ཀ་ཁ་སུམ་ཅུ་སུས་མཛད།
བོད་ཡིག་མཛད་པ་པོ་སུ་ཡིན་གླེང་སློང་གི་ཟིན་བྲིས་ཐུང་ངུ་འདི་ཕྱོགས་ཀྱི་ཤེས་ལྡན་པའི
་སྡེ་བར་བགྲོ་གཞི་རུ་ཆེད་དུ་དམིགས་ནས་བྲིས།
སྤྱིར་བཏང་ནས་བཤད་པ་ཡིན་ན། ད་ལྟ་ང་ཚོས་སྤྱོད་བཞིན་པའི་བོད་ཀྱི་སྐད་ཡིག་
འདི་ཉིད་ཀྱི་སྲོལ་གཏོད་པ་པོ་བོད་པ་རང་ཉིད་ཡིན་པས་མ་ཚད་འཛམ་གླིང་གི་མི་
རིག་སྐད་ཡིག་ཁྲོད་ནའང་ཆེས་སྔོན་ཐོན་གྲལ་དུ་སླེབས་ཡོད་པའི་ཚུལ་མཁས་རྣམས
་མ་བགྲོས་གཅིག་ཏུ་སྨྲ།ཡིན་ནའང་བོད་པའི་ནང་ཁུལ་དུ་དེ་ཉིད་ཀྱི་སྲོལ་གཏོད་མཁན་
མི་ངོ་མ་དེ་སུ་རེད་ཟེར་ན་རྩ་བའི་ཆ་ནས་ཧ་ལམ་ཕྱོགས་ཁག་གཉིས་སུ་གྱུར་ཡོད་པ་རེད།
དང་པོ་བོན་གྱི་ཆོས་ལུགས་རྒྱུད་འཛིན་མཁས་དབང་རྣམས་ཀྱིས་གཙོས་པའི་རིག་
པ་སྨྲ་བ་ཁག་ཅིག་གིས་སྟོན་པ་གཤེན་རབ་ཀྱིས་མཛད་པར་བཤད་ཡོད།
གཅིག་ཤོས་ནི་བན་ཆོས་ཀྱི་རྒྱུད་འཛིན་མཁས་དབང་རྣམ་པས་བོད་རྒྱལ་
སྲོང་བཙན་གྱི་བློན་པོ་ཐུ་མིས་གསར་གཏོད་མཛད་ཅེས་ཟེར་བ་སོགས་ཕྱོགས་
སོ་སོ་ནས་རྩ་བའི་ཁུངས་ལུང་རེ་བཙལ་ཏེ་དགག་སྒྲུབ་ཀྱི་རྣམ་བཞག་མང་དུ་བྱེད་ཀྱིན་ཡོད།
ངས་འདི་ན་འདོད་ཚུལ་གཉིས་པོ་བན་བོན་ཆོས་ལུགས་མཁན་པོ་ཕྱོགས་
གཉིས་སུ་བཤད་པ་དེ་དག་ཆོས་བཤད་དུས་འཇིག་རྟེན་དང་།
འཇིག་རྟེན་བཤད་དུས་ཆོས་ཤོད་པ། ཆོས་དང་འཇིག་རྟེན་བསྲེ་བའི་ལུགས་ཀྱང་
དེ་བས་མ་ཡིན། འོ་ན་ཇི་ལྟར་ཞེ་ན། ད་ལྟ་བོད་ཡིག་སྐོར་གྱི་དཔྱད་གཞིའི་
ཡིགརིགས་དེ་དག་གི་མཛད་པ་པོ་ཆོས་ལུགས་མཁན་པོ་ཚོ་ཡིན་པས་
མ་ཚད་བརྡ་སྤྲོད་ཀྱི་གཞུང་དེ་ཀུན་ཀྱང་ཆོས་ཀྱི་གཞུང་ལུགས་དང་
འབྲེལ་ནས་ཡོད་པས་ཡིན།བོད་འདིར་བར་སྐབས་ཤིག་ཏུ་ཤེས་རིགས་
སློབ་གཉེར་བྱེད་གནས་ཕལ་ཆེ་བ་དགོན་སྡེ་རུ་ཡིན་པ་དང་།སློབ་གཉེར་
རྒྱུད་འཛིན་པསེར་མོ་བ་དང་མི་སྐྱའི་རིགས་གཉིསསུ་འདུསཡོདཧ་ལམ་དགོན་པའི་
ཁོར་ཡུག་དུ་གནས་ཤིང་འཚོ་བའི་ཕྱིར་དུའོ།།དེ་ལས་གཞན་པའི་ད་ལྟ་ནང་བཞིན་
དགོན་གནས་མ་ཡིན་པའི་ཆེ་འབྲིང་ཆུང་བའི་སྒྲིག་གཞི་ཅན་གྱི་སློབ་གླིང་སོགས་
ཞེ་དྲག་མེད་པའི་རྐྱེན་གྱིས་རེད།འོན་ཏེ་ད་ལྟའི་སློབ་གླིང་ཆེ་ཁག་དག་ཏུའང་བོད་ཀྱི་ཤེས་
རིག་སྤྱི་དང་བྱེ་བྲག་བོད་ཡིག་སྐོར་ཞིབ་འཇུག་བྱ་དགོས་ཚེ་བོད་རང་གི་ཆོས་ལུགས་ཀྱི་
གཞུང་ཁག་དང་མ་འབྲེལ་བ་མེད་པའི་སྒོའི་ནས་གླེང་རྒྱུའི་གོ་སྐབས་ཀྱང་ཕྲ་སྟེ། གོང་ནས་
བཤད་པ་བཞིན་དཔྱད་གཞིའི་ཡིག་རིགས་དེ་དག་ཆོས་རྒྱུད་དང་འབྲེལ་ནས་ཡོད་པས་སོ། །
དེ་བཞིན་ད་ལྟའི་བོད་རིག་པ་མཁས་ཅན་གྱི་མིང་ཡོད་པ་དེ་ཚོའི་སེམས་ནང་ལ་སྔར་
གྱི་ཆོས་ལུགས་ཕྱོགས་འཁྱེར་མཁན་དེ་དག་གི་བག་ཆགས་བརྟན་པོ་ཞིག་སིམ་ནས་
བསྡད་ཡོད་འདུག་པ་ནི་ཁྱད་མཚར་བ་ཞིག་རེད།དེའང་གནའ་མིའི་ཁ་རྒྱུན་དུ།ཤྭ་ཁྱིས
་ཤ་ལ་བལྟ་ཟུག་དུས།།བུལ་ཁྱིས་དེ་ལ་བལྟ་ནས་ཟུག།ཟེར་བ་ནང་བཞིན་ཏེ།སྔོན་གྱི་ཆོས་ལུགས་
མཁན་པོ་དེ་དག་ནི་སྐབས་དེའི་ཚོ་པ་དང་མི་སྡེའི་དཔོན་པོའང་ཡིན་ཕྱིར་ཕྱོགས་དུ་མ་ཞིག་
ནས་རང་གི་ཐོབ་དང་གོ་གནས་དཔལ་འབྱོར་དང་མངའ་ཐང་སོགས་ཀྱི་ཆེད་དུ་གནས་སྐབས་
ཀྱི་ཐབས་ལམ་སྣ་ཚོགས་བཙལ་ཏེ་ཕྱོགས་གཅིག་ནས་ཤེས་རིག་ལ་ཞབས་འདེགས་
ཞུས་ཡོད་ལ།ཕྱོགས་གཅིག་ནས་གནས་སྐབས་སོ་སོའི་མངའ་ཐང་གི་ཆེད་དུ་
ཤེས་རིག་དང་ལོ་རྒྱུས་དུ་མ་ཞིག་ལ་བཅོས་བསླད་ཀྱང་མཛད་ནས་ཕེབས་སོང་བ་
ཡིན་འདུག དེ་འདྲ་ཡིན་ཙང་དེའི་དུས་ན་དགོས་པ་དང་དམིགས་ཡུལ་ཡོད་ཡོད་
འདྲ་ཞིག་སྣང་ནའང་།དེང་གི་དུས་ན་ཁོ་ཚོའི་ལད་ཟློས་ཁོ་ན་བྱས་ཏེ་སྡོད་པ་ནི་
ཐོབ་རྒྱུ་ཅི་ཡང་མེད་ཅིང་མི་གཞན་གྱི་མིག་མདུན་ན་ཧོལ་རྒྱུག་ཅན་ཞིག་ཏུ་
མཐོང་རྒྱུ་ལས་གཞན་ཅི་ཞིག་མཆིས།ཡང་སྙིང་ང་ཚོས་ལག་ལེན་གང་འདྲ་ཞིག་བྱེད་
དགོས་མིན་སྐོར་ཞིབ་འདང་རེ་བརྒྱབ་ནས་བཤད་པ་ཡིན་ན།བསྐྱར་བཤད་དང་
ཧོལ་རྒྱུག་ཁོ་ནས་ཡོང་ཐབས་མེད་པའི་ངོས་འཛིན་གསལ་དུ་བཏང་ཐོག་
བདེན་པའི་ལམ་ཁ་གཞན་ཞིག་ཉུལ་རྒྱུ་དེ་རེད།གོང་ནས་བཤད་པའི་གླེང་ཕྱོགས་གཉིས་ལ་
འདི་ནས་མར་བོན་དང་འབྲེལ་བའི་སྐད་ཆའི་ཕྱོགས་ལ་ཀ་པ་དང་།བན་དང་འབྲེལ་བའི་སྐད་
ཆའི་ཕྱོགས་ལ་ཁ་པ་ཞེས་ཀློག་བདེའི་ཆེད་དུ་འབྲི་རྒྱུ་ལགས་ན་ཡིད་འཇག་ཡོད་པ་ཞུ་རྒྱུ་ཡིན།
ཕྱོགས་ཁ་པ་ནས་བོད་རྗེ་སྲོང་བཙན་གྱི་མཛད་པའི་ནང་དུ་ཐར་པ་དང་ཐམས་ཅད་
མཁྱེན་པ་སྒྲུབ་པའི་ཐབས་ལམ་ཉག་གཅིག་གི་གཞུང་ལུགས་ཏེ་རྒྱ་གར་ནས་དམ་ཆོས་
གདན་དྲངས་པ་དང་།དེ་བཞིན་ཁྱིམ་མཚེས་རྒྱལ་ཁབ་ཁག་ནས་ཤེས་རིག་
ཕུན་སུམ་འཚོགས་པོ་ཞིག་ནང་འདྲེན་བྱས་ཚུལ་གྱི་ལོ་རྒྱུས་ལ་གསལ་འགྲེལ་
བྱེད་རྒྱུ་གལ་གནད་དུ་ཐུག་ཚེ་ཤེས་རིག་གཞུང་ལུགས་ཀུན་གྱི་རྨང་གཞི་ཡི་གེའི་
བྱུང་རིམ་དེ་ནི་གལ་ཆེ་བ་ཞིག་ཏུ་ངེས་ཕྱིར་བོད་རང་ཉིད་ཀྱི་སྐད་ཡིག་དེའང་
ཐོན་མིས་གསར་གཏོད་བྱས་ཚུལ་སོགས་དེའི་གོང་གི་རང་རེའི་མེས་པོ་དུ་མའི་
ཕྱག་རྗེས་དང་མཛད་པ་ལ་སྒྲིབ་གཡོག་ཅིག་མ་བཙལ་ཐུ་མེད་དུ་གྱུར་པ་ཞིག་རེད། སྐད་ཆ་དེས་དང་བ་དྲངས་ཡོང་བའི་མི་མང་དུ་ཕྱིན་པ་དང་ཕྱོགས་ཀ་པའི་
ལོ་རྒྱུས་དང་མངའ་ཐང་ལ་གདེང་འཇོག་ཆུང་དུ་ཕྱིན་རྗེས།ཕྱོགས་ཀ་པ་ནས་སྲོང་
བཙན་ཡར་སྔོན་ནས་བོད་ཡིག་ཙམ་དུ་མ་ཟད་གཡུང་དྲུང་བོན་གྱི་ཆོས་དང་ཤེས་རིག་
གི་གཞུང་ལུགས་ཕུན་སུམ་ཚོགས་པོ་ཡོད་ཚུལ་གྱི་ཁུངས་ལུང་བཙལ་ཏེ་བཟློག་ཏུ་མེད་
པའི་རྒོལ་ལན་ཞིག་བསློག་པ་རེད།དེར་ཕྱོགས་ཁ་པས་རིག་པ་གཞན་ཞིག་བཏང་ཡོད་པ་ནི།
སྲོང་ཡར་སྔོན་དུ་བོད་ལ་ཡི་གེ་ཞིག་ཡོད་པ་དེ་ནི་ཆོས་ཕྱོགས་ཙམ་མ་གཏོག་སྤྱི་ཚོགས་ཀྱི་
འཚོ་བའི་དགོས་མཁོ་སྐོང་མི་ཐུབ་པ་ཞིག་ཡིན་པ།སྲོང་བཙན་གོང་དུ་བོན་གྱི་ཆོས་ལུགས་
ཡོད་ཀྱང་དེ་ནི་ཐར་པ་སྒྲུབ་མི་ནུས་པའི་ཆོས་ཤིག་ཡིན་སྐད་བཤད་པ་སོགས་ཕྱོགས་
དུ་མ་ནས་བོད་ཀྱི་ལོ་རྒྱུས་གསར་དུ་བཅོས་པས་བོད་མི་བྱིངས་རྣམས་མགོ་འཐོམ་པར་གྱུར་། དེས་ཕྱོགས་ཀ་པ་ཡང་མགོ་འཐོམ་ཏེ་སྐད་ཆའི་ལན་རྒྱག་སྟངས་ཐད་གོམ་པ་ཡང་འཁྱར་རེ་
འཁྱོར་རེར་ཕྱིན་པ་ཏེ།ཡ་གིའི་མཁས་ཆེན་ཚོས་བཤད་ནའང་འདྲ།མ་གིའི་མཁས་ཆུང་ཚོས་བཤད་
ནང་འདྲ།མདོ་དྲི་མེད་གཟི་བརྗིད་ལས།ཡིག་འབྲུ་སུམ་ཅུས་བོན་གྱི་ཁོག་ཀྱང་དབུབ།།ཅེས་སོགས་
ཀྱི་ལུང་ཚིག་དེ་བསྐྱར་འདྲེན་ཙམ་དང་སྲོང་བཙན་ཡར་སྔོན་དུ་བོད་ལ་ཡི་གེ་མེད་པ་ཡིན་ན་རྒྱལ་
པོས་རྒྱལ་སྲིད་སྐྱོང་ཐབས་མེད་པའི་གནས་ཚུལ་དེ་ཡང་ནས་ཡང་དུ་གླེང་བཞིན་པའི་གནས་
ཚུལ་དེ་རེད།དུས་རབས་འདིའི་གོང་ཙམ་ན་ཕྱོགས་ཁ་པ་ཧ་ལམ་ཁ་གཅིག་གྲགས་སུ་བོད་ཡིག་
ཐུ་མིས་གསར་གཏོད་བྱས་ཞེས་སྨྲས་ཡོད་ཚོད་རེད་འདུག་མོད་ཀྱང་དེང་གི་དུས་ན་སླེབས་དུས་ཁ་
པའི་ཕྱོགས་མང་པོ་ཞིག་ལ་དེའི་སྐོར་དྭོགས་གཞི་རུ་གྱུར་ཡོད་པས་མ་ཚད།ཀ་པ་དང་ཕྱོགས་
མཚུངས་པར་སྨྲ་མཁན་ཡང་མང་དུ་ཐོན་བཞིན་མཆིས།ཕྱོགས་ཀ་ཁ་གང་ཡིན་མི་ལྟོས་པའི་
མཁས་པ་དུ་མ་ཞིག་གིས་ཡུལ་འོལ་མོ་ལུང་རིངས་བོད་ཁུལ་ཡིན་པ་དང་།སྟོན་པ་གཤེན་རབ་ཀྱང་
བོད་ཀྱི་མི་ཡིན་པར་བཤད།ཀ་པའི་ཕྱོགས་མང་པོ་ཞིག་ལ་དེ་འདྲ་གླེང་ཚེ་གདོང་ཡང་དམར་པོར་
འགྱུར་ལ་ཁད་དེ་སྟོན་པ་གཤེན་རབ་ཀྱི་འཁྲུངས་ཡུལ་འོལ་མོ་ལུང་རིངས་ནི་སྤྲུལ་པའི་ཞིང་
ཁམས་ཤིག་ཡིན་པ་ལས་ཤ་ཁྲག་གདོས་བཅས་ཁུར་ནས་འགྲོ་ས་འདི་ལྟ་བུའི་ས་རྡོ་རི་
བྲག་ཅན་ཞིག་མ་ཡིན་ཞེས་ཁྲེལ་དགོད་ཀྱང་བྱེད་སྲིད་པ་ཞིག་རེད། ཕྱོགས་ཀ་པའི་སྐད་ཆ་ཡོངས་
གྲགས་ལྟར་ན།འོལ་མོའི་གླིང་དུ་སྟོན་པ་གཤེན་རབ་ཀྱིས་དཔའ་བོ་འབྲུ་ལྔ་ལས་འཕྲུལ་ཡིག་
བཞི་བཅུ་གཏན་ལ་ཕབས་ཚུལ་དང་།དེ་ལ་དཔེ་བླངས་ཏེ་སྟག་གཟིག་གི་ཡི་གེ་གསར་དུ་བཟོས།
སྟག་གཟིག་གི་ཡི་གེ་ལ་དཔེ་བྱས་ཏེ་ཞང་ཞུང་གི་ཡི་གེ་གསར་གཏོད་བྱས།ཞང་ཞུང་གི་ཡི་གེ་
ལ་དཔེ་བླངས་ཏེ་བོད་ཀྱི་ཡི་གེ་གསར་དུ་བཟོས་པར་བཤད་དུ་ཡོད་ཀྱང་ཞང་ཞུང་གི་ཡི་གེ་ལས་
བོད་ཡིག་དངོས་སུ་སྒྱུར་པ་པོ་དེ་སྟོན་པ་མཆོག་ཉིད་དམ་ཡང་ན་མཁས་པ་དང་ལོ་ཙཱ་བ་སུ་
ཞིག་ཡིན་པའི་མཚན་འབོད་རྒྱུའི་གསལ་ཁ་ལུང་དང་རིགས་པ་གང་གི་ཐད་ནས་གསལ་བཤད་
དེ་ཙམ་མེད་པ་དང་། དེའི་དེའི་སྐོར་ནས་ཨ་བཤད་ཡང་བཤད་འགའ་བྱས་ཚེ་སྟོན་པ་གཤེན་རབ་
མཆོག་ཉིད་ཀྱང་བོད་ནས་མིན་ཚུལ་དང་།ཁོང་གིས་མཛད་པའི་ཡི་གེ་དེ་ཉིད་གཏན་ལ་
ཕབས་ས་བོད་ཡུལ་མིན་ཚུལ།བོད་དུ་འགྱུར་ཟིན་པའི་ཡི་གེ་དེ་རྒྱལ་ཁབ་མི་གཅིག་པ་དང་མི་
རིགས་དང་སྐད་རིགས་མི་གཅིག་པ་དུ་མ་ཞིག་བརྒྱུད་ནས་ཡོང་ཚུལ།བོད་དུ་དངོས་སུ་སྒྱུར་
པ་པོ་སུ་ཞིག་ཡིན་པའི་མིང་སྨོས་མེད་པ་སོགས་ཀྱི་རྒྱུ་རྐྱེན་ལ་བརྟེན་ནས་མི་མང་པོ་ཞིག་ལ་
སླར་ཡང་དྭོགས་གཞི་རུ་གྱུར་འདུག་པས་སླད་ཕྱིན་ཀ་པ་དང་ཁ་པའི་ཕྱོགས་སོ་སོ་ན་
གྲུབ་མཐའི་ཆགས་སྡང་གིས་མ་བསླད་པའི་ཤེས་རབ་ལྡན་པ་དག་གིས་གོང་གསལ་གྱི་དྭོགས་
གནད་དེ་དག་གི་ཐད་ལ་གནད་སྨིན་བསམ་གཞིག་གི་འབྲས་རྟགས་རེ་འཇོག་ཏུ་རན་ཞེས་
སྨྲ་བ་དང་ཆབས་ཅིག་རེ་ཞིག་མཇུག་བསྡུ་བའོ། །
༢༠༡༢ལོའི་ཟླབ་༦ཚེས་༢༥ཉིན་ཆབ་མདོར་བྲིས།
