རྨོངས་པའི་འབྱོར་ཡིད་འཕྲོག་པའི་གཏེར་སྟོན་རྣམས། །
གསང་དོན་རྡོ་ལ་བརྐོ་བའི་གྲོགས་ཟེར་ནས། །
ཁྱིམ་ཐབས་བདག་གིར་བཟུང་ལ་ཐུགས་དགྱེས་ཀྱང་། །
ཟབ་གཏེར་མོ་ཕྱིར་མིན་པ་ཤེས་སམ་ཅི། །
རང་ཚོད་ཞེ་ལ་མེད་པའི་གྲུབ་ཐོབ་རྣམས། །
ཆོས་མཛད་གོང་མ་རྣམས་ལ་སྐྱོན་བརྗོད་ནས། །
རྡོ་བརྫིས་ལྕགས་བཀུག་སོགས་ལ་ཐུགས་དགྱེས་ཀྱང་། །
བྱང་སེམས་རྩ་བ་ཆད་པ་མཁྱེན་ནམ་ཅི། །
སྟོང་སྒོམ་མུན་མདའ་འཕེན་པའི་སྒོམ་ཆེན་རྣམས། །
མཐའ་བྲལ་སྨྲ་ཡང་བྲལ་གཞི་མ་ཤེས་ནས། །
སྲིད་རྩེའི་ལྟ་བར་ཞེན་ལ་ཐུགས་དགྱེས་ཀྱང་། །
དོན་མེད་ལོག་པར་གོལ་དེ་ཚོར་རམ་ཅི། །
དགྲ་གཉེན་གཞན་ནས་བསྒྲུབ་པའི་བྱ་བཏང་རྣམས། །
བྱར་མེད་གནས་ལ་བྱ་རྒྱུ་མང་དྲན་ནས། །
བྲེལ་གཟིང་ཚུབ་རྒྱ་ཆེ་ཐུགས་དགྱེས་ཀྱང་། །
རང་གཡེང་རོགས་བསླུ་བྱས་པ་གཟིགས་སམ་ཅི། །
རང་བདེ་འབའ་ཞིག་བསྒྲུབ་པའི་དྲང་སྲོང་རྣམས། །
འདོད་པའི་ལས་ལ་གཞན་ཡང་བསྐུལ་བྱས་ནས། །
ནོར་སོགས་གྲགས་འཐོབ་རེ་བར་ཐུགས་དགྱེས་ཀྱང་། །
རང་གནོད་དོགས་ཀྱིས་གཞན་འཁྲུགས་རིག་གམ་ཅི། །
དབེན་པར་ཚེ་འདི་གཉེར་བའི་རི་པ་རྣམས། །
ཉེ་བའི་ཡོན་བདག་གྲོང་ཁྱིམ་ཁ་འཛིན་དུ། །
ཕེབས་ཕེབས་འབྱོན་འབྱོན་ངང་ལ་ཐུགས་དགྱེས་ཀྱང་། །
གཡེང་བས་མི་ཚེ་ཟད་པ་དྲན་ནམ་ཅི། །
བློ་མང་བག་མི་ཕེབས་པའི་རྣལ་འབྱོར་རྣམས། །
འདི་ལྷག་གནད་དང་འདི་ཟབ་བོན་བསམ་ནས། །
རྒྱུག་རྒྱུག་ཚོལ་ཚོལ་ཞིག་ལ་ཐུགས་དགྱེས་ཀྱང་། །
འདུག་དུས་འགྲུབ་དུ་མེད་དེ་རྟོགས་སམ་ཅི། །
སྟོང་སྐད་ནམ་མཁའ་འདྲ་བའི་རྟོགས་ལྡན་རྣམས། །
སྒོམ་ལུགས་ཁྱི་རྒན་ལས་ཀྱང་སྡུག་བྱས་ནས། །
ཐོས་བསམ་གཤེ་སྐུར་འདེབས་ལ་ཐུགས་དགྱེས་ཀྱང་། །
གཏི་མུག་ནགས་ལ་འཁྱམས་པ་མ་རྟོགས་སམ། །
རྟོགས་འཛིན་བྲམ་ཟེ་ལས་ཆེ་འཁྲུལ་ཞིག་རྣམས། །
དགོང་དྲོ་ཙམ་གྱིས་དགྱེས་དང་འཚོམ་གྱུར་ནས། །
སྨྱོ་རྒྱུག་གཟའ་འགྲོས་སྤྱོད་ལ་ཐུགས་དགྱེས་ཀྱང་། །
གཙང་མའི་འཛིན་པ་རགས་པ་མ་རིག་གམ། །
ཐ་སྙད་སྤྲོས་མཐར་འབྱམས་པའི་མཁས་པ་རྣམས། །
ཚིག་འབྲུ་ཙམ་ལའང་རང་ཕྱོགས་བསྒྲུབ་བསྒྲུབས་ནས། །
སྒོམ་སྒྲུབ་ཟུར་ཟ་འདོགས་ལ་ཐུགས་དགྱེས་ཀྱང་། །
དོན་ལ་དྲན་པ་སྟོར་བ་མ་ཤེས་སམ། །
རང་དྲེགས་མཆོག་ཏུ་རློམ་པའི་དགེ་སྦྱོང་རྣམས། །
ཞེ་སྙེམ་དབང་གིས་གཞན་ལ་བརྙས་བརྙས་ནས། །
གཏོང་སྡུད་འཚུབ་ཉིལ་དག་ལ་ཐུགས་དགྱེས་ཀྱང་། །
བསླབ་པ་སེམས་ཀྱིས་བཀྲལ་དེ་མ་དགོངས་སམ། །
དང་པོ་ཚུལ་བཟང་རློམས་པའི་དགེ་སློང་རྣམས། །
ལེགས་སྨོན་དུག་གིས་བསྐྱེད་པའི་བློས་བསླུས་ནས། །
བསྲུང་སྡོམ་རིམ་ལྷོད་དེ་ལ་ཐུགས་དགྱེས་ཀྱང་། །
རྒས་ཁར་ཕལ་པ་བཞིན་གྱུར་མ་ཚོར་རམ། །
ཆོས་བརྒྱད་ཁེ་རྔམས་སྒྲོགས་པའི་དགོན་སྡེ་རྣམས། །
རྩོད་འཁྲུགས་གཞི་ཆེ་ཀུན་ལ་དགྲ་སྡང་ནས། །
ཁྲོ་སླ་འཐབ་མོ་འགྱེད་ལ་ཐུགས་དགྱེས་ཀྱང་། །
སྡིག་ཚོགས་ཕྱི་རུ་འཕེལ་བ་མ་མཁྱེན་ནམ། །
འབུལ་ལོངས་ཁྲལ་སྡུད་བླ་བྲང་ནང་ཟན་རྣམས། །
འབྱུང་སྒོ་མང་ཡང་ཡོད་སྒོ་ཉུང་བྱེད་ནས། །
མེད་མེད་ཆད་ཆད་སྨྲ་ལ་ཐུགས་དགྱེས་ཀྱང་། །
དམ་པའི་ལ་ཡོགས་འཁྲི་བ་མ་དྲན་ནམ། །
བླ་དགོན་དཀོར་གྱིས་སྦོས་པའི་གྲྭ་ཚང་རྣམས། །
སྒེར་ནོར་རོ་ཉེ་ལ་ཡང་འཕང་གྱུར་ནས། །
གཞུང་རྫས་གསེར་དངུལ་བཀོལ་ལ་ཐུགས་དགྱེ་ཀྱང་། །
གཞན་གྱིས་འཕྱའ་ཁྲེལ་སྨོད་པ་མ་གསན་ནམ། །
དགེ་ཕྱོགས་ལག་དམ་སྨྲ་མཁན་ཕྱག་མཛོད་རྣམས། །
མཐུན་འཇུག་རྣམས་གྲངས་དཀོར་ཐོགས་འགྱེད་མཁས་ནས། །
རང་དབང་ཕུག་ཉར་སོགས་ལ་ཐུགས་དགྱེས་ཀྱང་། །
སྟོང་སྡེའི་མི་ཁ་གླེངས་དེ་གཟིགས་སམ་ཅི། །
གཡོ་ཐབས་སྐོར་འགོ་རྒོད་པའི་གཉེར་པ་རྣམས། །
ཚོགས་ལ་མིན་ཡང་ཆེ་དང་རང་ཚིམས་ནས། །
ཁེངས་དཀའ་སྟོང་སླ་བྱེད་ལ་ཐུགས་དགྱེས་ཀྱང་། །
གྲྭ་མང་ཟུར་ནས་འཁང་དེ་གསན་ནམ་ཅི། །
དམན་པ་ལས་ཀྱང་འབེབས་པའི་དགེ་བསྐོས་རྣམས། །
ཅོས་ཚུལ་མཐུན་པའི་དགེ་ཁྲིམས་བཅའ་བཏང་ནས། །
རང་འདོད་ཁེ་གྲགས་སྙེམས་ལ་ཐུགས་དགྱེས་ཀྱང་། །
ཆེ་བཙན་ཀླད་ལ་ཤོར་དེ་མཐོང་ངམ་ཅི། །
ངར་སྐད་གྲགས་འདོད་ཆེ་བའི་དབུ་མཛད་རྣམས། །
རིམ་གཉིས་ཟུང་འབྲེལ་ཕྱག་ལེན་ཕར་བཞག་ནས། །
རྔ་དབྱུགས་དྲག་བརྡུང་ཞིག་ལ་ཐུགས་དགྱེས་ཀྱང་། །
སྙན་བྱིན་བརྗིད་ཚུགས་མེད་དེ་མཁྱེན་ནམ་ཅི། །
དཀོར་འབུལ་གང་ལེགས་འཁྱེར་བའི་གསོལ་དཔོན་རྣམས། །
དམ་པའི་གསུང་ཡང་ཕྱེད་ཉན་ཕྱེ་སྤངས་ནས། །
གསོལ་ཟས་ཞིམ་མངར་ཞིག་ལ་ཐུགས་དགྱེས་ཀྱང་། །
བག་ཆགས་ལྷག་པོས་ཉེས་དེ་ཚོར་རམ་ཅི། །
ཞལ་ཟས་མར་མེས་འཚོ་བའི་དཀོར་གཉེར་རྣམས། །
བདེར་གཤེགས་རྟེན་ལའང་ཇི་མི་སྙམ་པའི་ངོས། །
མཆོད་ཚོགས་ཉེར་མཁོ་བྱ་ལ་ཐུགས་དགྱེས་ཀྱང་། །
རྣམ་སྨིན་གང་ཅིས་གོས་དེ་ཤེས་སམ་ཅི། །
ཅིས་ཀྱང་ངེས་ཤེས་མེད་པའི་ཁོ་ཕྲེ
༼ བླ་མ་དང་དཔོན་གྱི་འཁོར་རྒྱུ་བརྔམ་ཅན་ནམ་ཞེ་གནག་ཅན་ལའོ།༽ རྣམས། །
རྫོགས་སངས་རྒྱས་ལའང་ཡི་རང་མེད་གྱུར་ནས། །
བླ་དགོན་དཀོར་ཐོག་སྤྱོད་ལ་ཐུགས་དགྱེས་ཀྱང་། །
འདི་ནས་ཕེབས་ཅིང་བྱེད་དེ་རིག་གམ་ཅི། །
དེས་ན་ད་ལྟའི་དགེ་ཚོགས་རྒྱ་ཆེ་ཡིས། །
སྦྱོར་དངོས་རྗེས་ཀྱི་བསླབ་པ་རྒྱས་ཐེབས་པའི། །
ཚར་གཅིག་སྐྱབས་འགྲོའི་བསོད་ནམས་རྗེས་མི་འགྲོ། །
མི་འགྲོ་རྗེས་ལ་འཇུག་པ་ཤིན་ཏུ་མང་། །
མདོར་ན་རང་གཞན་དོན་དུ་ཁས་འཆེ་བའི། །
དགེ་བྱེད་མཐོ་དམན་སྐྱེ་བོ་གྲངས་མང་ཡང་། །
མ་ཚོར་དྲན་པ་སྟོར་བའི་གཟུགས་བརྙན་ལས། །
བྱང་ཆུབ་སྙིང་པོའི་དོན་ཡོད་ཉུང་བར་གདའ། །
ཕལ་ཆེར་བླུན་པོས་སྡིག་པའི་ལས་བསགས་ཤིང་། །
ཆོས་སྒོར་ཞུགས་པའང་བརྙན་གྱུར་དུས་འདིར། །
མཚན་དང་དོན་མཚུངས་ཚུལ་ལྡན་དགེ་བསྒྲུབ་པའི། །
སྐྱེས་བུ་རྣམས་ལ་སུ་ཡང་ལྷག་པར་གུས། །
དེ་ལས་རྟག་འཛིན་བདུད་ཀྱིས་དམ་བཟུང་ནས། །
ངན་འགྲོའི་གཡང་ཁར་འཁྱེར་བའང་མི་ཚོར་རྣམས། །
དྲན་སད་རྒྱལ་བའི་བཀའ་ལུང་རྒྱ་མཚོ་དང་། །
དམ་པའི་གསུང་སྒྲོས་སྟོང་གིས་འབོད་པར་བྱེད། །
དེས་ཀྱང་མི་ཉན་བདུད་ཀྱི་ཕྱོགས་བཟུང་ཞིང་། །
བདེ་ལམ་མངོན་སུམ་མཐོ་ཡང་སྤངས་བྱེད་ཅིང་། །
སྡིག་པའི་མངོན་རྟོགས་ངོམས་པས་འདི་མཐོང་ན། །
བརྗོད་རིགས་མིན་ཞེས་སྨོད་འཕྱས་འགོག་ཏུ་བརྩོམ། །
དིང་དུས་ཆེར་སྙིགས་གྲགས་པས་བསྡུས་པའི་མིའི། །
འདོད་གཏམ་དྲང་སྲོང་བཀའ་བཞིན་ཀུན་ཉན་ཅིང་། །
ཆོས་མཐུན་དགེ་གཏམ་སྨོས་འཁྲུག་འགྱུར་ཡང་། །
ཀྱེ་མ་དུས་ཀྱི་གཤིས་ཏེ་ཅི་བྱར་ཡོད། །
བློ་གསར་ཁོང་དགེ་དད་དམ་ལྡན་པའ་མི། །
ངེས་ཤེས་ཁྲེལ་ཡོད་གོ་ཆས་ཕྱུག་པ་རེ། །
སྲིད་ན་དེ་ཡིས་གདམས་ངག་འདི་ལོངས་དང་། །
ཆོས་བརྒྱད་དམག་དཔུང་བཟློག་པ་ཡོང་ངམ་སྙམ། །
འདི་ནི་ཡི་རང་མེད་པའི་སྙིང་ཁམས་ཀྱིས། །
མཐོ་གནོན་ཟུར་ཟ་བརྗོད་པ་མ་ལགས་ཤིང་། །
རང་དང་རང་འདྲའི་གོལ་དྲེད་མི་རྣམས་ལ། །
བྱང་ཆུབ་དྲན་བསྐུལ་ཙམ་གྱི་བརྗེད་བྱང་ལགས། །
མ་དག་སྣང་བར་ཞེན་པའི་རྟོག་འཛིན་བློས། །
སྐྱོན་ཡོན་གཉིས་སུ་མཐོང་བའི་སྤང་ལེན་གྱིས། །
མཉམ་ཉིད་སྒྱུ་མའི་དོན་ལས་འགལ་འགྱུར་གང་། །
འཀོར་འདས་མཉམ་གཟིགས་མཁའ་གྲུབ་རྣམས་ལ་བཤགས། །
ཕན་གྱུར་སྲིད་ན་འདི་ལ་སྐྱོན་རྟོག་འདབ་སྟོང་རྒྱས་པར་བསྔོ། །
དོན་གཉིས་ལྷུན་གྲུབ་ཆོས་ཀྱི་རྒྱལ་པོར་ཤོག །
ཅེས་པའང་ཧོར་སྤྲང་འཇིགས་མེད་ནམ་མཁའི་རྡོ་རྗེས་ཞང་ཞུང་ཁྱུང་ལུང་དངུལ་མཁར་གྱི་རི་ལ་བྲིས་པའོ།
