༧སྟོང་ཆེན་མ་བཅོས་ཀ་དག་ཀློང་ཡངས་པོ། ལྷུན་གྲུབ་ཐུགས་རྗེའི་རང་མདངས་ལྷུན་རྫོགས་གསལ།
རྣམ་དག་གཞན་ཕན་ཚ་ཟེར་ཕྱོགས་བརྒྱར་འཕྲོས།
སྐུ་གསུམ་མངོན་གྱུར་བསྟན་པའི་འབྲུག་གྲགས་རྒྱལ།
༧སྔོན་བསགས་བཟང་པོས་བརྒྱད་ཁྲི་བཞི་སྟོང་བོན།
ཆེས་ཆེར་མ་བརྩོན་ཐམས་ཅད་མཁྱེན་པའི་ཚུལ།
ལྷག་པའི་ལྷ་མཆོག་མི་ཡི་ཟོལ་བསྟན་པའི།
གངས་ཅན་མཁས་པའི་ཁྱུ་མཆོག་སྤ་འབྲུག་རྒྱལ།
༧སྙིགས་མའི་སྨག་རུམ་བདོ་བའི་ཁམས་གསུམ་འགྲོ།
གཏན་བདེའི་རྒྱལ་ས་ཆེན་པོ་མྱུར་ཟིན་ཆེད།
རླབས་ཆེན་ཐུགས་དགོངས་སྐྱ་རེངས་གསར་དང་ལྷན།
བོད་ཡུལ་མུན་སྨག་བསལ་མཛད་ཉི་མའི་དབང་།
༧སྟོན་མཆོག་བརྒྱ་པའི་མཛད་མཕྲིན་གསང་གསུམ་བོན།
སེ་ཆེན་ཧོར་ཡུལ་གདུལ་བྱའི་དཔལ་དུ་ཡང་།
འཆད་རྩོད་རྩོམ་གསུམ་ནོར་བུའི་གཏེར་ཆེན་གྱིས།
སྐལ་ལྡན་བྱེ་བ་ཐར་པའི་ཞིང་མཆོག་བསྟན།
༧ཁྱད་པར་བསྟན་པ་འཛིན་སྐྱོང་སྤེལ་གསུམ་དང་།
སྡེ་སྣོད་གསུམ་དང་ཐེག་དགུ་རིག་པའི་གནས།
ཚད་གསུམ་ཟུང་འབྲེལ་ལམ་ནས་པོད་བཅུ་ཕྲག།
ཕྱི་རབས་རྗེས་བཞག་བསྟན་པའི་གཙུག་ན་མཛེས།
༧རྨད་བྱུང་འཁོར་ལོ་གསུམ་གྱི་རིམ་པ་གང།
འཛམ་གླིང་གོ་ལའི་ཁྱོན་དུ་བསྒྱུར་བ་ཡིས།
རྒྱལ་བསྟན་སྲོག་གི་ཀ་ཆེན་རྒྱུན་ཚུགས་ནས།
བཤད་སྒྲུབ་སྒོམ་པའི་རྒྱལ་མཚན་དབྱིངས་སུ་ཚར།
༧བསྐལ་མང་ཚོགས་གཉིས་རྫོགས་པའི་བྱིན་མཐུ་གང་།
ཞིང་འདིར་སྟོན་མཆོག་གཤེན་རབ་མཛད་ཆེན་བཞིན
ཡིད་ཅན་བསོད་ནམ་དཔལ་དུ་བསྐྲུན་པ་ཡིས།
སྙན་པའི་གྲག་དཀར་སྲིད་གསུམ་ཁྱོན་ཀུན་བདལ།
༧མགོན་ཁྱེད་ཐུགས་དགོངས་ཉི་ཟླའི་གུར་ཁང་ལས།
བརྩེ་བའི་སྤྱན་ཟུང་མདོར་མེད་རྒྱུན་གཟིགས་པའི།
ཕྱི་རབས་རྗེས་བཞག་བསྟན་པའི་རྩ་ལག་གང་།
ཉམས་མེད་ཡར་ཟླའི་དཔལ་རྒྱས་སྙིང་ནས་དྲན།
༧དཔལ་ལྡན་བླ་མའི་མཛད་བཟང་ཡིད་བཞིན་ནོར། བདག་འདྲས་གཞལ་མིན་དམ་པའི་ཡོན་ཏན་ཆར།
དད་འདུན་མོས་པས་གསོལ་བཏབ་བསྟོད་བཀུར་ཙམ།
རིང་མིན་དམ་པའི་བྱིན་རླབས་འཇུག་པར་སྨོན།།
༧ཞེས་སྐྱབས་རྗེ་གཡུང་དྲུང་བསྟན་པའི་འབྲུག་གྲགས་བསོད་ནམས་དཔལ་བཟང་པོའམ་སྤ་ཚང་འབྲུག་རིན་པོ་ཆེ་མཆོག་གི་རྣམ་ཐར་དང་མཛད་རྗེས་བཅས་ལ་དད་འདུན་རྗེས་དྲན་དང་བཅས་སྤ་ཚང་གྲྭ་བཙུན་བསམ་གཏན་རྒྱལ་མཚན་གྱིས།།
སྟོ 
