སྙིང་གཏམ།

བུ་ཕྲུག་ཚོ།

རེ་བ་ཡི་མདུན་མ་ཞིག་གམ།

མདུན་བསྐྱོད་ཀྱི་གོམ་སྟབས་དེ་ཡིས།

སློབ་གྲར་སོང་དང་། གནས་དེ་ན།

འཕྲུལ་ཡིག་བཞི་བཅུའི་གསང་ཤུགས་ཀྱི་འོག་ནས།

ཕ་སྐད་རྣལ་མའི་དབྱངས་རྟ་ཡོད།

 

བུ་ཕྲུག་ཚོ།

དགའ་སེམས་དང་ཞེན་ཆགས་ཤིག་གམ།

སྙིང་སྟོབས་དང་ལ་རྒྱ་ཞིག་གིས།

སློབ་གྲར་སོང་དང་། གནས་དེ་ན།

སློབ་གྲོགས་ཚོའི་མཛའ་མཐུན་ཡོད།

དགེ་རྒན་གྱི་བྱམས་བརྩེ་ཡོད།

 

བུ་ཕྲུག་ཚོ།

ཕ་མ་ཡི་རེ་མདུན་ཞིག་གམ།

གཉེན་ཉེ་ཚོས་འབོད་སྐུལ་ལ་བསམ་ནས།

སློབ་གྲར་སོང་དང་། གནས་དེ་ན།

ཤེས་རིགས་ཀྱི་འོད་སྣང་ཡོད།

འཚོ་བཅུད་ཀྱི་དྭངས་མ་ཡོད།

 

བུ་ཕྲུག་ཚོ།

མིག་ཟུང་གིས་ཕྱིར་བལྟས་མེད་པར།

བསམ་པ་ཡིས་ཞེན་ཆགས་མེད་པར།

སློབ་གྲར་སོང་དང་། གནས་དེ་ན།

མདུན་བསྐྱོད་ཀྱི་ལམ་བུ་ཡོད།

མི་ཚེ་ཡི་རིན་ཐང་ཡོད།

                         ༢༠༡༡ ༨ ༡༢ ཉིན་བྲིས།