ཡིད་རེ་སྐྱོ།།
སློབ་གྲྭ་ཆེན་མོར་འགྲིམས་པའི་དེང་རབས་ཀྱི་གཞོན་ནུ་འགའ་ཡིས།།
ཕ་མས་རྔུལ་ཆུའི་བསགས་པའི་ཀུན་དགའ་དོན་གྲུབ་དེ་ཁྱེར་ནས།།
རིག་གནས་ཡོན་ཏན་མི་སློབ་ཆང་རག་ཐ་མག་ལ་བརྗེ་སྟེ།།
མི་ཚེ་སྟོང་ཟད་གཏོང་བའི་གངས་ཕྲུག་གཞོན་ནུ་དེར་སྐྱོ་ཨང་།།
ང་ཚོ་སྐྱིད་པའི་ཕ་ཡུལ་བསིལ་ལྡན་གངས་ཅན་གྱི་ཡུལ་འགར།།
རྒྱུ་ནོར་དབྱར་རྩ་དགུན་འབུའི་ཐོན་ཁུངས་ཕུན་སུམ་ནི་ཚོགས་ཡང་།།
ཡང་དག་རིག་པའི་གནས་ལ་བརྩོན་མཁན་ཉུང་ཐག་གི་ཆོད་པས།།
ཕས་བཞག་བུ་འཛིན་མེད་པའི་ན་ཆུང་རིག་གསར་རྣམས་སྐྱོ་ཨང་།།
དྲིན་ཆེན་ཕ་མ་ཟུང་གིས་རེ་བ་བུ་ཆུང་བཅོལ་ནས།།
མ་འོངས་མདུན་ལམ་བཟང་བའི་ཤེས་རིག་སློབ་གླིང་དུ་བཞག་ཀྱང་།།
འ་འུར་གཡེང་བ་ཆེ་བའི་མ་རབས་བུད་མེད་དང་འགྲོགས་ནས།།
ཕ་མའི་དྲིན་ལན་བརྗེད་པའི་ཁྲེལ་མེད་བུ་ཆུང་རྣམས་སྐྱོ་ཨང་།།
གངས་རིའི་ལྗོངས་ནས་སྐྱེས་པའི་རོང་འབྲོག་གཞོན་ནུ་ཡི་ཚོགས་རྣམས།།
སྒོ་ཕྱུགས་སུག་རྗེས་འབྲངས་ན་མ་འོངས་མདུན་ལམ་ཞིག་ཨི་ཡོད།།
མི་རིགས་གཞན་གྱི་ཚན་རྩལ་གོ་ལའི་ཡང་རྩེ་རུ་བསྐྱོད་དུས།།
ང་ཚོའི་ཤེས་རིག་ཚན་རྩལ་དབེན་པའི་ངང་ཚུལ་འདི་སྐྱོ་ཨང་།།
མེས་པོ་གོང་མ་རྣམས་ཀྱི་དཀའ་ངལ་ཁྱད་བསད་རང་བྱས་ནས།།
རང་རེའི་མི་རིགས་སྐྱོང་སླད་བཅུ་ཕྲག་རིག་གནས་དེ་མཛད་ཀྱང་།།
གསར་སྐྱེས་གཞོན་ནུ་འགའ་ཡི་ད་ལྟ་དགོས་མེད་དུ་སྣང་ནས།།
གཞན་རིག་གཙོ་བོར་འཛིན་མཁན་མདོ་མེད་བུ་ཕྲུག་དེར་སྐྱོ་ཨང་།།
