ཆུ་ཁུལ་ཤེལ་དམ་གང་།

         ཁྱུང་མུ་ཝེར།

ཉེར་གཅིག་དུས་གསར་འཕེལ་རྒྱས་བཟང་།།

དབྱར་རྩྭ་དགུན་འབུ་རིན་གོང་མཐོ།།

དེ་རྐྱེན་ཞིང་འབྲོག་གཉིས་ཀ་ཡི།།

སོ་ནམ་ལས་ཀ་རིང་དུ་དོར།།

མ་གའི་མདོ་རུ་སྤྲོ་གསེང་རོལ།།

དེ་མཚུངས་ཁོ་བོ་ཙག་ཙིག་གི།I

ལས་དོན་འགའ་ཡི་རྐྱེན་བྱས་ནས།།

སྤྲོ་གསེང་རོལ་རྒྱུའི་སྐལ་བཟང་རྙེད།།

དོན་རྣམས་གྲུབ་རྗེས་ངལ་གསོ་རུ།།

ཇ་ཁང་ཞིག་གི་ནང་དུ་སོང་།། 

རྐུབ་སྟེགས་སྟེང་དུ་བསྡད་མ་ཐག།

རྒྱ་བོད་གང་ཡིན་ཆ་མ་འཚལ།།

ཞབས་ཞུ་མ་ཞིག་འཁྲིས་སུ་བྱུང་།།

སྦི་རག་ག་རེ་ཁུར་ཡོང་ཟེར།།

སྦི་རག་མི་ཐུང་དམ་བཅའ་དེ།།

བླ་མའི་མདུན་དུ་བཞག་ཚར་སྨྲས།།

ཡང་ན་ཁུ་ལུ་གང་ཐུང་ཟེར།།

མཆིན་པ་ན་ཚའི་གཞི་ཡོད་པས།།

ཁུ་ལུ་བཏུང་ན་མི་བཟང་ལུགས།།

སྨན་པའི་ངག་ནས་བྱུང་ལུགས་བཤད།།

གཅིག་གཉིས་ཐུང་ན་མི་སྐྱོན་ལུགས།།

བཤད་བཞིན་ཨུ་ཚུག་རྒྱག་ནས་འདུག།

ཆུ་ཁུལ་ཡོད་ན་དེ་ལས་ནི།།

བཟང་བ་མེད་རབ་ཡང་ཡང་བཤད།།

དེ་མཐར་ཞབས་ཞུ་མ་དེས་ནི།།

ཅུང་ཙམ་མ་དགའི་ངང་ཚུལ་དུ།།

ཆུ་ཁུལ་ཤེལ་དམ་གང་བླུག་བྱུང་།།

         ༢༠༡༣     ༨    ༢༨