དྲི་བ།

༡   རྣམ་སྨིན་དང་ཚེ་དབང་གཉིས་བསྟན་སྐབས་རང་གི་སྤང་བྱའི་དངོས་གཉེན་དང་གཞི་

གཉེན་སོང་ཞེས་མདོ་མཚན་ཉིད་ཐེག་པ་ལྟར་སྤོང་གཉེན་དུས་མཉམ་འགག་པའི་དངོས་གཉེན་དང་དེ་གཉིས་སྐྱེ་འགག་མཉམ་པའི་གཞི་གཉེན་ཞེས་འདོད་དམ་དེ་མིན་གང་།

༢  རྣམ་སྨིན་དང་ཚེ་དབང་གཉིས་རིམ་གྱིས་ཐོབ་ནས་ཨ་དཀར་བའི་མཐོང་ལམ་དེ་སྐད་ གཅིག་དུ་མ་ལ་སྐྱེ་འམ།  ཡང་ན་རྣམ་སྨིན་དང་ཚེ་དབང་གཉིས་དུས་གཅིག་ལ་ཐོབ།

ཁོ་བོས་བསམ་ཚུལ་ཞིག་བཀོད་ན།        གཉིས་ཀ་མཐོང་ལམ་ལ་འཇོག་

དགོས་པ་ལུང་རིག་གཉིས་ཀྱིས་གྲུབ་པའི་ཕྱིར་ཏེ། དང་པོ་གསང་བ་ཐབས་ཞགས་གཡུང་དྲུང་ གསང་བའི་རྒྱུད་ལས། །མཐོང་ལམ་རྣམ་སྨིན་སེམས་དཔའ་དང་། །ཚེ་ལ་དབང་ཐོབ་སེམས་ དཔའ་ཡིས། །དབྱེ་བའི་ས་ནི་གཅིག་ཡིན་ནོ། ཞེས་དང། གསང་སྔགས་བཀའ་འགྲེལ་ལས། རྒྱུན་ མཐའི་སྔ་ལོགས་ཀྱི་སྒོམ་ལམ་གྱིས་བསྡུས་པའི་བདེ་སྟོང་ཡེ་ཤེས་རྒྱུད་ལྡན་གྱི་སྐྱེས་བུ་དེ་ཕྱག་ ཆེན་རིག་འཛིན་གྱི་ངོ་བོ་ཞེས་གསུངས་པས། དེའི་ཤུགས་ལ་རྣམ་སྨིན་དང་ཚེ་དབང་གཉིས་ མཐོང་ལམ་ལ་འཇོག་དགོས་པ་བསྟན། རིགས་པའི་ཆ་ནས་སྦྱོར་ལམ་ལ་སོགས་ལ་མེད་དེ་ཉོན་ མོངས་སྒྲིབ་པ་སྤངས་པ་མེད་པའི་ཕྱིར་རོ། །ཉོན་སྒྲིབ་སྤངས་དགོས་པ་ནི། །ཐབས་ཞགས་ལས་

ཉོན་མོངས་པ་ཡིས་ཟག་པ་མེད། ཅེས་དང་།  འགྲེལ་ཉི་ཟེར་དྲ་བ་ལས་རིག་འཛིན་གྱི་ངོ་བོ་ནི་

སངས་རྒྱས་སེམས་ཅན་གང་ཡང་མིན་པའི་ས་བཅུ་གཡུང་དྲུང་སེམས་དཔའ་འོ། །ཞེས་སོགས་ གསུངས་པའི་ཕྱིར།  ༣ ཡེ་ཤེས་ཐིག་ལེའི་འགྲེལ་བ་དང་དེའི་མཆན་འགྲེལ་ལས། གཞི་ཡེ་ཤེས་ལྷུན་གྲུབ་ཆེན་པོ་དེ་གྲུབ་མཐའི་གསང་བ་དགུ་ལས་འཕར་བ་ཡིན་ཏེ། ཕྱི་ནང་རྒྱུ་ འབྲས་ཆེ་ཆུང་ཨ་དཀར་ཡེ་གཤེན་བླ་མེད་ཀུན་ལ་འཕགས་པའོ། ཞེས་གསུངས་སྐབས ཐེག་པ་ཆེ་ཆུང་ཞེས། ཆེ་བ་དཔོན་གསས་འཇོག་ལ། ཆེ་བ་དཔོན་གསས་དེ་རྫོགས་པ་ཆེན་པོ་ལ་

འཇོག་མཁན་སྣང་།  དེ་ལྟར་ན།  གྲུབ་མཐའི་གསང་བ་དགུ་མི་ཚང་སྟེ།  བླ་མེད་དང་ཆེ་བ་

གཉིས་གཅིག་ལ་རྩིས་པའི་ཕྱིར།  དེ་མིན་ན་བླ་མེད་ལས་ཁྱད་དུ་འཕགས་ཚུལ་ཇི་ལྟར་བསྟན།

བླ་མེད་ལས་ཁྱད་དུ་འཕགས་ན་གོང་དུ་བསྟན་པའི་གཞི་ཡེ་ཤེས་ལྷུན་འགྲུབ་དེ་ཨ་དཀར་བའི་ལྟ་བ་ཡིན་ནམ་མིན།

གོང་གི་དོན་ཚན་གསུམ་གྱི་ཐོག་ལ་ལུང་རིགས་དང་མཐུན་པའི་ལན་ཞིག་གནང་རྒྱུའི་རེ་བ་

ཆེ་ཞུ།