རེ་སྐུལ།

དྲག་རླུང་ཁྲོད་ཀྱི་དྭངས་གཙང་གི་གངས་ཆུ།།

ཡབ་མེས་ཞིག་གི་ཚེ་སྲོག་གི་ལྷག་འཕྲོ།།

སེར་ཆེན་དང་ལུ་གུའི་མེ་ཏོག་འཛུམ་ཆུང་།།

འཇིག་རྟེན་ཞིག་གི་མཛེས་སྡུག་གི་དཔྱིད་དཔལ།།

ཕུ་ནུ་ཚོ།      ཕུ་ནུ་ཚོ།

ཆུ་ལ་བཙོག་པོ་མ་བཟོ་བུ་ཕྲུག་སྐོམ།།

རི་ལ་རྐོ་སློག་མ་བྱེད་སྒོ་ཟོག་ཉམས།།

ཆོས་དང་རིག་གནས་ཀྱི་རིན་ཐང་འདི་ཡིས།།

དགེ་ལྡན་ལྗོངས་ཀྱི་མིང་བྱང་དེ་མཚོན་ཡོད།།

སྐད་དང་ཡི་གེ་ཟོལ་མེད་ཀྱི་ཁྱད་ཆོས།།

མི་རིགས་ཤིག་གི་ལྷག་བསམ་གྱི་ཉིང་ཁུ།།

ཕུ་ནུ་ཚོ།      ཕུ་ནུ་ཚོ།

ཡབ་མེས་ལག་ཟུང་ལ་འཇུས་དང་བུ་ཆུང་།།

སྐད་ཡིག་སྲུང་སྐྱོབ་ལ་རེམ་དང་བུ་མོ།།