སྟོན་པ་གཤེན་རབ་ལ་ཞུས་པ།
ཐུན་མོང་ཐུན་མིན་ལུགས་སུ་ཕྱེས་མ་ཕྱེས།།
ཐུན་མིན་ཐུན་མོང་ལྟར་དུ་ཤོད་མི་ཤོད།།
བུ་ང་ལགས་ན་འཁྱེར་སོ་གཞན་ཞིག་ཡིན།།
གཤེན་རབ་མི་བོ་ཁྱེད་ལ་ཕྱག་བགྱི་འོ།།
བསྐལ་བ་དུ་མར་ཚོགས་གཉིས་བསགས་མ་བསགས།།
རྒྱལ་སྲིད་ལོངས་སྤྱོད་སྤངས་པ་བདེན་མི་བདེན།།
འཁོར་བའི་འགྲེང་མི་དག་ལ་ཁེད་ཅིག་ཡིན།།
ཡ་ཐོག་དྲང་སོང་ཁྱེད་ལ་སེམས་འདུད་དོ།།
སྒྲིབ་གཉིས་ཟད་ཅིང་བདུད་བཞི་བཅོམ་མ་བཅོམ།།
སྤངས་རྟོགས་མཐར་ཕྱིན་མངོན་སངས་རྒྱས་མ་རྒྱས།།
འཇིག་རྟེན་སོར་སྐྱེས་རྣམས་ལ་སྒྲུང་ཞིག་ཡིན།།
མཚན་ཉིད་སྨྲ་བ་ཁྱེད་ལ་ཡིད་རྟོན་ནོ།།
འགྲོ་ལ་བརྩེ་བའི་གཟིགས་པ་དགོངས་མ་དགོངས།།
གཟིགས་ཚད་རེ་རེ་བཞིན་དུ་དགོངས་མ་དགོངས།།
སྙིགས་མའི་ཁ་ཕོ་ཅན་ལ་གནའ་བཤད་ཡིན།།
སྲིད་པའི་གྱལ་མི་ཁྱེད་ལ་གུས་པས་འདུད།།
ཁྱེད་ལ་མཚན་དང་དཔེ་བྱད་ལྡན་མི་ལྡན།།
སྐུ་ཡི་འོད་ཟེར་ཕྱོགས་ཀུན་བཀྱེ་མ་བཀྱེ།།
ཕྱི་རྫིག་ནང་སྟོང་དག་ལ་ལྡེབ་རིས་ཙམ།།
བོད་ཀྱི་གསར་ཡག་ཁྱེད་ལ་ཞེ་ནས་བསྟོད།།
འགྲོ་བའི་ནད་གདོན་དུག་ལྔས་གཟིར་མ་གཟིར།།
ཉོན་མོངས་གཅོད་པའི་བོན་སྒོ་གསུངས་མ་གསུངས།།
བྱིང་རྨུག་ཅན་ལ་ལྐོག་གྱུར་ལྟད་མོ་ཡིན།།
གསོ་དཔྱད་རྒྱལ་པོ་ཁྱེད་རང་ཕ་རུ་འཛིན།།
ཁྱབ་པ་ལག་རིང་བདུད་དམག་དྲངས་མ་དྲངས།།
བཟོད་པའི་ལྕགས་ཀྱིས་ཕས་རྒོལ་མཛད་མ་མཛད།།
དངོས་གཙོ་སྨྲ་བ་དག་ལ་ལྐོག་གྱུར་ཡིན།།
བོད་ཀྱི་དཔའ་རྒོད་ཁྱེད་རང་མགོན་དུ་བཀུར།།
ཁྱབ་པ་ལག་རིང་གཏོ་སྒྲོམ་ཁྱེར་མ་ཁྱེར།།
དཔའ་བོ་འབྲུ་ལྔ་མེ་ཡིས་ཚིག་མ་ཚིག།
ལོ་རྒྱུས་ཉམས་ཞིབ་པ་ཚོར་གསང་བ་ཡིན།།
ངེས་དོན་གྲུབ་ཐོབ་ཁྱེད་རང་གཉེན་དུ་ལྟ།།
བཟོ་རིག་ལག་རྩལ་ཁྱེད་ཀྱིས་སྤེལ་མ་སྤེལ།།
ལྷ་ཁང་གསས་ཁང་ཁྱེད་ཀྱིས་བཞེངས་མ་བཞེངས།།
གནའ་རྫས་རྟོགས་དཔྱོད་པ་ཚོར་མུན་ནག་ཡིན།།
བོད་ཀྱི་མཛངས་མི་ཁྱེད་རང་ངོ་སོ་བསྟོད།།
ཁྱེད་རང་ཕྱོགས་དང་ཕྱོགས་སུ་ཕེབས་མ་ཕེབས།།
རིག་གནས་མང་པོ་གསར་དུ་བཏོད་མ་བཏོད།།
བོད་མི་ཕྱོགས་ལྷུང་ཅན་གྱི་གཞལ་བྱ་མིན།།
ཐམས་ཅད་མཁྱེན་པ་ཁྱེད་ལ་བདག་ཡི་རངས།།
བསྟན་པ་རྗེས་བཞག་མཛད་དེ་གཤེགས་མ་གཤེགས།།
དཔལ་མགོན་བྱེ་བ་སྲུང་མར་བསྐོས་མ་བསྐོས།།
ལྷ་མེད་སྨྲ་བ་རྣམས་ལ་ཡོད་པ་མིན།།
ཡི་དམ་ཀུན་འདུས་ཁྱེད་ལ་གསོལ་བ་འདེབས།།
ཁྱེད་ཀྱི་སྐུ་ལ་སྐྱེ་འཆི་མངའ་མི་མངའ།།
རྟག་དང་མི་རྟག་ཅེ་ན་འགྲིག་མི་འགྲིག།
བལྟས་བཅོས་སྨྲ་བ་རྣམས་ཀྱིས་དཔྱད་བཟོད་མིན།།
མཚུངས་མེད་མྱང་འདས་ཁྱེད་རང་སྐྱབས་སུ་འཛིན།།
