རྩོད་ཐུན་གཅིག་གི་འགྲེལ་ཆུང་།

སྤྱི་ལོ་༢༠༡༠ལོའི་ཟླ་༦ཚེས་༢ཉིན་ཐེངས་དང་པོའི་རྩོད་རྒྱུག་སྐབས་སུ་རང་གི་དམ་བཅའ་ལ།

ཐག་ཁྲ་སྦྲུལ་འཛིན་གྱི་ཡིད་ཤེས་རྟོག་པ་ཡིན་པ་ལས་རྟོག་མེད་མ་ཡིན། གལ་སྲིད་རྟོག་མེད་ཡིན་ན་

ཐག་ཁྲ་སྦྲུལ་ཡིན་པ་དང་དེ་འཛིན་གྱི་ཡིད་ཤེས་མངོན་གསུམ་ཚད་མར་འགྱུར་རོ། །ཞེས་བདག་ཉིད་

ཆེན་པོའི་ཚད་མའི་རང་འགྲེལ་ལས་གསུང་པ་དེའི་དོན་ནི། ཁྲ་ཙམ་རྟོགས་པའི་དབང་མངོན་ཚད་

མ་དང་ལྷན་དུ་སྐྱེས་པའི་རྟོག་མེད་ལོག་ཤེས་མི་སྲིད་དེ། དེ་དང་ལྷན་དུ་སྐྱེས་པའི་རྟོག་མེད་ཤེས་པ་

ཡིན་ན་དབང་མངོན་དེ་དང་རྫས་གཅིག་ཡིན་དགོས་པ་གང་ཞིག རྟོག་མེད་ཀྱི་བློ་རྫས་གཅིག་ལ་དོན་

ལ་འཁྲུལ་བ་དང་མ་འཁྲུལ་བ་ཆ་གཉིས་མི་སྲིད་པའི་ཕྱིར་རོ། །གལ་ཏེ་ཁྲ་ཙམ་འཛིན་པའི་དབང་

མངོན་ཚད་མའི་ཕྱི་ལོག་དེ་མ་ཐག་ཏུ་ཐག་ཁྲ་སྦྲུལ་འཛིན་གྱི་ཡིད་ཤེས་རྟོག་མེད་ཡོད་ཟེར་ན་དེ་ནི་མི

་སྲིད་དེ། དེའི་སྔ་ལོག་དེ་མ་ཐག་ཏུ་ཁྲ་འཛིན་དབང་མངོན་དེའི་ཁྲ་ཙམ་ངེས་པས་ན། ཕྱི་ལོག་དེ་མ་

ཐག་ཏུ་བྱུང་བའི་ཐག་ཁྲ་ལ་དམིགས་པའི་ཡིད་ཤེས་རྟོག་མེད་དེས་ཁྲ་ཙམ་མི་ངེས་པའི་རྒྱུ་མཚན་མེད་པའི་ཕྱིར་ཏེ། དེ་ལ་འཁྲུལ་རྒྱུ་གཞན་མེད་པའི་ཕྱིར། ཡང་ན་ཐག་ཁྲ་སྦྲུལ་འཛིན་གྱི་རྨི་ལམ་གསལ་སྣང་གི་ཤེས་པ་ཡོད་ཟེར་ན། དེ་ཡང་ཤིན་ཏུ་འཇོག་དཀའ་སྟེ། ཐག་ཁྲ་རྨིས་ན་ཐག་ཁྲ་རྨི་ལམ་དུ་གསལ་བར་སྣང་དགོས། རྨི་ལམ་དུ་ཐག་ཁྲ་གསལ་བར་སྣང་བཞིན་དུ་སྦྲུལ་དུ་འཛིན་མི་སྲིད་དོ། །དེ་ལ་ཐག་ཁྲ་རྨི་ལམ་དུ་གསལ་བར་རྨིས་བཞིན་པར་སྦྲུལ་དུ་འཛིན་ན་ཅི་སྐྱོན་ཞེ་ན། རྨི་ལམ་གསལ་སྣང་གི་ཡུལ་དུ་རྨི་ལམ་གྱི་ཤེས་པར་གང་སྣང་བ་དེ་ལས་གཞན་ཐག་ཁྲ་རང་མཚན་པ་ལ་སོགས་གང་ཡང་མེད་པ་གང་ཞིག དེས་ན་རྨི་ལམ་གྱི་ཤེས་སྣང་ཙམ་དེ་སྦྲུལ་དུ་སྣང་ན་ཐག་ཁྲར་སྣང་མི་རུང་བ་དང་། ཐག་ཁྲ་རུ་གསལ་བར་སྣང་ན་སྦྲུལ་དུ་སྣང་མི་རུང་བ་དོན་གྱིས་གྲུབ་པ་ཡིན་ཏེ། རྨི་ལམ་དུ་སྦྲུལ་དུ་འཁྲུལ་བཞིན་པའི་ཐག་ཁྲ་མེད་ལ་ཐག་ཁྲ་རུ་སྣང་བཞིན་པའི་སྦྲུལ་ཡང་མི་སྲིད་པའི་གནད་ཀྱིས་སོ། །དེ་ཡང་རྗེ་བདག་ཉིད་ཆེན་པོའི་ཞལ་ནས། རྨི་ལམ་གསལ་སྣང་ཅན་གྱི་ཡིད་ཤེས་དེར་འགྱུར་བ་མི་མཚུངས་ཏེ། ཐག་ཁྲ་ཕྱི་རོལ་གྱི་དོན་ཡིན་པ་བཞིན་རྨི་ལམ་གསལ་སྣང་ཡང་དེར་འགྱུར་བས་སོ། །ཞེས་གསུང་པའི་དོན་རང་གིས་གོ་ཚོད་ཙམ་དུ་ཐོ་རུ་བཀོད་པ་ཡིན། །