༧ནོར་འཁྲུལ་ངོས་འཛིན་ཐོབ་པའི་ལེགས་སྐྱེས།
༧ལྷོ་རྒྱལ་འཛམ་བུ་གླིང་པའི་དབུས་ལྟེ་འམ་ས་གཞི་གོ་ལ་རིལ་མོའི་ཡང་རྩེ་རུ་གནས་བཅའ་བའི་བསིལ་ལྡན་ཁ་བ་དཀར་པོའི་སྤུན་ཟླ་རྣམས་དང་།
དེ་བཞིན་དུ་འཛམ་གླིང་ཡུལ་གྲུ་ཀུན་ལ་བཞུགས་པའི་གངས་རིའི་སྤུན་ཟླ་ཡོངས་སུ་རྫོགས་པ་ལ་ཞུ་གསོལ། ན་ནིང་བྱང་སྡེ་ཉི་མ་རྫ་ཆུ་ཁར་འཇང་དགུན་ཆོས་ཚོགས་ཆེན་མོར་འཚོགས་སྐབས་སུ་འང་། སེར་བྱེས་དགེ་བཤེས་ཉིན་མ་ཕུན་ཚོགས་ལགས་ཀྱིས། གཡུང་དྲུང་བོན་གྱི་ཆོས་ལུགས་འདི་ནི་ནང་པ་སངས་རྒྱས་པ་མ་རེད་ཟེར་བ་ཁོང་གི་ཆོས་བཤད་དེ་དག་གནད་ལས་མ་ཁེལ་པ་ཞིག་རེད། དེ་ལས་འཕྲོས་ཏེ་གཡུང་དྲུང་བོན་ལུགས་འཛིན་པའི་བླ་མ་དང་སྤྲུལ་སྐུ། མཁན་པོ་དང་དགེ་བཤེས། དེ་བཞིན་དུ་ཕྱོགས་སོ་སོ་ནས་བཞུགས་ཤིང་བོན་སྒོར་ཞུགས་པའི་སྐྱེ་བོ་ཕོ་མོ་ཚང་མའི་སེམས་ཁམས་ལ་བཟོད་དཀའ་བའི་ཕོག་ཐུག་ཅིག་ཤོར་བ་རེད། རྒྱུ་མཚན་དེ་ཡིས་རྐྱེན་པས་བོན་ལུགས་འཛིན་པ་ཡོངས་ཀྱིས་ཡིད་མ་རངས་པའི་ཐ་ཚིག་སྒྲོགས་པ་དང་། ཁོ་བོས་ཀྱང་དེ་དག་ལ་བརྒལ་ལན་གྱི་རྩོམ་ཐུང་ཞིག་ཀྱང་སྤེལ་བ་ཡིན་ལ་ལྷག་པར་དུ་ཁོང་ལ་ཁ་པར་གྱི་ལམ་ནས་རྒྱུ་མཚན་འདི་ཉིད་འགྲེལ་བཤད་དགོས་པའི་དྲན་བསྐུལ་ཡང་ཞུས་པ་ཡིན། རེད་ཨ། ཁོང་ནི། དངོས་གནས་དྲང་གནས་མིང་དོན་དང་མཚུངས་པའི་དགེ་བའི་བཤེས་གཉེན་ཞིག་ལོས་ཡིན། གཟིགས་དང་། དེང་གི་སྐབས་སུ་ཁོང་ཉིད་ཀྱི་ལུས་ངག་ཡིད་གསུམ་གཅིག་ཏུ་སྒྲིལ་ཏེ་གཡུང་དྲུང་བོན་གྱི་སྟོན་པ་སངས་རྒྱས་གཤེན་རབ་མི་བོ་ཆེ་དཔང་པོར་བཙུགས་ཏེ་སྔར་འགྱོད་ཕྱིར་སྡོམ་བྱེད་པའི་སྒྲ་ཕབས་དང་བརྙན་ཕབས་ཀྱི་འོད་སྡེར་ཚ་ཚ་འུར་འུར་གྱི་ངང་ནས་ཁ་བ་གངས་དཀར་བའི་རི་ལུང་ཀུན་ནས་སྤེལ་བཞིན་འདུག་པ་འདི་ལ་གཟིགས་དང་། མཛད་ཚུལ་འདི་ལ་བལྟས་ན་དམ་པའི་རང་གཤིས་ཤིག་ངམ་ངམ་ཤུགས་ཤུགས་ཀྱིས་མངོན་ཡོང་གི་འདུག། ནོར་བ་དང་འཁྲུལ་བ་ནི་ཀུན་ལ་ཡོད་མོད། དཔེར་ན། མི་ལ་སྐྱོན་དང་། ཤིང་ལ་མཛེར་པ་མེད་པ་ཞིག་ག་ལ་སྲིད། དེར་བརྟེན་ནོར་འཁྲུལ་ནོར་འཁྲུལ་དུ་ངོས་ཟིན་པ་དང་། སྔར་བྱས་ལ་འགྱོད་སེམས་དྲག་པོ་སྐྱེས་པ། ཕྱིས་འབྱུངས་སུ་ལམ་ནོར་ལྡོག་ཤེས་བྱེད་པའི་དམ་བཅའ་བརྟན་པོ་ཡོད་པ། མ་ཟད་ཁོང་གིས་དམིགས་སུ་བཀར་དེ་གསུང་དོན་སླད་ཕྱིས་སུའང་གཡུང་དྲུང་བོན་གྱི་རིང་ལུགས་འདི་ལ་དད་པ་དག་སྣང་གི་འདུ་ཤེས་བཅོས་མ་མ་ཡིན་པ་ཞིག་བཟུང་བ་དང་བོན་གཞུང་ལ་སྦྱོང་བརྩོན་ཧུར་ཐག་མཛད་པའི་སེམས་ཤུགས་ཆེན་པོ་ཡོད་ཚུལ་གསུང་འདུག་པས་ཁོང་ལ་ཐུན་མིན་གྱི་གྲུབ་འབྲས་ཤིག་ཏན་ཏན་ཐོབ་ངེས་རེད། ད་ཕན་ལ་ཡང་རྒྱུ་མཚན་འདི་དག་གི་ནུས་པས་ཁོང་ཉིད་ཀྱི་ནོར་འཛོལ་ཤོར་བའི་ཉེས་པ་དག་པ་ལ་ཐེ་ཚོམ་ཅི་དགོས། གང་ཞེ་ན། མཚམས་མེད་ལྔ་ལ་སོགས་པའི་མི་དགེ་པ་མཐའ་དག་གི་སྒྲིབ་པ་སྦྱོང་བའི་གཉེན་པོ་ལ་སངས་རྒྱས་ཀྱི་གསུང་ཚད་མ་ཡོད་པས་སོ། དཔེར་ན་ཁྱབ་པ་གཡུང་དྲུང་དོན་ལྡན་ལྟར་རོ། ལྷག་དོན་དམིགས་བསལ་དུ་ཞུ་རྒྱུར། ཁར་སྔོན་ཕྲན་གྱིས་གཙོས་པའི་བོན་འབང་རྣམས་པས་ཁྱེད་ལ་ཡིད་མ་རངས་པའི་གནས་ལུགས་རྒྱུ་མཚན་མང་དག་གཅིག་བཤད་ཡོད་མོད། ད་གཟོད་བཤད་མ་ཐག་པའི་རྒྱུ་མཚན་དེ་དག་ནི་ཁྱེད་ཀྱིས་གོ་འཛོལ་དུ་མ་སོང་བའི་སྒོ་ནས། ཁྱེད་ལ་བཟོད་སྒོམ་གནང་རོགས་དང་འགྱོད་བཤད་བྱེད་པའི་གོ་སྐབས་ཡོད་པའི་རེ་དོན་དེ་ཉིད་ང་ཚོས་ཀྱང་དང་ལེན་བྱེད་འདོད་སེམས་གཏིང་ནས་ཡོད། སླད་མར་ཡང་ཁྱེད་ཀྱིས་གསུང་དོན་ལྟར་རང་རེ་ཁ་བ་གངས་ཅན་བའི་མདུན་ལམ་ལ་དམིགས་ཏེ། སྤུན་ཟླ་ཚང་མས་ཕྱར་གྲུ་མཉམ་འདེགས་ཀྱི་ཐོག་ནས་མཐུན་སྒྲིལ་གྱི་དམ་བཅའ་མི་ཆུང་བའི་འབོད་བསྐུལ་ཡང་བསྐྱར་དུ་ཞུ་བའོ།
སྨྲས་པ།
རྣམ་དཀར་དགེ༵་བཅུའི་འོད་ཀྱི་ངང་ཚུལ་ཅན། དམ་པའི་བཤེ༵ས་གཉེན་གང་གི་མཛད་ཕྲིན་དག
ཕན་བདེ་ཉི༵་མ༵་འབུམ་གྱིས་འོད་ཟེར་ལྟར། རྒྱལ་བསྟན་ཕུན༵་ཚོག༵ས་སྣང་བའི་གསོས་སུ་ཤོག།
བོན་གྱི་དགེ་བཤེས་གཡུང་དྲུང་བསྟན་རྒྱལ་ནས།
