རོང་ཡུལ་ཁུ་ནུའི་སྦྱིན་བདག་སེར་སྐྱ་རྣམས་ཀྱི་ངོར་གདམས་པ།
ཁྱུང་སྤྲུལ་འཇིགས་མེད་ནམ་མཁས་གདམས་པ།
རྩ་བརྒྱུད་བླ་མ་རྣམས་ལ་གསོལ་བ་འདེབས།།
བསམ་དོན་ཆོས་བཞིན་འགྲུབ་པར་བྱིན་གྱིས་རློབས།།
འདི་ཕྱིར་གཉིས་ཀར་ཕན་པའི་གཏམ་ཞིག་བཤད།།
ཀུན་གྱིས་ཡིད་ལ་ཟུངས་ཤིག་ཁུ་ནུ་བ།།
དལ་འབྱོར་ལུས་འདི་བརྒྱ་ལམ་རྙེད་པར་དཀའ།།
རྙེད་ཚེ་ཆུད་ཟོས་མ་གཏོང་ཁུ་ནུ་བ།།
ཚེ་འདིར་ཡུན་རིང་མི་སྡོད་མྱུར་དུ་འཆི།།
འཆི་ཆོས་ད་ལྟ་གྱིས་ཤིག་ཁུ་ནུ་བ།།
བླ་མ་དཀོན་མཆོག་སྤྱི་བོའི་ཐོད་བཞིན་བཀུར།།
འཁུར་མཁན་ཐམས་ཅད་རྒྱལ་ལོ་ཁུ་ནུ་བ།།
དྲིན་ཆེན་ཕ་མ་དཔྲལ་བའི་མིག་བཞིན་འཚོས།།
འཚོ་མཁན་ཐམས་ཅད་བདེ་འོ་ཁུ་ནུ་བ།།
ཤ་ཚ་སྙིང་ཉེའི་གྲོགས་པོ་སྤུན་ལྟར་བསྟེན།།
དགོས་དུས་ནམ་ཡང་སླེབས་འོང་ཁུ་ནུ་བ།།
ཡུན་རིང་འགྲོགས་ན་སངས་རྒྱས་སྐྱོན་ཡང་མཐོང་།།
བླ་མའི་སྐྱོན་ལ་མ་རྟོག་ཁུ་ནུ་བ།།
མཆོད་མ་ཤེས་ན་ལྷ་ཡང་གཤེད་དུ་འབབ།།
ཡུལ་ལྷར་དམར་མཆོད་མ་གཏོང་ཁུ་ནུ་བ།།
བླ་མ་རྣམས་ཀྱིས་ཆོས་ལ་བཟང་ངན་འབྱེད།།
གྲུབ་མཐའི་ཕྱོགས་རིས་མ་བྱེད་ཁུ་ནུ་བ།།
གྲྭ་པ་རྣམས་ཀྱིས་འཆལ་ལེ་འཆོལ་ལེ་སྤྱོད།།
བླ་མའི་ཞབས་འདྲེན་མ་བྱེད་ཁུ་ནུ་བ།།
བཙུན་མ་རྣམས་ཀྱིས་དམ་ཚིག་སྡོམ་པ་སྲུངས།།
དགེ་སྦྱོར་ཁ་འདོན་གྱིས་ཤིག་ཁུ་ནུ་བ།།
མི་སྐྱ་རྣམས་ཀྱིས་ཡ་རབས་བྱ་བ་གྱིས།།
དོན་མེད་སྐྱུར་འགོང་མ་རྒྱག་ཁུ་ནུ་བ།།
བཟའ་མི་ཤི་དུས་འགྱོད་པ་བླུན་པོའི་ལུགས།།
གསོན་ཚེ་མཐུན་པར་འགྲོགས་དང་ཁུ་ནུ་བ།།
གཡོག་པོར་ཁ་ཡིས་བྱམས་པས་ཅི་ལ་ཕན།།
སྙིང་ནས་ལྟོ་གོས་བྱིན་ཅིག་ཁུ་ནུ་བ།།
ཚོང་པ་རྣམས་ཀྱིས་འབྲོག་ནས་ལུག་ཉོས་ཏེ།།
མོན་དུ་དམར་ཚོང་མ་བྱེད་ཁུ་ནུ་བ།།
རྗེ་དཔོན་རྣམས་ཀྱིས་མི་སེར་ཐམས་ཅད་ལ།།
གསར་ཁྲལ་ཆད་པ་མ་འགེལ་ཁུ་ནུ་བ།།
འགོ་པས་མི་སེར་རྣམས་ལ་སྡུག་བཏང་ནས།།
ཡུལ་སྡེའི་རྒྱུ་ནོར་མ་ཟ་ཁུ་ནུ་བ།།
མི་སེར་རྣམས་ཀྱིས་འགོ་དཔོན་སུ་ལའང་།།
ངོ་ལོག་རྒྱག་སྟོན་མ་བྱེད་ཁུ་ནུ་བ།།
སྔགས་པ་རྣམས་ཀྱིས་མཐུ་དང་ངན་སྔགས་བྱེད།།
རང་གཞན་ཕུང་སྦྱོར་མ་བྱེད་ཁུ་ནུ་བ།།
ཐམས་ཅད་ནང་བ་སངས་རྒྱས་བསྟན་པ་ཡིན།།
གྲུབ་མཐའ་གཞན་ལ་མ་སྡང་ཁུ་ནུ་བ།།
བླ་མ་རྗེས་སུ་དད་ལོག་མ་བྱེད་ཅིག །
ཤི་ནས་དམྱལ་བར་འགྲོ་འོ་ཁུ་ནུ་བ།།
དཀོར་ས་ཞིང་ཁང་རྣམས་ཀྱང་ཕན་ཚུན་གྱི།།
ལག་ནས་འཕྲོག་རེས་མ་བྱེད་ཁུ་ནུ་བ།།
བླ་མར་ཧ་ཅང་དད་པ་མ་ཆུང་ཞིག །
བྱིན་རླབས་འཇུག་དུ་མེད་དོ་ཁུ་ནུ་བ།།
བཟའ་ཚང་ནང་མིར་འཁོན་འཁྲུགས་མ་བྱེད་པར།།
སེམས་ཟིན་མཐུན་པར་འགྲོགས་དང་ཁུ་ནུ་བ།།
ཧ་ཅང་སྲོག་གཅོད་ལས་ལ་མ་རྔམས་ཤིག །
དམྱལ་བའི་གཏིང་དུ་འགྲོ་འོ་ཁུ་ནུ་བ།།
སྐྱེས་སྨན་གཉིས་ནི་སྡུག་བསྔལ་གཞི་མ་ཡིན།།
གཟའ་དཔོན་ཆུང་མ་མ་ལེན་ཁུ་ནུ་བ།།
ཚོང་མ་ཤེས་ན་བུ་ལོན་འོག་ཏུ་འགྲོ།།
དོན་མེད་ཚོང་ལོག་མ་རྒྱག་ཁུ་ནུ་བ།།
ཞིང་ལ་འཚོ་སྐྱོང་བྱས་ན་ཕྱུག་པོར་འགྱུར།།
ཁ་རོག་ཉལ་ལ་མ་དགའ་ཁུ་ནུ་བ།།
ཟ་འདོད་འཐུང་འདོད་ཁྱི་ལས་ལྟོགས་པ་མེད།།
ཧ་ཅང་ལྟོགས་དུ་མ་འཇུག་ཁུ་ནུ་བ།།
ཟས་ནོར་གསོག་འཇོག་མང་ན་དགྲ་འདྲེས་འཁྱེར།།
ནོར་འདོད་ཧམ་པ་མ་ཆེ་ཁུ་ནུ་བ།།
བསོད་ནམས་མེད་ན་བརྒྱ་བསམ་གཅིག་མི་འགྲུབ།།
དོན་མེད་བློ་སྣ་མ་མང་ཁུ་ནུ་བ།།
སྔོན་གྱི་ལས་གསལ་བླ་མ་དཀོན་མཆོག་མཁྱེན།།
སོམས་དང་དོན་ཡང་འགྲུབ་བོ་ཁུ་ནུ་བ།།
རྣམ་རྟོག་ཅན་གྱི་མི་ལ་ལྷ་འདྲེ་མང་།།
དོན་མེད་རྣམ་རྟོག་མ་མང་ཁུ་ནུ་བ།།
ཞེ་སྡང་ཅན་གྱི་མི་ལ་དགྲ་བོ་མང་།།
གཞན་ལ་ཁོང་ཁྲོ་མ་ཆེ་ཁུ་ནུ་བ།།
སེར་སྣ་ཅན་གྱི་མི་ལ་བདེ་དུས་མེད།།
ནོར་ལ་སེད་པ་མ་ཆེ་ཁུ་ནུ་བ།།
ཟས་ལ་ལག་པ་ཡང་ན་བྲན་གཡོག་འཁོར།།
ཟ་མ་སྡུག་ཙིར་མ་བྱེད་ཁུ་ནུ་བ།།
མཆོད་སྤྱིན་བཏང་ན་བསོད་ནམས་ཤུགས་ལས་སྐྱེ།།
མི་ཚེ་འདིར་ཡང་བདེ་འོ་ཁུ་ནུ་བ།།
རྒྱུན་དུ་རྟེན་གསུམ་ཕྱག་དང་བསྐོར་བ་བགྱིས།།
དཀོན་མཆོག་རྗེས་སུ་འཛིན་ནོ་ཁུ་ནུ་བ།།
བྱ་བཏང་སྒོམ་ཆེན་བཟང་པོར་མཐུན་རྐྱེན་སྤྱོར།།
སངས་ཀྱང་མཉམ་པོར་རྒྱ་འོ་ཁུ་ནུ་བ།།
གཞན་གྱི་དགེ་བར་རྗེས་སུ་ཡི་རངས་གྱིས།།
བསོད་ནམས་རྒྱ་ཆེན་འཐོབ་བོ་ཁུ་ནུ་བ།།
དགེ་བ་གང་བྱས་མཇུག་ཏུ་བསྔོ་སྨོན་གྱིས།།
ནམ་ཡང་ཆུད་ཟོས་མི་འགྲོ་ཁུ་ནུ་བ།།
འདི་བཞིན་ལྷ་ཆོས་བྱེད་པའི་སྐྱེ་བོ་ཀུན།།
འདི་ནས་བཟུང་སྟེ་སྐྱིད་དོ་ཁུ་ནུ་བ།།
དེ་ལྟར་ལྷ་ཆོས་དགེ་བ་མ་སྒྲུབ་ཀྱང་།།
མི་དགེའི་སྡིག་གསོག་མ་བྱེད་ཁུ་ནུ་བ།།
ཆོས་པ་གཞན་ལ་དད་པ་མི་བྱེད་ཀྱང་།།
དོན་མེད་གཤེ་སྐུར་མ་བྱེད་ཁུ་ནུ་བ།།
ཡུལ་མི་ཁྱིམ་མཚེས་ཕན་ཞིག་མ་ཐོགས་ཀྱང་།།
ཞེ་བརྣག་གནོད་པ་མ་བྱེད་ཁུ་ནུ་བ།།
ཁ་འདོན་བཟླས་བརྗོད་མང་པོ་མ་ཐུབ་ཀྱང་།།
མ་ཎི་རྒྱུན་དུ་གྲོངས་ཤིག་ཁུ་ནི་བ།།
ཨ་ནེ་རྒད་མོས་མ་ཎི་མི་འདོན་ཡང་།།
མནའ་མར་ཁ་ཚག་མ་རྒྱག་ཁུ་ནུ་བ།།
ཕ་རྒན་དལ་དུས་ཕྱག་སྐོར་མི་བྱེད་ཀྱང་།།
བུ་ཡི་མནའ་མ་མ་རྐུ་ཁུ་ནུ་བ།།
མ་གྱུར་འགྲོ་ལ་ཕན་ཐོགས་མ་ནུས་ཀྱང་།།
ཕན་སེམས་ཡང་ཡང་བསྐྱེད་ཅིག་ཁུ་ནུ་བ།།
རྣལ་འབྱོར་སྙིང་གཏམ་གསེར་དང་འདྲ་བ་འདི།།
ཁྱེད་རྣམས་སྙིང་ལ་ཆོངས་ཤིག་ཁུ་ནུ་བ།།
ཆོས་མཐུན་འདི་བཞིན་བྱེད་པའི་འགྲོ་བ་ལ།།
ཆོས་སྐྱོང་དཀར་ཕྱོགས་ལྷ་ཡིས་བསྲུང་བར་ཤོག །
