ཀ་ཕྲེང་ངན་མཚང་འབྱིན་པའི་ང་རོ།

          མཁར་ནག་སྐལ་བཟང་རྒྱ་མཚོ།།

ཀ་ཁའི་སྐད་རིགས་སྨྲ་བའི་སྐྱེས་བུ་ཡི་ཚོགས་ལས།།      

ཁ་ཅིག་ཁེངས་དྲེགས་རྒྱས་ཀྱང་མཁྱེན་དཔྱོད་དང་བྲལ་ཞིང་།།

ག་ཞ་དགོད་པའི་ཉམས་ཀྱིས་འགྲོ་བ་ཀུན་བསླུ་ཚུལ།།

ང་ཡིས་མངོན་སུམ་མཐོང་ཕྱིར་དངན་པ་རང་ཤོར་སོང་།།

ཅ་ལག་ཅི་ཙམ་འཛོམས་ཀྱང་ཅོལ་ཆུང་གི་བློ་ཅན།།

ཆ་རྐྱེན་མཆོག་ཅིག་ལྡན་ཡང་ཆོག་ཤེས་དང་བྲལ་ཞིང་།། 

 ཇ་ཆང་འཇམ་པའི་རོ་ལ་རྗེས་ཆགས་ཀྱི་སེམས་པ།། 

ཉ་མོ་ཉལ་འགྲོར་དགྱེས་བཞིན་ཉམ་ང་རང་མི་འདུག། 

ཏ་རིན་ལྟ་བའི་རྫིག་ཉམས་བརྟན་པོ་ཡི་ངང་ནས།།

ཐ་ཤལ་ཐུ་བོའི་སྤྱོད་ངན་ཐམས་ཅད་ལ་གོམས་ཤིང་།། 

ད་དུང་དུས་ཀུན་བག་མེད་དུ་ཆང་ལ་སྤྱོད་བཞིན།།  

ན་ཟླ་རྣམས་ལ་ཕྲག་དོག་རྣམ་འགྱུར་ཡང་བསྟན་འདུག།    

པ་སངས་དཔལ་ལྟར་དཀར་བའི་སྤྱོད་བཟང་དང་བྲལ་ཞིང་།། 

ཕ་མ་ཕུ་ནུ་སོགས་ལའང་ཕོག་ཐུག་རེ་བཏང་ནས།། 

བ་གླང་བོང་བུ་ལ་སོགས་བྱ་ཡུལ་སོང་གི་སྡེ་དང་།།

མ་གྱུར་དམན་པའི་འགྲོ་ལ་སྨན་སེམས་རང་མི་འདུག། 

ཙ་རིར་བརྩོན་པས་སྐོར་བའི་བཙུན་པ་ཡི་ཚོགས་དང་།། 

ཚ་གྲང་འཚེས་པ་བཟོད་པའི་ཚངས་སྤྱོད་ཀྱི་སྡེ་སོགས།། 

ཛ་ཡ་མཛའ་གཅུགས་ངང་ནས་འཛིན་དགོས་པའི་ཚུལ་འདི།། 

ཝ་ཡེ་ཝོ་བརྒྱལ་མ་འཛེམ་ཝ་ལེར་རང་སོམས་ཤིག། 

ཞ་འཐེང་ཞར་བ་སོཊ་ལ་ཞབས་ཏོག་གི་རྒྱུ་ནོར།། 

ཟ་འཐུང་བཟང་པོ་ཡོད་ཀྱང་གཟིགས་སྐྱང་རང་མི་མཛད།།

འ་འུར་འོལ་ཚོད་ཅན་གྱི་འུད་བརྗོད་ཀྱི་ཚིག་ལས།།

ཡ་རངས་ཡར་ཐོན་ཚིག་བཟང་ཡིད་ལ་ཡང་མི་འཁོར།།

རྭ་ལྟར་རང་རློམ་མཁྲེགས་པའི་རང་གཤིས་དེ་འདོར་ཕྱིར།།

ལ་ལས་ལེཊ་པར་གདམས་ཀྱང་ལོག་ལྟ་ཡི་ཚུལ་འཛིན།།

ཤ་ཚའི་བཤེས་གཉེན་ལ་སོགས་ཤེས་ལྡན་གྱི་བསླབ་བྱ།།

ས་ལྟར་བསམ་བཞིན་དོར་ནས་སྲི་ཞུ་རང་མི་སྒྲུབ།། 

ཧ་ཅང་ལྷུན་ཆགས་མ་ཡིན་ཧུར་ཐག་གི་བརྩོན་པས།།  

ཨ་གསར་ཨར་ལ་གཏད་ནས་ཨ་ཁུ་ཡིས་བྲིས་པའི།། 

ཧ་ལམ་རྣོ་ངར་ཚིག་གི་མཚོན་ཆ་རུ་གྱུར་ཀྱང་།།  

ཨ་འཐས་སྤྱོད་ངན་འགོག་ཕྱིར་སྨྱུག་རྩེ་ལས་འཁྲུངས་སོ།།  །།