བོན་པོའི་ངོས་འཛིན་གྱི་ཐད་ནས་ཅུང་ཟད་ཞུས་ན་ཁ་ཅིག་གི་འདོད་པ་ལྟར་བོན་པོ་ནི་མགོ་བོ་ལ་རལ་པ་དཀྲིས་ཤིང་རྒྱབ་ལ་རྔ་ཁུར་ནས་གཞན་ལ་དམོད་མོ་འདེབས་མཁན་ཁོ་ན་ཙམ་མམ་ཕྱི་རོལ་མུ་སྟེགས་པ་ལྟ་བུ་ལ་ངོས་འཛིན་པ་ནི་ཧ་ཅང་མི་འོས་པ་ཞིག་རེད།འདིའི་རྩ་བའི་འབྱུང་ཁུངས་ནི་ཡ་ཐོག་སྲིད་པའི་བོན་གྱི་དོན་སྙིང་བོན་པོ་སྤྱི་ལ་དཔེ་འགེབས་བྱས་པའི་གནད་དོན་ཞིག་གམ་ཡང་ན་ནང་ཆོས་བོད་ལ་འབྱོར་བའི་དུས་ནས་བཟུང་བོན་པོ་དང་འགལ་བ་རྣོ་ངར་དུ་གྱུར་ཞིང་མཐར་བོན་པོའི་ཤེས་རིག་གི་དཔེ་ཆ་མང་པོ་མེ་ལ་བཏང་ཞིང་ཆུ་ལ་བསྐྱུར་བའི་ལས་འགུལ་རབ་དང་རིམ་པ་དར་ཞིང་དམའ་འབེབས་སྣ་ཚོགས་པ་བྱས་མྱོང་བའི་སྲོལ་དེའི་འཕྲོ་བརྐྱངས་པ་ཙམ་ཡིན་པས་ད་ལྟའི་དུས་རབས་གསར་པའི་ཁྲོད་སྲོལ་ངན་འདིའི་རིགས་ལ་ང་ཚོས་མཐའ་གཅིག་ཏུ་སུན་འབྱིན་བྱེད་འོས་པ་ཞིག་རེད།དེ་ལྟར་བོན་པོའི་རིག་གནས་ལ་དར་རྒུད་སྣ་ཚོགས་ཤིག་བྱུང་མྱོང་ཡོད་ནའང་རིག་གནས་འདི་ཉིད་ནི་བོད་རང་ཡུལ་གྱི་ས་སྐྱེས་རྡོ་སྐྱེས་ཀྱི་རིག་གནས་ཤིག་ཡིན་གཤིས་གཞི་རྒྱ་ཆེ་བའི་མང་ཚོགས་ཀྱི་ཁྲོད་དུ་དར་ཁྱབ་བྱུང་ཡོད་པས་མང་ཚོགས་ཀྱི་རང་བཞིན་ལྡན་པའི་ཁར་མི་རིགས་ཀྱི་རང་བཞིན་ལྡན་པ་དང་ཡུལ་སྲོལ་གྱི་རང་བཞིན་ལྡན་པས་ད་ལྟ་ཡང་བོན་པོའི་རིག་གནས་འདིར་ཕྱི་ནང་ཀུན་ན་མཐོང་ཆེན་དང་གཙིགས་འཛིན་གནང་མཁན་ཇེ་མང་དུ་འགྲོ་བཞིན་ཡོད་པ་རེད།དེ་བཞིན་བོན་པོ་ཡིན་ན་མུ་སྟེགས་པ་ཡིན་པའི་འདོད་ཚུལ་དེ་ནི་མ་བརྟག་ཀྱ་ཚོམ་དུ་སྨྲ་བར་དགའ་བ་འགའི་སྣང་ངོར་རྨ་བྱས་འབྲུག་སྒྲ་ཡིན་མོད་དཔྱད་པའི་འདུ་ཤེས་ལ་རིང་ནས་གོམས་ཤིང་ཕྱོགས་ཞེན་མིག་རིས་བོར་བའི་སྐྱེ་བོ་དཔྱོད་ལྡན་དག་ལ་ཐེ་ཚོམ་གྱི་གནས་སུ་མི་གྱུར་མཐུ་མེད་ཆགས་པ་ཞིག་རེད།རྒྱུ་མཚན་གང་ཡིན་ཞེ་ན་ལྟ་བ་བཀར་བཏགས་ཀྱི་ཕྱག་རྒྱ་བཞི་རིགས་པའི་ལམ་ནས་ཁས་ལེན་པའི་ཕྱི་རོལ་མུ་སྟེགས་པ་ཞིག་ཁས་ལེན་དགོས་པ་ནི་ཧ་ཅང་དཀའ་ཁག་ཆེ་བ་ཞིག་མ་ཡིན་ནམ།སངས་རྒྱས་ཆོས་ལུགས་པའི་མཁས་དབང་རྣམ་པའི་ཞལ་སྔ་ནས་བོན་པོའི་ལྟ་སྒོམ་སྤྱོད་སོགས་རང་གཞུང་དང་མི་མཐུན་པ་རྣམས་ལ་དགག་བཞག་དང་སུན་འབྱིན་མཛད་མྱོང་ཡོད་མོད་དེས་བོན་པོ་མཐའ་གཅིག་ཏུ་མུ་སྟེགས་པ་ཡིན་པར་འགྱུར་མི་ཐུབ་པ་ཞིག་རེད།བོན་པོའི་རིག་གནས་གཞིར་བཞག་གི་སྟེང་ནས་བཤད་ན་བོན་པོ་ལ་སྲིད་པའི་བོན་དང་གཡང་དྲུང་བོན་ཞེས་གཉིས་སུ་ཕྱེས་རུང་ལ་སྲིད་པའི་བོན་ལ་སྟོན་པ་གཤེན་རབ་མི་བོ་ཆེ་ཡི་བསམ་བློའི་བཅོས་བསྒྱུར་གྱི་གྲལ་ལ་མ་ཚུད་པའི་བོན་པོ་རྣམས་ལ་བཤད་དགོས་ཤིང་དེ་ནི་མི་རིགས་གཞན་གྱི་འདོད་མའི་ཆོས་ལུགས་དང་འདྲ་བར་ཡུལ་ལྷ་དམར་མཆོད་དང་རི་ལ་རི་ལྷ་སོགས་རང་བྱུང་ཁམས་ཆེན་པོའི་ཤུགས་རྐྱེན་ཐེབས་པའི་ཆོས་ལུགས་ཆོ་ག་ཞིག་རེད།གཡུང་དྲུང་བོན་ནི་དེ་ལས་ལྡོག་སྟེ་སྐྱེ་བ་སྔ་ཕྱི་སོགས་ཁས་ལེན་ཞིང་སངས་རྒྱས་ཆོས་ལུགས་དང་འདྲ་བར་ལྟ་བ་བཀའ་བཏགས་ཀྱི་ཕྱག་རྒྱ་བཞི་ཁས་ལེན་གནང་བའི་ནང་བའི་ཆོས་ལུགས་གྲུབ་མཐའ་ཞིག་རེད།

༼གོང་གསལ་གྱི་ཚིག་དུམ་དེ་དག་ནི་ཁོ་བོས་བན་ཤུལ་དཔལ་མཁར་རྒྱལ་ལགས་ཀྱི་༼༼དེབ་ཐེར་ནག་པོ།༽༽ལས་བཏུས་ཏེ་འདིར་བཀོད་པ་ཡིན་ཞིང་།འདིར་བཀོད་དགོས་དོན་ཡང་དཔལ་མཁར་རྒྱལ་ཁོང་གི་བོན་གྱི་རིག་གནས་ཉམས་ཞིབ་ལས་འགྱན་སངས་ཀྱི་དོགས་ལན་བསྡུས་པའི་སྐོར་ཞེས་པའི་བརྩམས་ཆོས་ཀྱི་མཇུག་ཏུ་གསུངས་པ་བཞིན་མཐའ་ཕུག་བོད་ཡུལ་ཕུང་བའི་གཞི་རུ་འགྲོ་བའི་བན་བོན་གྱི་རྩོད་གཞི་དེ་ཞི་བའི་ཆེད་དུ་དང་བོན་ཆོས་ལ་རྒྱུས་མངའ་མེད་པའི་གྲོགས་པོ་ཚོར་བོན་ཆོས་ཀྱི་སྐོར་མདོར་བསྡུས་ཙམ་ངོ་སྤྲོད་བྱས་ནས་བོན་པོའི་རིག་གཞུང་འདིར་ཡང་དག་པའི་སྒོ་ནས་ངོས་འཛིན་ཐུབ་ཆེད་མ་བསྐུལ་དང་བླངས་ཀྱི་བྲིས་པ་དགེའོ།༽