བྱིས་དུས་སྣང་སྐྱིད་ཡལ་བ་ཡིད་རེ་སྐྱོ།།

                    ཁྱུང་བསོད་བློ།

          རིན་ཐང་མི་ཚེའི་དུས་ཚོད་རིན་པོ་ཆེ།།

         ལོ་ན་སྣང་བ་སྐྱིད་པོ་བགྲེས་པོས་བཀར།།

     ཟཊ་བཅས་ཕུང་སྒོག་འདི་ལ་གཟེར་ཟུག་ཞིག།

      དྭངས་བའི་གོ་སྐབས་མེད་པའི་སུན་སྣང་ཆེ།།

    ལས་དབང་སྒྱུ་མའི་ཟློས་གར་འཁྲབས་ཆེ་བས།།

   ད་ལན་གསོན་ལུས་འདི་ཡི་བསྲན་ཚུགས་དཀའ།

      མི་འདོད་སྐྱགས་པ་རང་གི་བཟོས་པས་རྐྱེན།།

          སུ་ལ་འགེལ་ས་མེད་སྟེ་ཐོག་མའི་རྒྱུ།།

      མ་བཀག་མ་ཁོག་འདོན་ཡོན་གཡེང་ཆེ་བས།།

    སྡུག་འབྲས་ཁུར་པོ་རང་གིས་རང་འཚོལ་འདི།།

  དཀོན་མཆོག་བརྩེ་བ་ཁྱེད་ཀྱིས་བྲལ་ཐབས་ཞིག།

       མ་རྒན་མགོ་འཐོམ་འགྲོ་ལ་སྐྱོང་རྒྱུ་གྱིས།།

      སྣང་བ་བསླུ་བྲིད་མཁས་པའི་འདོད་ཡོན་མ།།

        ཐོག་མེད་གོམ་གོམ་ཆེ་བས་བློས་མི་ཐོང་།།

   འཇིག་རྟེན་བདེ་བ་འདི་ཡིས་བསྐོར་བསྐོར་ཞིག།

     ང་རྒྱལ་ཁོ་ཕམ་རྩོད་པའི་སྲང་ལམ་རྒྱུད།།

  དུག་ལྔའི་འགྲན་རྩོད་རྒྱས་པའི་འཁོར་འདམ་དུ།།

     ཉོན་མོངས་ཤི་མ་གསོན་གྱི་ཆགས་སྤྱོད་དེ།།

    ནམ་ཡང་ཐར་པའི་དགག་བྱ་འཇོག་ལ་བརྩོན།།

    འབྱུང་ཆེན་རག་པའི་མི་རྟག་མིག་གིས་གསལ།།

       རང་ངོ་རང་གི་མ་མཐོང་བྱད་གཟུགས་ཐོག།

        མི་འདོད་ཀ་ལིའི་གཉེར་དགྲ་ནག་པོ་དེ།།

        དྭངས་གསལ་མེ་ལོང་ཁྱོད་ཀྱིས་ངོ་སྤྲོད་རེ།།

        བྱེད་པའི་དུས་སྐབས་རེ་ལ་སྐྱོ་སྣང་རེ།།

      མི་སྤྲད་སྔོན་འགོག་སུས་ཀྱང་དགག་མ་ནུས།།

        ད་ལན་ལུས་རྟེན་འདི་ལ་སྡུག་བསྲན་ཞིག།                      

   དགོས་རྒྱུ་ཨ་ཞང་རྒྱལ་པོའི་བཀའ་ཁྲིམས་རེད།།

༢༠༡༣-༡༡-༦-དགོང་མོ་ད་ལྟ་འཚོགས་གྲོལ་རྗེས་སུ་བྲིས།།