སེམས་པའི་གཞི་བརྟེན།།

ན་ནིང་དབྱར་ཀ་ཞིག་ལ།།
རྒྱ་གྲོང་འགྲིམ་པའི་སྐབས་སུ།།
མི་ཚོགས་མང་པོའི་དཀྱིལ་ནས།།
གངས་དཀར་ལྷ་མོ་ཐོན་བྱུང་།།

ཡངས་པའི་རྩ་ཐང་སྟེང་དུ།།
མེ་ཏོག་སྣ་བརྒྱ་བཞད་ཀྱང་།།
སེམས་ལ་དགའ་བའི་མེ་ཏོག། 
ད་བར་མ་མཇལ་ལུས་སོང་།།

བུ་མོ་བརྒྱ་འཛོམས་དབུས་ནས།།
སེམས་པའི་གཏིང་ན་གནས་པའི།།
རིགས་བཟང་གངས་རིའི་བུ་མོ།།
མཇལ་བ་ཙམ་གྱིས་དགའ་ཡོད།།

སྐད་ཆ་བཤད་འདོད་ཆེ་རུང་།།
ང་རང་ངོ་ཕོད་ཆུང་བས།།
ལྐོག་མིག་བལྟ་བཞིན་འདུག་སྐབས།།
ཁྱོད་ཀྱིས་འཛུམ་མདངས་རྒྱས་འདུག །

བློ་ཁོག་ཆེ་ཙམ་བྱས་ཏེ།།
མདུན་དུ་སོང་ནས་བལྟ་སྐབས།།
ཟུར་མིག་སེམས་ཀྱི་མདའ་མོ།།
སྙིང་གི་དཀྱིལ་དུ་ཕོག་བྱུང་།།


ལྔ་གཉིས་གཅིག་ཐིག་ཨང་གྲངས །།
ལབ་ཐེངས་གཅིག་གིས་ངེས་ཡོད།།
ཕན་ཚུན་འཕྲིན་ཐུང་བཏང་དུས།།
སྙིང་གཏམ་དམར་རྗེན་ཤོར་སོང་།།

ལོ་ཟླ་ག་ཚད་ཕྱིན་རུང་།།
ངེད་གཉིས་བར་གྱི་བརྩེ་དུང་།།
ཉིན་བཞིན་ཇེ་ཟབ་འགྲོ་བ།།
ལས་འཕྲོ་ཡོད་པའི་རྟགས་རེད། ་

སྔོན་བསཌ་ལས་ཀྱི་བསྐོས་པའི།།
བུ་མོ་གངས་དཀར་ལྷ་མོ།།
ལུས་སེམས་གཉིས་ཀའི་བདག་པོ།།
ང་རང་བྱུང་ན་དགའ་བ།།


མི་ཁའི་རླུང་ནག་འཚུབ་རུང་།།
ངེད་གཉིས་དམ་བཅའ་དེ་ནི།།
རྡོ་རྗེ་བྲག་ལྟར་སྲ་དགོས།།
གཡུང་དྲུང་བཞིན་དུ་བརྟན་ཤོག །

ཁྱིམ་གཞིས་གཅིག་ལ་འཛོམས་ནས།།
མངར་སྐྱུར་འདྲེས་མའི་འཚོ་བ།།
མཉམ་རོལ་བྱ་རྒྱུ་བྱུང་ན།།
ཁོ་བོའི་བསམ་དོན་འགྲུབ་སོང་།།

2013.7.29

གྲོགས་པོ་གླུ་བ་ཞིག་གི་རེ་སྐུལ་བཞིན་དུང་བརྗོད་སྐོར་འབྲི་ཁུལ་བྱས།