༧  ཀ་རྨད་སུམ་ཅུ་ལས་དྲངས་པའི་མགུར།

 སྐྱང་སྤྲུལ་ནམ་མཁའ་རྒྱལ་མཚན།

 

དང་པོ་བདག་གིས་པི་ཝང་ལ་རྩོད་པ།

ཀ་ཀོ་རྒྱུད་ལ་རྟེན་པའི་པི་ཝང་ཁྱེད་། །ཁ་འཁོར་བ་རུ་འདྲེན་པའི་བསླུ་བ་པོ།།

ག་གང་ཤེད་ནས་འཁྱམས་ནས་འོང་བ་ཡིན།།ང་ངོ་མཚར་དུ་ཆེ་བའི་གླུ་སྒྲོག་ཨེ་ཤེས།།

པི་ཝང་གིས་ཚུར་ལ་རྩོད་པ།

ཅ་ཅི་ཟེར་ནི་མེད་པའི་བུ་ཚ་ཁྱོད། །ཆ་འཆི་བ་ནི་ཡིད་ལ་མི་དྲན་པར།།

ཇ་འཇིག་རྟེན་གྱི་སྣང་བ་འདིར་ཡེངས་ནས། །ཉ་ཉི་མ་དེ་ཨེ་འགྲོ་སྙིང་རེ་རྗེ།།

ཡང་ཕར་ལ།

ཏ་རྟོགས་ལྡན་གྱི་སྐྱེས་བུ་ང་འདྲ་ལ། །ཐ་ཐ་སྙད་ཀྱི་མཚང་འདྲུ་ཅི་བྱས་ཀྱང་།།

ད་དོན་དམ་ནི་ཁོང་དུ་ཆུད་ཟིན་ཡིན། །ན་ནམ་ཟླ་ནི་གར་འགྲོ་འགྲོ་རུ་ཆུག།

ཡང་ཚུར་ལ།

པ་པི་ཝང་ང་རིག་པའི་རྩལ་ལས་གྲུབ། །ཕ་ཕ་རོལ་གྱི་སེམས་ལ་ཅི་ཤར་སྨས།།

བ་བོན་ཉིད་ཀྱི་གནས་ལུགས་ཤེས་པས་ན།།མ་མི་ཁྱོད་དང་ང་གཉིས་རྩོད་པ་གཏོང་།།

ཡང་ཕར་ལ།

ཙ་རྩོད་པ་ནི་ལྷ་མིན་འཁྲུག་ར་ཡིན། །ཚ་མཚོན་པ་ཡི་ཚིག་ཕྱིར་ང་མ་འབྲེང་།།

ཛ་འཛིན་མེད་ཀྱི་སྣང་བ་རང་གྲོལ་འདི། །ཝ་ཝ་ལེར་རང་མ་བཅོས་ངང་ལ་འདུག།

ཡང་ཚུར་ལ།

ཞ་ཞེ་འདོད་དང་ཁ་ཏ་མ་ཡིན་པར། །ཟ་ཟེར་བཞིན་དུ་རྟོགས་ན་རབ་རེད་ཀྱང་།།

འ་འོ་སྐོལ་གྱི་ལས་སྤྱོད་འདི་འདྲ་ལ། །ཡ་ཡང་དག་དོན་ལ་ཐག་རིང་འདྲ།།

ཡང་ཕར་ལ།

ར་རང་བྱུང་གི་ཤེས་རིག་རྒྱལ་པོ་འདི། །ལ་ལྷུན་གྲུབ་ཀྱི་སྐུ་གསུམ་ངོ་བོ་ལ།།

ཤ་ཤེས་བྱ་ཡི་སྒྲིབ་པས་མ་བཀབ་ན། །ས་སངས་རྒྱས་ཀྱི་ས་ལ་རིང་རྒྱུ་མེད།།

ཧ་ཧ་ཅང་དང་ཐལ་འདྲའི་ལས་སྤྱོད་འདི།།ཨ་ཨི་བཞད་དུ་འདི་སྣང་ཉམས་ལ་རྟེན།།

༧ ཡང་པི་ཝང་གིས་མཚར་གླུ་སྒྲོག་པ་ནི།

ཀ་ཀ་དག་བོན་སྐུ་མ་གཡོས་ཀྱང་། །ཁ་འཁོར་བ་དྲང་ཕྱིར་ལོངས་སྤྱོད་རྫོགས།།

ག་གང་འདུལ་དེ་བཞིན་ཅི་ཡང་སྤྲུལ། །ང་ངོ་མཚར་སྐུ་གསུམ་གླུ་འདི་ཆེ།།

ཅ་ཅིར་ཡང་མེད་པའི་སེམས་ཉིད་ལ། །ཆ་ཆོ་འཕྲུལ་སྣ་ཚོགས་ཅི་ཤར་ཡང་།།

ཇ་འཇའ་ཚོན་ནམ་མཁའ་ཡལ་བ་བཞིན།།ཉ་ཉམས་སུ་ལེན་པའི་རྟོགས་ལྡན་རྣམས།།

ཏ་ལྟ་བ་ཐེག་ཆེན་གདར་ཤ་ཆོད། །ཐ་ཐོས་བསམ་སྒོམ་པ་མཐའ་རུ་ཕྱུངས།།

ད་དོན་དམ་བོན་ཉིད་ཁོག་ཏུ་ཚུད། །ན་ན་དགའ་འཆི་སྐྱིད་ཨི་འགྲུབ་ལྟོས།།

པ་པད་མ་ལྟ་བུའི་སེམས་ཉིད་འདི། །ཕ་འཕོ་འགྱུར་མེད་པའི་བོན་སྐུ་མཆོག།

བ་བག་ཆགས་བཟང་ངན་རྣམ་རྟོག་ཀུན། །མ་མ་སྤང་རྒྱན་དུ་ཨི་ཤར་ལྟོས།།

ཙ་རྩོལ་སྒྲུབ་བྲལ་བའི་རིག་པ་ལ། །ཚ་ཚོགས་དྲུག་སྣང་བ་རྣམ་པ་ཀུན།།

ཛ་འཛིན་མེད་ཆུ་ནང་ཟླ་གཟུགས་བཞིན། །ཝ་ཝ་ལེར་ཤར་གྲོལ་དུས་མཉམ་ཐོངས།།

ཞ་ཞེན་འཛིན་ཐག་པ་རྦད་ཀྱིས་ཆོད། །ཟ་གཟུང་འཛིན་མདུད་པ་མཐའ་ནས་ཁྲོལ།།

འ་འལ་འོལ་སབ་སོབ་མ་ཡིན་པར། །ཡ་ཡང་དག་དོན་ལ་རབ་ཏུ་བརྩོན།།

ར་རིམ་གཉིས་ཉམས་ལེན་མཐར་ཕྱིན་ན། །ལ་ལོག་པར་གོལ་བའི་འཕྲང་ལས་ཐར།།

ཤ་ཤེས་རབ་ཕ་རོལ་ཕྱིན་པ་ཡིན། །ས་ས་བཅུའི་ཁྲི་འཕང་ཡང་གོང་ན།།

ཧ་ཧུར་རེ་ཀུན་བཟང་རང་ཞལ་ལྟོས། །ཨ་ཨ་ཙིས་ཁ་ལྟའི་གླུ་རེ་མཚར།།

༧ ཡང་བདག་གི་རང་འདོད་ཀྱིས་མཚར་གླུ་སྒྲོགས་པ་ནི།

ཀ་དཀོན་མཆོག་བླ་མ་བཀའ་དྲིན་ཅན། །ཁ་ཁོག་པའི་སྙིང་གི་དཀྱིལ་དུ་བཞུགས།།

ག་གང་ཅན་བོད་ཀྱི་རྒྱལ་ཁམས་ན། །ང་ངེས་མེད་སྤྲང་ཕྲུག་འཁྱམ་པོ་ཡིན།།

ཅ་ཅལ་ཅོལ་སྨྲ་བ་མི་མང་རྒྱུ། །ཆ་ཆུང་ནས་མི་ཡུལ་ས་མཐར་འགྲིམས།།

ཇ་ཇོ་བོ་བླ་མ་སློབས་དཔོན་མདུན། །ཉ་ཉི་མ་ཐོས་བསམ་སྒོམ་པས་བཅད།།

ཏ་ལྟད་མོ་སྐྱེ་འཆི་གཉིས་ལ་ལྟས། །ཐ་མཐོང་རྒྱུ་དགེ་སྡིག་རྒྱུ་འབྲས་འདུག།

ད་དད་པ་བྱང་ཆུབ་སེམས་ལ་བཞག །ན་སྣང་ཚད་སྐུ་གསུམ་རོལ་བ་ཤར།།

པ་སྤང་བླང་མེད་པས་བློ་རེ་བདེ། །ཕ་ཕ་རོལ་མི་ཡིས་ཅི་ཟེར་ཀྱང་།།

བ་བོན་ཉིད་གཤིས་ཀྱི་གནས་ལུགས་ལ། །མ་མ་བཅོས་ངང་ལ་འདུག་ཤེས་ཙམ།།

ཙ་རྩ་བའི་བླ་མའི་བཀའ་དྲིན་ཡིན། །ཚ་མཚོན་བྱེད་དཔེ་ཆའི་མཚོ་གླིང་ནས།།

ཞ་ཞེན་ན་བརྩོན་འགྲུས་རྟ་ཕོ་མགྱོགས། །ཟ་ཟོས་ན་བསམ་གཏན་འཚོ་བས་རྒྱགས།།

འ་འོང་ན་འོང་གར་འཆི་བདག་བདུད། །ཡ་ཡ་ང་བག་ཚ་ང་ལ་མེད།།

ར་རང་ལ་རང་གིས་ལྟས་ཙ་ན། །ས་སངས་རྒྱས་སེམས་ཅན་གང་ཡང་སྣང་།།

ཧ་ཧེད་དེ་བཞག་ན་དགོངས་པའི་མཆོག །ཨ་ཨེ་མ་ངོ་མཚར་གླུ་འདི་ཆེ།།

ཞེས་པ་ཀ་མད་སྡེ་གསུམ་འདི་མུན་ཁྲིད་འོད་གསལ་དམ་པའི་ནང་ཉམས་འཕེལ་དགའ་གླུ་བླངས་བའོ།།