འབུམ་གསལ་རྣམ་གཉིས་ཀྱིས་སྐུ་གདུང་བསྟན་པ་རྗེས་བཞག་གི་མདོ་ལྟར་སྤྲུལ་སྐུའི་མཆོད་རྟེན་བརྒྱ་དང་ཉི་ཤུའི་ནང་ཚན་༧ནུབ་ཕྱོགས་ཟླ་བའི་ཟེར་ལྡན་པའི། བཀྲ་ཤིས་འོད་འབར་མཆོད་པའི་རྟེན། ཞེས་པ་ལྟར་ལྗགས་བཀོད་གནང་སྟེ་དམིགས་བསལ་དུ་དབལ་གཤེན་སྟག་ལའི་སྐུ་བརྙན་སོགས་བདེ་བར་གཤེགས་པའི་སྐུ་འདྲ་འབུམ་གཅིག་ཟུང་བཞུག་ཏུ་ཕུལ་ཏེ་སྐུ་འབུམ་བཀྲ་ཤིས་འོད་འབར་ཞེས་མཚན་དུ་གསོལ་ཞིང་བདེ་ཆེན་གླིང་པའམ་མི་འགྱུར་ཚེ་དབང་གསང་སྔགས་གྲགས་པས་དབུས་ཕུག་གསང་བ་ཡང་རྫོང་ནས་གཏེར་དུ་སྤྱན་དྲང་བའི་རྣམ་མཁྱེན་རྒྱལ་བ་གཤེན་རབ་ཀྱི་འཕེལ་གདུང་སྲན་མ་ཙམ་ཏོག་གི་རྩེ་མོར་བཀོད་པའོ། དེ་བཞིན་གདོན་ཆེན་ཡན་དགེ་བཅུ་སོགས་རྣམ་བྱང་གི་བོན་དང་སྦྱར་ཏེ་སྐུ་གསུང་ཐུགས་རྟེན་གྱི་བྱིན་རྫས་ཇི་སྙེད་དང་། རྨང་གཞི་ནས་གདོན་ཆེན་མན་ཕུང་པོ་ལྔ་སོགས་འཁོར་བའི་བོན་དང་སྦྱར་དགོས་ཏེ་གནོད་སྦྱིན་གྱི་རྟེན་འཁོར། གཏེར་བུམ། གཏེར་རྫས་གསེར་དངུལ། རིན་ཆེན་འཕྲེང་ཞགས། བཀྲ་ཤིས་རྫས་བརྒྱད་ཇ་འབྲུ་མེ་ཏོག་སོགས་གང་ལ་གང་དགོས་ཀྱི་དངོས་པོ་རྣམས་འཚོགས་པར་བསགས་ཤིང་ཕུལ་ཏེ། མཐར་སྤ་ཉི་མ་འབུམ་གསལ་སོགས་བླ་གྲྭ་རྣམས་ཀྱིས་རབ་གནས་བཀྲ་ཤིས་སྨོན་ལམ་དགའ་སྟོན་རྟེན་འབྲེལ་གྱིས་མཐར་ཕྱུང་།
