ཀ་རྩོམ་གཞོན་ནུ་བསྐུལ་བའི་དྲི་བཞོན།

མཁར་ནག་སྐལ་བཟང་རྒྱ་མཚོ།

ཀ་ཡེ་གསོན་དང་བསིལ་ལྗོངས་ན་ཆུང་གི་གྲོགས་པོ།།

ཁ་བས་བཀླུབས་པའི་མཛེས་སྡུག་ཕུན་ཚོགས་ཀྱི་ཞིང་ལ།།

ག་ནས་བསྡད་ཀྱང་མེས་རྒྱལ་གཅེས་འཛིན་གྱི་བསམ་པས།།

ང་ཚོའི་ཕ་ཡུལ་རྫོགས་ལྡན་དཔལ་ཡོན་ལ་དགོད་རོགས།།

ཅ་ཅོ་སྨྲ་བ་མང་ཡང་ཕ་སྐད་ནི་མ་བརྗེད།།

ཆ་ལུགས་སྣ་ཚོགས་མཛེས་ཀྱང་རང་ཆས་དེ་མ་འདོར།།

ཇ་ཆང་རོལ་རྩེད་ངང་ནས་མི་ཚེ་འདི་མ་གཏོང་།།

ཉ་མོ་ཆུ་ལ་དགའ་བཞིན་རིག་གནས་ལ་བརྩོན་དང་།།

ཏ་ག་ཏ་བཞིན་མཛེས་པ་ཡིད་འོང་གི་ལུས་ལ།།

ཐ་སྙད་རིག་པའི་དོ་ཤལ་སྣ་ཚོགས་ཀྱིས་བརྒྱན་བཞིན།།

ད་དུང་ངོམས་མེད་ཡོན་ཏན་སྦྲང་རྩི་ལ་རོལ་ན།།

ན་ཚོད་གཞོན་པའི་དུས་བཟང་ཆུད་ཟོས་སུ་མི་འགྲོ།།

པ་སངས་ལྟར་དཀར་རྣམ་དག་ལྷག་བསམ་གྱི་ཟླ་བ།།

ཕ་རོལ་ཀུནྡ་རྒྱས་པའི་གཉེན་པོ་རུ་ཤར་ན།།

བ་ཚྭའི་དྲི་མས་དབེན་པ་མཛའ་གཅུགས་ཀྱི་ཆུ་གཏེར།།

མ་ཕམ་མཚོ་མོ་ཇི་བཞིན་སྲིད་རྩེ་རུ་འཕྱུར་ངེས།།

ཙ་ཀྲའི་དཔལ་ལྟར་རྣོ་བའི་ཤེས་རབ་ཅིག་ཞན་ཡང་།།

ཚ་གྲང་སྡུག་བསྲན་ཆེ་བ་གུས་རྟག་གི་བརྩོན་པས།།

ཛ་ཧཱུ་བུ་མོ་དང་མཚུངས་ལེགས་བཤད་ཀྱི་རྒྱུན་བཟང་།།

ཝ་ལེར་ཤར་པ་ཡིད་ཀྱི་རལ་ཀློང་དུ་སྐྱིལ་ཅིག།

ཞྭ་གོས་བཀྲག་མདངས་རྒྱས་པའི་ཁེངས་ཅན་ལ་མ་སྨོན།།

ཟ་མ་ངན་ངོན་སྟེན་པའི་དཔྱོད་ལྡན་དག་མ་སྨོད།།

འ་འུར་ཁེངས་ཚིག་སྨྲ་བའི་གྲོགས་ངན་དང་མ་འགྲོགས།།

ཡ་རབས་སྤྱོད་ལམ་ལེགས་པའི་གྲོགས་མཆོག་ནི་མ་སྤོང་།།

ར་རོ་ཆང་གིས་མྱོས་པའི་ཚུལ་མིན་གྱི་སྤྱོད་ངན།།

ལ་ལུང་ཀུན་ཏུ་འཁྱམས་པ་རི་སྤྱང་གི་སྤུན་ཟླ།།

ཤ་ཞེན་བྲལ་བའི་སྨྱོ་སྤྱོད་ཁོ་ན་ལ་བརྩོན་ན།།

ས་ཕྱོགས་གང་དུ་སོང་ཡང་སྙིང་ཉེ་བའི་གྲོགས་དཀོན།།

ཧ་ཧ་དགོད་བཞིན་དུས་ཀུན་རྣམ་གཡེང་ལ་ཤོར་ན།།

ཨ་མའི་རླབས་ཆེན་ཐུགས་དགོངས་དོན་མེད་དུ་སྟོང་འགྲོ།།

ཨ་ཁུ་རྒན་པའི་གསུང་བཞིན་ཤེས་བྱ་ལ་བརྩོན་དང་།།

ཧ་ཅང་མི་འགྱངས་མཁས་པའི་རྒྱལ་ས་ཞིག་ཟིན་ངེས།།

ས་བོན་བཟང་ལ་འབྲས་བུ་ལེགས་པོ་ཞིག་སྨིན་ཕྱིར།།

ཤ་ཚའི་ཚིག་འདི་འབིགས་བྱེད་རླུང་གཞོན་ལ་མ་སྐུར།།

ལ་རྒྱ་བསམས་ན་ལྔ་རིག་པད་དཀར་གྱི་ཚལ་ལ།།

ར་ཡིག་གཉིས་པ་ཇི་བཞིན་སྐྱོ་མེད་དུ་འཁོར་དང་།།

ཡ་མཚན་ཆེ་བ་ཚན་རིག་དར་རྒྱས་ཀྱི་སྐབས་འདིར།།

འ་ཅག་རྣམས་ལ་བརྩོན་པའི་བསྐལ་བཟང་ཞིག་ལྡན་ཕྱིར།།

ཟ་ཧོར་དབྱིན་ཇི་ལ་སོགས་ཕྱི་གླིང་པའི་ཡིག་རིགས།།

ཞྭ་དཔེ་ལྷམ་ལྟར་མ་སོང་ལེགས་པོ་རུ་སྦྱོངས་དང་།།

ཝ་མོས་རྒྱ་སྟག་བསླུས་པའི་ངང་ཚུལ་ལ་སྤྱོད་ན།།

ཛ་ཡ་བཟང་བོ་ཡིན་ཡང་རང་བཞིན་གྱིས་གྱེས་འགྲོ།།

ཚ་ཟེར་འབར་བའི་སྣང་བྱེད་གཞོན་ནུ་ཡི་འགྲོས་བཞིན།།

ཙ་རི་ལ་སོགས་ཡུལ་ཀུན་རིས་མེད་ཀྱིས་སྐྱོང་དགོས།།

མ་འོངས་དུས་ན་མེས་རྒྱལ་རྨད་བྱུང་གི་དཔལ་གྱིས།།

བ་གམ་སུམ་བརྩེགས་བརྗིད་པའི་ལྷ་ཡུལ་ལ་འགྲན་ཚེ།།

ཕ་ཡུལ་ནོར་འཛིན་སྒེག་མོའི་ཡིད་འོང་གི་ལུས་ལ།།

པ་ཏྲའི་རི་མོས་བརྒྱན་པའི་མཛེས་སྡུག་ཅིག་འཆར་ངེས།།

ན་ཆུང་ཤེས་རབ་རྒྱས་པ་བློ་གསལ་གྱི་དུས་བཟང་།།

ད་ལྟ་ཉིད་དུ་བཅུ་ཕྲག་རིག་གནས་ལ་སྦྱངས་ན།།

ཐ་མའི་སྣང་ཚུལ་མཐའ་དག་དུས་གཅིག་ཏུ་ལོག་ནས།།

ཏ་ཐཱ་ག་ཏ་ཇི་བཞིན་མཁྱེན་རབ་ཅིག་རྒྱས་ངེས།།

ཉ་རྒྱས་ཟླ་ལྟར་མཛེས་པ་མཚོ་བྱུང་གི་ལྷ་མོ།།

ཇ་ཡུན་ཙམ་ལའང་མ་བརྗེད་དུས་རྟག་ཏུ་སྟེན་ན།།

ཆ་ཤས་རིམ་གྱིས་འཕེལ་བ་བསིལ་ཟེར་གྱི་དཔལ་ལྟར།།

ཅ་ཅོ་ངག་ལ་དབང་པའི་དགེ་མཚན་ཞིག་འཐོབ་སྲིད།།

ང་རོ་དྲག་པོ་སྒྲོག་པ་གདོང་ལྔ་ཡི་མཁས་དབང་།།

ག་བུར་རྡུལ་མང་བརྩེགས་པ་ཤེས་བྱ་ཡི་གངས་ནས།།

ཁ་དོག་རྣམ་པར་མཛེས་པ་མཁྱེན་དཔྱོད་ཀྱི་གཡུ་རལ།།

ཀ་ཙན་དབྱངས་ཀྱི་དཔལ་དང་ལྷན་གཅིག་ཏུ་ངོམ་སོང་།།

 

༡༩༩༩ལོའི་སྦྲང་ཆར་དེབ་བཞི་བའི་སྟེང་དུ་སྤེལ།