དམངས་ཁྲོད་རིག་གནས་ལས་རས་པའི་འཁྲབ་སྟོན་ངོ་སྤྲོད།  

སྤྱིར་བྲོ་དང་དེ་མིན་དམངས་ཁྲོད་ཀྱི་རིག་གནས་གང་ཞིག་ཡིན་ཀྱང་ཐ་སྙད་ལྔ་ལྡན་གྱི་མི་ཞིག་གི་རྣམ་དཔྱོད་ཀྱི་རྩལ་ལས་གྲུབ་པ་ཞིག་ཡིན་ཕྱིར་སྐབས་འདིའི་རས་པའི་སྐོར་བྲོ་ཞེས་པ་འདི་ཡང་དེ་ལྟར་དུ་གྲུབ་པའི་སྲོལ་རྒྱུན་རིག་གནས་ཤིག་ཡིན་ལ། དེ་ལྟར་གྱི་བྲོ་འདི་དམངས་ཁྲོད་ཀྱི་སྲོལ་རྒྱུན་རིག་གནས་གཞན་དག་དང་མི་འདྲ་བའི་ཁྱད་བོན་དུ་མར་ལྡན་ཡོད། དེ་ནི་དོན་དངོས་སུ་བྲོ་འདིའི་ནང་ངོས་སམ་བྲོ་འདིའི་རང་བཞིན་ལ་ཅུང་ཟད་བརྟགས་ཚེ་རང་རེའི་ཡུལ་སྲོལ་གོམ་གཤིས་སམ་ཁྱད་པར་དུ་མེས་པོ་ཚོའི་རིང་ལུགས་ཏེ་བོན་ལུགས་ཀྱི་རང་བཞིན་འགའ་ལྡན་ལ་དམངས་ཁྲོད་དུ་རྒྱ་ཆེར་བེད་སྤྱོད་བྱེད་བཞིན་པའི་གནའ་དེང་གཉིས་ཀའི་སྲོལ་རྒྱུན་ཞིག་ཀྱང་རེད་འདུག་སྟེ། ཐོག་མར་རས་པའི་སྐོར་བྲོ་འདི་འཁྲབ་པའི་ལྟ་གོན་རྩོམ་ཚེ། རྒྱན་གོས་དང་ཕྱག་ཆ་འགའ་གྲ་བསྒྲིགས་བྱེད་དགོས་ལ། དུས་སྐབས་དེ་དང་བསྟུན་ཏེ་དེའི་སྐོར་འགའ་ལ་ཅུང་ཟད་ཙམ་གཞིག་ཚེ་ཕྱག་ཆ་དེ་དག་བྲོ་གར་པ་གཞན་པའི་ཕྱག་ཆ་དང་གཏན་ནས་མི་འདྲ་བར་རྔ་དང་གཤང་སོགས་འཆང་ནས་རྔ་རྡུང་གི་བཤད་པ་ལ་ཡང་གཅིག་རྡུང་གཉིས་རྡུང་ཞེས་འབོད་བཞིན་འཁྲབ་སྲོལ་ཡོད་པ་དེ་དག་མཐོང་ཐོས་ཀྱི་ཡུལ་དུ་གྱུར་ཚེ་ད་གཟོད་ངེས་ཐུབ་ཀྱི་འདུག་ལ། དེ་མིན་ཁྱུང་ཆེན་རིག་པའི་གཤོག་རླབས་ལོ་དེབ་དང་པོའི་སྟེང་དུ། རས་པའི་བྲོ་དེ་ཉིད་བྱུང་ཁུངས་ཐོག་མར་བོན་གྱི་ལྷ་བྲོ་ཞེས་བོན་ལུགས་ཀྱི་གསང་སྔགས་ཀྱི་གཞུང་ལས་བྱུང་བའི་བྲོ་དེ་ལས་བྱུང་བར་བཤད་ཡོད་ལ། རས་པ་འཁྲབ་སྟོན་པ་རྣམས་ཀྱིས་གྱོན་པའི་གོས་དེ་དག་ནི་སྔོན་གྱི་སྔགས་པ་ཕོ་མོ་དག་གི་གོས་ལས་ཅུང་ཟད་འགྱུར་བ་ཐེབས་པའི་གོས་ཤིག་ཡིན་པར་འགྲེལ་འདུག དེ་ལྟར་གྱི་རས་པ་ཞེས་པའི་བྲོ་དེ་ཉིད་ཀྱི་མིང་དེ་ཡང་འབོད་སྲོལ་ཁག་གཉིས་སུ་གྱེས་ཡོད་པ་སྟེ། ༼རལ་པ་༽དང་༼རས་པ་༽ཞེས་གཉིས་སུ་འབོད་བཞིན་ཡོད་པ་ལྟ་བུ་རེད། ཐ་སྙད་དེ་གཉིས་ཀྱི་ཕྱོགས་ནས་ཅུང་ཙམ་བསམ་ན་དོན་དངོས་སུ་རས་པ་ཞེས་པའི་ཐ་སྙད་དེ་ལེགས་པར་སེམས་ཀྱི་ཡོད། ཅིའི་ཕྱིར་ན། མདོ་སྟོད་སྨད་ཀྱི་ཐ་སྙད་སྨྲ་བ་རྣམས་ཀྱིས་རྗེས་འཇུག་ས་ཡིག་ཞིག་སྦྱར་བའི་མིང་ཚིག་དེ་ལྟ་བུ་འབོད་སྐབས་སུ་སྒྲ་གྲགས་ཚུལ་མི་འདྲ་བ་རག་པའི་དབང་དུ་གཏང་ན་གཉིས་སུ་འབྱུང་གི་ཡོད་མོད། དེ་ལྟར་བྲོ་འདིའི་མིང་བཀོལ་སྤྱོད་བྱེད་ཚེ་གོང་གི་རྗེས་འཇུག་ས་ཡིག་སྦྱར་ཡོད་པ་ལྟ་བུའི་སྒྲ་གདངས་མི་འདྲ་བ་གཉིས་སུ་འབྱུང་གི་འདུག་ལ། གོང་ལྟར་བྲོ་འདིའི་མིང་རལ་པ་ཞེས་འབོད་ཀྱི་ཡོད་པའི་དབང་དུ་བཏང་ན་རྗེས་འཇུག་ས་ཡིག་སྦྱར་ཡོད་པ་ལྟ་བུའི་ཀློག་ཚུལ་བཞིན་ཡུལ་གྲུ་རང་རང་གི་སྐད་ཀྱི་ཆ་ནས་འགྱུར་བ་དེ་ལྟ་བུ་གཉིས་འབྱུང་དགོས་པའི་རྒྱུ་མཚན་མེད་ལ། དེ་བས་ཀྱང་རལ་པ་ཞེས་པའི་མིང་ཚིག་འདི་ཡང་བཀོལ་སྤྱོད་བྱས་ཚེ་མདོ་སྟོད་སྨད་ཀྱི་མི་རྣམས་ཀྱིས་འབོད་ཚུལ་ལམ་སྒྲ་གདངས་གཉིས་སུ་འབྱུང་ཐབས་མེད་དེ་དཔེར་ན་མདོ་སྟོད་སྨད་ཀྱི་མི་གང་གིས་ཀྱང་ཐ་སྙད་འདི་བཀོལ་སྤྱོད་བྱས་ཚེ་རྗེས་འཇུག་ས་ཡིག་སྦྱར་བ་ལྟ་བུའི་སྒྲ་གདངས་གཉིས་འབྱུང་ཐབས་མེད་པའི་རྒྱུ་མཚན་གྱིས་སོ། ཡང་བྲོ་འདིའི་བྱུང་རིམ་བཤད་ཚེ་བྱུང་རིམ་མི་འདྲ་བ་འགའ་མཆིས་མོད་ཀྱང་དོན་དངོས་སུ་བརྟགས་ན་སྤྱི་ལོའི་དུས་རབས་ཀྱི་སྔོན་ནས་བྱུང་བ་དང་རྗེས་སུ་བྱུང་བ་གང་ཡིན་གསལ་ཁ་ཆེན་པོ་ཞིག་ཐག་ཆོད་ཀྱི་མི་འདུག་ཀྱང་། དུས་རབས་བརྒྱད་པའི་སྐབས་སུ་རྒྱ་ཆེར་དར་ཁྱབ་བྱུང་ཡོད་པ་ནི་མངོན་གསལ་དོད་པོར་ར་སྤྲོད་ཐུབ་ཀྱི་ཡོད། ཅིའི་ཕྱིར་ན། རྒྱལ་རབས་གསལ་བའི་མེ་ལོང་ལས་ལུང་དྲངས་པ་ལྟར། པད་མ་བཀའ་ཐང་ལས། སིལ་སྙན་རོལ་མོ་འབྲུག་བཞིན་ལྡེར། གྱི་ལིང་རྟ་ལ་རྒྱུག་ས་མེད། ཁྱེའུ་བུ་མོ་ཐམས་ཅད་ཀྱིས། ཆ་རྒྱན་ལག་ན་རྔ་མ་ཐོགས། རྔ་བརྡུང་གླུ་ལེན་གར་སྟབས་བསྒྱུར། ཞེས་བསམ་ཡས་གཙུག་ལག་ཁང་རབ་གནས་མཛད་སྒོའི་སྐབས་སུ་དེང་དུས་སུ་ཁྱུང་ཡུལ་དུ་འཁྲབ་བཞིན་པའི་རས་པའི་འཁྲབ་སྟོན་དང་བྲོ་དེ་འཁྲབ་པའི་ཕྱག་ཆ་ཀྱང་གཅིག་མཚུངས་ཡིན་པས་རས་པའི་སྲོལ་རྒྱུན་ཞིག་རྒྱ་ཆེར་དར་སྲོལ་ཡོད་ལ་ལྷག་ཏུ་སྐབས་དེ་དུས་ནས་བྲོ་དེ་རུ་བཞི་བོད་ཞེས་གྲགས་པའི་རང་རེའི་ཡུལ་གྲུ་འདིར་འཁྲབ་སྲོལ་ཡོད་པར་གོ་ཐུབ་ཀྱི་འདུག་པས་སོ།                        ༢༠༡༡ ༡༠ ༢ཉིན་བྲིས།