སྙིང་གི་རེ་འབོད།

མཚན་དཔེ་ལྡན་པའི་མི་བུ།

གོས་སེར་ན་བཟའི་བདག་པོ།

སྤྲུལ་པའི་སྐུ་མཆོག་ཡིན་ན།

བསྟན་འགྲོའི་དོན་ཆེན་མཛད་རོགས།

ངུར་སྨྲིག་ཚུལ་གོས་མཛེས་པའི།  

དཔྱོད་ལྡན་སྨྲ་བའི་དབང་པོ།

དྲང་བདེན་བཤེས་གཉན་ཡིན་ན།

ཐུགས་བརྩེ་ཀུན་ལ་སྙོམ་རོགས།

མེས་པོའི་དྲིན་གྱིས་བཞགས་པའི།

བཅུ་ཕྲག་རིག་པའི་གཞི་འཛིན།

དོན་གྱི་དཔའ་བོ་ཡིན་ན།

རང་རིགས་སེམས་ལ་བཞག་རོགས།

འོད་གསལ་ལྷ་ཡི་རྒྱུད་འཛིན།

གཤིས་བཟང་དཔལ་གྱིས་ཕྱུགས་པ།

ཡ་རབ་བུ་ཕྲུག་ཡིན་ན།

ཕ་མའི་རེ་མདུན་བསྒྲུབ་རོགས།