སྤེལ་མ་ཕོད་ཉར་ན་རང་སྡུག་རེད།།

ཐེངས་དང་པོའི་གོམ་འགྲོས་ཨ་མས་ཁྲིད། །

གཟན་དམར་་པོའི་རིན་སྒོར་ཨ་ཕས་སྤྲད། །

འདོན་ཀ་ཁའི་དབྱངས་རྟ་ཞང་པོས་བསླབས། །

གཞུང་ལྔ་རིག་གོ་བ་བླ་མས་གནང་། །

མགོན་རྣམ་མཁྱེན་རྒྱལ་བ་གཤེན་རབ་ཀྱི།།

བཀའ་དྲི་མེད་མདོ་འབུམ་རྒྱུད་མཛོད་འདིའི།།

ཚིག་ཙམ་མིན་དོན་དམ་དགོངས་པའི་བཅུད།།

དུས་ནམ་ཡང་ངོམ་མེད་བཏུང་འདི་སྐྱིད།།

ལུང་རིག་པའི་རྩོད་པ་མཁས་པས་རྒྱག།

རྡོ་དབྱུག་པའི་རྩོད་པ་བླུན་པོས་རྒྱག།

ཚིག་ངན་པའི་རྩོད་པ་དྲྭ་འབུས་རྒྱག།

ངའི་འཆད་ར་དང་པོ་ཕེབས་ས་ཡིན།།

བོན་ཡོད་དགུ་འབྱུང་གནས་ཐིམ་སའི་གཞི།།

དོན་འགྱུར་མེད་བདེ་སར་ཕྱིན་བྱེད་ལམ།།

དུས་ཡུན་རིང་སྒོམ་པའི་བསླུ་མེད་འབྲས།།

གང་དྲིས་ཀྱང་གང་དཔོག་རིག་མཆོད་འབུལ།།

དེ་མ་གཏོགས་དེང་སོང་དྲྭ་འབུ་འགས།།

དོན་རྩོམ་ཉམས་ཕྱོགས་ལ་མི་སེམས་པ།།

གོ་མེད་པའི་སྟོང་སྒྲ་མང་བསྒྲགས་འདུག།

དེ་འདྲ་བའི་དྲྭ་གྲོགས་མེད་ན་དགའ།།

ངའི་དྲི་བའི་གནད་ལ་མ་ཁེལ་བའི།།

ཚིག་མཚོན་ཆའི་དྲིས་ལན་མང་་ན་ཡང་།།

ཅི་མི་སྙམ་རང་འགར་འཇོག་པ་ལས།།

ཡ་མི་བྱེད་འཆད་རའི་དམ་བཅའ་ཡིན།།

ཁྲ་འདྲ་བའི་སྤྱང་གྲུང་མ་འཛོམས་ཀྱང་།།

ལུག་འདྲ་བའི་གླེན་པ་མིན་པས་ན།།

ལོ་དུ་མ་གཞུང་ལ་བརྩོན་པའི་འབྲས།།

སྤེལ་མ་ཕོད་ཉར་ན་རང་སྡུག་རེད།།

ཕ་མེས་པོའི་རྐང་རྗེས་འཚོལ་འདོད་པའི།།

བུ་ཚ་འུ་ལས་ཀྱི་འཕྲོ་ཅན་རྣམས།།

ངའི་འཆད་ར་གཡུང་དྲུང་དགའ་ཚལ་དུ།།

དོན་བདེན་པའི་རྟགས་གསལ་བསྣམས་ནས་ཕེབས།།