འཆད་རའི་ཕུགས་བསམ་གླེང་བ།

བླ་མ་དང་ཤེས་རབ་སྨྲ་བའི་སེང་གེ་དབྱེར་མ་མཆིས་པ་ལ་ཕྱག་འཚལ་ལོ།།

འཛམ་གླིང་སོག་པའི་དབྱིབས་ཅན་སྟེང་དུ་འཚོ་ཞིང་གངས་ཆུ་སྔོན་མོ་མཉམ་དུ་གསོལ་བའི་རིགས་རུས་གཅིག་པའི་སྤུན་ཟླ་རྣམ་པ་ལགས། ང་ཚོ་ནི་རང་གི་རིག་གཞུང་མི་ཉམས་གོང་འཕེལ་དང་ཉམས་པ་སླར་གསོའི་ཆེད་དུ་རང་ནུས་གང་ལྕོགས་ཀྱི་སྒོ་ནས་བོད་ཡིག་གི་དྲྭ་བ་གང་རུང་ཞིག་གི་ཐོག་ཏུ་འགྲོ་རྒྱུ་ནི་དུས་རབས་ཀྱིས་སྤྲད་པའི་རིན་ཆེན་གསེར་ལས་ལྕི་བའི་འགན་འཁྲི་རུ་སོང་གཤིས།

དེས་ན་ཁོ་བོ་ནི་ཞང་བོད་རིག་གནས་ལ་ལྷག་བསམ་དཀར་བའི་ཧི་བོན་དྲྭ་བའི་གཙོ་སྒྲུབ་པ་ རྣམ་པ་ཚོས་ངལ་བ་ཁྱད་དུ་བསད་དེ་ཧི་བོན་ཟིན་ས་ཡངས་པོར་བཟུང་བ་དེའི་ཐོག་ཏུ་འཆད་ར་ཞེས་པའི་མིང་ཞིག་གཡར་ཏེ་ཞུགས་པ་ཡིན། འཆད་ར་འདི་ནི་ལུང་རིག་གི་རྒྱབ་རྟེན་ཡོད་ པའི་དཔྱད་བརྗོད་སྤེལ་སའི་འཆད་ར་ལས་དོན་མེད་གཏམ་ཉོབ་ཀྱི་གད་སྙིགས་སྤུང་སའི་འཆད་ར་མ་ལགས་སོ།། དེས་ན་རིག་པའི་གནས་ལྔ་ལ་མ་རྨོངས་ཤིང་ཤེས་རིག་གི་ཉམས་ཀྱིས་ཕྱུགས་ པའི་བླ་མ་དང་མཁས་དབང་རྣམ་པ་གཞན་ཕན་གྱི་ཆེད་དུ་དང་། རང་དང་འདྲ་མཉམ་གྱི་ འཆད་གྲོགས་རྣམ་པ་ཕན་ཚུན་གླེང་མོལ་གྱི་ཆེད་དུ་དང་། རང་ལས་དམན་པའི་གསར་ཞུགས་ ཀྱི་སློབ་མ་རྣམ་པ་ སོ་སོའི་ཤེས་རིག་ལ་ཡར་རྒྱས་ཀྱི་ཆེད་དུ་ངའི་འཆད་ར་རུ་ཕེབས་ཤིག་ཀྱེ།། 

ཡ་གྲོགས་པོ་ཚོ།  ཁོ་བོས་ནི་དུས་དེ་རིང་ནས་བཟུང་སྟེ་མེས་པོ་དམ་པའི་ཞབས་རྗེས་འཚོལ།  ཁོ་བོས་ནི་དུས་དེ་རིང་ནས་གཟུང་སྟེ་མ་འོངས་པའི་མི་རབས་དག་གི་ཚེ་སྲོག་གསོ།    ཁོ་བོ་ནི་དུས་དེ་རིང་ནས་བཟུང་སྟེ་ཙན་དན་འཕྲེང་བ་ལག་དང་དང་མི་འབྲལ་བའི་སྒོ་ནས་འཆད་ར་ལ་ཆས་ཡོང་།།