སེམས་ཀྱི་འབོད་པ།
འབྲོག་ཁ་མང།
ཆུ་བཞི་སྒང་དྲུག་གི་འདབས་ནས།།
དགའ་སྐྱོའི་གླུ་ཆུང་ཞིག་ལེན་འདོད།།
མདངས་ངག་སྒྱུ་རྩལ་གྱི་རྒྱན་དུ།།
ཕ་སྐད་མ་ཡིག་དེ་བཀོལ་འདོད།།
ཀི་ཀི་བསྭོ་བསྭོ་ཡི་མ་ཚད།།
རིགས་ཞེན་འབོད་པ་ཞིག་གྱེར་འདོད།།
མོན་ཡུལ་ཚང་ཚིང་གི་ཕྱོགས་སུ།།
མགྲོན་བརྡས་ཀི་འབོད་ཞིག་འདེབས་འདོད།།
དབྱར་གསུམ་སྤང་ལྗོངས་ཀྱི་དབུས་ནས
ཁུ་བྱུག་གསུང་དབྱངས་རེ་མཉན་འདོད།།
ཟས་ཞིམ་སྡེར་ཁ་ཞིག་སྒྲིག་ནས།།
མགྲོན་པོར་སྣེ་ལེན་རེ་བྱ་འདོད།།
སྙིང་སྡུག་བཞིན་བཟང་མའི་ཕྱོགས་སུ།།
དྲན་གདུང་འཕྲིན་པ་ཞིག་བསྐུར་འདོད།།
མ་ལྷད་མགྲིན་པ་ཡི་ཁུག་ནས།།
བརྩེ་སེམས་རོལ་དབྱངས་ཤིག་དཀྲོལ་འདོད།།
རྒྱང་རིང་རྒྱང་རིང་གི་མཛའ་མོར།།
ཁམས་བདེའི་འཚམས་འདྲི་ཞིག་བྱ་འདོད།།
ན་མཉམ་ན་གཞོན་གྱི་ཕྱོགས་སུ།།
འབོད་སྐུལ་གླུ་དབྱངས་ཤིག་ལེན་འདོད།།
རང་རློམ་སྣང་མེད་སོགས་གཡུགས་ནས།།
རང་ནུས་འབད་རོགས་ཞེས་ཞུ་འདོད།།
མི་རིགས་གླེང་སྤྲོ་ཞིག་མེད་ཀྱང།།
ཡབ་ཡུམ་མ་བརྗེད་ཞེས་ཞུ་འདོད།།
- ཟིན་ཐོ་གོང་མ།སེམས་ལ་ངེས་དང་རིགས་གཅེས་ཚོ།།
- ཟིན་ཐོ་འོག་མ།ཆང་འཐུངས་རོལ་བ།