རྒྱལ་བའི་ཡུམ་དང་ངོ་བོ་དབྱེར་མེད་པ།།

བརྒྱད་ཟུང་ལང་ཚོའི་ཉམས་ལྡན་དབྱངས་ཅན་མ།།

བདག་མགྲིན་པད་མའི་མཛའ་བཤེས་བསྒྲིགས་པའི་མཐུས།།

སྙན་པའི་ངག་གི་དངོས་གྲུབ་སྩོལ་ཤིག་ཀྱེེ།།

ཤེས་བྱའི་དཀྱིལ་འཁོར་ཀུན་མཁྱེན་ཐུགས་མངའ་ཞིང་།།

རབ་མང་འཕྲིན་ལས་ཡོན་ཏན་ཆེས་འཛུམ་པའི།།

རྒྱལ་བའི་གསུང་ལྟར་ལེགས་བཤད་གཏེར་སྦྱིན་མཛད།།

མཚན་ལྡན་གོང་གི་སྐུ་མཆོག་རི་བཞིན་བརྗིད།།

ས་འཛིན་དཀར་པོའི་ཁྱོན་གྱི་ཡོངས་རྩེ་རུ།།

གསེར་འོད་འཁྱུད་པའི་རྒྱལ་མོ་རང་གི་སར།།

འགྲོ་བའི་མགོན་པོ་རྒྱལ་བ་གཉིས་པ་ཞེས།།

མཚན་དཔེའི་པད་དཀར་འདབ་སྟོང་ལྷོད་ཀྱིས་བཞད།།

གནས་ལྔའི་མེ་ཏོག་དཀྲིགས་པའི་དགའ་ཚལ་དུ།།

མཁྱེན་རྩེ་ཉི་འོད་ཟིག་མ་འབུམ་གྱིས་ཀྱང་།།

འགྲོ་བའི་དཔལ་དུ་ལྷ་ཡི་དངོས་གྲུབ་དག །

ཆུ་ཡི་གཏེར་བཞིན་འཇོ་བའི་སྦྱིན་བརྒྱ་བ།།

འཛམ་བུ་གླིང་ཞེས་ས་འཛིན་སྲིད་པའི་ཁྱོན།།

གཤེན་བསྟན་འཁོར་ལོ་གསུམ་གྱི་སྙན་པ་ཅན།།

མདོ་སྔགས་སེམས་གསུམ་དགའ་སྟོན་དགྱེས་མཛད་པ།།

མཆོག་ཉིད་སྙིགས་མའི་གདུངས་བ་སེལ་བའི་བཤེས།།

འཆད་པས་ལོག་རྟོག་འབུམ་གྱི་དྲ་བ་བསལ།།

རྩོད་སྒྲས་རྨོངས་པའི་མདུད་རྒྱ་ལྷོད་ཀྱིས་དཀྲོལ།།

རྩོམ་པ་ནོར་བུའི་མཛོད་ཆེན་བསྐྲུན་མཛད་པས།།

སྨྲ་བའི་སེང་གེའི་སྙན་པ་ཁྱེད་ལ་མཐོ།།

གང་སྐུ་མཚན་དཔེའི་བཀོད་པ་ལྷ་ཡིས་བྱས།།

ཁྱེད་གསུང་ལེགས་བཤད་སྒྱ་སྐར་འཕྲིང་བཞིན་སྐྲ།།

ཐུགས་ཉིད་ཤེས་བྱའི་དཀྱིལ་འཁོར་གསལ་བའི་དཔལ།།

རྒྱལ་ཀུན་དཔལ་ཡོན་གཅིག་ཟླུམ་མཉམ་མེད་པ།།

སྲིད་གསུམ་གོ་ལ་ཟླུམ་པོའི་རྩེ་མོ་རུ།།

སྣང་བྱེད་གྱེར་བསྟན་ཟླ་བ་དཀར་པོ་ཡང་།།

ས་འཛིན་ཕག་ཏུ་ཡིབ་པར་ཉེ་བའི་ཆར།།

ཉིད་ཀྱིས་ཟེར་ཕྲིང་ཕྱོགས་ཀུན་མཛེས་པར་བྱས།།

སྐལ་བཟང་རྣམ་འདྲེན་བརྒྱ་པའི་མགོན་པོ་ཡི།།

ཡོངས་ཟབ་རྨད་བྱུང་རིང་ལུགས་གཤེན་གྱི་བསྟན།།

མི་འགྱུར་ས་ཆེན་གོ་ལའི་རྩེ་མོ་རུ།།

རྒྱལ་ཁའི་དར་གྱི་དཔྱང་ཐག་འཐེན་པའི་དབང་།།

རྒྱལ་ཀུན་སྤྱི་གཟུགས་འདྲེན་པ་མཆོག་ཉིད་ཀྱི།།

བཀའ་དྲིན་དྲན་པའི་འཕར་རྩ་ལྡིང་བཞིན་དུ།།

སེམས་ཀྱིས་སྙན་ངག་བྲིས་པའི་ཤོག་སྟེང་དུ།།

བསྟོད་དབྱངས་ངག་གི་རོལ་མོ་ཅི་ཡང་འཁྲོལ།།

                                                   ༢༠༠༩ ༣ ༢༢    ཉིན་ཀོ་རྒྱལ་དགོན་ནས།