༧ལོག་བཤད་དུག་རླངས་གཏོར་བའི་དྲི་བཞོན།
སི་ཁྲོན་ཞིང་ཆེན། དཀར་མཛེས་ཁུལ། དཔལ་ཡུལ་རྫོང་། ཧོར་པོ་ཤངའ། ཀཿཐོག་དགོན་པར་ཡོད་པའི། མིག་རྒྱང་ལུག་གི་འཇུག་མ་ལས་ཐུང་ཞིང་། ཐོས་རྒྱ་ཁྲོན་པའི་སྦལ་པ་ལས་ཆུང་བའི་ཕུག་དཀྲུགས་འཁྱོགས་བཤད་མཁན་གྱི་བླུན་རྒན་ཚུར་བསྟན་ལ་བཤད་རྒྱུར། ཁྱོད་རང་འདི་ལོར་བདག་འཛིན་དུག་ལྔའི་དབལ་སོ་རབ་ཏུ་རྒྱས་ཏེ་ཀུན་གཞིའི་རྣམ་ཤེས་ལ་སྨྱོ་འབོག་ནད་ཀྱིས་ཟིན་པ་དང་། རྣམ་དཔྱོད་མཁྱེན་པའི་མིག་ཟུང་ལ་མ་རིག་པའི་ལིང་ཏོག་གིས་སྒྲིབ་ཏེ་བླང་དོར་འབྱེད་པའི་ཤེས་རབ་ཀྱི་སྣང་བ་ནུབ་པའི་དབང་གིས། ཉོན་མོངས་རང་ཁ་མ་ཁྱོད་ཀྱི་དམ་ལོག་ཁ་ཡིས་ཚིག་ལོག་བཤད་པའི་བརྙན་ཕབས་འོད་སྡེར་ཞིག་གི་ནང་དུ། ༼གངས་ཅན་མདོ་ཁམས་བསིལ་ལྡན་འཛིན་མའི་ཁྱོན། ཕྱི་རོལ་གཤེན་གྱི་བསྟན་པས་དབང་བསྒྱུར་དུས། ནང་བའི་ཆོས་སྡེ་ཐོག་མ་ཀཿཐོག་ཆགས།༽ཟེར་བའི་རྨོངས་བཤད་ཕུང་དཀྲུགས་ཀྱི་ནད་ཡམས་འདི་གངས་ཅན་ཁ་བའི་ཞིང་འདིར་འཕྱུར་སྐབས་སུ། རང་རེ་གངས་རི་དཀར་པོའི་འདབ་རོལ་དུ་ལང་ཚོའི་ཁོ་ལག་རྫོགས་ཤིང་། གངས་ཆབ་ཟེགས་མས་ལུས་སྟོབས་གསོས་པའི་ཤ་ཁྲག་གི་རུས་རྒྱུད་གཅིག་ལས་ཆད་ཅིང་། བརྩེ་སེམས་འོ་ཆུ་གཅིག་ཏུ་འདྲེས་པ་དང། ལས་དབང་སྐྱིད་སྡུག་གཅིག་ཏུ་གནས་པའི་གངས་རི་སྤུན་ཟླ་རྣམས་པའི། བརྩེ་སེམས་དར་དཀར་མདུད་པ་ལ་ཉེས་ཅན་པ་ཁྱོད་ཀྱིས་ནག་ནོག་གི་དྲི་མ་བྱུག་པ་དང་། མཛའ་མཐུན་མི་འགྱུར་གཡུང་དྲུང་ལ་ཕུང་དཀྲུགས་མཁན་ཁྱོད་ཀྱིས་གཏོར་བཤིགས་ཀྱི་དུག་མདའ་འཕོངས་པ། ཤ་ཁྲག་རུས་རྒྱུད་གཅིག་པའི་སྤུན་ཟླ་ལ་ཁྲེལ་མེད་ཁྱོད་ཀྱིས་བརྩེ་སེམས་འབྲེལ་བའི་སྲོག་ཐག་བཅད་པ་སོགས། ཕུང་རྒན་ཁྱོད་ཀྱི་དུག་གི་ཁ་ཕྲུ་དེ་རབ་དཀར་གངས་རིའི་ཞིང་འདིར་བཏབས་པའི་བྱ་ངན་གྱི་སྡིག་ཏོ་འདི་ཁྱོད་ཀྱིས་ཨི་རིག། ཁྱོད་ཀྱིས་དེ་དག་རིག་ན་འཇུག་འབྲས་བཟང་ངན་གང་འདྲ་བྱུང་མིན་བླུན་རྒན་ཁྱོད་ཀྱིས་ཨི་རྟོགས། དེ་དག་རྟོགས་ན་མིག་ཞར་ཁྱོད་ཀྱིས་བྱ་སྤྱོད་ངན་པ་དེའི་རང་འཁྲིའི་འགན་འཁྲི་ཅི་འདྲར་ཁུར་རྩིས་ཡོད་དམ། མ་ཟད་སྤུན་ཟླའི་བརྩེ་སེམས་ཀྱི་རྨ་ཁ་ཅི་འདྲར་གསོ་རྩིས་ཡོད། ཁ་བའི་ཕ་ཆོས་ནང་ཁུལ་གྱི་འགལ་འདུ་ཅི་འདྲར་བསྒྲིགས་རྩིས་ཡོད། ཉོན་ཅིག་གཏོར་བཤིགས་མཁན་གྱི་བླུན་རྨོངས་མགོ་འཐུམ་པ། ཁྱོད་ཀྱི་སྐྱག་ཚང་ལྟ་བུ་ཁ་སྒོ་ནས་སྐྱག་དྲི་བྲོ་བའི་གཏམ་བཤད་སྤེལ་དོན། ཕྱི་རོལ་གཤེན་གྱི་བསྟན་པ་ཟེར་བ་འདི། ཁྱོད་ཀྱི་ཁྱི་ཁས་འགྲེལ་བཤད་གཅིག་རྒྱོབས་དང་། འགྲོ་བ་ལྷ་དང་བཅས་པའི་༧སྐྱབས་མགོན་སྐལ་བཟང་རྣམ་འདྲེན་སྲིད་ཞིའི་མགོན་པོ་༧སྟོན་པ་ཡང་དག་པར་རྫོགས་པའི་སངས་རྒྱས་༧རྒྱལ་བ་གཤེན་རབ་མི་བོ་ཆེ་མཆོག་གིས་སྲོལ་གཏོད་པའི་ཕན་བདེའི་འབྱུང་གནས་སངས་རྒྱས་གཡུང་དྲུང་བོན་གྱི་རིང་ལུགས་འདི་ཉིད་ནི། གཞི་སྙིང་རྗེ་ཆེན་པོས་ཀུན་ནས་སློང་། ཐབས་ཕ་རོལ་ཕྱིན་པ་བཅུ་ལ་སྤྱོད། ལྟ་བ་ཡས་ནས་མར་ཕུབ། སྤྱོད་པ་མས་ནས་ཡར་འཛེགས་ཏེ། ཁམས་གསུམ་འཁོར་བའི་སྐྱེ་དགུའི་སེམས་ཅན་ཐམས་ཅད་ཐར་མེད་སྡུག་བསྔལ་གྱི་རྒྱ་མཚོ་ཆེན་པོ་ནས་སྐྱབས་ཏེ་ཐར་པ་དང་ཐམས་ཅད་མཁྱེན་པའི་གོ་འཕང་འཐོབ་བྱེད་ཀྱི་ཐབས་ལམ་ཁྱད་པར་ཅན་ཉག་གཅིག་ཡིན། དེར་བརྟེན་སྟོན་པ་སངས་རྒྱས་བཀའ་དྲིན་ཅན་དེ་ཉིད་ཀྱིས་གདུལ་བྱའི་བློ་ཚོད་དང་བསྟུན་ཏེ་བོན་གྱི་སྒོ་མོ་ཕྱི་ནང་གསང་གསུམ། སྒོ་བཞི་མཛོད་ལྔ། ཐེག་པ་རིམ་དགུ། བོན་སྒོ་བརྒྱད་ཁྲི་བཞི་སྟོང་སོགས་གདུལ་བྱ་གང་ལ་གང་འདུལ་དེ་ལ་དེར་སྟོན་མཛད་པའི་ལུང་རྟོགས་ཀྱི་བསྟན་པ་རིན་པོ་ཆེ་འདི་ཉིད་ལ། དམ་ལོག་ཁྱོད་ཀྱིས་གོ་ལོག་དང་ལྟ་ལོག་གང་འདྲར་འཛིན་གྱིས་ཡོད་དམ། ཕྱོགས་ལྷུང་རུ་ཏྲ་ཅན་ཁྱོད་དང་ཁྱོད་འདྲ་ཉུང་ཤས་ཅན་གྱིས། གཡུང་དྲུང་བོན་ཆོས་འདི་ཉིད་ནང་པ་སངས་རྒྱས་པ་མ་ཡིན་ཞེས་པའི་སྒྲུབ་བྱེད་ཀྱི་རིག་པ་ཅི་འདྲ་ཞིག་ཡོད་དམ། དཔེར་ན་དེ་སྔོན་བན་བོན་སྤྱི་མཐུན་གྱིས་འདོད་དོན་ནི། ཕྱི་ནང་གྲུབ་མཐའི་ཁྱད་པར་འབྱེད་བྱེད་མཆོག་གསུམ་སྐྱབས་གནས་སུ་འཛིན་མིན་ལ་གཞིར་བཟུང་བ་དང་། ཡང་ལྟ་བ་བཀའ་རྟགས་ཀྱི་ཕྱག་རྒྱ་བཞི་ཁས་ལེན་མིན་སོགས་ལ་གཞིར་འཛིན་པ་འདི་ཉིད་སྤྱི་མཚུངས་ཡིན་མོད། དེར་འཕྲོས་གངས་ཅན་ཁ་བའི་ཕ་ཆོས་༧མདོ་སྔགས་སེམས་གསུམ་མམ། ཕྱག་རྫོགས་དབུ་གསུམ་གྱི་ལྟ་སྒོམ་སྤྱོད་གསུམ་ཆ་ཚང་བའི་སངས་རྒྱས་གཡུང་དྲུང་བོན་དང་། གསར་འབྱོར་དམ་པའི་ཆོས་ཡིན་པའི་གསང་སྔགས་ཀྱི་རིག་འཛིན་རྙིང་མ་བ། དཀའ་སྤྱད་སྒོམ་སྒྲུབ་ཀྱི་རྒྱལ་བ་བཀའ་རྒྱུད་པ། མཐའ་བྲལ་དབུ་མའི་དེད་དཔོན་དཔལ་ལྡན་ས་སྐྱ་བ་དང་། རི་བོ་དགེ་ལྡན་པ་སོགས་ནི་སྟོན་པ་རྫོགས་པའི་སངས་རྒྱས་གཤེན་རབ་མི་བོ་ཆེ་མཆོག་དང་། སངས་རྒྱས་ཤཀྱ་ཐུབ་པ་རྣམ་གཉིས་ཀྱི་རིང་ལུགས་ཡིན་པས། སངས་རྒྱས་ཀྱི་ཆོས་ལུགས་ཞེས་པའི་ཐ་སྙད་དེ་ཆགས་ཡོད་པ་དང་། སངས་རྒྱས་ཀྱི་ཆོས་ལུགས་ཟེར་བ་ནི་སངས་རྒྱས་ཀྱིས་ཞལ་གསུངས་ལ་གོ་དགོས་པ་འདི་མངོན་སུམ་དུ་གྲུབ་ཡོད་མོད། དེང་དུས་སུའང་གོང་བཤད་ལྟར་ཕྱོགས་ལྷུང་ཅན་ཁག་གཅིག་གིས་སྔ་སྲོལ་གྱི་དམ་བཅའ་དེ་རིགས་དོར་ཞིང་། སངས་རྒྱས་ཀྱི་ཆོས་ལུགས་ཞེས་པ་ནི་བཅོམ་ལྡན་འདས་ཀྱི་ཞལ་ནས་གསུང་པའི་ཆོས་རྒྱུད་གཅིག་པུ་ལ་གོ་དགོས་ཟེར་བའི་ལོང་བཤད་འདི་ཉིད་རང་མགོ་བརྡུང་བྱེད་ཀྱི་ཐོ་བ་ཁོ་ན་མ་ཡིན་ནམ། དཔེར་ན། དམ་ཆོས་ཡིན་པའི་སྔ་རབས་འདས་པའི་སྟོན་པ་སངས་རྒྱས་འོད་སྲུང་གི་བསྟན་པ་ཆོས་ཅན། སངས་རྒྱས་ཀྱི་ཆོས་ལུགས་མ་ཡིན་པ་ཐལ། སངས་རྒྱས་བཅོམ་ལྡན་འདས་ཀྱིས་གསུངས་པའི་བསྟན་པ་མ་ཡིན་པའི་ཕྱིར། རྟགས་ཁྱབ་ཁས། ཡང་ན། མ་འོངས་སངས་རྒྱས་རྒྱལ་བ་བྱམས་པའི་བཀའ་ཆོས་ཅན། སངས་རྒྱས་ཀྱི་ཆོས་ལུགས་མ་ཡིན་པ་ཐལ། བཅོམ་ལྡན་འདས་ཀྱི་ཞལ་གསུངས་མ་ཡིན་པའི་ཕྱིར། རྟགས་ཁྱབ་ཁས། ཞེས་སོགས་སྒྲུབ་བྱེད་མང་ངོ་། འཇུག་ཏུ་བཤད་རྒྱུར་དམ་ཉམས་ཁྱོད་ཀྱིས་ཁྱི་ཁ་དམ་པོར་ཚུམས་དང་། གངས་ཅན་ཁ་བའི་མི་རིགས་འདི་ཉིད་སྤུན་ཟླའི་མཐུན་སྒྲིལ་གྱི་མཛའ་སེམས་ལ། ཁྱོད་ཀྱིས་གཏོར་བཤིགས་གཏོང་བའི་དུག་ཆབ་གང་སར་མི་གཏོར་བར་སྡུག་ཚོད་གཟུང་ན་མི་དགའ་འམ། ཉོན་དང་། ཁྱོད་ལ་དམ་ཉམས་ཟེར་པའི་སྒྲ་དེ་ཁྱོ་རང་གི་མགོ་སྟོད་རྣ་བས་ཐོས་སྐབས་སུ་ཁྱོད་ནི་མི་བཟོད་པའི་ང་རྒྱལ་ཞིག་ལང་སྲིད་མོད། ཡིནའང་ཁྱོད་རང་བློ་རྣལ་དུ་ཕོབས་ལ་ལེགས་པར་ཉོན་དང་། ངས་ལུང་རིག་གིས་ཁྱོད་ལ་ཁྱོད་རང་དམ་ཉམས་ཡིན་པ་ངོ་སྤྲོད་བྱེད་རྒྱུ། ཁྱོད་རང་ནི་ཨོ་རྒྱན་པདྨ་འབྱུང་གནས་ཀྱི་ཆོས་སྒོར་ཞུགས་ཁུལ་བྱེད་པའི་ཆོས་པའི་གཟུགས་བརྙན་ཞིག་ཡིན་པ་གང་ཞིག ཨོ་རྒྱན་རིན་པོ་ཆེའི་ཞལ་གསུངས་པདྨ་བཀའ་ཐང་ལས། ༼ཆོས་ཀྱི་རྩ་བ་བོན་ཐུག་པས། ཆོས་པས་བོན་གཤེ་དམ་ཚིག་ཉམས། དེ་ཡིས་རང་བསྟན་རང་གིས་བཤིགས།༽ཞེས་པའི་བཀའ་ལུང་བྱིན་བརླབས་ཅན་འདི་དམ་ལོག་ཁྱོད་འདྲའི་རིགས་ལ་དགོངས་ཏེ་གསུངས་པ་མ་ཡིན་ནམ།སྨྲས་པ། ཕྱི་ཚུལ༵་ཆོས་པའི་འདྲ་འབག་གྱོན་པ་ཙམ། ནང་ཁྲིམ༵ས་ལོག་པ་དུག་ལྔའི་དབལ་ཆུ་ཁོལ། རྒྱལ་བ༵སྟན་ཕུང་དཀྲུགས་ལྕེ་གཉིས་བོད་མིའི་འདྲེ། བདག་འ༵ཛིན་འདམ་དུ་བྱིང་འདི་སྙིང་རྗེའི་ཡུལ། ༧ཞེས་གངས་ལྗོངས་༧གཤེན་བསྟན་༧བཀྲ་ཤིས་སྨན་རིའི་དགེ་བཤེས་གཡུང་དྲུང་བསྟན་རྒྱལ་ནས།