བོད་ཀྱི་ཡི་གེའི་སྒྲ་གདངས་དྲག་ཞན་དབྱེ་ཚུལ་ལས་འཕྲོས་པའི་དོགས་འདྲི་དཔྱོད་ལྡན་དྲ་གྲོགས་བསུ་བའི་ཕོ་ཉ།
མ་རྒྱུད་སྐྱེ་མེད་ཐིག་ལེའི་དགོངས་དོན་ལྟར། བརྡ་སྤྲོད་ཉི་ཤུ་བདུན་པ་ལས། ཡི་གེའི་འབྱུང་ཁུངས་འབྱུང་བ་ཆེ་བའི་ལུགས། །སྒྲ་གདངས་དྲག་ཞན་འབྱུང་བ་ཆུང་བའི་ལུགས། །ཞེས་གསུངས་པ་ལྟར་ བརྡ་སྤྲོད་ཉི་ཤུ་བདུན་པ་དང་བརྡ་སྤྲོད་སྲིད་པའི་སྒྲོན་མེ་སོགས་བོན་གྱི་བརྡ་སྤྲོད་གཞུང་རྣམས་ལས་འབྱུང་ཆེན་ལུགས་ཀྱིས་བྱུང་ཁུངས་བསྟན་པ་དང་འབྱུང་ཆུང་ལུགས་ཀྱིས་སྒྲ་གདངས་དྲག་ཞན་བསྟན་པ་དེ་ནི་བོན་རང་ལུགས་ཀྱི་ཐུན་མོང་མ་ཡིན་པའི་རྣམ་བཞག་ཅིག་ཡིན་ནམ་སྙམ། འོན་ཀྱང་འབྱུང་ཆུང་ལུགས་ཀྱི་སྒྲ་གདངས་དྲག་ཞན་དེའི་ཅུང་ཞིག་གོ་མ་ཆོད་པའི་བཟོ་ཞིག་སྣང་བ་ནི་ཁོ་བོ་ཤེས་རབ་ཀྱི་མིག་རྩ་ཞན་དྲག་པའི་དབང་དུ་ཡིན་སྲིད། དེས་ན་ད་ལན་དཔྱོད་ལྡན་དྲ་གྲོགས་རྣམ་པའི་སྤྱན་ལམ་དུ་དོགས་འདྲི་ཞིག་སྤེལ་བར་འདོད་པས། ༼༡ འབྱུང་ཆུང་ལུགས་ཀྱི་ཡི་གེའི་སྡེ་ཚན་ལྔ་སྟེ་རིམ་བཞིན་དུ་ཆེན་པོ་དྲག་པོ་འབྲིང་ཞན་རྔུབ་པ་བཅས་དབྱེ་བ་དེ་དག་གང་གིས་འབྱེད་པའི་རྒྱུ་མཚན་ནི་རྗོད་པའི་རླུང་ཤུགས་ཆེ་ཆུང་ངམ་སྒྲ་རྩོལ་དྲག་ཞན་གྱི་སྒོ་ནས་བཞག་པ་ཡིན་ནམ། དེ་ལས་གཞན་པའི་རྒྱུ་མཚན་གང་།？ ༼༢ དེ་ཉིད་སྒྲ་རྩོལ་དྲག་ཞན་གྱི་སྒོ་ནས་འབྱེད་པ་ཡིན་ན། ཡང་ཡི་གེའི་སྦྱོར་བ་འམ་རྟགས་འཇུག་གི་སྐབས་སུ་གསལ་བྱེད་སུམ་ཅུ་དེ་ལ་ས་ཆུ་མེ་དང་མེ་ཡི་མེ་མེ་ཙམ་སྟེ་སྡེ་ཚན་ལྔ་རུ་དབྱེ་བ་དེ་ཡང་སྒྲ་གདངས་དྲག་ཞན་ནམ་རྗོད་པའི་རླུང་ཤུགས་ཆེ་ཆུང་གི་སྒོ་ནས་འབྱེད་པ་མ་ཡིན་ནམ།？ ༼༣ འབྱེ་དོན་སྔ་ཕྱི་དེ་གཉིས་ཀ་སྒྲ་གདངས་དྲག་ཞན་གྱི་སྒོ་ནས་འབྱེད་པ་མཐུན་ན་ཡི་གེའི་སྦྱོར་བ་བྱེད་པའི་སྐབས་སུ་འབྱུང་ཆུང་ལུགས་ཀྱི་སྒྲ་དོན་དྲག་ཞན་ཕྱེས་པ་དེ་ལྟར་དུ་བེད་སྤྱོད་མ་བཏང་པར་སླར་ཡང་གསལ་བྱེད་སུམ་ཅུ་དེ་ལ་སྡེ་ཚན་ལྔའི་སྒོ་ནས་སྒྲ་དོན་དྲག་ཞན་གྱི་རྣམ་བཞག་ཕྱི་མ་དེ་འཇོག་དགོས་པའི་རྒྱུ་མཚན་ཅི།？ ༼༤ དབྱེ་བ་སྔ་ཕྱི་གཉིས་ལས་འབྱུང་ཆུང་ལུགས་ཀྱི་དབྱེ་བའི་ནང་དུ་ཞ་དང་ར་གཉིས་སྒྲ་དྲག་པོར་བཞག་པ་གང་ཞིག གསལ་བྱེད་སུམ་ཅུ་སྡེ་ཚན་ལྔ་རུ་དབྱེ་བའི་ནང་དུ་ཞ་དེ་སྒྲ་ལྷོད་པ་མེ་སྡེ་དང་ར་ནི་སྒྲ་ཆེས་ཤིན་ཏུ་ལྷོད་པ་མེ་ཙམ་གྱི་ཡི་གེར་བཞག་འདུག་མོད། དོན་ངོ་མར་ཞ་དང་ར་གཉིས་སྒྲ་དྲག་པོ་ཡིན་ནམ་ཞན་པ་ཡིན།？ ༼༥ ཡང་ན་འབྱུང་ཆུང་ལུགས་ཀྱི་འཕྲུལ་ཡིག་བཞི་བཅུ་སྡེ་ཚན་ལྔ་རུ་དབྱེ་བ་དེ་དང་གསལ་བྱེད་སུམ་ཅུ་སྒོས་སུ་སྡེ་ཚན་ལྔ་རུ་འབྱེད་པ་དེ་གཉིས་སྒྲ་དོན་དྲག་ཞན་ཙམ་ལས་ཁྱད་པར་གཞན་ཞིག་ཡོད་དམ།？༼༦ འབྱུང་ཆུང་ལུགས་ཀྱི་ཡི་གེའི་སྡེ་ཚན་ལྔ་པོ་རིམ་བཞིན་དུ་རང་ལུགས་བརྡ་སྤྲོད་ཀྱི་སྐབས་སུ་གང་ལ་བེད་སྤྱོད་གཏོང་དགོས་སམ།？ ཞེས་པའི་དྲི་བ་ཁག་དྲུག་པོ་དེ་ལ་དཔྱོད་ལྡན་གཟིགས་པ་པོ་རྣམ་པས་ལན་ཞིག་གནང་བའི་ཕན་སེམས་མི་འདོར་བར་མཁྱེན་མཁྱེན་ཞེས་བོན་སྨྱུག་ནས། ༢༠༡༢－༨－༥ཉིན་ཕུལ་བ་ལགས་སོ། །
- ཟིན་ཐོ་གོང་མ།འབྲུ་སུམ་ཅུའི་སྐད་ཡིག་སྦྱོང་སྤྱོད་གྱིས།
- ཟིན་ཐོ་འོག་མ།རྩོད་ཐུན་གཅིག་གི་འགྲེལ་ཆུང་།
དྲི་བ་འདི་སྣང་མེད་དུ་མི་གཏོང་བར་གཟིགས་པ་པོ་རྣམ་པས་རང་རང་གི་དགོངས་འཆར་དང་མཐུན་པའི་ལན་ཞིག་གནང་ན་ང་དང་ང་འདྲ་བའི་བོན་དང་བོད་ཀྱི་སློབ་མ་དག་ལ་ཕན་ཐོགས་འབྱུང་ངེས་པས་ཅིས་ཀྱང་འཐད་པར་སེམས། ཞེས་ཟིན་བདག་གིས་སླར་ཡང་དྲན་བསྐུལ་ཞུ་བ་ཡིན།