དེ་རིང་རྩོད་ཐུན་གཅིག་གི་ཟིན་མཚམས་ཐོར་བུ།།།
རྗེ་རིན་པོ་ཆེའི་ས་ལམ་ལས་ ཐེག་ཆེན་མཐོང་ལམ་གྱི་མཚན་ཉིད་དང་ས་མཚམས་སོགས་བཤད་པ་ལས། དང་པོ་མཚན་ཉིད་ནི་དེ་ཁོ་ན་ཉིད་ཀྱི་རང་མཚན་སྔར་མ་རྟོགས་པའི་ཕྱིན་པར་བྱེད་པའི་རིག་པ་དེ་དང་། ས་མཚམས་ནི། བོན་མཆོག་ཆེན་པོའི་རྟོགས་པ་རྫོགས་ནས་སྒོམ་ལམ་ཆུང་ངུའི་རྟོགས་པ་རྒྱུད་ལ་མ་སྐྱེས་ཀྱི་བར་དུ་མཐོང་ལམ་གྱི་ས་མཚམས་སུ་རིག་པར་བྱའོ་གསུང་འདུག། དང་པོ་མཐོང་ལམ་གྱི་ས་མཚམས་འཇོག་སྟངས་དང་། གཉིས་པ་མཉམ་རྗེས་གཅིག་ཆར་དུ་སྐྱེས་པའི་རྗེས་ཐོབ་གི་རྣམ་པ་འཆར་ཚུལ་གཉིས་ལས། དང་པོ་རྗེ་རིན་པོ་ཆེའི་ས་མཚམས་འཇོག་སྟངས་དེ་ལ། ཁ་ཅིག་གི་མཐོང་ལམ་མཉམ་རྗེས་གཅིག་ཆར་དུ་སྐྱེ་བའི་དབང་དུ་བཏང་ནས་གསུང་པ་རེད་ཟེར་འདུག། ཁ་ཅིག་ན་རེ་ཐེག་ཆེན་མཐོང་ལམ་གསར་དུ་སྐྱེ་སའི་ལུས་རྟེན་མ་དོར་བ་ལ་དགོང་པ་འགྲེལ་འདུག། དང་པོ་ལྟར་མཐོང་ལམ་མཉམ་རྗེས་གཅིག་ཆར་དུ་སྐྱེ་བའི་དབང་དུ་བྱས་ན་ཐེག་ཆེན་མཐོང་ལམ་མཉམ་རྗེས་གཉིས་དུས་གཅིག་ཆར་དུ་འགག་མ་ཐག་གིས་སྒོམ་ལམ་ཆུང་ངུའི་རྟོགས་པ་རྒྱུད་ལ་མ་སྐྱེས་བར་གིས་མཉམ་བཞག་གི་ངོ་བོར་གྱུར་པའི་ས་གཉིས་པའི་སྦྱོར་བ་ཉེར་སྡོགས་ཞིག་ཡོད་བ་གང་ཞིག་དེ་མཐོང་ལམ་དུ་ཐལ་ལོ། གཉིས་པ་ལྟར་ཐེག་ཆེན་མཐོང་ལམ་གསར་དུ་སྐྱེ་སའི་ལུས་རྟེན་མ་དོར་བའི་དབང་དུ་བྱས་ན། མཐོང་ལམ་གསར་དུ་སྐྱེ་སའི་ལུས་རྟེན་འགག་པ་དང་སྒོམ་ལམ་ཆུང་ངུའི་རྟོགས་པ་རྒྱུད་ལ་སྐྱེ་བ་དུས་མཉམ་པ་ཐལ་བ་དང་། མཉམ་རྗེས་རིམ་ཅན་དུ་སྐྱེ་བའི་ས་དང་པོའི་རྗེས་ཐོབ་ཡེ་ཤེས་དེ་ཐེག་ཆེན་མཐོང་ལམ་ཡིན་པ་ཐལ་ལོ། རྟེན་མཐོང་ལམ་པ་ཡིན་པའི་ཕྱིར་ཏེ། རང་ལུགས་ལ་ དེ་ལམ་སྒོམ་ལམ་དང་རྟེན་མཐོང་ལམ་བཞག་པ་ཡིན་པའི་ཕྱིར། དེ་རྟེན་མཐོང་ལམ་པ་ཡིན་པའི་དོན་ནི་དེ་ལྡན་སའི་ལུས་རྟེན་དེ་མཐོང་ལམ་གྱིས་ཡོན་ཏན་བརྒྱ་ཕྲག་བཅུ་དྲུག་གསར་དུ་ཐོབ་སའི་རྟེན་ཁྱད་པར་ཅན་ཡིན་པས་ན་རྟེན་མཐོང་ལམ་པ་བཞག་ན་ཆོག་གམ་སྙམ་བྱུང་། སྤྱིར་རང་ལུགས་ལ་དབང་པོ་རྣོ་རྟུལ་གཉིས་ཡོད་པ་ལས། དབང་པོ་རྣོན་པོ་ལ་མཉམ་རྗེས་དུས་གཅིག་ཆར་སྐྱེ་བ་དང་དབང་པོ་རྟུལ་པོ་རྣམས་ལ་དུས་སྔ་ཕྱི་རིམ་ཅན་དུ་སྐྱེ་བ་ལུང་ལས་གསལ་འདུག། དེ་ལྟར་ཡིན་དུས་ཁོ་བོས་ནི་རྗེ་རིན་པོ་ཆེའི་གོང་གི་མཐོང་ལམ་གྱི་ས་མཚམས་བཞག་པ་དེ་མཐོང་ལམ་པ་ཡི་ས་མཚམས་ལ་དགོངས་པ་ཡིན་ན་སྙམ་བྱུང་། སྤྱིར་མཉམ་རྗེས་གཅིག་ཆར་དང་རིམ་སྐྱེ་གཉིས་ཡོད་པ་ལས་གཅིག་ཆར་བའི་དབང་དུ་བྱས་ན་མཐོང་ལམ་གྱི་ས་མཚམས་ནི་སྦྱོར་ལམ་བོན་མཆོག་ཆེན་པོའི་རྟོགས་པ་རྫོགས་ནས་ས་གཉིས་པའི་མཉམ་བཞག་ཡེ་ཤེས་ཀྱི་རྒྱུ་རུ་གྱུར་པའི་ས་གཉིས་པའི་སྦྱོར་བ་ཉེར་སྡོགས་མ་སྐྱེས་བར་དུ་འཇོག། རིམ་སྐྱེས་པ་ལ་བོན་མཆོག་གི་རྟོགས་པ་རྫོགས་ནས་ས་དང་པོའི་རྗེས་ཐོབ་ཡེ་ཤེས་མ་སྐྱེས་བར་དུ་འཇོག་དགོས་ན་ཐང་། ཁ་གསལ་གིས་ལུང་དང་རིག་པ་ཁུང་མ་ཞིག་རང་གི་མ་རྙེད་པས་བློ་གསལ་མཁྱེན་དཔྱོད་ཡངས་པའི་སློབ་གཉེར་བ་རྣམས་ཀྱིས་བརྟག་ཞིབ་མཛད་ནས་འོག་ཏུ་མཆན་སྤེལ་ཡོང་རོགས།། གཉིས་པ་མཉམ་རྗེས་གཅིག་ཆར་དུ་སྐྱེས་པའི་རྗེས་ཐོབ་ལ་རྣམ་པ་འཆར་ཚུལ། རྗེ་རིན་པོ་ཆེའི་ས་ལམ་ལ། བློ་ཡི་ངོ་བོར་དཔྱད་པ་ནི་། མཉམ་བཞག་དང་རྗེས་ཐོབ་ཚུལ་དུ་སྐྱེ་ལ། མཉམ་བཞག་གི་དུས་སུ་གནས་ལུགས་སྐྱེ་མེད་བདག་མཐའ་དག་གི་སྟོང་པར་རྟོགས་པའི་དུས་སུ། རྗེས་ཐོབ་ཏུ་མཁྱེན་པའི་ཡོན་ཏན་སྣ་ཚོགས་སྒྱུ་མ་ལྟ་བུ་ཤུགས་ལས་རྟོགས་ཤིང་། དེ་གཉིས་དུས་ངོ་བོ་ཐ་དད་དབྱེ་བ་མེད་ཅིང་རྣམ་པ་རྟོགས་ཚུལ་ཐ་དད་ཏུ་འཆར་རོ་ཞེས་གསུང་པ་དེ་ནི་མཉམ་རྗེས་གཅིག་ཆར་དུ་སྐྱེ་བའི་དབང་དུ་བཞག་དགོས་པར་སྣང་ངོ། ཁ་གཅིག་གི་མཉམ་རྗེས་གཅིག་ཆར་དུ་སྐྱེ་བའི་རྗེས་ཐོབ་དེ་ཡིས་བོན་ཅན་སྒྱུ་མ་ལྟ་བུའི་རྣམ་པ་མ་སྣང་ནས་ཤུགས་ལས་རྟོགས་པར་འདོད་ཚུལ་ཡོད་ཀྱང་། དེ་ལྟར་འདོད་མི་རུང་སྟེ། མཐོང་ལམ་རྗེས་ཐོབ་ཡེ་ཤེས་ཡིན་ན་སྟོང་གཞི་བོན་ཅན་སྒྱུ་མ་ལྟ་བུར་དངོས་སུ་རྟོགས་དགོས་སོ། ཁོ་བོས་ནི། རྗེ་རིན་པོ་ཆེའི་ས་ལམ་ལས། མཉམ་བཞག་གི་དུས་སུ་གནས་ལུགས་སྐྱེ་མེད་བདག་མཐའ་དག་གི་སྟོང་པ་རྟོགས་པའི་དུས་སུ་རྗེས་ཐོབ་གིས་མཁྱེན་པའི་ཡོན་ཏན་སྒྱུ་མ་ལྟ་བུ་ཤུགས་ལས་རྟོགས་ཞེས་པ་དེ་ཚད་མ་དང་རྟགས་རིགས་སྐབས་བོན་དེ་ཡི་རྣམ་པ་མ་སྣང་ནས་རྟོགས་པ་ནི་ཤུགས་རྟོགས་ཟེར་བ་ལྟ་བུ་ལ་མི་བཞག་གང་ཟག་དེ་བློ་དབང་པོ་རྣོན་པོ་ཞིག་ཡིན་དུས་མཉམ་བཞག་དེ་ཡིས་བོན་ཉིད་ནམ་མཁའ་ལྟ་བུ་ལ་སྒྲོ་འདོགས་དངོས་སུ་གཅོད་དུས་རྗེས་ཐོབ་དེ་ཡིས་བོན་ཅན་སྒྱུ་མ་ལྟ་བུ་ལ་སྒྲོ་འདོགས་གཅོད་པ་ལ་དངོས་སུ་འབད་རྩོལ་རགས་པ་བྱེད་མི་དགོས་པ་ལ་དགོང་པ་ཡིན་ན་སྙམ་བྱུང་། རྗེས་ཐོབ་དེ་ཡིས་བོན་ཅན་སྒྱུ་མ་ལྟ་བུ་དངོས་སུ་རྟོགས་པར་འདོད་དོ་་།
མཐོང་ལམ་ས་མཚམས་འཇོག་ལ་མཁས་པའི་རིག་པ་སྨྲ་བའི་སྐྱེས་བུ་དང་།
དཔྱོད་ལྡན་མཁས་པའི་བློ་དང་མཐུན་པའི་དཔྱད་རྩོམ་སྤེལ་མཁན་གང་མིན་ཀྱང་།
སྲོ་ལོ་དཀར་པོའི་བསམ་ཚུལ་ཐེངས་གཅིག་དེ་རིང་འདི་ན་བཀོད་པ་ཡིན། །
རང་བློའི་མ་དཔོག་ནོར་འགལ་འཆིས་ཚེ་ཚད་མ་སྨྲ་བའི་ཚོགས་ལ་བཤགས། །
སྤྱི་ལོ་ ༢༠༡༢ ཟླ་ ༨ ཚེས་ ༢༧ ཉིན་མོར།
སྲོ་ལོ་དཀར་པོ་ནས་བཀོད།།།
