༧༼གསུམ་པ༽སྤྱིར་རིག་གནས་གསར་རྗེའི་གྱོང་གུད་ནི་ཁྱོན་ཡོངས་ལ་སོང་བ་ཞིག་ཡིན་པས་དགོན་འདི་ཡང་སྐབས་དེར་རྨིང་མེད་དུ་འཐོར་ཞིག་ཏུ་སོང་བ་རེད། དེར་བརྟེན་ཏང་གི་སྐབས་བཅུ་གཅིག་ཚོགས་འདུ་ཐེང་བདུན་པ་འཚོགས་ནས་སྔར་ལྟར་དགོན་པ་སྐྱར་བཞེངས་ཆོག་པའི་སྲིད་ཇུས་ལ་བརྟེན་ནས། དགོན་འདི་ཆབ་མདོ་ས་ཁུལ་གྱི་དགོན་པ་ཆེ་ཁག་སྟེ་ཆབ་མདོ་བྱམས་པ་གླིང་། རི་བོ་ཆེ་ལྷ་ཁང་ཁྲ་འཇལ་མ། ཁྱུང་པོ་སྟེང་ཆེན་གྱི་རྩེ་དྲུག་དགོན། མཛོ་སྒང་མདོ་དར་དགོན་སོགས་མཉམ་དུ་ཆོག་མཆན་ཐོབ་པ་ནས་རྩེ་དྲུག་བླ་མ་གར་དབང་རྣམ་རྒྱལ་གྲགས་པས་བཀའ་སློབ་ལམ་སྟོན་བརྒྱུད་སྤྱི་ལོ་༼༡༩༨༣༽དགོན་འདི་བསྐྱར་བཞེངས་གང་མཚམས་གནང་ཀྱང་། གཏན་ཁེལ་གྱི་བླ་མ་འདི་ཡིན་མེད་པའི་རྐྱེན་གྱིས་འཁྲུག་ཆ་དོད་པོ་ཞིག་འགྲོ་མ་ཐུབ་པ་མ་ཟད་རྙིང་མའི་བླ་མ་ཞིག་གིས་དགོན་འདིའི་སྲོལ་རྒྱུན་ཀྱི་མཛད་སྒོ་ཡང་གཞན་གྱི་ཆོ་ག་སྤེལ་བ་དང་ཡུལ་སྡེ་ནང་ལ་ཡང་རང་གི་ཕ་ཆོས་སྤྱོད་མི་ཤེས་པའི་གནས་ཚུལ་ཡང་ཆགས་པ་རེད།། དེར་བརྟེན་མདོ་དར་དགོན་གྱི་འགན་འཛིན་ཆེན་མོ་ཁ་ཞེ་གདིང་གསུམ་གཡུང་དྲུང་བོན་ལ་བཀལ་བ་རྟོགས་ལྡན་གཡུང་དྲུང་བཀྲ་ཤིས་ནས་སྤྱི་ལོ་༼༢༠༠༥ལོའི་ཚེས་༡༣༽ཉིན་རྩེ་དྲུག་མཆོག་སྤྲུལ་བསྟན་འཛིན་འོད་ཟེར་རིན་པོ་ཆེ་ལ་དགོན་དང་ཡུལ་སྡེའི་གནས་ཚུལ་སྙན་ཞུ་བྱས་པ་མ་ཟད་སྔར་སྲོལ་ལྟར་རྩེ་དྲུག་དགོན་གྱིས་ཐུགས་ཁུར་སྐྱབས་འཇུག་འོག་ཡུལ་འདིའི་དགོན་དང་ལྷ་སྡེ་རྣམས་གཟིགས་སྐྱོང་མ་གནང་ན་གཡུང་དྲུང་བོན་གྱི་བསྟན་པ་ནུབ་ལ་ཉེ་བ་ཡིན་ཞུས་པས། མཆོག་ནས་དགོན་པར་བླ་མ་གནང་རྒྱུ་དང་བསྟན་བཞེངས་སོགས་གང་ས་སྤྱི་ཐད་ནས་རོགས་སྐྱོར་རྒྱ་ཆེར་གནང་རྒྱུ་ཐུགས་ཐག་གཅད་པ་དང་སྟབས་གཅིག་ལོ་དེའི་ཟླ་བ་དྲུག་པའི་ནང་མདོ་དར་དགོན་ལ་དམ་པ་ཉིད་ཞབས་སོར་བཀོད་དེ། དགོན་གྱི་རྒྱ་ཁྱོན་དང་ས་ཆ་སོགས་གཏན་ཁེལ་གནང་ནས་མ་འོངས་པར་བླ་མ་ཤེས་རབ་བློ་གྲོས་ཡིན་པར་ངོ་སྤྲོད་གནང་བ་དང་འབྲེལ་དགོན་པ་འདི་ཉིད་ཐོག་མཐའ་བར་གསུམ་དུ་བོན་དགོན་ཡིན་པ་དང་། ལྷ་སྡེ་མང་ཚོགས་རྣམས་ལ་སྤྱིར་སེམས་བསྐྱེད་དང་སྐྱབས་འགྲོའི་གཞི་མ་གཏིང་ནས་དགེ་སྡིག་སྤང་བླང་ཇི་ལྟར་དགོས་ཚུལ་གྱི་བཀའ་སློབ་དང་། ལྷག་པར་དུ་གཡུང་དྲུང་གི་བོན་རིན་པོ་ཆེ་འདི་ནི་ང་ཚོའི་ཕ་ཆོས་ཡིན་པས་ནམ་ཡང་སེམས་ནས་འབོར་མི་གཉེན་ཞེས་བླ་མ་གྲྭ་པ་ལྷ་སྡེ་བཅས་ཚང་མ་རྒྱས་འཛོམས་ཐོགས་བཀའ་དབང་ཟབ་མོའི་དམ་ཚིག་དང་འབྲེལ་བའི་གནད་སྨིན་གྱི་བཀའ་སློབ་གནང་བར་བསྟེན། ལྷ་སྡེ་རྣམས་ནས་མཆོག་ཉིད་རྩ་བའི་བླ་མ་གཙུག་གི་ནོར་བུ་འཛིན་ནས་དམ་པ་ཉིད་ཀྱི་བཀའ་སྒྲུབ་ཐུབ་པའི་དད་སེམས་ལྡན་པ་ཞིག་ཏུ་གྱུར་ཡོད། དེ་བཞིན་དམ་པ་ཉིད་མདོ་དར་དགོན་ལ་ཕེབས་སྐབས་ལྷ་སྡེ་རྣམས་ནས་རླངས་འཁོར་ཆེ་ཆུང་བཅུ་ཡར་བརྒལ་བ་དང་། འཕྲུལ་རྟ་སུམ་བརྒྱ་དང་ཆིབ་རྟ་ལྔ་བཅུ་ལྷག་བཅས་ཀྱི་བསུ་བ་གྲྭ་རྒྱས་པོ་སྒྲིག་ནས་ལྷ་མི་ཀུན་གྱི་སྟོད་སྔགས་ཀྱི་ཡུལ་དུ་གྱུར།། དེར་བརྟེན་སྤྱི་ལོ་༼༢༠༠༦༽ལོ་བོད་ཟླ་དང་པོའི་ནང་ཤེས་རབ་བློ་གྲོས་མཆོག་རྩེ་དྲུག་མཁན་སློབ་རྣམ་པ་དབུས་པའི་སེམས་དཔའ་འདུས་སྡེ་རྒྱ་མཚོའི་དབུས་སློབ་ཐོན་གྱི་མཚན་རྟགས་བཞེངས་སྐབས་དེར་ཕྱི་སེམས་དཔའ་འདུས་སྡེ་རྒྱ་མཚོ་ལ་བརྙེན་བསྐུར་དང་། ནང་ཐོས་བསམ་སྒོམ་པའི་ཤེས་རབ་ཀྱི་མཆོད་སྤྲིན་གྱ་ནོམ་པར་ཕུལ་བའི་རྒྱུ་བསོད་ནམ་དང་འབྲས་བུ་ཡེ་ཤེས་ཀྱི་ཚོགས་རྫོགས་པར་གནང་ནས་རྩེ་དྲུག་དགོན་དུ་ཁྲི་བཞེངས་ཟབ་རྒྱས་གནང་། དེ་ནས་བོད་ཟླ་གཉིས་པའི་ཚེས་༼༢༽ཉིན་མདོ་དར་ལྷ་སྡེ་ཡོངས་ནས་རླངས་འཁོར་ཆེ་ཆུང་དང་འཕྲུལ་རྟ་ཆིབ་རྟ་བཅས་བརྒྱ་ཕྲག་ལས་བརྒལ་བས་བསུ་བ་དང་བཅས་མདོ་དར་ལ་ཞབས་སོར་འཁོད་ནས་དགོན་གྱི་ལྷ་སྡེ་རྣམས་ལ་བཀའ་སློབ་ལམ་སྟོན་གནང་།། ཡང་ལོ་དེའི་བོད་ཟླ་གཉིས་པའི་ཚེས་༼༡༣༽ལ་རྩེ་དྲུག་དཔོན་སློབ་ལུང་རྟོགས་བསྟན་པའི་རྒྱལ་མཚན་རིན་པོ་ཆེ་གདན་འདྲེན་ཞུས་ཏེ་སྐབས་དེར་རླངས་འཁོར་དང་འཕྲུལ་རྟ་ཆིབ་རྟ་སོགས་བརྒྱ་ཕྲག་གཉིས་ལྷག་ཙམ་གྱིས་བསུ་བ་དང་དགོན་གྱི་བླ་གྲྭ་རྣམས་ནས་སེར་འཕྲེང་སོགས་ཡིད་རང་བར་གནང་། དེར་སྔར་སྲོལ་ལྟར་གྱི་མ་ཏྲི་རིན་ཆེན་སྒྲོན་མའི་སྒྲུབ་བ་ཆེན་མོ་གྲྭ་རྒྱས་སུ་བཏང་ཏེ་གྲྭ་བཙུན་ཡོངས་དང་ལྷ་སྡེ་ལ་མ་ཏྲི་རིན་ཆེན་སྒྲོན་མའི་བཀའ་དབང་ཟབ་རྒྱས་བསྩལ་བ་དང་ཆབས་གཅིག་དགེ་བཤེས་ཤེས་རབ་བློ་གྲོས་མཆོག་དགོན་འདིའི་བླ་མ་ཡིན་པ་ངོ་སྤྲོད་བྱས་པ་མ་ཟད་སླད་ཕྱིན་བླ་མ་འདིའི་བཀའ་དབང་གནང་ཆོག་པའི་གནང་བ་དང་། དེ་བཞིན་དགོན་པ་བཞེངས་སྐབས་དགོན་པ་དང་བླ་མ་ལྷ་སྡེ་ཡོངས་ནས་ནུས་ཤུགས་གཅིག་སྒྲིལ་དགོས་ཚུལ་གྱི་བཀའ་སློབ་ཀྱང་བརྩལ།། དེ་ལྟར་རྩེ་བླ་བསྟན་འཛིན་འོད་ཟེར་རིན་པོ་ཆེ་དབུས་པའི་བླ་མ་རྣམས་ཀྱིས་སློབ་སྟོན་འོག མདོ་དར་དགོན་གྱི་བླ་མ་ཤེས་རབ་བློ་གྲོས་མཆོག་གིས་གཙོ་བོའི་འགན་བཞེས་ཐོག་དགོན་འདིའི་འགན་འཛིན་རྟོགས་ལྡན་གཡུང་དྲུང་བཀྲ་ཤིས་དང་ཚུན་ཁག་བརྒྱད་ཀྱི་འགོ་ཁྲིད་དང་གྲྭ་པ་རྣམས་ཀྱིས་སྣེ་ཁྲིད་དེ། ལྷ་སྡེ་ཡོངས་ཀྱི་ཐུགས་སེམས་གཅིག་སྒྲིལ་ལ་བརྟེན་ནས་༼༢༠༠༧༽ལོའི་ཟླ་བ་གཉིས་པ་ནས་འགོ་བཙུགས་ནས་བཞེངས་པའི་འདུ་ཁང་ཀ་བ་བཞི་བཅུ་ཞེ་གཉིས་ཅན་གཅིག་དང་། ཇ་ཁང་ཀ་བ་ཉི་ཤུ་རྩ་བཞི་ཅན། བླ་བྲང་ཀ་བ་ཉི་ཤུ་རྩ་བཞི་ཅན་དང་། གྲྭ་ཤག་བཅོ་ལྔ་ནང་བསྟན་བཀའ་འགྱུར་བརྟེན་འགྱུར་ཆ་ཚང་དང་སྤྱིར་འདོན་ཆ་དང་རྒྱུད་གཞུང་སོགས་གང་མང་ཡོད། རྒྱུ་གསེར་ཟངས་ལས་གྲུབ་པ་སྟོན་པ་ལོངས་སྤྱོད་རྫོགས་སྐུ་ཐོག་བརྩེགས་གཉིས་ལྡན་མ་གཉིས་དང་སྐུ་འདྲ་ཆུང་བ་གྲངས་མང་བཅས་ཡོད། འདུ་འཚོགས་སྐོར་འཆམ་རྒྱབ་རྒྱུ་ལས་གཞན་མ་ཕལ་ཆེར་སྔར་སྲོལ་ལྟར་བསྐྱར་གསོ་ཐོབ་ཡོད་ལ། སྒྲུབ་ཁང་ལྷ་མཆོད་སོགས་སྒྲུབ་གྲྭ་བདུན་ལྷག་ལ་ཁྲིད་དང་སྔོན་འགྲོ་བསགས་སྦྱོང་གནང་བ་མ་ཟད་གྲྭ་ཆུང་བཅུ་ཕྲག་ཡར་བརྒལ་ལ་བྲིས་ཀློག་འདོན་གསུམ་སྦྱོང་བ་སོགས་ལོ་བཞིའི་རིང་གིས་མཛད་འཕྲིན་མི་དམན་པ་བྱུང་ཡོད། ལྷག་པར་དུ་དགོན་པ་དང་ལྷ་སྡེ་རྣམས་ལ་རྙིང་མས་བན་སྡེ་བསླབ་གསོ་མང་པོ་གནང་སྟེ་ལྷ་སྡེ་ཕལ་ཆེ་བར་བན་དེ་འདོན་རྒྱུ་ལས་བོན་པོ་སྤྱོད་མི་ཤེས་པར་བྱུང་བ་རྣམས་བླ་མ་ཤེས་རབ་བློ་གྲོས་ཀྱིས་དཀའ་དགུ་ཁྱད་དུ་བསད། ཐབས་བརྒྱ་ཇུས་སྟོང་གིས་ད་ལྟར་སྔར་སྲོལ་ལྟར་བོན་པོའི་ཆོ་ག་སྤྱོད་ཐུབ་པ་ཆགས་ཡོད། དགོན་འདིར་ཚུན་ཁག་བརྒྱད་ལ་ལྷ་སྡེ་དུད་གྲངས་སུམ་བརྒྱ་ལ་ཉེ་བ་ཡོད་པ་ཡིན་དེང་ཆོས་ལུགས་གཞན་མས་ཀྱང་དགོན་འདིར་ཡིད་སྨོན་གནང་སའི་ཡུལ་དུ་གྱུར། མ་འོངས་པར་མི་མཐུད་ཁོང་གི་སེམས་ཤུགས་ཆེན་པོས་ཉམས་པ་ལྷར་གསོ་དང་མི་ཉམས་གོང་འཕེལ་གཏོང་རྒྱུ་ལ་བློ་སྟོབས་དང་ཆོད་སེམས་ལྡན་ཡོད་པ་བཅས་སོ།། །། ༧སྤྱིར་མཛོ་སྒང་རྫོང་འོག་ལ་བོན་པོ་རྒྱ་ཆེན་པོ་ཡོད། དེ་ཡང་རྫོང་འོག་ཤང་ཁག་བཅུ་གཅིག་ལས་བོན་པོ་ཡོད་སར་ཝ་མདར་ཀྲེང་གྲོང་རྡལ་《མདོ་དར་དགོན》སྟབས་འབར་ཤང་འོག《གུ་མདོག་དགོན་ས་ལ་བོན་དགོན》ཀྲུང་གླིང་ཁ་ཤང་འོག་《ལ་ངུ་དགོན། ཤུགས་རྫོང་དགོན། རབ་དགོན། རི་སྣེ་དགོན། མདངས་ཆ་དགོན》བྱ་གླིང་ཁ་ཤང་འོག《དབྱིབས་བྲག་པོ་རྫོང་། རྟ་འཚེར་དགོན། གཤེན་ལྷ་དགོན》བྲག་དབྱིབ་གྲོང་རྡལ་འོག་《ཁྲི་འདུ་ལྷ་སྡེ་བཅས》ལ་བོན་དགོན་བཅུ་གཅིག་དང་། བོན་གྱི་ལྷ་སྡེ་སྟོང་ཕྲག་ལྔ་ལ་ཉེ་ཡོད་འོན་ཀྱང་ས་ཆ་གཞན་དང་མི་འདྲ་བ་མཛོ་སྒང་ལ་བོན་བན་གྱི་འཐབ་རྩོད་ཆུང་ཆུང་ཡིན་པས་སྡེ་ཕལ་ཆེར་གྱིས་བོན་པོ་ལ་དབང་ལུང་ཞུ་བ་དང་དད་མོས་བྱེད་པ་ཡིན། དགོན་པ་འདི་ནི་བོད་ལྗོངས་ཆབ་མདོ་མཛོ་སྒང་རྫོང་ཝ་མདའ་གྲོང་རྡལ། རྫོང་གི་ལྷོ་ཤར་སྤྱི་ལེ་ཉི་ཤུ་མཚམས་སུ་གནས་ཡོད་རྒྱ་མཚོ་ངོས་ནས་ཧེ་བག་༼༣༦༠༠༽ཙམ་ཡོད་དེང་སྐབས་བླ་མ་ཁོང་གི་མཛད་འཕྲིན་ལ་ཀུན་གྱི་ཡིད་རངས་གནང་བ་དེ་བོན་པོ་སྤྱི་ལ་ཕན་ཐོག་ཆེ་བ་ཞིག་ཏུ་གྱུར་ཡོད། ཞེས་པ་འདི་ནི་དགོན་གྱི་བླ་མ་ཤེས་རབ་བློ་གྲོས་དང་འགན་བཞེས་གཡུང་དྲུང་བཀྲ་ཤིས་གཉིས་ཀྱི་གསུངས་བརྒྱུད་དང་བོན་གྱི་ལོ་རྒྱུས་ཀྱི་ཡིག་ཆ་བཅས་ལ་བརྟེན་རྩེ་སློབ་ལུང་རྟོགས་བསྟན་པའི་རྒྱལ་མཚན་དང་དགེ་བཤེས་ཤེས་རབ་རྣམས་རྒྱལ་གཉིས་ཀྱིས་ཀྲུང་དབྱང་ནང་བསྟན་སློབ་གླིང་ནང་མཐུན་སྦྱོར་བྱས་པ་དགེའོ།། །།
