༡
༄༅།།རིས་མེད་མཁས་པའི་ཞལ་གདམས།།
རྩོམ་པ་པོ ༧ ཤར་རྫ་བཀྲ་ཤིས་རྒྱལ་མཚན །
ཉེས་པ་ཀུན་གྱི་གཞི་མ་ལོངས་སྤྱོད་ནོར། །
ཇི་ཙམ་འབྱོར་ཡང་འདོད་པ་ཕྱི་ཕྱིར་མང་། །
དགོས་དགུ་ཚང་ཡང་ད་དུང་ཆོག་ཤེས་མེད།།
ལོངས་སྤྱོད་སྡིག་ནོར་མ་བསཌ་སྙིང་གཏམ་ཡིན། །
བོན་དང་ཆོས་ལ་རིས་མ་ཆོད་པར། །
གང་ཡང་ཡང་དག་དོན་དུ་གཅིག་པས་ན། །
གང་ན་ཞུགས་ཀྱང་སངས་རྒྱས་བསྟན་པ་ལ། །
ཐོས་ཆུང་བློ་ཡི་མ་ཕྱེ་སྙིང་གཏམ་ཡིན། །
མཐོ་ཡང་རང་ལ་མི་ཕན་ཀུན་ལ་འགྲས། །
མཁས་ཀྱང་རང་རྒྱུད་མི་ཁྲོལ་རྩོད་པ་འཕེལ། །
འབྱོར་ཡང་ནོར་གྱིས་མི་འཚོ་སྡུག་བསྔལ་རྒྱུ། །
ཅི་ཡང་དགོས་པ་མེད་ཀྱི་སྙིང་གཏམ་ཡིན། །
དང་པོ་དཀོར་ཟས་བག་རེས་ངོམས་པ་སླ། །
བར་དུ་རང་གི་དགེ་བློའི་རྩ་བ་ཆད། །
ཐ་མར་དཀོར་ཟན་བླ་མ་ངོམ་དུའང་མེད། །
ཟ་འདོད་གྲོང་དུ་མ་འཁྱམས་སྙིང་གཏམ་ཡིན། །
དང་པོ་ཆོས་པ་ཡིན་གྱི་དགོས་མེད་ཟེར། །
རང་དུ་གང་བྱུང་བླངས་ཤིང་མགུ་བར་དཀའ། །
ཐ་མ་ཟས་ནོར་རྒྱུད་ནས་འཐབ་རྫོད་སློང་། །
དེ་འདྲའི་མཚོན་རྟཌ་མ་བཏོན་སྙིང་གཏམ་ཡིན། །
ལོངས་སྤྱོད་འབྱོར་པ་མང་ཡང་ཤུལ་དུ་ལུས། །
ཁང་ཞིང་བཀོད་པ་ཆེ་་ཡང་གཞན་གྱིས་སྤྱོད། །
སྟོབས་དང་མངའ་ཐང་འཛོམས་ཀྱང་འཆི་བའི་དུས། །
གང་གིས་ཕན་པ་མེད་དོ་སྙིང་གི་བུ། །
དེང་སང་ཐུན་སྒོམ་ཙམ་ཡང་མ་ཐོབ་པས། །
བསྙེན་སྒྲུབ་ཅུང་ཟད་རེ་ལ་ཡིད་གཏད་ནས། །
འགྲོ་དོན་བྱ་ཆོག་སྙམ་པ་དེ་དག་ནི། །
བདུད་ཀྱི་བསླུས་པར་ཡིན་གསུངས་སྙིང་གི་བུ།
གྲོགས་ཁྱོད་སྙིང་ནས་བྱང་ཆུབ་བསྒྲུབ་སྙམ་ན། །
རང་རྒྱུད་རང་གིས་གདུལ་ཞིང་རང་མགོ་སྨོད། །
རང་ལ་རང་གིས་བལྟས་ན་རང་སྐྱོན་སྤོངས།།
རང་གིས་རང་བསྐུལ་མཛོད་ཅིག་སྙིང་གི་བུ། །
ཉོན་མོངས་གཞི་བསྐྱེད་བདག་འཛིན་དགྲ་ལྟར་འདུལ།།
དགེ་རྩ་འཇོམས་བྱེད་ཁོང་ཁྲོ་དུག་ལྟར་སྤོངས། །
ཡོན་ཏན་གཅོད་བྱེད་ང་རྒྱལ་རྩ་ལྟར་དོར། །
བསམ་སྦྱོར་དགེ་བ་གྱིས་ཤིག་སྙིང་གི་བུ། །
གོང་གི་ཚིག་བཅད་དག་ཀུན་མཁྱེན་ཤར་རྗ་པའི་ཞལ་གདམས་ལས་བཏུས། །
རྩོམ་པ་པོ ༧ ཀུན་བཟང་ནམ་མཁའི་སྙིང་པོ །
སྔོན་བྱོན་གྲུབ་ཐོབ་བླ་མ་གོང་མ་དག་རྣམས་ཀྱང་། །
འདི་དོན་རྒྱབ་བསྐྱུར་ཕྱི་མ་དང་ལེན་ཞིག་མ་གཏོཌ། །
འདི་ཕྱི་མཉམ་བཞེས་མཛད་པའི་བླ་མ་དང་གྲུབ་ཐོབ། །
ས་སྟེང་འདི་ན་མ་བྱུང་ལས་ལྡན་གྱི་གྲོགས་རྣམས། །
དང་པོ་བླ་མ་བསྟེན་ནས་དད་མོས་ཞིག་ཡོད་མདོག །
བར་དུ་བླ་མར་མི་རྩི་རང་རང་གི་ཅི་མོས། །།
ཐ་མར་བླ་མའི་གསུང་ལ་ཐན་ལྟར་དུ་མཐོང་བ། །
དེ་འདྲའི་སློབ་མ་མ་བྱེད་ལས་ལྡན་གྱི་གྲོགས་རྣམས། །
སྐུ་ལུས་མཛེས་མཛེས་བྱས་ཀྱང་རང་རྒྱུད་ནི་མ་ཐུལ། །
གསུང་སྐད་སྙན་སྙན་བྱས་ཀྱང་ཚིག་དོན་ནི་མ་ཁྲོལ། །
སྒོམ་པ་མཐོ་མཐོ་མཛད་ཀྱང་རང་ངོ་ནི་མི་མཐོང་། །
དེ་འདྲའི་བླ་གཟུགས་མི་དགོས་ལས་ལྡན་གྱི་གྲོགས་རྣམས། །
རང་ངོ་མ་འཕྲོད་རོ་ལ་ངོ་སྤྲོད་ཞིག་འདོན་མདོག །
རང་མགོ་མ་ཐོན་རོ་མགོ་འཕོ་བ་ཞིག་འཕེན་མདོག །
སེམས་བསྐྱེད་མེད་པ་འབུལ་བ་ཆེ་ཆུང་བསམ་པ། །
དེ་འདྲའི་འདེན་སྟོན་མ་བྱེད་ལས་ལྡན་གྱི་བུ་རྣམས། །
ཕ་མའི་དྲིན་ལན་རང་གིས་སོད་པ་ཞིག་བསམ་ན། །
ཡང་དག་དགེ་བ་མ་གཏོགས་གང་གིས་ཀྱང་མི་སོད། །
དེ་ཕྱིར་ཕ་མའི་གཙོར་བྱས་སེམས་ཅན་གྱི་དོན་དུ། །
དམིགས་ནས་དགེ་ལ་བརྩོན་དགོས་ལས་ལྡན་གྱི་གྲོགས་རྣམས། །
གཞན་ལ་སྐྱོན་དང་སྐུར་འདེབས་ཁྱད་གསོད་ནི་མ་བྱེད། །
དོན་མེད་སྡིག་ཚོགས་བསགས་པའི་དགོས་པ་ནི་ཅི་ཡོད། །
དེ་བས་རང་མིན་གཞན་བསྟོད་གོང་དུ་ནི་བཀུར་ན། །
རང་མགོ་རང་གིས་སྨད་དགོས་ལས་ལྡན་གྱི་གྲོགས་རྣམས། །
གལ་སྲིད་གཞན་སྐྱོན་མཐོངམཚེ་དེ་འདྲ་ཡི་སྐྱོན་དེ། །
རང་ལ་ཨེ་འདུག་ལྟ་ནས་ཡོད་པ་རེ་ཡིན་ན ། །
དེ་མ་ཐག་ཏུ་ངོས་ཟུང་རང་སྐྱོན་འདི་སྤང་དང་། །
གནད་ཀྱི་དམ་པ་ཡིན་ནོ་ལས་ལྡན་གྱི་བུ་རྣམས། །
གོང་གི་ཚིག་བཅད་དག་དབྲ་སྲས་ཀུན་བཟང་སྙིང་པོའི་ཞལ་གདམས་ལས་བཏུས། །
སློབ་དཔོན་པདྨ་འབྱུང་གནས།
སྔོན་ཚེ་བསྐལ་བཟང་སངས་རྒྱས་ཐམས་ཅད་དང། །
ད་ལྟའི་སྟོན་པའི་སྐུ་གསུང་ཐུགས་ཀྱི་བསྟན། །
ཇི་གསུང་ཐམས་ཅད་འགྲོ་དོན་ཡིན་པའི་ཕྱིར། །
བོན་དང་ཆོས་ཞེས་དབྱེ་བ་ག་ལ་ཡོད། །
སྙོམས་པར་མི་འཇོག་ཕྲག་དོག་རྩོད་པ། །
མཐའ་ཕུག་བོད་ཡུལ་ཕུང་བའི་གཞི་རུ་འགྲོ། །
དེ་ཕྱིར་བོན་ཆོས་མ་རྩོད་རང་སར་ཞོགས །
རྒྱལ་དབང་ལྔ་པ་ཆེན་པོས། །
སྐུ་ལྷ་གྱེར་འཛོམ་ལྷ་འུ་གཡང་དཀར་དང་། །
བོད་ཀྱི་མི་འུ་གདུང་དྲུག་ཟོ་དོར་ལྷ། །
ཐུགས་དཀར་སུམ་བརྒྱ་དྲུག་ཅུ་ལ་སོགས་པ། །
མདོར་ན་གཡང་དྲུང་བོན་གྱི་ལྷ་རྣམས་བསང་། །
འཇུ་མི་ཕམ་ཕྱོགས་ལས་རྣམ་རྒྱལ་གྱིས། །
གཤེན་ཡུལ་འོལ་མོ་གླིང་ཆེན་དུ། ། སྟོན་པ་གཤེན་རབ་མི་བོར་བསྟན། །
བོན་གྱི་ཐེག་པ་རམ་དགུ་གསུངས། ། སྐྱེ་འགྲོ་སེམས་ཅན་བེད་ལ་བཀོད། །
ཕྱྭ་གཤེན་ལ་སོགས་ཐེག་པ་དགུས། ། གདུལ་བྱའི་དོན་མཛད་ཐུགས་རྗེའི་གཏེར། །
སྟོན་པ་གཤེན་རབ་མི་བོ་ནི། ། བརྒྱུད་དང་བཅས་ལ་གུས་ཕྱག་འཚལ། །
སྡེ་སྲིད་སངས་རྒྱས་རྒྱ་མཚོས། །
ཞང་ཞུང་ཡུལ་ནས་བོན་འདུལ་བས། ། དགོངས་ཏེ་གཤེན་རབ་མི་བོར་སྤྲུལ། །
བོན་གྱི་མཛད་པ་བཅུ་གཉིས་བསྐྱངས། ། ཐེག་པ་རིམ་པ་དགུ་རུ་གསུངས། །
གསོན་པོ་རྣམས་ཀྱི་ལྷ་སྒོ་ཕྱེས། ། གཤིན་པོ་རྣམས་ཀྱི་དུར་སྒོ་བཅད། །
འགྲོ་རྣམས་གཡུང་དྲུང་ལམ་ལ་བཀོད། །
བོན་ལུགས་བཀའ་རྟེན་སུམ་བརྒྱ་ཉི་ཤུ་ལས།
ཐ་མའི་དུས་འདིར་སེམས་ཅན་ཕྲག་དོག་ཆེ།
བསྟན་པ་འཕེལ་འགྲིབ་དབང་གི་ཁ་མ་ཟིན།
སྒྲོ་སྐུར་འདེབས་མང་ངན་ལན་མི་བརྗོད་ཅིང་།
སྙིང་རྗེ་བཟོད་པ་བསྒོམ་བྱ་བྱང་ཆུབ་ལམ།།
