2

推荐

ཀོ་ཡི་གཤིས་ཀ།  སྣུམ་གྱིས་མ་ཟིན།

འཁོར་བ་སྡུག་བསྔལ་གྱི་རྒྱ་མཚོ།།

ཞེས་པའི་ལུང་བསྟན་དེས་ཅི་བསླུ།།

རང་རྒྱུད་ཀོ་གྱོང་གི་གཤིས་ལ།།

སྣུམ་གྱི་ཟིན་རྒྱུ་ནི་མི་འདུག།།

 

དང་པོ་ཁ་ཏོག་གི་རྣམ་བཞག།།

སྤང་ཐང་ཁྲ་ཚོམ་གྱི་མེ་ཏོག།

དགྱེས་པའི་རྣམ་དཔྱོད་ཀྱིས་བཏུས་པ།།

རན་པའི་ཞྭ་མོ་ཞིག་བཟོས་ཡོད།།

 

བར་དུ་གཏན་ཚིགས་ཀྱི་རྣམ་བཞག།།

ཚུལ་གསུམ་འཕྲུལ་འཁོར་ལ་སྦྱར་ཀྱང་།།

ཐེག་པའི་ལྟ་བ་འདི་མཁྲེགས་པས།།

འདེགས་པའི་བློ་སྟོབས་ཞིག་མ་རྙེད།།

 

གོང་མས་རྟགས་གསལ་རེ་གཏོང་སྐབས།།

རྒན་པོ་གཤིས་གྱོང་གི་ཨུ་ཚུགས།།

ཤུགས་འཐེན་གཡག་སྐེ་ལ་བཏགས་ཀྱང་།།

ལུང་རིག་རྟ་ལུག་གིས་བཞུས་སོང་།།

 

ལོ་གསུམ་ཨུ་ཚུགས་ཀྱི་འདས་སོང་།།

ལོ་དྲུག་སྟོང་བསམ་གྱི་བསྐྱལ་ཐལ།།

ལོ་བརྒྱད་ལོ་དགུ་ཡི་རིང་ལ།།

དོན་གྱི་མར་ལོ་ཞིག་མ་རྙེད།།

 

ཚོགས་དང་འཆད་ར་ནས་མ་རྙེད།

ཡངས་པའི་སྤང་ཐང་ནས་མ་སྐྱེས།།

མི་ཚོགས་རྦ་རླབས་ཁྲོད་རྙེད་པས།།

བྱམས་པའི་ཞལ་རས་འདི་མཛེས་པ།།

 

དགའ་དུས་བར་སྣང་ལ་འཕུར་ཆོག།

སྡུག་དུས་ས་འོག་ལ་འཛུལ་ཆོག།

བསྙེས་གཅིག་མཛའ་མོ་དང་ལྷན་དུ།།

སྐྱིད་པའི་དགའ་སྟོན་ལ་རོལ་ཆོག།