སྟོན་མཇུག་གི་སྐྱོ་གླུ། 

 

མེ་ཏོག་སེར་པོའི་མཛེས་སྡུག་རྒྱང་དུ་གྱེས།།

ལྕང་གླིང་ལྡུམ་རའི་ལོ་མ་ཁ་དོག་ཡལ།།

ཁ་ཆར་ཞིག་གིས་རི་རྩེ་གངས་ཀྱིས་གཏམ།།

གདུང་བའི་བསམ་པས་སྟོན་གྱི་སྐྱོ་གླུ་ལེན།།

 

ཁུ་བྱུག་གཤོག་འགྱུར་ཞིག་གིས་ནུབ་ཏུ་བཞུད།།

ལྗོན་མདོག་རྩྭ་ཐང་ཁ་དོག་དལ་གྱིས་ཡལ།།

ཞིང་ཁའི་སྙེ་མ་ཟོར་བས་གཞོམ་པ་ལ།།

ཞེན་ཆགས་བཙན་པོས་སྟོན་གྱི་སྐྱོ་གླུ་ལེན།།

 

ལྷག་རླུང་བསིལ་མོས་ཁ་བའི་སྐྱ་རེངས་བསུས།།

ཆར་ཆུ་གཙང་མའི་བཞུར་རྒྱུན་རིང་དུ་སོང་།།

དགུན་གྱི་སྟ་གོན་མགྲོན་བརྡ་གཏོང་བ་ཡིས།།

ན་ཟུག་བཙན་པོས་སྟོན་གྱི་སྐྱོ་གླུ་ལེན།།

 

དབྱར་གྱི་རྣམ་པའི་མཛེས་སྡུག་ཡལ་ཤུལ་ནས།།

ཁྲུང་ཁྲུང་སྟོང་གིས་སྨྲ་ངག་གོ་བ་ཡིས།།

ན་ཟུག་ཀློང་གི་དབུགས་རིང་རེ་རེ་ཡིས།།

མགྲིན་པའི་གསང་ནས་སྟོན་གྱི་སྐྱོ་གླུ་ལེན།།

                   ༢༠༡༡ ༩ ༡༨དགོང་མོར།