བསྭོ། དབོན་གསས་ལ་ཅི་ཆེ་ན། དབོན་གསས་ལ་ཐོད་དཀར་ཆེ། ཐོད་དཀར་ནི་སྤྲིན་ལྟར་འཁྲིགས། སྡོང་བ་ནི་གསས་དང་སྡོང་། འགྲོགས་པ་ཡང་གསས་དང་འགྲོགས། མགོན་པ་ཡང་གསས་ལ་མགོན། བཤམ་བཤམ་གྱི་མཆོད་པ་འབུལ། ངན་འདྲེས་ཀྱི་ནོངས་པ་མཐོལ། དབོན་གསས་ལ་ཅི་ཆེ་ན། དབོན་གསས་ལ་ཝེར་མ་ཆེ། ཝེར་མ་ནི་བུ་ཡུག་འཚུབ། སྡོང་བ་ནི་གསས་དང་སྡོང་། འགྲོགས་པ་ཡང་གསས་དང་འགྲོགས། མགོན་པ་ཡང་གསས་ལ་མགོན། བཤམ་བཤམ་གྱི་མཆོད་པ་འབུལ། ངན་འདྲེས་ཀྱི་ནོངས་པ་མཐོལ། རེས་འགའ་ནི་ཀློང་ན་རྒྱུ། གཟའ་སྐར་གྱི་བྱ་ར་བ། རེས་འགའ་ནི་ཟེར་མར་རྒྱུ། ཡག་ཉེས་ཀྱི་སྟང་མ་འཛིན། རེས་འགའ་ནི་དོགས་ལ་རྒྱུ། དབོན་གསས་ཀྱི་ལས་ལ་མྱུར། ཅོང་སེ་དང་སྤྲུལ་པ་ལ། གཞའ་ཚོན་ནི་ཅི་ལི་ལི། རྔ་ཤང་ནི་ཁྲོལ་ལོ་ལོ། སྤོས་དུད་ནི་ཐུ་ལུ་ལུ། ཕྱེ་མར་ནི་སིལ་ལི་ལི། ཡུ་ཏི་ནི་མེ་རེ་རེ། ཐུན་རྫས་ནི་ཐོ་རོ་རོ། སྣང་སྲིད་ཀྱི་ཝེར་མ་བརྔན། ངན་འདྲེས་ཀྱི་ནོངས་པ་མཐོལ། མུ་ཡེ་ཧ་ར་ཐིམ་ཐིམ་ཡེ་ཐུན་ཡ། སད་དོ་ཧྲོ་ཡོ་ཐིམ་ཡེ་ཐུན་ཡ། མདོས་ཁ་གསོ་ནས་གྲང་བསག་གོ།
དགོངས་གསོལ་ནི། བསྭོ། དགོངས་གསོལ་ནི་སུ་ལ་གསོལ་ན། དགོངས་གསོལ་ནི་གཤེན་ལ་གསོལ་ལོ། ལྷ་རྗེ་ནི་གཤེན་ལྷ་འོད་དཀར། སྲིད་རྗེ་ནི་སྟག་ལ་མེ་འབར། མྱི་རྗེ་ནི་གཤེན་རབ་མྱི་བོ། སྐུ་བཞུགས་པ་ཀློང་ན་བཞུགས་ཀྱང་། ཐུགས་དགོངས་པ་གསས་ལ་སལ་ལེ་ཡ། ཨ་དཀར་སལེ་འོད་ཨ་ཡཾ་བྲུཾ་འདུ། ཐིབ་རྨུག་གི་ཞ་ནག་ཕུད། གསལ་ས་ལེའི་མཐུ་ནུས་ཕོབ། དབོན་གསས་ནི་སད་དོ་ལ། ཤ་གཟུགས་ཀྱི་འདྲེན་ཆེ་བ། བླ་སྲོག་གིས་ཅི་རྡོ་སྟེ། ཡེ་སྲིད་ཀྱི་འདྲེན་པ་ནི། གཡུང་དྲུང་གི་ཀློང་ལ་ཐོབ། བྲུཾ་བྲུཾ་ཨ་ཡཾ་སལ་ལེ་སལ་ལེ་གསལ་སལ་ལེ་ཨཱོྃ་འདུ།
བསྭོ། སྟེང་གི་ལྷ་བསྙེན་ཏོ། དགུང་ཕྱི་བསྙེན་འཚལ་ན། དགུང་ནས་སྐྱོབ་མ་གྱིས། རྨུ་རྗེ་བསྙེན་ཏོ། གནམ་གྱི་འཇུ་ཐག་གྱིས། གུ་ལང་བསྙེན་ཏོ། སྲིད་པའི་རྟེན་ཕུར་གྱིས། བཙན་རྗེ་བསྙེན་ཏོ། རྒྱབ་ཀྱི་རྟེན་ས་གྱིས། ཐིས་རང་བསྙེན་ཏོ། མདུན་གྱི་སོ་ཁ་གྱིས། མ་མོ་བསྙེན་ཏོ། ཡག་ཁའི་རྗེ་འུ་གྱིས། དོགས་བདག་བསྙེན་ཏོ། གཞིས་ཀྱི་ཁ་འཛིན་གྱིས། གཉན་རྗེ་བསྙེན་ཏོ། ཞིང་ཁའི་ལོ་རྫི་གྱིས། ཀླུ་རྗེ་བསྙེན་ཏོ། མྱི་ཕྱུགས་སྲོག་ཀར་གྱིས། ཐོད་དཀར་བསྙེན་ཏོ། དབོན་གསས་བདུང་འཚོབ་ཀྱིས། ཝེར་མ་བསྙེན་ཏོ། བསམ་བསམ་ལག་ཏུ་སྤྲོད། མི་འབྲལ་གྲིབ་ལྟར་འགྲོགས། གསོན་པོ་བླ་ཚེ་བརྟན། གཤིན་པོ་གཤེད་དང་ཁྲོལ། རྒྱལ་ཁམས་བདེ་ལ་སྐྱིད། སྟོང་ཁམས་དར་ལ་རྒྱས། ཅི་བསམ་ལྷུན་གྱིས་འགྲུབ། བསྭོ་ཡཾ་ཨ་ཡཾ་འདུ།
སྲིད་པ་སྤྱི་སྐོང་སྣང་སྲིད་ཀྱི་མདོས་ཟབ་མོ། དབོན་གསས་ཐམས་ཅད་ཀྱི་སྲུང་བའི་གོ་ཁྲབ་གཤེན་ཆེན་པོ་གཅེ་འོད་ནས་རིམ་པར་བརྒྱུད་པ། སངས་པོ་ཁྲི་ན་ཁོད་བདག་གིས་ཡི་གེར་བཏབ་པ། ཞང་བོད་དབོན་གསས་བར་མ་ཆད་པས་མཐུ་ཐོན་པ། ཟབ་མོ་ཆིག་ཆོག་ནི་རྫོགས་སོ། ། མུ་ཙུག་སྨྲར་རོ། །
གསལ་བཤད། སྲིད་པ་སྤྱི་སྐོང་སྣང་སྲིད་སྤྱི་མདོས་ཞེས་པ་འདི་ནི། ལོ་རྒྱུས་ཆེས་རིང་བའི་བོན་གྱི་དཔེ་རྙིང་རྩ་ཆེན་ཞིག་དང་། བོད་རྒྱལ་སོ་གཅིག་པ་སྟག་རི་གཉན་གཟིགས་ཀྱི་སྐུ་གཤེན་སངས་པོ་ཁྲི་ན་ཁོད་ཀྱིས་ཡི་གེར་བཀོད་པ་གཏན་ཚིགས་སུ་ངེས་པས། དེང་རབས་བོད་ཀྱི་སློབ་གྲྭ་ཆེ་འབྲིང་གི་གཞོན་ནུ་བློ་གྲོས་ཅན་རྣམས་ཀྱི་མཐོང་ལམ་དུ་བསྟར་ན་ཕན་ཐོགས་ཆེ་བར་དམིགས་ཏེ། གུས་ཕྲན་པ་བདག་གིས་རང་ནུས་ཅི་ལྕོགས་ཀྱིས་མ་བསྐུལ་བའི་འགན་འཁྲི་དང་དུ་བླངས་ཏེ། འཚོལ་སྡུད་དང་བརྒྱུད་སྤྲོད་ཀྱི་བྱ་བ་སྤེལ་བ་འདི་ལ། མ་ཕྱི་ལག་བྲིས་ཀྱི་དབང་གིས་ཡི་གེ་ནོར་དོགས་ཀྱི་ཆ་ཅི་རིགས་ཤིག་མཆིས་ན་ཡང་། མ་དཔེ་ཇི་བཞིན་བཅོས་ལྷད་ཀྱིས་མ་གོས་པར་རང་སོར་བཞག་པ་ལས། སང་ལ་བསང་དང་། ཙང་ལ་གཙང་། ནོངས་པ་ཐོལ་ལ་མཐོལ་ཞེས་བཅོས་པ་ཙམ་དུ་ཟད་པ་ལ། འགྲིག་མིན་ལྟང་འཛིན་གྱི་དོན་ལ་བསམ་གཞིག་གནོངས་རོགས་ཞེས། རྒྱ་ཆེ་བའི་གཟིགས་མོ་བ་རྣམས་ཀྱི་ཐུགས་མོས་དང་མཐུན་པའི་དགེ་བ་དོན་ཡོད་དུ་སྨིན་པས་རེ་བ་སྙིང་ནས་ཞུ། ཟིན་བདག་པས།
