ཁེ་ཕམ་ཕྱེས་པ།

རྒན་གོག་ལུས་སོས་དལ་ན་ཁེ་རེད། །

གཞོན་ནུ་ལུས་སོས་དལ་ན་ཕམ་རེད། །

མཛེས་མ་འཕྱོར་འདོད་ཆེ་བ་ཁེ་རེད། །

དགེ་མ་འཕྱོར་འདོད་ཆེ་བ་ཕམ་རེད། །

སྐྱ་བོ་ཚོང་ལས་མཁས་ན་ཁེ་རེད། །

གྲྭ་པ་ཚོང་ལས་མཁས་ན་ཕམ་རེད། །

སྒོ་ཁྱི་སྤྱང་ལ་སྡང་ན་ཁེ་རེད།  །

བུ་རྒྱུད་ཕ་ལ་སྡང་ན་ཕམ་རེད།  །

དགེ་བྱེད་རི་ལ་འགྲིམས་ན་ཁེ་རེད། །

སྒོ་ཟོག་རི་ལ་འགྲིམས་ན་ཕམ་རེད། །

མནའ་མ་ཁྱོ་ལ་བྱམས་ན་ཁེ་རེད། །

བུ་མོ་བྱི་ལ་བྱམས་ན་ཕམ་རེད། །

རྐང་ཐང་འདོར་ལེན་མགྱོགས་ན་ཁེ་རེད། །

འཕྲུལ་ཞོན་འཁོར་ལོ་མགྱོགས་ན་ཕམ་རེད། །

གྲྭ་གཞོན་རིག་རྩལ་འགྲན་ན་ཁེ་རེད། །

ཕོ་གཞོན་དཔའ་རྩལ་འགྲན་ན་ཕམ་རེད། །

ལུང་རིགས་རྒོལ་ལན་བྱས་ན་ཁེ་རེད། །

མཚོན་ཆའི་གཡུལ་འགྱེད་བྱས་ན་ཕམ་རེད། །

ཁྱི་ཕག་ཟ་རྒྱུ་མང་ན་ཁེ་རེད། །

མི་ལ་ཟ་རྒྱུ་མང་ན་ཕམ་རེད། །

ཚོགས་ལ་གཏོང་ཕོད་ཆེ་ན་ཁེ་རེད། །

བག་ལ་ཤོར་ཕོད་ཆེ་ན་ཕམ་རེད། །

ཉིན་ལ་དགོན་པར་གནས་ན་ཁེ་རེད། །

མཚན་ལ་གྲོང་ཁྱེར་འགྲིམས་ན་ཕམ་རེད། །

དཔྱིད་དབྱར་འབུ་རྫ་བརྐོས་པ་ཁེ་རེད། །

སྟོན་དགུན་མ་ཅཱང་རྒྱབ་པ་ཕམ་རེད། །

བློ་ཁུག་སྒོར་མོས་གང་བ་ཁེ་རེད། །

མ་རྩ་བུ་ལོན་ཡིན་ན་ཕམ་རེད། །

གྲོགས་པོའི་མཛའ་མཐུན་ཆེ་བ་ཁེ་རེད། །

བློ་གཏད་བཅོལ་ས་མེད་ན་ཕམ་རེད། །

མི་རིགས་ལ་རྒྱ་ཡོད་པ་ཁེ་རེད། །

སྐད་ཡིག་སྦྱོང་སྤྱོད་མ་ཤེས་ཕམ་རེད། །

རྩྭ་ཐང་བདག་གཉེར་བྱེད་པ་ཁེ་རེད། །

ཕུ་ནུ་ནང་དམེ་བྱེད་པ་ཕམ་རེད། །

གོས་སུ་བོད་ལྭ་གྱོན་པ་ཁེ་རེད། །

མཐའ་ལ་སྟག་ལྤགས་བརྒྱན་པ་ཕམ་རེད། །

ལུས་ལ་གཙང་སྦྲ་བྱེད་པ་ཁེ་རེད། །

རྐེ་ལ་སྲུང་མདུད་མེད་པ་ཕམ་རེད། །

རྟ་ལུག་གཡང་དུ་འབོད་པ་ཁེ་རེད། །

སྒོ་ལ་ལུག་རྡོག་མེད་པ་ཕམ་རེད། །

གཟའ་ཟླ་ནང་དུ་རུམ་པ་ཁེ་རེད། །

ཕ་མ་སྒོ་ལ་ཕུད་ན་ཕམ་རེད། །

དེང་རབ་བརྙན་འཕྲིན་མཐོང་བ་ཁེ་རེད། །

གནའ་སྲོལ་དགོང་འདོན་ཆད་པ་ཕམ་རེད། །

ཕྱི་རྒྱལ་མིག་དཔེ་ལེན་པ་ཁེ་རེད། །

གཅེར་བུ་གོས་ནས་བུད་པ་ཕམ་རེད། །

             བོན་སྨྱུག་གིས་བྲིས།