ཇོ་ མོ་ གླང་ མ་ ལགས།།

མཁར་ནག་སྐལ་བཟང་རྒྱ་མཚོ།།

སྤྱི་མཐུན་གྱི་བསོད་ནམས་ལས་གྲུབ་ཅིང་འབྱུང་བཞིའི་འཕོ་འགྱུར་ལ་བརྟེན་ནས།

མཆོང་སྟབས་གཅིག་གིས།

ཁྱེད་རང་འཛམ་གླིང་གི་ཡང་རྩེར་སོན།

སྲ་བརྟན་གྱི་ལང་ཚོ་རྒྱས་ཤིང་རབ་དཀར་གྱི་བཞིན་མདངས་བཀྲ་བཞིན།

གཟི་བརྗིད་གཅིག་གིས།

ཁྱེད་ཀྱིས་འཛམ་གླིང་ལ་ཟིལ་ཤུགས་ངོམ།

ལ་རྒྱ་དང་གཟི་བརྗིད་ཀྱི་བདག་ཉིད་དེ།    

ཇོ་མོ་གླང་མ་ལགས།

ཁྱེད་ནི་འཛམ་གླིང་གི་ཆེས་གཞོན་པའི་ས་འཛིན་ཡིན་ལ།

ཆེས་མཚན་སྙན་འབར་བའི་རི་དབང་ཡང་ཡིན།

ཁྱེད་ཉིད་འཚར་ལོང་བྱུང་བའི་དུས་སྐབས་སུ་འབྱུང་ལྔའི་གནོད་རྐྱེན་ཐེབས་མྱོང་ལ།

ལང་ཚོ་ལ་རྐྱེན་ངན་གྱིས་རྨ་ཁ་ཡང་བཟོས་མྱོང༌།

ཡིན་ན་ཡང་།

ད་ལྟ་ཁྱེད་ཀྱིས་ཉི་ཟླ་སྐར་ཚོགས་ཀྱི་རྒྱན་ཆ་སྤྲས་ཏེ།

གོ་ལའི་ཡང་རྩེ་ནས་བརྗིད་ཉམས་ཀྱིས་འགྱིང་དུས།

དགུང་དུ་བསྙེགས་པའི་དབུ་རྩེ་ནམ་ཡང་སྨད་མི་སྲིད་ལ།

སྲ་ཞིང་བརྟན་པའི་ལང་ཚོ་ནམ་ཡང་ཉམས་མི་སྲིད།

ཁྱེད་ནི་གངས་སེང་གི་ཕ་ཡུལ་ཏེ།   

 དཀར་གསལ་གྱི་བཞིན་ལ་འགྱུར་བ་མེད།

ཁྱེད་ནི་མཐོ་སྒང་གི་གནས་མཆོག་སྟེ།  

  སྲིད་འབྱོར་གྱི་གཙང་རྒྱུན་ཁྱེད་ལས་འབབ།

ཁྱེད་ནི་ལོ་རྒྱུས་ཀྱི་དཔང་པོ་དང་གངས་ལྗོངས་ཀྱི་ལ་རྒྱ་སྟེ།

བསིལ་ལྗོངས་ཀྱི་འཕོ་འགྱུར་ཁྱེད་ལས་གསལ་ཞིང་དབུ་འཕང་གི་བ་དན་ཁྱེད་ལས་རྟོཊ།

ཇོ་མོ་གླང་མ་ལགས།  

 ཁྱེད་ནི་གཟི་བརྗིད་དང་ལ་རྒྱའི་བདག་ཉིད་དེ།

ཇི་སྲིད་ཀྱི་བར་དུ།

འཛམ་གླིང་གི་ཆེས་མཐོ་ས་ནས་བརྗིད་ཉམས་ཀྱིས་འགྱིང་ཆོག་པ་ནི།

ཁྱེད་དང་ཁྱེད་ལ་དབང་བའི་ཐུ་བྷོད་ཀྱི་མི་རིགས་ཡིན་