བོད་མོ་དབྱངས་ཆེན་ལགས།

                   ༼ བར་ཆ །  ༽

ལོ་ངོ་གཉིས་ཀྱི་གོང་། ། བརྩེ་བའི་གྲོགས་མོ་ལ། །

རྒྱང་རིང་ས་མཐའ་ནས། །  སེམས་ཚོར་བྲིས་ནས་ཡོད། །

ལྷད་མེད་བརྩེ་དུང་དེ། །  གཏིང་ཟབ་གྱུར་པ་ན།།

དུས་འགྱངས་རིང་ཡང་།།  ཉིན་བཞིན་ཇེ་དྲན་རེད།།

གཅིག་སེམས་གཅིག་མཐུན་ཏེ།།  དགའ་རོགས་འགྲིག་ཚུལ་སོགས།།

སྔར་ནས་བཤད་ཟིན་པས།།   སླར་ཡང་འདིར་མི་བཤད། །

ཚེ་སྔོན་ལས་ཀྱིས་བསྐོས།།  དགའ་བའི་གྲོགས་པོར་གྱུར།།

ད་ལྟའི་རྐྱེན་གྱིས་བྱས།།   མཉམ་འཛོམས་མིན་པས་སྐྱོ། །

དེ་རིང་ཉིན་མོ་འདིར།།  ཁྱུང་པོ་སྟེང་ཆེན་དུ། །

དབྱར་རྩ་དགུན་འབུ་ཡི།།  དུས་སྟོན་ཉིན་མོ་རེད། །

སྐྱེ་བོ་ཕལ་ཆེར་བ། །  དུས་སྟོན་རོལ་ལ་ཕྱིན། །

ལྷ་གཡག་དར་མ་ཡིས།།  དུངས་བརྗོད་བྲིས་ནས་བསྡད། །

ཅི་ཡང་ཆ་མ་མཆིས། །  ནམ་སྟོད་རྨི་ལམ་དུ། །

དགའ་བའི་གྲོགས་མོ་དེ།།  གློ་བུར་འཕྲད་ནས་འདུག །

ཅི་བཤད་འདི་བྱེད་མེད། །  ཅུང་ཟད་ཧོན་འཐོར་ལུས། །

བཀྲ་ཤིས་བདེ་ལེགས་ཀྱི། །  གཏམ་འགོ་ཐོག་མར་དྲངས། །

བུ་མོ་དབྱངས་ཅན་གྱི། །  འཛུམ་མདངས་ཤིགས་སེ་ཤིག །

དུང་སེམས་ཟུར་མིག་དེ། །  ཁོ་བོའི་ཕྱོགས་སུ་གཏད། །

མ་འཕྲད་ལོ་ཟླའི་རིང་། །  བྱ་སྤྱོད་འགྲོ་འདུག་ཀུན། །

མ་གསང་ལྷུག་པོར་ངང་། །  གླེང་མོལ་ཡུན་རིང་བྱས། །

མི་གཤིས་རྣམ་འགྱུར་དག །  སྔོན་མ་ཇི་བཞིན་དུ། །

འགྱུར་བ་གང་མེད་པས །   ཡིད་སེམས་རབ་ཏུ་སྤྲོ། །

ཕོ་མོ་རྒན་གཞོན་འགས། །  ཡངས་པའི་རྩ་ཐང་ཐོག །

དགའ་བའི་ཞབས་བྲོ་འཁྲབ། །  སྐྱིད་པའི་གླུ་དབྱངས་སྙན། །

ཁྱོད་ཀྱིས་ཞབས་བྲོ་འཁྲབ། །  ང་ཡིས་བརྩེ་གླུ་བླང་། །

ངེད་གཉིས་དགའ་སྐྱིད་ཡན། །  སུ་ལའང་མེད་སྣང་བྱུང་། །

བྱས་གཏེ་ཁ་པར་གྱིས། །   ཏིར་ཏིར་སྒྲ་ངན་དེས། །

སྐྱིད་པའི་རྨི་ལམ་དཀྲོགས།  དགའ་བའི་གྲོགས་མོ་ཡལ། །

མལ་ལས་ལང་མ་ཐག །   ཞོགས་ཟས་མ་ཟོས་གོང་། །

མདང་སུམ་རྨི་ལམ་དེ། །  ཡིག་ཐོག་ཕབ་འགོ་ཚུགས། །

                                    2013-8-15  ཞོགས་པར།