སྨུག་མོ་རི་རྩེའི་བཀོད་པ།
དབེན་གནས་མ་འདལ་རི་ཁྲོད།
རིག་འཛིན་གོང་མའི་སྒྲུབ་གནས།
གནས་ཆེན་སྨུག་མོ་རི་རྩེ།
དབལ་ཆེན་གེ་ཁོད་གནས་རི།
གཡས་སུ་སྲང་རྒན་འབར་བ།
གཡོན་དུ་ཡང་མགོན་ཉིན་ཤར།
མདུན་དུ་གསེར་ཁུར་རིན་ཆེན།
སྨུག་མོ་རི་རྩེའི་རྔམ་རྫིག།
སྟོད་ཀྱི་རྫ་བྲག་དཀར་པོ།
བར་གྱི་ལྷ་ཤིང་ཤུག་པ།
སྨད་ཀྱི་ཁྲ་ཆུ་སྔོན་མོ།
སྨུག་མོ་རི་རྩེའི་རྒྱན་ཆ།
དབྱར་རྩ་དགུན་འབུའི་ཕ་ས།
ཤ་མར་ཐུད་ཀྱི་སྣུམ་ལུང་།
ཁྲ་ཡི་ལུང་ཆེན་བཅོ་བརྒྱད།
སྨུག་མོ་རི་རྩེའི་གཏེར་མཛོད།
བྱིའི་ཆུང་འཇོལ་མོའི་གསུང་སྐད།
ལྷ་གཡག་རོག་པོའི་ངར་ལྷབ།
འབྲི་མོ་སྟོང་གི་ངུར་རྒྱང་།
ཁྲ་གཞུང་ལུང་པའི་རྒྱན་ཆ།
མ་འདལ་མཚམས་ཆུང་རྣམ་པས།
ཞོག་པས་དུང་བརྡ་གཏོང་སྐབས།
བྱ་བརྒྱ་སྟོང་གི་གསུང་སྐད།
ལྷང་ལྷང་རྣ་བར་གསིང་པ།
སྨུག་མོ་རི་རྩེའི་སྤྲོ་དབྱང་།
དབུས་ཀྱི་མཚམས་ཁང་གྲུ་གཞི།
གཡས་ཀྱི་ལྷ་ཁང་ཀ་བཞི།
གཡོན་གྱི་འདུ་ཁང་ཀ་བརྒྱད།
མདུན་གྱི་དུར་ས་ཤུག་སྒོ།
སྨུག་མོ་རི་རྩེའི་བཀོད་པ།
ངོས་ཀྱི་ཤུག་པ་ནོར་བུ།
བར་གྱི་མཚམས་པ་རྣམ་གཉིས།
སྨད་ཀྱི་མུ་ཟི་སེར་པོ།
མ་འདལ་ལུང་པའི་རྒྱན་ཆ།
སྤྱི་ལོ་བཅུ་གཉིས་ལོ་ཡི།
བཤད་གྲྭའི་ངལ་གསོ་སྐབས་སུ།
རང་འབྲོག་སླས་ར་ནང་དུ།
རང་ཉིད་ཐེངས་གཅིག་འབྱོར་རྗེས།
གནས་ཆེན་སྨུག་མོ་རི་རྩེའི།
མཛེས་སྡུག་བཀོད་པ་མཐོང་དུས།
བུ་ཆུང་སྲོ་ལོ་དཀར་པོས།
རྩོམ་ཐུང་འདི་འདྲ་ཤོར་ཐལ།
སྤྱི་ལོ་༢༠༡༢ ཟླ་ ༦ ཚེས་ ༡༣ ཉིན་མོར་སྲོ་དཀར་ནས་བྲིས།
