གདོང་དམར་བ།
འདི་ནས་ཡར་ལ་རྩས་པའི་ལོ་ཟླ་ཁྲི་ཕྲག་གི་མཚམས་ན།        
སྙིང་སྟོབས་དངསྤོབས་པས་གནམ་འཕང་གཅོད་པའི་གདུང་དམར་བ།
ད་ལྟ་མུན་པའི་སྨག་རིམ་ན་འཁོར་བའི་གདོང་དམར་བ།
མགོ་བོ་ཡར་ལ་དགྱེ་དང་།

ཤེས་རིག་དང་མཐུན་སྒྲིལ་གྱི་རྒྱགས་ཕྱེ་བསྣམས་ནས།        
གཉའ་གནོན་དང་རྗེས་ལུས་ཀྱི་ལ་ཆེན་བརྒལ།
འདི་ནི་ང་ཚོའི་སྙིང་སྟོབས་དང་འགན་འཁྲི་ལགས།
མགོ་བོ་ཡར་ལ་དགྱེ་དང་།

འདི་ནས་ཡར་ལ་རྩས་པའི་ལོ་ཟླ་ཁྲི་ཕྲག་གི་མཚམས་ན།    
འབྱོར་ཕྱུག་དང་རིག་གནས་ཀྱིས་འབབ་ཆུ་གྱེན་ལ་གཤག་པའི་གདོང་དམར་བ།
ད་ལྟ་མུན་པའི་སྨག་རིམ་ན་འཁོར་བའི་གདོང་དམར་བ།
མགོ་བོ་ཡར་ལ་དགྱེ་དང་།

འབད་བརྩོན་དང་འཚོལ་སྙེག་གི་དམིགས་འདུན་ཁུར་ནས།
བདེ་སྐྱིད་དང་དྲོད་བོལ་གྱི་འཚོ་བར་སྙེག།
འདི་ནི་ང་ཚོའི་སྙིང་སྟབས་དང་འགན་འཁྲི་ལགས།
མགོ་བོ་ཡར་ལ་དགྱེ་དང་།

འདི་ནས་ཡར་ལ་རྩས་པའི་ལོ་ཟླ་ཁྲི་ཕྲག་གི་མཚམས་ན།    
དད་འདུན་དང་སྒྲུབ་སྦྱོང་གིས་མི་ཚེ་སྐྱེལ་མྱོང་བའི་གདོང་དམར་བ།
ད་ལྟ་མུན་པའི་སྨག་རིམ་ན་འཁོར་བའི་གདོང་དམར་བ།
མགོ་བོ་ཡར་ལ་དགྱེ་དང་།

སྙིང་རྗེ་དང་བྱམས་སེམས་ཀྱི་སྤས་བཅུད་བརྟེན་ནས།
དག་ཞིང་དང་བདེ་ཆེན་གྱི་ས་རུ་གོམ་གྱིས་གཞལ།
འདི་ནི་ང་ཚོའི་སྙིང་སྟོབས་དང་འགན་འཁྲི་ལགས།
མགོ་བོ་ཡར་ལ་དགྱེ་དང་གདོང་དམར་བ།