སྤྲོ་སྣང་།

ང་དང་གཡུང་དྲུང་སྤུན་གྲོགས་ཁྱེད་གཉིས།

བར་ཐག་རི་ཆུ་སྟོང་གིས་ཆོད་ཀྱང་།

བསོད་ཚོགས་ཞིག་གིས་བཀོད་སྒྲིག་འོག་ནས།

མཇལ་བའི་བསྐལ་བཟང་ངང་གིས་འཁྲུངས་སོང་།

 

དམར་སེར་མཚམས་སྤྲིན་འོད་ཀྱིས་མཛེས་པའི།

སློབ་ཚོགས་སྟོང་གི་ཕ་ས་ཆེན་མོ།

གཤེན་བསྟན་ཀུན་གྲགས་གླིང་གི་འདུས་སྡེར།

མཇལ་འཛོམ་ཞིག་གིས་སྤྲོ་སྣང་སྦྱིན་བྱུང་།

 

ཐོས་བསམ་གླིང་ཞེས་འཆད་རྭའི་ཐང་ནས།

དར་གྱིས་འབོད་པའི་ཐལ་སྐད་བཙན་པོའི།

ལྔ་རིག་བུ་མོ་མགྲོན་དུ་བསུས་པས།

དོན་གྱི་རིགས་སྒྲའི་དགེ་མཚན་མྱོང་བྱུང་།

 

སྒྲ་ཚད་ཤེས་བྱ་རྒྱ་མཚོའི་འགྱིང་ནས།

ང་དང་གཡུང་དྲུང་སྤུན་གྲོགས་ཞིག་གིས།

འཆད་རྩོད་རོལ་བའི་བྱ་ཞག་དེ་ཡིས།

རྣམ་རིག་གསར་པའི་མེ་ཏོག་སྦྱིན་བྱུང་།

 

འདུས་གྲལ་འགྲིགས་པའི་འཚོགས་དབུས་དེ་ནས།

 རིགས་པའི་སེང་སྐད་འུར་གྱིས་སོྐང་བཞིན།

བདེན་དོན་ཞིག་གིས་གནས་ལུགས་འཚོལ་འདི།

ཚད་མའི་རིགས་སྒྲ་སྨོས་པར་ཤིས་སོ།

                                                            རིགས་སྒྲའི་སྐབས་ཀྱི་དམ་བཅའ་ཆེན་མོ་འཇུག་རྫོགས་རྗེས།