གཤམ་དུ་གངས་སྙུག་ལགས་ཀྱིས་ལན་སློག་པ་ནི་
སྣང་བ་ཐམས་ཅད་སེམས་ཀྱིས་བཟོས་པའི་ཚུལ།།
སྣང་བ་ལྡིང་ལྡིང་དེ་ཚོས་ག་ལ་གོ།།
དགེ་སྡིག་སྐྱོན་ཡོན་སེམས་ཀྱིས་མ་བཞག་པའི།།
སེམས་མེད་བེམ་པོའི་བགོ་སྐལ་ནམ་ཞིག་ལྷག།

ཐག་ཁྲ་སྦྲུལ་དུ་འཁྲུལ་དེ་ལོག་རྟོག་དཔེར།།
མཁས་པ་གོང་མས་དཔེ་ཆའི་དགོས་མཁོར་བཞག།
དེ་རིང་སྙུག་ཟོར་གྲོགས་ཀྱིས་ཁྱོད་བཀོལ་ཏེ།།
སྙུག་གུས་བྲིས་པའི་རི་མོར་རྒོལ་སྙམ་ཞིག།

སེམས་ཀྱིས་བཞག་ཚུལ་གོ་བ་ཡོད་མེད་དེ།།
སེམས་ཀྱི་དངོས་པོ་ཕྱི་རུ་འཆར་བ་ཡི།།
སེམས་ཀྱི་རྩལ་ལས་འཁྲུངས་པའི་རྩོམ་རིགས་ལས།།
སེམས་ཀྱི་གོ་བ་ཅན་ལ་འགྲེལ་ཞིང་འཆད།།

ཐག་ཁྲར་སྦྲུལ་དང་སྦྲུལ་ཕུང་སྦྲུལ་ལ་སོགས།།
གང་ཞིག་གནད་ལ་གང་མིང་གདག་པའི་ཚུལ།།
རང་འཛིན་བློ་ཡིས་བཞགས་པ་མི་བདེན་ན།།
གཅིག་མིན་སྟོང་གི་སྐད་རིགས་ཇི་ལྟར་འགྱུར།།

ཁྱོད་ལ་སྤྲིངས་པའི་འཕྲིན་གྱི་གཏམ་ཐུང་འདི།།
ཁྱོད་དང་ང་གཉིས་རིགས་པའི་གླེང་སྟེགས་ལས།།
ཁྱོད་ལ་མི་འདོད་ཟུར་ཟའི་ཚིག་སྐམ་མིན།།
ཁྱོད་ཉིད་དགའ་བའི་ངོ་བསྟོད་དེ་བས་མིན།།

གཤམ་དུ་གངས་སྙུག་ལགས་ཀྱིས་ལན་སློག་པ་ནི་
ཀ་བའི་གདུང་འདེགས་བུམ་པའི་ཆུ་སྐྱོར་སོགས།།
གདོད་ནས་གྲུབ་ཚུལ་རིག་གཞུང་ཞིག་གི་འགྲོས།།
འོན་ཏེ་ཀ་བ་བུམ་པའི་དངོས་མཚན་དེ།།
སེམས་ཀྱིས་མ་བཏགས་ལོག་ནས་རྙེད་པ་མིན།།

མི་རིགས་སྟོང་ངམ་མི་ནི་སྟོང་ཕྲག་ཏུ།།
ཐ་སྙེད་འདི་དག་གཅིག་གིས་གཅིག་བསླབས་ཏེ།།
གཅིག་གཅིག་གཉིས་གཉིས་རིམ་པར་ཤེས་ཙམ་ལས།།
ཀ་བའི་ངོས་ནས་ཀ་བ་ངོ་སྤྲོད་་མིན།།

གཞུང་ལུགས་ཤིག་གི་དགོངས་དོན་ཡིན་སྙམ་པའི།།
ཀ་བས་གདུང་འདེགས་བུམ་པས་ཆུ་སྐྱོར་སོགས།།
ཐ་མལ་བློ་ཡི་སྣང་ཚུལ་བཤད་པ་ལས།།
ཡིན་ལུགས་དངོས་ཁམས་གནས་ཚོད་ག་ལ་ཡིན།།

ལུག་མགོ་གསེར་དང་མཇེ་མགོ་ལྷར་སྒོམ་པ།།
གནད་དུ་སོང་ཚེ་དོན་ལ་འབྱོར་བ་སྟེ།།
བུམ་པ་རྟེན་གཏོར་དཀྱིལ་འཁོར་བཞེངས་བཀོད་ལས།།
ལྷ་དང་གཞལ་ཡས་འགྲུབ་པ་ལུང་གིས་འཆད།།

གུ་ཡང་བློ་ཡིས་དཔྱད་དེ་བལྟས་པའི་ཚེ།།
ཀ་བའི་ཐ་སྙེད་ཀ་འཛིན་བློ་ཡིས་བཏགས།།
ཀ་འཛིན་ཤེས་པ་ཀ་བར་བརྟེན་ནས་བྱུང་།།
ཡུལ་ཤེས་རྟེན་འབྱུང་སྣང་བས་བསྐྲུན་ཙམ་མོ།།

གྲོགས་ལོས་བཤད་པའི་ཐ་མའི་ཚིག་བཅད་དུ།།
སེམས་ལ་མ་བརྟེན་ཡུལ་སྟེང་གྲུབ་འདོད་ཅིང་།།
བློ་ཡིས་དཔྱད་ཚེ་གཞི་ནས་ཡུལ་འགྱུར་བའི།།
དོན་དེ་ངོས་བཟུང་གསལ་འགྲེལ་ཤེས་ཚེ་ཤོག།

དེ་ཉིད་ཡུལ་གྱི་ཐ་སྙེད་རུང་མི་རུང་།།
རུང་ན་ཁྱོད་དང་སྦྲེལ་བའི་ཡུལ་ཅན་དགོས།།
མི་རུང་ཡུལ་དུ་བཤད་པ་རང་བཞིན་འགལ།།
ཡུལ་དང་ཡུལ་ཅན་ལྟོས་འཇོག་ཡིན་པས་སོ།།

སྙུག་མིང་ང་ལ་གཏམ་གཞན་ཞིག་ཡོད་དེ།།
སྙུག་གུར་ཟོར་བ་མི་འཚམས་ཀུན་ཤེས་ཤིང་།།
སྙུག་དབལ་འབྱིན་ལ་སྙུག་གྲི་འཚམས་པས་ན།།
སྙུག་ཟོར་མཚན་དེ་སྙུག་གྲིར་བསྒྱུར་ན་མཛེས།།

འདི་ནི་དུས་ཚོད་བརླག་པའི་ལོང་གཏམ་མིན།།
འདི་ནི་གཞན་ངག་བརྐུས་པའི་ཁ་སྒུམ་མིན།།
འདི་ཁྱོད་ཀྱི་རིག་པའི་གསང་གསེང་དུ།།
འདི་འདྲ་རིག་པའི་གཏམ་ལེན་སྒུག་སའོ།།

གཤམ་དུ་གངས་སྙུག་ལགས་ཀྱིས་ལན་སློག་པ་ནི་
ཀ་བའི་གཤིས་ལུགས་བློ་ཡིས་མ་བཏགས་ཞེས།།
བརྗོད་ཀྱིན་བརྗོད་ཀྱིན་ཀ་བའི་གཤིས་ལུགས་ལ།།
མནོ་བསམ་བློ་ཡིས་དཔྱད་པ་རྫོགས་མིན་འདི།།
ངག་སྡོམ་སྨྲ་བའི་ཁྲུང་ཁྲུང་འུར་བ་བཞིན།།


ཀ་འཛིན་རྟོག་པ་ཀ་བ་ལ་བརྟེན་པས།།
ཀ་བ་དང་ཐོག་གྲུབ་པ་འགྲེལ་འདོད་རུང་།།
གདུང་འདེགས་དོན་ནུས་ཀ་བར་འཇོག་མཁན་བློ།།
ཀ་བའི་རྗེས་སུ་གྲུབ་ཚུལ་ཇི་ལྟར་འགྲེལ།།

དང་པོའི་ཡུལ་ཞེས་བཤད་པའི་ཡུལ་དེ་ཉིད།།
གྲུབ་དང་མ་གྲུབ་ཚད་ཀྱིས་གང་གཞལ་བ།།
དོན་དུ་བློ་ངོར་གྲུབ་མིན་བལྟ་ཙམ་ལས།།
གཞན་དུ་གནས་ལུགས་བདེན་དཀྲོལ་སུ་ཡིས་ནུས།།

འདིར་སྣང་ཤེས་བྱའི་ཁམས་ཀྱི་སྣེ་ཁ་ཀུན།།
བྱེ་བྲག་བློ་ཡི་སྣང་ངོར་འཆར་ཚུལ་སྟེ།།
ཐོ་ཡོར་རང་སྟེང་མི་མིན་བློ་ཡིས་བཞགས།།
མི་རུ་འཛིན་མཁན་འཁྲུལ་བ་བློ་ཡིས་འདོད།།

ཀ་བ་ཞེས་པའི་ཐ་སྙེད་མ་བཏགས་གོང་།།
ཀ་བའི་གདག་གཞིག་ཙམ་འདོད་དགོས་རུང་།།
དེ་ཉིད་ཀ་བར་སྙམ་པ་འཁྲུལ་དུ་ཐལ།།
ཡིན་མིན་ཁྱོད་འཛིན་སྒྲ་རྟོག་བརྟེན་པས་སོ།།

སྟོད་སྨད་བར་གསུམ་ཡིག་རིས་སྒྱུ་རྩལ་མཁན།།
མཐོང་ཐོས་འབྲེལ་བ་གང་གི་ལག་ལེན་ཁྲོད།།
ཟོར་བས་སྙུག་གུ་བཟོ་ཚུལ་མ་མཐོང་རུང་།།
དྲ་གྲོགས་ཁྱེད་ལ་མཁོ་དེ་དམིགས་བསལ་ཞིག།