སང་ཕོད།

རང་གི་ཤེས་རིག་ཕྱི་མི་ཁག་ནས་བསླབ། །

དོན་གྱི་ཉམས་ལེན་ཚིག་གི་རུམ་དུ་ལུས། །

མེས་པོའི་ཤུལ་བཞག་བུ་ཚའི་ལག་ནས་བརླག ། 

འདི་བཞིན་འབྱུང་བ་རང་རེའི་བཞིན་ནས་འཕྱུར། །

   ཕམ་པ།

ཕྲུ་གུའི་ཕམ་ཁ་སློབ་བརྩོན་དོར་བ་དང་། ། 

མཁས་པའི་ཕམ་ཁ་གཞན་ཕན་བསྐྱུར་བ་དང་། །

 རྗེ་བོའི་ཕམ་ཁ་དམངས་དོན་མི་གཙོ་བ། །

འདི་གསུམ་དུས་རབས་གཅིག་གི་ཕམ་ཁ་ཡིན། །

      བློ་འགྱོད།

གཞོན་དུས་ཡོན་ཏན་བསླབ་ལ་མི་བརྩོན་ཅིང་། །

དར་སྐབས་གཞན་ཕན་བསྒྲུབ་རྒྱུར་མི་གཙོ་བ། །

རྒས་དུས་བུ་ཚའི་མདུན་ལམ་མི་བསམ་པར། །

འདི་གསུམ་མི་ཚེ་གཅིག་གི་འགྱོད་གདུང་ཡིན། །