སྟོན་ཁར།
མཁར་ནག་སྐལ་བཟང་རྒྱ་མཚོ།།
སྟོན་ཁར།
ལང་ལོང་གི་ཆུ་འཛིན་དགུང་སྔོན་ན་གཡོ་ཞིང༌།
གཡང་དཀར་གྱི་ལུག་ཁྱུ་རྩྭ་ཐང་དུ་མཛེས།
སྟོན་ཁར།
འབྲུ་དྲུག་གི་སྙེ་མས་མགོ་ལྕོག་ལྡེམ་ཞིང༌།
སོ་ནམ་པའི་སྙིང་ཁོང་འཛུམ་གྱིས་ཁེངས།
སྟོན་ཁར།
སློབ་གླིང་གསར་བ་ཞིག་གི་སྒོ་ཐེམ་བརྒལ་བའི་སློབ་མ་ཚོར་སྤྲོ་སྣང་གིས་ཁེངས་ཤིང༌།
འཚོ་བ་སྣེ་འཛིངས་ཤིག་གི་ལམ་སྣ་ཟིན་པའི་གཞོན་ནུ་ཚོར་སྤོབས་པ་ཡིས་མྱོས།
སྟོན་ཁར།
ཆར་དུས་སུ་བཞད་པའི་མེ་ཏོག་གི་མཛེས་སྡུག་ལྷ་ལམ་དུ་བསྡུས་ཤིང༌།
ནགས་ཀློང་དུ་རྒྱས་པའི་ལྗོན་ཤིང་གི་སྐྲ་ལོ་དྲི་བཞོན་ལ་བསྐུར།
སྟོན་ཁར།
དྲོད་ཁོལ་འཛོམས་པའི་དབྱར་དུས་ཀྱིས་སྐྱོ་གདུང་གི་གྱེས་ཕྱག་ཕུལ་ཞིང༌།
གྲང་རེག་ཆེ་བའི་དགུན་དུས་ཀྱིས་ལྷགས་རླུང་གི་སྔོན་བརྡ་བཏང༌།
སྟོན་ཁར།
རྟ་མཆོག་གི་རྨིག་སྒྲས་རྩྭ་ཐང་ལ་གཟི་བརྗིད་བསྣན་ཅིང༌།
རླངས་འཁོར་གྱི་དུང་སྒྲས་མཛེས་ལྗོངས་ལ་འཇིགས་སྣང་བཟོས།
སྟོན་ཁར།
གཡུར་དུ་ཟ་བའི་འབྲས་བུ་ཐོབ་པའི་ལུས་ཅན་གྱི་འགྲོ་བས།
བདེ་སྐྱིད་ཀྱི་འཚོ་བ་ལ་རོ་མྱོང་བྱེད་ཅིང༌།
ཕྱོགས་སུ་འཁྱམས་པའི་ཁེར་རྐྱང་གི་སེམས་པས།
སྐྱོ་གདུང་གི་ཚོར་བ་ལ་ཕྱིར་དྲན་བྱས།
སྟོན་ཁ།
སྐྱེས་འགྲོ་ཡོད་ཚད་ལ་ཕུགས་སེམས་དང་དགོད་སྒྲས་ཁེངས་ཤིང༌།
གཞོན་ནུ་མའི་ལང་ཚོ་ལ་མཛེས་སྡུག་སྣོན་པའི་འབྲས་ལྡན་གྱི་དུས་ཚིགས།
སྟོན་ཁར།
ཁུ་བྱུག་གི་གསུང་སྙན་དང་བྲལ་རྐྱེན།
བདག་གི་སེམས་ལ་སྐྱོ་གདུང་གིས་རྨ་ཁ་བཟོས།།
- ཟིན་ཐོ་གོང་མ།སྙིང་གཏམ་མུ་ཏིག་དོ་ཤལ།
- ཟིན་ཐོ་འོག་མ།ཆུ་ཐིགས་ཀྱི་གཏམ།
ཟིན་གྲོགས་ལྷན་རྒྱས་ནས་བཀའ་མོལ་གནང་བ་ཐུགས་རྗེ་ཆེ།
སྟོན་ཁ། འབྲས་དྲུག་གི་ལོ་ཏོག་གཡུར་དུ་སྨིན་ཤིང་སྡོང་ལོའི་འདབ་མ་ས་རུ་ཟག་པའི་གསེར་མདོག་གི་ཡུལ་ལྗོངས་ཤིག
མདོ་ཡི་ཚན་པ་གསུམ་པོའི་ཁྱོད་ཀྱི་དེ་བརླགས་འདུག
མཁས་དབང་ཁྱེད་ཀྱི་སྙན་རྩོམ་དག་ཤིན་ཏུ་ནས་སྙན་པོ་འདུག དུས་ཚོད་རེ་བྱུང་དུས་ཁོ་བོའི་ཟིན་བྲིས་སུ་བཀའ་སློབ་རེ་གནང་བར་ཕེབས་སྒུག་བྱས་ཡོད།
གསོ་རིག་ལ་བརྩོན་བཞིན་པའི་བོན་ཕྲུག་ཞིག་ནས།