དར་བཤད།

                                    འོ་ལེགས་སོ།

ངའི་ལག་ལ་དར་ཅིག་ཡོད་ལེ་འདི། །སེར་མདོག་ས་དང་ལྗང་ཁུ་རླུང་།།

དམར་པོ་མེ་དང་སྔོན་པོ་ཆུ། །དཀར་པོ་ཤེལ་མདོག་ནམ་མཁའ་སོགས།།

རིན་ཆེན་འབྱུང་བ་ལྔ་ཡི་དར། །དང་པོ་ཚེ་ལོ་བརྒྱ་པའི་དུས།།

རྣམ་མཁྱེན་རྒྱལ་བ་གཤེན་རབ་ཀྱིས། །བོན་སྒོ་ཆབ་དཀར་ཆབ་ནག་གསུངས་།།

སྟག་གཟིགས་འོལ་མོ་ལུང་རིང་གི །གསས་ཁང་ཤམ་པོ་ལྷ་རྩེ་རུ།།

རྒྱལ་ཚབ་མུ་ཆོ་ལྡེམ་དྲུག་གིས། །སྒོ་བཞི་མཛོད་སོགས་ལྔར་ཕྱེས་ཏེ།།

ན་བཟའ་རྒྱན་གྱི་དང་པོ་སྟེ། །རིན་ཆེན་སྣ་ལྔའི་དར་འདི་གསོལ།།

དེ་འོག་འོད་གསལ་ལྷ་རིགས་ལས། །མི་རྗེ་གཉའ་ཁྲི་བཙན་པོ་ཞེས།།

དབུ་ནག་བོད་ཀྱི་སྤྱི་རྗེ་རུ། །ལྷ་རི་གྱང་མ་གྱང་ཐོར་འབྱུང་།།

བོན་ཁྲིམས་དར་གྱི་མདུད་པ་དམ། །རིག་འཛིན་གཤེན་རབ་བོན་པོ་ཡི།།

དར་འདིས་རྗེ་ལ་དབུ་འཕང་བསྟད། །དེ་རིང་བསྐལ་བ་བཟང་པོའི་ཉིན།།

ལྷ་གཞི་ཁྲ་མོའི་ཡངས་སྟེང་ན། །སྤོས་མར་མེ་འཇའ་ཚོན་དཀྲིགས་འདྲ་གདའ།།

ལྷ་སྲུང་མ་གདན་ལ་བཞུགས་འདྲ་གདའ། །ཡར་མཆོད་པ་བསང་དང་ཡོན་ཆབ་འབུལ།།

དར་འདི་ཡིས་ཁྱེད་ལ་དབུ་འཕང་བསྟོད། །ངའི་ལག་ལ་བཟུང་བའི་དར་འདི་ནི།།

མགོན་གཤེན་རབ་བོན་པོའི་བོན་དར་ཡིན།།གོང་དཔོན་པོ་བཟང་པོའི་ཁྲིམས་དར་ཡིན།།

ལྷ་སྲུང་མ་དགྱེས་པའི་ཕུགས་དར་ཡིན།།གནས་འདི་ན་ཕུགས་ལྷ་མ་ཉམས་བཀྲ་ཤིས་ཤོག།

ཅེས་དམངས་ཁྲོད་དར་བཤད་པ་འགས་བྲིས་ཤོག་ཅེས་པ་བཞིན་གཤེན་སྨྱུག་པས་སྡེབ་ཙམ་བྱས་སོ།