གོང་མའི་འཕྲོ་མཐུད། རྗེ་དམ་པ་ཉིད་ཀྱིས་དད་ལྡན་སྦྱིན་བདག་རྣམས་ནས་ཚོགས་བསགས་བསྔོ་སྨོན་གྱི་རྟེན་དུ། འབྱོར་བའི་དངོས་རྫས་གྱུར་རོ་ཅོག་རྣམས་རྒྱལ་བའི་སྐུ་གདུང་སྐུ་གཟུགས་གསུང་རབ་ཀྱི་རྟེན་བཞེངས་དང་། དེ་དག་གི་མདུན་སར་རྒྱུན་མཆོད་སྣང་གསལ་ཞུགས་མེའི་མཆོད་པ་འབུལ་བའི་རྟེན་དུ་སྦྱར་བ་ཐུགས་གཤིས་སུ་ལགས་པས། དེ་ནས་སྐབས་ཤིག་ཏུ་སྤྲུལ་སྐུ་བློ་ལྡན་སྙིང་པོས་རྫུ་འཕྲུལ་གྱིས་བཞེངས་པའི་ཕྱག་བྲིས་ངོ་མ་རྣམ་མཁྱེན་རྒྱལ་བའི་རྟོགས་བརྗོད་དྲི་མེད་གཟི་བརྗིད་དུམ་པ་བཅུ་གཉིས་དང་། མི་ནུབ་མཚན་མདོ་དུམ་པ་བཞི་བཅས་གཡར་པོ་ཞུས་ཏེ་ལེགས་པར་ཟབ་བྲིས་བཞེངས་སུ་གསོལ། དེ་ནས་སྐབས་ཤིག་ནུབ་ཅིག་གི་ཉམས་སྣང་དུ་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པ་ཤིན་ཏུ་རྒྱ་ཆེ་བ་ཞིག་གི་ནང་དུ། རིན་པོ་ཆེའི་ཁྲི་མང་པོའི་སྟེང་དེར། རིག་འཛིན་དཔའ་བོ་མཁའ་འགྲོ་ཐམས་ཅད་གྲལ་ཤར་དུ་བཞུགས་པར་གཟིགས་ཤིང༌། དེའི་གཡས་གྲལ་དེར་གསང་བ་འདུས་པ་དང་བདེ་ཆེན་གླིང་པ་སོགས་བཞུགས་པ་ལ་རང་གིས་དད་པ་དང་དགའ་སྤྲོ་བསམ་གྱིས་མི་ཁྱབ་པར་ཐོབ་ཅིང་། བདག་གིས་རྒྱལ་བའི་བཀའ་འགྱུར་ཞིག་བཞེངས་སྙམ་པ་ཡོད་པས་མཐར་ཐོན་ནམ་ཞུས་པས་མཐར་ཕྱིན་པར་ཡོང་བའི་ལུང་བསྟན་ཀྱང་ཐོབ་པར་གསུངས། དེ་ནས་སྐབས་ཤིག་ཏུ་ཧོར་སྡེ་སྤྱི་ཡིས་གཏེར་སྟོན་ཆེན་པོ་བདེ་ཆེན་གླིང་པ་མཆོག་མཆོད་གནས་སུ་གདན་དྲངས་སྐབས་སུ་བདེ་གླིང་མཆོག་ནས་རྗེ་དམ་པ་ཉིད་ལ་ཁྱོད་བདག་དང་སྔོན་ནས་འབྲེལ་བའི་ལས་ཅན་སེམས་དཔའ་ཉེར་ལྔའི་ནང་གསེས་ཡིན་པ་དང་པན་ཆེན་ནམ་སྙིང་གི་སྤྲུལ་པ་ཡིན་ཚུལ་སོགས་གསུངས་ཏེ་ཞབས་བརྟན་གསོལ་འདེབས་འདི་སྐད་དུ་བསྩལ་ཏེ། ༈གང་གི་སྲས་བཅས་རྒྱལ་བའི་ཐུགས་རྗེའི་མཚོར། སྙིང་རྗེས་རབ་སྲུབ་ས་བཅུའི་སེམས་དཔའ་ཆེ། ལུང་ཟིན་སྤ་ཡི་རིག་པ་འཛིན་པའི་གཤེན། ཉི་མ་འབུམ་གསལ་བསྐལ་བརྒྱར་འཚོ་བཞེས་གསོལ། ཞེས་པ་དང་གཞན་ཡང་གཏེར་རྫས་བྱིན་རྟེན་ཁྱད་པར་འཕགས་པ་མང་དུ་གནང་ཞིང་བླང་འདོར་གྱི་བསླབ་བྱ་ཡང་མང་དུ་གདམས། ཡང་མཚམས་ཤིག་ཏུ་རྩ་གསུམ་དགོངས་པ་འདུས་པ་དང་དེའི་ཚེ་སྒྲུབ་སྦྲེལ་མའི་བསྙེན་སྒྲུབ་བརྩོན་སྐབས་སུའང་། མ་སྲིང་མཁའ་འགྲོའི་ཞལ་གྱི་དཀྱིལ་འཁོར་གཟིགས་ཤིང་ཞལ་ནས་ཀྱང༌། འདི་སྤྲུལ་སྐུ་བློ་ལྡན་སྙིང་པོའི་ཚེ་རྫས་ཡིན་གསུངས་ནས་ཤོག་ཆག་གཅིག་འཆི་མེད་ཚེ་ཡི་དངོས་གྲུབ་ཏུ་སྦྱིན། ཡང་སྐབས་ཤིག་སྲིད་རྒྱལ་དྲིའུ་དམར་མོ་རྒྱན་དང་ཆ་ལུགས་རྫོགས་ཤིང་འོད་ཟེར་མེ་དཔུང་རབ་འབར་ཀློང་། ཁྲག་མཚོ་ཁོལ་མའི་དབུས་ནས་ཞལ་མངོན་པར་གཟིགས་པས་དེ་ཚུན་ལྷག་པའི་སྲུང་མ་དེ་ཉིད་རྒྱུན་དུ་ཆགས་མེད་ཀྱི་གསོལ་མཆོད་འབད་ནས་སྒྲུབ་པའི་དམ་བཅའ་ཕུལ། དེ་ནས་རྗེ་དམ་པ་ཉིད་ཀྱི་ཚེ་རབས་ཀྱི་བླ་མ་ཨོ་རྒྱན་བདེ་ཆེན་གླིང་པའི་མདུན་ས་ནས། བདེར་གཤེགས་དགོངས་པ་འདུས་པའི་དབང་ལུང་ཁྲིད་བཅས་ཟབ་རྒྱས་གསན་གྲུབ་མཐར། བླ་མ་བདེ་གླིང་མཆོག་གིས་ཀྱང་རྗེ་དམ་པ་དེ་ཉིད་ཀྱི་༼སྐྱེས་རབས་ཀྱི་ཕྲེང་བ་གསོལ་འདེབས་སྐལ་བཟང་ལྷ་ཡི་རྔ་བོ་ཆེ༽ཞེས་བྱ་བ་འདི་སྐད་ཅེས་བསྩལ་ཏེ།
༈རབ་འབྱམས་སེམས་ཀྱི་མཁའ་དབྱིངས་རྒྱལ་ཀུན་གྱི།
སྤྲོས་བྲལ་གནས་ལུགས་དབང་པོའི་གཞུ་ལྟར་བཀྲ།
སྒྱུ་འཕྲུལ་རོལ་པའི་འཁོར་ལོའི་མགོན་པོ་གང༌།
ལྷ་བོན་ཡོངས་སུ་དག་པར་གསོལ་བ་འདེབས།
རྒྱལ་བ་ཀུན་གྱི་ཕྲིན་ལས་གར་མཁན་པ།
སྡེ་སྣོད་བཀའ་ཡི་ཤིང་རྟའི་སྲོལ་ཆེན་བདག
སྐད་གཉིས་སྨྲ་བའི་ལམ་འབྱེད་འགྲོ་འདུལ་གྱི།
ཡོངས་འཛིན་ཤད་པུ་ར་ཁུག་ལ་གསོལ་བ་འདེབས།
བོད་དང་བོད་ཆེན་བཀའ་ཡི་མཛོད་འཆང་བ།
ཐུ་བོར་གྱུར་པ་ཀུན་གྱི་འདུས་སོ་གཅིག
བདག་ཉིད་ཆེན་པོ་ཡོ་གྲགས་ཡ་གྱལ་རྗེ།
མེ་ལྕམ་བདེ་ལྡན་སྐུ་ལ་གསོལ་བ་འདེབས།
གདུལ་དཀའ་བཀའ་བཞིའི་རྟེན་འབྲེལ་ཤར་བའི་ཚེ།
གཡུང་དྲུང་བོན་ལ་ཤེས་རབ་རྩལ་ཐོབ་པ།
འདྲ་མིན་གྲུབ་མཐའི་སྡེ་ལས་རྣམ་པར་རྒྱལ།
ནམ་མཁའ་དབང་ལྡན་སྐུ་ལ་གསོལ་བ་འདེབས།
གཞི་ཡི་གནས་ལུགས་མཁའ་ལྟར་སྤྲོས་བྲལ་ཀློང༌།
ལམ་གྱི་ཤེས་བྱ་ཉི་མའི་གཟི་འབར་བ།
འབྲས་བུ་དོན་གཉིས་ལྷུན་གྲུབ་སྐྱེས་ཆེན་པོ།
སུརྱཱ་ཁ་རིའི་སྐུ་ལ་གསོལ་བ་འདེབས།
དེ་ལྟར་སྐྱེ་བ་བརྒྱུད་པར་བཅས་རྣམས་ལ།
གསོལ་བ་བཏབ་པས་དོན་གཉིས་ལྷུན་གྲུབ་སྟེ།
དཔལ་ལྡན་བླ་མའི་སྐུ་ཚེ་ཕྲིན་ལས་རྒྱས།
གདུལ་བྱའི་ཡུལ་དུ་བཀའ་འཁོར་རྣམ་གསུམ་བསྐོར།
བདག་སོགས་རྫོགས་ལྡན་དང་པོའི་དགའ་སྟོན་ལ།
སྐལ་བཟང་སྤྱོད་པའི་བཀྲ་ཤིས་འབར་གྱུར་ཅིག
ཅེས་རྗེ་དམ་པ་ཉིད་ཀྱི་སྐྱེས་རབས་གང་ཡིན་ངོས་འཛིན་གནང་སྟེ་གསུངས་སོ། དེ་ནས་རྗེ་དམ་པ་ཉིད་ཀྱིས་གསས་ཁང་རི་ཁྲོད་བཀའ་སྟེགས་གསང་བ་བདེ་ལྡན་ཁྲོད་བཞེངས་བསྐྲུན་མཐར་ཕྱིན་པར་མཛད། ཡང་སྤ་དགོན་གཡུང་དྲུང་རབ་བརྟན་གླིང་གི་ཉེ་ཆར་གཡས་མདུན་དུ་ལུང་བཟང་མདོ་བྱ་བའི་ལུང་གསུམ་གྱི་གཞི་མདོར། གཏེར་ཆེན་རིན་པོ་ཆེའི་བཀའ་དགོངས་བཞིན་དབལ་ཕུར་འབར་བ་ནག་པོའི་སྒྲུབ་ཆེན་དང་སྲུང་ཟློག་བསད་གསུམ་གྱི་ལས་མཐའ་ཟབ་རྒྱས་ཀྱི་སྒོ་ནས། མཐའ་མི་བཞི་དང་སྲི་དགུ་རྐྱེན་བཅུ་རྣམས་མནན་ཞིང་ཟིལ་གནོན་མཆོད་རྟེན་སྐུ་འབུམ་བཀྲ་ཤིས་འོད་འབར་ཞེས་བྱ་བ་བཟོ་བཀོད་ལེགས་པ་ཀུན་གྱི་དད་མོས་ཕྱག་སྐོར་སྐལ་བཟང་གི་དཔལ་དུ་བཞེངས་སུ་གསོལ་ཏེ་རབ་གནས་བཀྲ་ཤིས་སྨོན་ལམ་གྱིས་གཞི་ཡོངས་སུ་བརྟན་པར་མཛད། ཡང་རྗེ་དམ་པ་ཉིད་ཀྱིས་རྣམ་ཀུན་ཐུགས་ཀྱི་རེ་དོན་བཞིན་དུ་རྩ་བའི་བླ་མ་དྲན་མཆོག་རྣམ་བཞིའི་ནང་ཚན་གཏེར་སྟོན་བདེ་ཆེན་གླིང་པ་རིན་པོ་ཆེའི་བཀའ་ལུང་གིས་ཀྱང་རྒྱལ་བའི་བཀའ་འགྱུར་འབྲི་བཞེངས་མཐར་ཐོན་ཏུ་འགྲུབ་པར་བསྟན་པ་རྣམས་རྒྱུ་རྐྱེན་ཕུན་སུམ་ཚོགས་པ་དང་། མདོ་ལས་ཀྱང་། མ་འོངས་མཐའ་མའི་དུས་སུ་ནི། ང་ཉིད་ཡི་གེའི་གཟུགས་སུ་གནས། ང་ཡིན་སྙམ་དུ་ཡིད་བྱོས་ལ། དེ་ཚེ་དེ་ལ་གུས་པ་བསྐྱེད། ཅེས་གསུངས་པའི་དོན་བཞིན་འཇིག་རྟེན་ཆེ་སྙན་ཀུན་སློང་གི་གཞི་རུ་མ་བྱས་པ་ད་ལན་རྒྱལ་བའི་བཀའ་ལུང་ཟབ་མོ་འདི་དག་སྐལ་བཟང་ལོངས་སྤྱོད་ཀྱི་དཔལ་དུ་བཞུགས་པ་ལ་ཐུགས་དགྱེས་མཉེས་ཆེན་པོས་གུས་པ་རབ་ཏུ་བསྐྱེད་དེ། ལུས་ཅན་ཐམས་ཅད་མཐར་ཐུག་བྱང་ཆེན་གྱི་གོ་འཕང་མངོན་དུ་བྱ་བ་དང་། དེ་མ་ཐོབ་བར་དུ་ཚེ་རབས་ཀུན་ཏུའང་སངས་རྒྱས་ཀྱི་བསྟན་པ་གཡུང་དྲུང་བོན་རིན་པོ་ཆེ་འདི་ལ་ཐོས་བསམ་སྒོམ་གསུམ་དང་འཆད་རྩོད་རྩོམ་གསུམ་གྱི་བགོ་སྐལ་ཡོངས་སུ་སྨིན་པའི་ཕྱིར་དང༌། རྣམ་མཁྱེན་རྒྱལ་བ་གཤེན་རབ་ཀྱི་བསྟན་པ་འདི་ཉིད་འཇིག་རྟེན་གྱི་ཁམས་སྤྱི་དང་། བྱེ་བྲག་ཏུ་ཞང་ཞུང་དང་རུ་བཞིའི་བོད་དང་བོད་ཆེན་པོའི་ལྗོངས་འདིར་མི་ནུབ་བསྟན་པའི་རྒྱལ་མཚན་ཁྱབ་གདལ་དུ་འབར་བའི་སླད་དུ། དགུང་ལོ་སོ་བཞི་སྟེ་སྤྱི་ལོ་༡༨༨༧མེ་མོ་ཕག་གི་ལོའི་ཟླ་བ་ལྔ་པར་རྒྱལ་བའི་བཀའ་འབུམ་ཆེན་མོ་བཞེངས་པར་ལས་གཞིའི་དབུ་བརྩམས་ཏེ། རྗེ་དམ་པ་ཉིད་ཀྱི་གཞན་དོན་དུ་རྒྱལ་བའི་བཀའ་ལུང་ཟབ་མོའི་དཀྱིལ་འཁོར་ཕྱི་ནང་གི་དབང་དང་། གདམས་པ་འཆད་ཁྲིད་བསྟན་སྦྱིན་རང་རང་དང་མཐུན་པའི་རིམ་གྲོ་བཅས་སྨིན་གྲོལ་གྱི་གསོས་སུ་བཀའ་དྲིན་བསྩལ་བ་ལས། དད་མོས་ཚོགས་བསགས་དུ་ཕུལ་བའི་དངོས་འབྱོར་ཇི་སྙེད་གྱུར་རོ་ཅོག་ཡིག་བྲིས་བ་སུམ་ཅུ་སོ་གྲངས་ལ་ཟས་ཡོན་དུ་སྦྱར་ཏེ་བཞག དེ་ནས་འགྲོ་དོན་དུ་ཕེབས་པའི་མཚམས་ཤིག་ཏུ་ཟླ་ཕུ་སྤུ་རྒྱལ་གངས་བཟང་གི་དབུ་རྩེ་ནས། འཇའ་འོད་ལྔ་ལྡན་གྱི་བ་ཐག་ཤིན་ཏུ་གསལ་བར་ཟུག་པ་ཀུན་གྱིས་མཐོང་ཡུལ་དུ་གྱུར། རྗེ་དམ་པ་ཉིད་ཀྱིས་ཀྱང་འོད་ལྔའི་གཞའ་གུར་ཤིན་ཏུ་གསལ་ཞིང་འཚེར་བའི་དབུས་སུ། འཆི་མེད་དྲན་པ་ཡབ་སྲས་གསུམ་འོད་ཀྱི་སྐུ་རུ་ཞལ་ཕྱག་རྒྱན་དང་ཆ་ལུགས་རྣམས་མ་འདྲེས་པ་རབ་ཏུ་གསལ་བར་བཞུགས་པ་གཟིགས་ཤིང༌། ཞལ་ནས་ཀྱང་འདིར་དུས་འབབ་ཀྱི་གནས་ཆེན་གསང་ཆེན་དངོས་ཀྱི་ཞིང་ཁྱད་པར་ཅན། འདི་ཉིད་ལ་ཕྱག་སྐོར་མཆོད་འབུལ་གྲུབ་ཚད་སྒྲིབ་སྦྱོང་ཚོགས་རྫོགས་བླ་མེད་ཐར་བདེ་ཐོབ་པ་སོགས་ཀྱི་དགོས་པ་དུ་མ་དང་ལྡན་པས། ཀུན་ལ་ཡང་ཡང་བསྐུལ་བ་གནང་དགོས་པར་ལུང་བསྟན་ཐོབ། སྐབས་དེར་རྗེ་དམ་པ་ཉིད་ཉམས་འཕེལ་བ་སྣང་བ་གསལ་བ་ཐུགས་དགོངས་ལ་མི་ཕྱེད་པའི་དད་པ་རབ་ཏུ་ཐོབ་པས། ཐུགས་ཀྱི་གསང་མཛོད་ནས་དགོངས་གཏེར་བརྡོལ་ཏེ་གནས་ཆེན་སྤུ་རྒྱལ་གངས་བཟང་གི་གསོལ་འདེབས་བསམ་པ་མྱུར་འགྲུབ་ཅེས་བྱ་བ་འགྲོ་བའི་སྐལ་བཟང་དུ་ལྗགས་རྩོམ་གནང༌། དེ་ནས་ས་མོ་གླང་གི་ལོའི་དཔྱིད་ཀར་བྲིས་རྒྱང་པད་བྲག་དམར་པོའི་རི་ཁྲོད་བཀའ་སྟེགས་གསང་བ་བདེ་ལྡན་ཁྲོད་དུ། རྒྱལ་བའི་བཀའ་འགྱུར་བཞེངས་འཕྲོ་མ་ལྷག་པར་ལེགས་པར་བཞེངས་སུ་གསོལ་བའི་མཛད་མཐར་གྲུབ་པའོ། དེ་ལ་ཡང་ཕུན་ཚོགས་མདོ་སྡེ་ལ་པོད་ལྔ་བཅུ་ང་ལྔ། རྒྱས་པ་འབུམ་སྡེ་ལ་པོད་བདུན་ཅུ་དོན་བདུན། ཟབ་མོ་སྔགས་སྡེ་ལ་པོད་ཉི་ཤུ་རྩ་གཅིག བླ་མེད་སེམས་སྡེ་ལ་པོད་གསུམ་བཅས་བསྡོམས་པོད་གྲངས་ཆིག་བརྒྱ་དང་ལྔ་བཅུ་ང་དྲུག་ཡོད་པར་གསུངས། དེ་དག་གི་དཀར་ཆག་ལ་ཡང་རྗེ་དམ་པ་ཉིད་ཀྱིས་བསྐུལ་བ་ལས་བདེ་ཆེན་གླིང་པས་མཛད་པ་དཀར་ཆག་སྲིད་པའི་སྒྲོན་མེ་གཞོན་ནུའི་འཁྲི་ཤིང་ཕྱོགས་ལས་རྣམ་པར་རྒྱལ་བ་ཞེས་པ་ཞིག་ཀྱང་ཡོད་པར་མངོན། ཡང་ལྕགས་ཕོ་སྟག་གི་ལོ་དེར་བསྟན་སྦྱིན་རྣམས་ནས་དངོས་འབྱོར་གྱི་མཆོད་པ་རྒྱ་ཆེར་བྱུང་བ་རྣམས། རྒྱལ་བའི་བཀའ་བརྟེན་ཆེན་མོ་བཞེངས་རྒྱུར་མཆོད་ཡོན་འབུལ་བའི་ཐུགས་བསྐྱེད་གནངས་ཏེ་འབྲི་བཞེངས་ཕྲིན་ལས་གྱི་དབུ་བརྩམས། དབུ་ལྡེབས་རྣམས་སུ་གསེར་བྲིས་གནང་ཞིང་རྗེ་དམ་པ་ཉིད་ཀྱི་ལྕམ་མོ་གཡུང་དྲུང་འོད་གསལ་སོགས་ནས་བཀའ་བརྟེན་གྱི་དབུ་ཡི་ཞལ་ཁེབས་དང་། གདོང་དར་རྣམས་དར་གོས་སྤུས་ལེགས་ལས་གྲས་དྲུབ་ལེགས་པར་གནང་ཞིང་བརྒྱན། དེ་ནས་ལྕགས་མོ་ཡོས་ལོའི་དཔྱིད་ཀར་རྒྱལ་བའི་བཀའ་བརྟེན་ཆེན་མོར་བྲིས་བཞེངས་མཐར་ཕྱིན་དུ་གྲུབ་པའོ། དེ་ལ་ཡང་སྤོང་ལམ་མདོ་སྡེའི་བཀའ་བརྟེན་ལ་པོད་སུམ་ཅུ་སོ་བཞི། སྒྱུར་ལམ་སྔགས་སྡེའི་བཀའ་བརྟེན་ལ་པོད་བརྒྱ་དང་བདུན་ཅུ་དོན་གཅིག གྲོལ་ལམ་སེམས་སྡེའི་བཀའ་བརྟེན་ལ་པོད་སུམ་ཅུ་ཐམ་པ། བཀའ་གཏེར་ཚད་མར་གྱུར་པའི་བོན་གསར་མར་གྲགས་པ་ལ་པོད་བཞི་ཅུ་ཐམ་པ། རིག་གནས་ལ་པོད་བརྒྱད། བཀྲ་ཤིས་སྨོན་ལམ་དང་དཀར་ཆག་སྒྲིག་རིམ་རྣམས་བསྡུས་པའི་པོད་གཅིག་བཅས་བསྡོམས་གྲངས་པོད་བརྒྱ་ཕྲག་གཉིས་དང་བརྒྱད་ཅུ་གྱ་བཞི་ཡོད་པར་གསུངས་སོ། དེ་ཡི་དཀར་ཆག་ནི་སྤ་སྟོན་དྲུང་མུ་དམུ་ཨུན་གྱིས་སྦྱར་བ་སྒྲིག་རིམ་རྟ་བདུན་དབང་པོ་ཞེས་པ་ཞིག་ཡོད་པར་གསུངས་སོ། མུ་དགོད་བྱ་རྒྱུ།
