ངས་ཁྱེད་ལ་ཡིད་འོང་གི་སྨོན་ལམ་འདེབས།

 

གྲོགས་ཀྱི་དྭངས་མ་ཁྲི་བློ་གྲོས་སྐུ་གཤེགས་པའི་རྗེས་དྲན་དུ།

                    

                        མཁར་ནག་སྐལ་བཟང་རྒྱ་མཚོ།

     མཆོད་སྟེགས་སྟེང་འོད་དུ་འཚེར་བ་ནི་མདང་དགོང་གི་མར་མེ་ཡིན།

བཞིན་རས་སྟེང་དལ་དུ་འབབ་པ་ནི་སྐྱོ་གདུང་གི་མཆི་མ་ཡིན།

སུ་ཞིག་གི་ལས་དབང་དང་འདྲ་བའི་མར་མེ་ཚེ་འབར།

ལྷིང་འཇགས་ཀྱི་མུན་ཁྲོད་ན་མཛེས་སྡུག་གི་འོད་ཟེར་སྤྲོ།

 

ལྷགས་རླུང་གིས་བསུ་པའི་ཞོགས་པའི་ཕོ་ཉ་དལ་དལ་དུ་སླེབས་དུས།

ཁྱེད་ཀྱིས་ཆེས་མཐའ་མཇུག་གི་སྙན་ངག་གི་དབྱངས་རྟ་གྱེར་བཞིན།

མེ་ཏོག་དང་གླུ་གཞས་མེད་པའི་འཇིག་རྟེན་གཞན་དུ་བཞུད།

དེ་ནས་བཟུང་།  འཇིག་རྟེན་འདིར་སླར་ཡང་སྙན་ངག་གིས་སྟོངས་པས།

ཉི་ཟླའང་སྡུག་བསྔལ་གྱི་སྤྲིན་རིམ་དུ་ཡིབ་ལ།

གཙང་བོ་ཡང་ཆབ་རོམ་གྱི་གུར་ཁང་དུ་འཛུལ།

 

ཕྱིར་ཕེབས་ཤོག 

སྙིང་གྲོགས་ལགས། 

གནས་དེ་ན་ཕྲག་དོག་དང་སྒྲོ་བསྐུར་གྱི་དུག་མདའ་མེད་པ་བདེན་ཡང་།

བརྩེ་གདུང་དང་སྒྱུ་རྩལ་གྱི་སྐྱེད་ཚལ་དེ་བས་ཀྱང་བྲལ།

དེ་ནི་གཏན་སྡོད་ཀྱི་གནས་མིན་ལ་ཡིན་ཀྱང་མི་སྲིད།

ཁྱེད་ནི་སྣུམ་ཟད་ཀྱི་མར་མེ་བཞིན་དུས་ཆོས་སུ་གྱུར་ཀྱང་།

ཁྱེད་ཀྱི་ཁེར་རྐྱང་གི་རྣམ་ཤེས་འཁྱམས་པོ།

ཅིས་ཀྱང་ཕྱོགས་འདིར་ཕེབས་ཤོག

 

འདི་ན་ཁྱེད་ཀྱིས་བསྔགས་འོས་པའི་གངས་དཀར་ལྷུན་པོ་ཡོད་ལ།

ཁྱེད་ཀྱི་སྨྱུག་རྩེ་ལས་བཞུར་མྱོང་བའི་གཙང་ཆབ་སྔོན་མོའང་ཡོད།

འདི་ན་འདབ་སྟོང་གིས་བརྒྱན་པའི་སྙན་ངག་གི་སྐྱེད་ཚལ་ཡོད་ལ།

བརྩེ་གདུང་གིས་ཆིངས་པའི་སྒྱུ་རྩལ་གྱི་རྐང་དྲུག་ཀྱང་ཡོད།

འདི་ན་ཁྱེད་ཀྱི་རླབས་ཆེན་གྱི་ལས་འགན་ལུས་ཡོད་ལ།

ད་དུང་།

སྙན་ངག་ལ་དགྱེས་པའི་ཞེན་ཆགས་ལྕི་མོའང་ཡོད།

 

ཕྱིར་ཕེབས་ཤོག

སྙིང་གྲོགས་ལགས།

དུས་རབས་གསར་བ་ནི་སྙན་ངག་དང་བརྩེ་དུང་གི་འཇིག་རྟེན་དེ།

ང་ཚོས་སྒྱུ་རྩལ་གྱི་སྐྱེད་ཚལ་དུ་བརྩེ་དུང་གི་མེ་ཏོག་ཐུ་བཞིན་བསྒུག་ངེས་ལ།

ཁྱེད་ཀྱང་རྣམ་དཔྱོད་ཀྱི་གཤོག་རྩལ་ངོམ་བཞིན།

སྐྱ་རེངས་ཀྱིས་དྲངས་པའི་ཉི་གཞོན་དང་ལྷན་དུ།

རངས་པར་ཕྱིར་ཕེབས་ཤོག

 སྙིང་གྲོགས་ལགས།

 

ངེས་ཁྱེད་ཀྱི་ཆེད་དུ་ཡིད་འོང་གི་སྨོན་ལམ་བཏབ་མྱོང་ལ།

རྗེས་དྲན་གྱི་སྙང་ངག་ཀྱང་བྲིས་ཆོག