ཚོགས་གཏམ་ཐུང་ངུ་།

སྔགས་འཆང་བསོད་ནམས་རྒྱལ་ལགས་རེབ་གོང་བོན་མང་གི་དགེ་བསྐོས་སྐབས་སུ་བཏང་བའི་ཚོགས་གཏམ་ཐུང་ངུ་།

༄༅། །མནོབ་མནོབ་རྩ་གསུམ་ལྷ་དང་དམ་ཅན་སྲུང་མའི་མཐུ་དང་ནུས་པ་ལ་བརྟེན་ཏེ། རྣལ་འབྱོར་དཔོན་གཡོག་ཐམས་ཅད་བསྐྱེད་རྫོགས་ཟུང་འཇུག་གི་སྒོ་ནས་ཐུགས་ཉིད་ཞི་བའི་དབྱིངས་སུ་དྲག་པོ་ཁྲོ་བོའི་སྐུར་བཞེངས་ནས་མངོན་སྤྱོད་དྲག་པོའི་ལས་ལ་ཞུགས་པའི་སྐབས་འདིར་ཞྭ་གོས་དང་ཕྱག་ཆ་མེད་ན་བསམ་སྦྱོར་ཡ་བྲལ་ནི་རེད། རྩ་རྒྱུད་ལས། པྲ་ཕུད་གར་རྨོག་པྲོག་ཞུ་རྒྱན། །གཤེན་རབ་མི་ནུབ་དབུ་ཡི་ཆས། །ལྷ་དང་གཉིས་མེད་དབུ་ལ་བརྟེན། །གཡང་གཞི་དཔྱང་བུ་གོས་མ་ཧྲལ། །ཕྱར་གོས་དཔའ་ཆས་ལུས་ཀྱི་རྒྱན། །གཙང་ལྷམ་སྐུ་ཆིངས་སྐུ་རྒྱན་གསུམ། །མཛེས་བརྗིད་རྒྱན་དུ་སྐུ་ལ་སྤྲས། །ཞེས་གསུངས་ཡོད་ཀ །འཇིག་རྟེན་ཁ་དཔེར། མགོ་ཞྭ་མེད་ཀྱིས་མཐུ་མི་རྒྱག །རྐང་ལྷམ་མེད་ཀྱིས་བྲོ་མི་བརྡུང་། ཟེར་ནི་རེད། དགོས་པའི་ཡོ་བྱད་རྣམས་མེད་ན་ལག་སྟོང་ཇག་ལ་སོང་འདྲ། བྱིས་པའི་བྲོ་གླུ་འཁྲབ་པ་འདྲ་ནི་རེད། རིམ་གཉིས་ཟབ་མོའི་རྣལ་འབྱོར་པ་ཞིག་ཡིན་ན་ཞིང་བཅུ་ཚང་བའི་དགྲ་རྣམས་བསྒྲལ་དགོས་ནི་རེད། གཟི་བརྗིད་རབ་ཏུ་འབར་བའི་མདོ་ལས། སྤྱིར་ན་གཡུང་དྲུང་བསྟན་པ་ལ།  །གནོད་ཅིང་སྡང་བར་བྱེད་པ་ལ། །བརྣག་པ་སྦྱོར་བའི་ལས་བྱས་ཀྱང་། །དོན་ལ་མི་འགལ་བསྟན་པའི་ཆེད། །ཞེས་གསུངས་ཡོད་ནི་རེད། དེ་ཡིན་ན་དཔོན་གཡོག་ཐམས་ཅད་ཀྱིས་ཐུགས་མི་ཡེངས་པར་ཤིན་ཏུ་ནན་ཏན་བྱེད་དགོས། བླ་མའི་གསུང་མི་བརྩི། རྒྱལ་བའི་བཀའ་དང་མི་བསྟུན། འཕགས་པའི་ལུང་ལ་འགལ། རིག་འཛིན་འདུས་སྡེ་ཆེན་པོའི་བཅའ་ཡིག་དང་ཕྱག་ལེན་མི་དགོས། རང་སྣང་གང་ཤར་གྱིས་རྒྱལ་ཁྲིམས་གསེར་གྱི་གཉའ་ཤིང་། བོན་ཁྲིམས་དར་གྱི་མདུད་པ་བཤིག་མཁན་ཡོད་ན། ཐུགས་རྗེ་ཉི་མའི་རྒྱུད་ལས། དམ་ཅན་མཐོང་བ་ཙམ་གྱིས་སྤྲིན་བཞིན་འདུ།  །དམ་ཉམས་སྒྲ་ཐོས་ཙམ་གྱིས་དབྱིངས་ནས་བཤུམ།  །ཞེས་གསུངས་ཡོད་པས། བསྟན་བཤིག་བྱེད་མི་ཡོད་ན་རང་རང་ལ་ཡི་དམ་ལྷ་ཡིས་བཀའ་ཆད་གཏོང་བ། བོན་སྐྱོང་སྲུང་མས་དབུ་ཡོག་གཏོང་བ། རིག་འཛིན་འདུས་སྡེ་ཆེན་པོས་བཅའ་ཡིག་དང་ཕྱག་ལེན་བཞིན་དུ་ཚོགས་གྲལ་ནས་གཏོ་བསྐྱལ་བསྐྱལ་བྱས་ཏེ་ཉེས་ཆད་ནན་མོ་གཅོད་ལ། ཕྱིས་ནས་འགྱོད་ན་འཕྱི་སོང་བ་ཡིན། །

བཀྲ་ཤིས་བདེ་ལེགས་མངྒ་ལཾ། །